Escucando estrelles

Los anglosaxones dicen Halloween (de All Hallow Eve), los hispanos Tolos Santos, en Gales ye Nos Galan Gaeaf, y pa los celtes yera la fiesta de Samhain.

Celébrase’l 31 d’ochobre, y marca la división ente’l branu y l’iviernu, abenayá yera cuando en munchos puertos baxaben el ganao y sacrificaben lo que nun se podía alimentar nel iviernu. Yera una nueche de fiesta, pero tamién yera la nueche na que la puerta ente’l mundu de la carne y el mundu del espíritu ta abierta. Nesta nueche yera siempre cuando andaben sueltos los pantasmes, los degorrios y les bruxes

Nesti día prendíense veles pa dar la bienvenida a los espíritus y reservábase un llugar na mesa pa ellos, mientes dalgunos vecinos armaben bromes y trastaes pela nueche.

Asina que, mientes Gwyn ap Nudd conduz un fatáu d’almes pa la so morada definitiva, deséovos una bona nueche.

Hai un minutu nel que s’escosa la siesta. Hasta la secreta, escondía, actividá nana de los inseutos acaba nesi mesmu instante; el cursu de la ñatura párase, la creación zarapica al borde del caos y les muyeres llevántense, esbabayando, cola flor de l’almuhada bordada na mexella, afogaes pola temperatura y la tirria; y piensen: “Tovía ye miércoles en Macondo”. Y entós tornen a acurrucase nel rincón, empalmen el sueñu cola realidá, y pónense d’alcuerdu pa texer el xuxuríu como si fuere una sabanona de filo fecha en comuña por toles muyeres del pueblu.

Gabriel García Márquez, La Hojarasca.

Na facultá, nos llonxanos tiempos nos qu’estudiaba, un profesor siempre nos contaba que’l capitalismu ye’l sistema económicu llamáu a perdurar pola so capacidá d’adaptación al mediu, porque ye capaz de corromper y xintar a tolos movimientos que surden a la so contra y convertilos namás nun nichu de mercáu (la cara del Ché anguaño ye namás un iconu pa vender camisetes y llaveros).

Ye lo que ta pasando anguaño colo verde, cola preocupación pol mediu ambiente. Los ecoloxistes pasaron de ser una bestia negra pal sistema a convertise en dalgo cool que ta de moda y que munches  empreses usen ensin vergoña apelando a la conciencia del consumidor pa engordar la so cuenta de resultaos.

Ayeri la Fundación Latores XXI entregó al direutor xeneral de Patrimoniu Cultural del Principáu, Jose Adolfo Rodriguez Asensio, el so premiu “Castru d’oru” pola defensa del desapaecíu Castru de Cellagú. Tres la entrega d’esti premiu seique hai dos coses. Por un llau la mala conciencia, porque nun escaezamos qu’esa ye una organización empresarial, y que munchos de los sos miembros nun puen sacar pechu na tema de la defensa del patrimoniu precisamente. Y por otru l’interés propiu: como nun podía ser menos nesti país, la petición d’un aula pa la Fundación nel enésimu centru d’interpretación que van llevantar, nesti casu dedicáu a la cultura castreña.

Hai topónimos que van quedar pa siempre na memoria con un significáu especial. Nomar al Castru de Cellagú ye lo mesmo qu’alcordanos d’una de les mayores vergoñes que pasaron nos últimos tiempos nesti país bananeru.

El castru de Cellagú yera ún de los castros prerromanos más importantes qu’había n’Asturies, exemplu únicu na zona d’Uviéu y con delles particularidaes propies. Sábese que tuvo habitáu más de 700 años, hasta’l sieglu II d.C. Escavóse parcialmente, sacando bayura de restos importantes: sobre too munchos bronces, restos  en güesu y cerámiques.

Tuvo la mala suerte de qu’al llau había una cantera xestionada pola empresa Readymix Asland, y como nun acababen de da-yos la llicencia pa trabayar na zona del castru, una nueche fai cuasi diez años apaeció estrozáu, dalgo perfácil porque nun tenía vixilancia. Nin siquiera con eses lu nomaron Bien d’Interés Cultural, quedó ermu. Nun s’atopó a nengún de los responsables del atropellu. Equí paz y dempués gloria.

A la fin, salváronse delles coses que taben guardaes y pudo rescatase dalgo más: hasta  1278 sillares siguen nun almacén (ente ellos la puerta monumental del castru, el torrexón, el cuerpu de guardia, una cabaña y un cachu de la muralla) y 8.000 pieces de cerámica y metal. Ta previsto que, colos restos, se llevante una pequeña réplica, col so centru d’interpretación, pal añu qu’entra.

Dalgún día, dientro munchos años, va estudiase la esquizofrénica xestión de los bienes culturales ya históricos nesti requexu del mundu, con especial procuru nos inútiles centros d’interpretación a los que tantu enfotu tienen los nuestros gobernantes.

Hai dalgo nesti discu que fai que nun m’acabe de sonar bien del too, anque seique seya que según voi cumpliendo años l’oyíu musical va aformigándoseme.

De mano, el guapu nome del nuevu proyectu musical de Xune y les palabres coles que nos lu vendieron, fízome tener esperances y que naguare por mercalu. Y la verdá ye que, anque’l resultáu ye guapu y dignu enforma, ún esperaba dalgo más novedoso y seique seya eso lo que me fai quedame con un tastu amargosu tres escuchalu toos estos díes.

Nel camín vamos atopar lletres con mensaxe mui trabayaes y munchu pesu de soníos xamaicanos (ska, dub o reggae) y tempos medios, qu’intenten enmazcarase d’innovadores con unes pingarates de jazz, electrónica y hip-hop. A la fin, dannos un batulax con Manu Chao, The Clash, Dixebra y Fermín Muruguza al fondu. Si pa encima la voz de Xune, amortizada abondo en Dixebra, nun garra nengún matiz nuevu (sacantes Tienes un fusil, que furrula perbién) y les demás voces que lu arropen canten igual que nos sos grupos, tenemos la sensación de ser más de lo mesmo.

Un productu mui dignu y prestosu, ya digo, anque yo esperare otra cosa. ¿Qué vos paeció a vosotros?

Reconozo que me presten a esgaya les distintes teoríes de la conspiración.

Según una teoría espardía per ehí, tol tingláu Musel-Regasificadora-Centralesdeciclucombináu-Caliao-LadaVelilla ye un castiellu fechu de cartes. Si quites una, tolo demás esfarrápase, y entós nun vas tener nada. Si nun hai regasificadora nun fai falta tantu puertu y nun pue haber tantes centrales. Si nun hai centrales nun fai falta’l Banzáu de Caliao nin tampoco estrozar el paisax cola llinia Lada-Velilla.

Ye una guerra de guerrilles, na que ciudadanos sueltos, más o menos concienciaos, lluchen contra ún de los proyectos, el que más los afeuta, mientres que l’Alministración bombardea cola prensa y trai a dellos conferenciantes p’amosar les bondaes de los sos planes, ente ellos los mamporreros del Institutu El Cano, y tamién ye capaz de da-y un premiu Príncipe a Al Gore pa que nos venga a contar pola patiella que’l carbón caca y que’l gas mola.

Asina, la mesma Asturies qu’echa 34 tonelaes de Co2 por habitante y añu, triplicando la media europea, y qu’allegremente fai planes pa duplicar la so capacidá de producir mierda atmosférico, quier llimpiar la so cara convertiéndose n’abanderada del respetu pol mediu ambiente, festival de cine incluyíu.

Márketing d’empresa a lo xo, según la complicada dixestión de teoríes americanes por ún de les Cuenques.

A cambiu de la so habilidá, fuerza maxinativa y emotiva, l’artista busca la recompensa material. La satisfaición de la so ambición y cobicia conviértese en meta. En llugar d’un trabayu fondu y solidariu de los artistes, surde la llucha por estos bienes. Toos se quexen de la escesiva competencia y la escesiva producción. Odiu, partidismu, grupinos, celos, intrigues, son la consecuencia d’esti arte materialista ensin sentíu nengún.

Estes pallabres, tan modernes que podíamos diciles agora mesmo, son de 1910, escribióles Wassily Kandinsky nel so llibru Über das Geistige in der Kunst (De lo espiritual nel arte). Hai una torna al castellán de la editorial Paidós.

Nestos díes de barullu informativu, con bayura de fartones en coches tintaos, apetezme contar que’l gran protagonista d’Asturies estos díes ye un árbol: el texu d’Abamia.

El texu d’Abamia ye varies veces centenariu y ta, ente otros más mozos, al llau de la ilesia de Santolaya d’Abamia, onde anden faciendo unes obres non mui afortunaes.

Los vecinos y dalguna asociación denunciaron que-y cortaren la mayor parte de les raíces d’un llau pa facer una zanxa, y como pa la otra parte ta una carretera, ye mui probable que l’árbol quedare firíu de muerte.

La Conseyería diz que d’eso nada, que ya ta too tapao y nun se ve.

Un árbol asina tarda años en morrer. Un arquitectu como Javier Arbesú pue facer que les coses vayan muncho más ceo, y si pa encima los que-y teníen que tirar de les oreyes lu tapen, pa qué quies más.

Por contar dalgo un poco más prestoso, en Llaciana hai delles viesques con bidules centenarios, y van pasar a formar parte d’un proyectu pilotu que pretende facer que los propietarios caltengan les viesques y a cambio puedan desgravar na declaración de la renta, dalgo que yá se fai sitios como Canadá.

http://www.abamia.net/

http://www.uam.es/otros/consveg/documentos/tejo_asturias.htm

Pues resulta que sácase a concursu una obra de la de mio madre, y danla a la empresa X, y la empresa X pue facer lo que-y dea pola gana pa disparar el presupuestu, ensin que naide la controle. Y dempués pon el cazu y diz que necesita más perres porque sinón queda too empantanao.

La llei diz qu’en casu d’ampliación presupuestaria hai que sacalo a concursu otra vez, pero en dalgunes partes del mundu la llei ye dalgo mui enguedeyao.

Ensin afondar nes causes, anuncióse un sobrecoste pequeñu nes obres del puertu d’El Musel. Que si les oles del mar, que si les piedres de la cantera, que si los camiones, que si un cambiu d’última hora, que si’l nordés, que si la clasificación del Sporting… En fin, que necesitamos dalgo asina como 230 millonucos d’euros más (de momentu) pa poder acabar lo que ta entamao. O seya, contratamos en 580 y agora vamos pasar de llargo de los 800.

Y lo peor ye que nos lo quieran vender como dalgo normal, facenos pasar por tontos.

Pues non señor, nesti tema dalguién metió la pata o la mano hasta’l fondu.

En fin…

http://www.lne.es/secciones/noticia.jsp?pRef=1800_35_570277__Gijon-Puerto-modificara-proyecto-obra-ampliacion-este-para-incluir-sobrecoste

http://www.elcomerciodigital.com/gijon/prensa/20071024/gijon/musel-reconoce-sobrecoste-ampliacion-20071024.html

http://www.lavozdeasturias.es/noticias/noticia.asp?pkid=373706

Como él mesmu dicía, yera “matapallabres”: trabayaba na actualización de los diccionarios Larousse. Pero, mientres otros redactores dedicábense a la busca de voces y significaciones nueves, él, pa dexa-yos sitiu, tenía qu’eliminar toles pallabres y acepciones que cayeren en desusu.

Cuando se xubiló, en mil novecientos sesenta y cinco, dempués de cincuenta y tres años d’un llabor escrupulosu, ficiera desapaecer cientos y miles de ferramientes, técniques, costumes, creencies, dichos, manxares, xuegos, nomatos, pesos y midíes; borrara del mapa decenes d’islles, centenares de poblaciones y ríos, millares de cabeces de partíu; condenara al so anonimatu taxonómicu centenares de tipos de vaca, especies de páxaros, inseutos y culiebres, peces un poco especiales, variedaes de moluscos, de plantes non del too idéntiques, tipos particulares de frutes y verdures; esvaneciera na nueche de los tiempos a cohortes de xeógrafos, misioneros, entomólogos, Padres de la Iglesia, lliteratos, xenerales, Dioses & Degorrios.

Georges Perec, La vie mode d’emploi

Siempre se dixo qu'ástures vien del ríu Ástura, pero Mariano Tobes Arrabal sacó a la lluz fai poco una cita d’Alberto Magno que-y sirve de palanca pa intentar atopar un significáu distintu.

Nun escritu del sieglu XIII d’Alberto Magno (De animalibus) atopó esto: “narraverum autem nobis fideles aucupes in superiori parte Germaniae quae Suevia superior nuncupatur, quod cum longe ingrederetur in profundum silvae ad capiendas accípitres, qui astures vocantur”, o seya, que nuna rexón de Germania, na parte superior de Suevia, unos cazadores d’aves rapaces descubrieron no más fondero de la viesca unos páxaros conocíos como astures.

L’autor apuesta pola triada astur-ustur-astor, qu’andando’l tiempu diba dar el castellán azor (ferre).

Queda dicho, por si acasu.

Talmente paez que los políticos de porespan (poliestireno espandíu) que tenemos nesti requexu del mundu creense perriba del bien y del mal. Deben pensar que como salieron elixíos, tienen cuatro años per delantre pa facer lo que-yos pete ensin que naide-yos diga nada. Toi falando de toos, de los d’un llau y de los del otru (enantes de que me salga dalgún troll a protestar).

Polo menos, n’Asturies esti añu tenemos exemplos abondos de ciudadanos metíos na cárcel por manifestase (Cándido y Morala), desaloxaos a hosties de plenos y dempués llevaos a xuiciu (Domingo Goñi) por llevar una camiseta, o sindicalistes llevaos a xuiciu (Beatriz Quirós) o despidíos de la so empresa (Marco Antuña, Jose Manuel Carbajo…) por facer el so llabor.

Esto tamién afectó a otros políticos, como sabe perbién Isabel Pérez Espinosa, portavoz del PP n’Uvieu, a la que’l Presidente Vicente llevó a xuiciu (pidía 60.000 euros d’indemnización) por dicir que lo de Niemeyer ye “un pelotazu”, dalgo no que’l xuez nun apreció delitu.

Ye la táctica del mieu, d’aplastar al que se mueva pa protestar en contra del Réxime, una táctica bien aprendía de tiempos pasaos. Lo escandaloso, pa min, ye l'usu de tolos medios posibles: policiales, xurídicos, políticos, periodísticos y económicos que puen mover pa valise de los sos fines.

Ye dalgo obsceno, paezme, qu’un políticu lleve a xuiciu a un ciudadanu cualquiera con perres públiques impunemente.

Esta selmana supimos que l’alcalde de Llaviana pidió  que s’impusiere silenciu a dos vecinos que, rabiaos porque nun podíen protestar contra un plan urbanísticu que-yos va quitar un prau, colgaron un cartelu protestando.

http://www.elcomerciodigital.com/gijon/20071017/cuencas/alcalde-laviana-pide-juez-20071017.html

Aleguen que quieren caltener la bona imaxe del Ayuntamientu (¿nun será la d’ellos?) onde gobierna’l PSOE con IU-BA, y pa facelo saquen del armariu xurídicu una demanda de xactancia: agora los vecinos tan obligaos a denunciar al ayuntamientu o a quitar la pancarta y a nun tener derechu a protestar públicamente de nenguna manera nel futuru.

Asina, nun conceyu pequeñu acaben de concentrase toles miraes. Porque si ganen, acabose cualquier tipu de protesta, porque si lo faes, el pesu de l’Alministración (coles perres de toos) va dir por ti.

Hai una broma lliteraria, na qu’intervienen dos ilustres filósofos griegos del sieglu IV a.C., que me presta muncho.

Dionisio yera un filósofu que nun tenía mui bona fama. Entamara siendo un estoicu convencíu, de los que negaben qu’esistieren el dolor y el placer, pero en cuantes tuvo una inflamación ocular perdolorosa dióse cuenta de que, seique, los sos principios filosóficos nun teníen munchu fundamentu. Asina qu’abandonó la escuela estoica (polo que’l restu de la so vida cargó col nomatu de “El renegáu”) y pasó'l restu de la so llarga vida como un bon cirenaicu, ente chigres y puticlubs.

La so némesis filosófica foi Heráclides Póntico, un filósofu famosu por ser el primeru que dixo que la Tierra xira sobre’l so exe. Al paecer, esti Heráclides yera presumíu, y por eso lu conocíen col nomatu de “El maxestuosu” (ho pompikós) una deformación de “el del Ponto” (ho Pontikós).

Daquella acababa d’apaecer una traxedia, el Parthenopaeus, qu’atribuyíen a Sófocles. Heráclides, nun escritu, citóla como de Sófocles dafechu, y entós Dionisio dixo que la escribiera él imitando l’estilu del maestru, dalgo que fizo muncha gracia a Heráclides, que dixo que nun taba capacitáu pa escribir asina.

Dionisio entós dixo que la obra tenía un acrósticu: les primeres lletres de los versos incluyíen el nome del so mozu, Pánkalos. Y que si se siguía lleendo, diba ver esto:

Un monu vieyu nun diba cayer na trampa.Claro que va cayer; ye cuestión de tiempu.

Y asina siguía tola obra. La fin yera espectacular: “Heráclides nun sabe de lletres”.

La obra, por desgracia, perdióse, tamién cuasi toles obres d’estos dos filósofos. Anguaño sabemos de l'anécdota por Diógenes Laercio, que la dexó escrita na so Vitae Philosophorum.

Préstame pensar en dalguién echando hores n’escribir un pastiche de Sófocles tan bonu qu’engañare a un espertu namás que por facer una broma, y tamién la idea d’esconder una obra orixinal dientro d’otra, como una matriuska.

La Universidá Llaboral de Xixón yera un edificiu singular. Arquitectónicamente falando nun había nengún edificiu munchos kilómetros al rodiu que-y llegare a la suela los zapatos.

A pesar d’eso nun taba protexíu por nada. Nin yera Bien d’Interés Cultural, nin tenía protección nel PXOU, nin nada asemeyao.

Asina que cuando ponen en manes de dellos burócrates una montonera perres ensin control nengún pasen coses que ponen los pelos como escarpies al más templáu.

Pa entamar, pa dalguién d’a pie pue choca-y que les obres de remocique del teatru se disparen un 65 % por “causas imprevistas, necesidades nuevas y errores e imprevisiones en el proyecto inicial”. Digo yo, que soi dalgo gamberru, que por muncho menos qu’eso nuna empresa privada pónente de patines na cai, pero bueno, tamién sabemos que colocaron ehí a dalgún arquitectu condenáu por andar faciendo coses que nun debía, asina que nun estraña tanto.

Les obres nun teníen control de los técnicos del Principáu, porque taben en manes de Serpa, la Sociedá de Servicios del Principáu que xestiona Francisco Villaverde. Y la empresa que se fizo col contratu pillolu al dicir que lo diba facer un 15 % más baratu de lo que lo teníen presupuestao... si dempués lo fai un 65 % más caro ¿Naide se fai cargu por ello? ¿Equí nunca pasa nada?

Lo malo ye que yá nos vamos avezando y dalgo asina malapenes ye noticia.

Anque aquello, al nun tener protección nenguna, seya una especie de ciudá ensin llei, la caxa que ficieron pal teatru ye una de les mayores barbaridaes que se vieron en munchu tiempu.

Pongo equí una muestra de lo que se ve pela parte d’atrás (yá colgaré una semeya meyor) y dende la carretera… Si gastando un 65 % más ficieron esta chapuza ¿qué coyones teníen pensao facer?

Pa los  que nun lu conocíen, dici-vos que’l Teatru de la Universidá Llaboral tenía un mural del pintor Enrique Segura Iglesias que se llamaba “Alegoría de las artes y oficios”, onde taben representaos dalgunes personalidaes de la época. Seique fuere, xunto cola gran acústica, lo meyor que tenía’l teatru.

Pues los figures que diseñaron la obra tapáronlu con una concha de madera, seique pa caltener la memoria histórica de dalgún, y yá nun se va ver nunca más.

Y asina, el mesmu Gobiernín que nunca fizo un res pol teatru asturianu, va inagurar güei'l Teatru de la Ciudá de la Cultura y les Artes, con un ministru presente y con pinchos pa tolos asistentes y fuegos artificiales. La caraba, vamos.

Yá lo dicía mio güelu: lo peor que-y pues dar a un tontu son perres pa que les gaste.

Tamién dicía que lo que mal entama mal acaba.

Hai coses qu’ún piensa namás puen pasar nun país como esti.

Cuenten que nun Edificiu Alministrativu de la ciudá de Vetusta, onde tan asitiaes les conseyeríes del Gobiernín, acabóse esti añu’l presupuestu pa consumibles.

Asina que si dalguién pasa parte de que s’acabó’l tóner de la impresora y avisen al serviciu técnicu, al nun haber perres pa cambiar el tóner, cambien la impresora por una nueva, porque’l presupuestu pa equipamientu informáticu tovía nun s’escosó.

Entós la noticia de que’l Xuzgáu númberu  1 d’Uviéu tuvo paráu cuasi tol martes porque namás tienen dos impresores y taben les dos ensin tinta, nun garra a munchos por sorpresa.

http://www.lne.es/secciones/noticia.jsp?pRef=1794_42_568449__Asturias-Juzgado-contencioso-Oviedo-paraliza-falta-tinta-impresoras

Pues resulta que nel añu 2004, mandaron una delegación del Ayuntamientu de Xixón a Cuba, pa supervisar unos proyectos de cooperación financiaos pol ayuntamientu.

Que primero mandaron a un paisanu solu, pa organizalo too allá, venti díes, y dempués fue la delegación colos peces gordos, más d’una docena de persones (amén de dalgún allegáu que dicen que pagó’l viaxe) con tolos gastos pagos.

Que la inspeición, d’una selmana, costó al conceyu sobre 30.000 euros.

Que nos 30.000 euros tan metíes les dietes que cobraron cada día que tuvieron ellí, trabayando. Y tamién les factures del ron Habana 7 (que diz Churruca que foi namás pa tener un detalle con unos rapazos que-yos echaron un gabitu).

Y mira que son malos los del otru partíu que lo saquen agora, que tan organizando otru, y a lo meyor tienen que paralo, agora que yá teníen fecha la maleta.

Yá lo dixo’l fíu de Chus Pesetes: va castigalos Dios. Esi que nun s’atopa en  Cuba.

En fin…

La llibertá d’análisis supón un esfuerzu (pal llector, non sólo pal periodista). Si hai dalguién que me fuerza a reflexonar con claridá, con llucidez sobre les coses, toi obligáu a comprometeme. Ensin embargu, si me lleven de la mano, si ya sé qu’al escoyer un periódicu determináu alcuentro tolos titulares y artículos qu’apunten nuna dirección determinada, eso creame nel fondu una incomodidá hasta  psicolóxica.

La cita ta sacada d’una entrevista ente Antonio Tabucchi y el fiscal xeneral de Milán, Francesco Saverio Borrelli, miembru del famosu Mani Pulite (manes llimpies) italianu.

Dalgo se debe tar moviendo na conciencia de la xente pa que’l Presidente Vicente tenga qu’argumentar (con verbu probe y pocos argumentos, eso si) nuna columna de periódicu les bondaes del so plan p’Asturies. Resumo por si nun queréis lleelo: too ye poles perres.

http://www.lne.es/secciones/noticia.jsp?pRef=1790_45_567143__Economia-Energia-cambio-climatico

Pero sobre too, pa que traigan equí a xuntase (y a ver si sabemos dalguna vez cuánto nos cuesta) esi chiringu que ye anguaño’l Real Institutu Elcano (col “xubiláu” Suarez-Pertierra al frente) pa sofitar los sos argumentos ya invocar “la seguridá enerxética d’España”, y reducir la ¡¡¡dependencia enerxética del esterior!!! (con gas rusu, nixerianu o arxelinu, manda madre).

Asina qu'una foto de pesu, con exministru, presidente de puertu, conseyeru d’industria y presidentín, p’arropar dellos titulares tremendistes na prensa de güei. A ver si furrula'l discursu del mieu.

http://www.lne.es/secciones/noticia.jsp?pRef=1792_35_567596__Gijon-Pertierra-afirma-regasificadora-Musel-clave-para-seguridad-energetica

http://www.elcomerciodigital.com/gijon/prensa/20071016/economia/regasificadora-situa-musel-como-20071016.html

Lo meyor, lo d’Areces de tener la llinia Lada-Velilla pal 2011 (ye que si nun la tien pa entós, tol tinglao esbarrúmbase).

Si nun fediere too tanto y diere tanta pena, diba ser una cosa guapa pa vela dende fuera.

Voi ponevos equí un testu de Joaquin Vidal que me paez interesante. El so títulu ye Lobbies a la española, y Joaquin Vidal ye ún de los autores del llibru Conspiraciones Tóxicas.

Les influencies alcontraron una forma de sistematizase. La inspiración, americana. Les formes, ibériques de siempre. Ye’l lobby a la española, que trabaya a toa mecha nes sos ocupaciones habituales: facer ganar dineru a unos pocos a cuenta de los intereses  de toos.

Los lobbies españoles nun son sinón l’actualización d’una forma caciquil de poder que consistía en tener contactos y facer pasiellos, dalgo ibérico. Los lobbies métense en cuasi tolos sectores nos qu’una regulación pue dar pie a un negociu sustanciosu. Por supuestu que los vemos nes grandes infraestructures hidrolóxiques. Pero tamién tan na enerxía eólica, tres l’urbanismu, hasta a l’agachapanda nes viesques. España ye un país con más viesques  de lo que paez, si a los datos oficiales nos atenemos.

Hai dos grandes entes que controlen les viesques españoles. Los públicos, que nun son los mayoritarios, xestiónense básicamente por mediu d’una enorme empresa semiestatal llamada TRAGSA. Nella, según se detalla en Conspiraciones tóxicas, hai conseyeros de pluriempleu duldosu. Esta multinacional (porque invierte parte de los sos grandes beneficios fuera d’España) xestiona la mayor parte de la inversión público nel mantenimientu y meyora de les viesques españoles. Pa gran disgustu d’otru xigante, ADEFO. Ésta ye la patronal de la viesca. Qu'haila. La mayor parte de la superficie forestal española tien un dueñu particular. Los dueños de les viesques agrúpense al rodiu d’Adefo, lo que ye llexítimo, práutico y lloable. La so web, pa quien tenga la oportunidá d’averase, asegura mui bones intenciones. Lo bono ye ver quién tan a xunta direutiva d’esta patronal de la viesca, el “lobbing” de les viesques. Una güeyada al rexistru mercantil cruciando nomes y nos encontraremos a constructores como ACS o FCC, empreses químiques… Sorprendente.

Agora hai en xuegu un guapu negociu a cuenta de les viesques, al que punxeron la etiqueta de “bio”. Tan los “biocombustibles” (que si quemen, ya serán menos bio) y dempués la “biomasa”, que non ye sinón usar la tala de les viesques pa producir enerxía. Los biólogos ponen en dulda la rentabilidá “bio” d’esta práctica, porque la madera de les cortes ye sedimentu que nun se queda na viesca, dalgo fundamental pa rexenerar la capa fértil y evitar la erosión, la verdadera velea pal nuestru mediu ambiente na so llucha contra la desertización. Además nun se reduz la emisión de  CO2, porque nun dexa de ser combustible a quemar. Pero ehí queda’l non menor flecu de los cupos de quema “bio” que les cementeres y otres eléctriques tienen que prauticar anualmente pa cumplir cola llei. ¿A qu’agora sorpriende menos que les constructores y les químiques tean pela viesca rondando? Nin que dicir tien que tou esti asuntu de la biomasa ye principal nel orde de preocupaciones de la beatífica Adefo.

La democracia, que sólo lleva 30 años con nós, nun frenó la eficacia de tener una bona influencia. L'atomización del poder a los conceyos fizo de los pequeños ayuntamientos averaos a les ciudaes un caladeru de primera pa los nuevos lobbies que trabayen el rentable sector urbanísticu (…)

http://www.rebelion.org/noticia.php?id=57579

Vamos sacar una tarxeta colorada a David Gonzalez, esi poeta puercu que quier dir de malditu pela vida y que, namás que pue, nun para de miagar por perres.

Ayeri, yera l’autor invitáu na columna de Diego Medrano n’El Comercio, titulábase Lagrimas y lija, y como fai casi siempre, volvió a echar la llingua a pacer (nun lu traducimos porque nun-y presta):

“A Rimbaud le despreciaban en su pueblo tanto como me desprecian a mi. Hablo siempre de las instituciones, no de gente. Estaba harto del cielo gris de esta ciudad, y de las columnas de humo de Aceralia, que me recuerdan que yo curré allí. Estaba harto de que se me excluyera de todo tipo de acto público.”

“¿Sabías que en diez años como poeta en mi propia ciudad aún no me han llamado para una lectura a cambio de una puta peseta? Me voy a largar de aquí en cuanto pueda, porque aquí me voy a morir de hambre, al carecer de ingresos por otra vía y al ser marginado estética y sistemáticamente. Pero, claro, es que no escribo en la nuesa llingua de los cojones”.

Nun ye la primer vez que se mete cola llingua, nin va ser la última. A lo meyor el so discursu puercu y malditu furrula bien llonxe. Pero nuna ciudá pequeña, onde se conocen toos, dir de malditu sabiendo d’onde vienes nun lo cree naide.

Como diría la mio hermana, ésti quier “ser guai y nun llega nin a chachi”.

El mundu de la numismática ye una parte del procesu históricu que los historiadores suelen dexar de llau, más que nada pola imposibilidá d’atropar munches vegaes les pieces dignes d’estudiu, que suelen tar en manes de coleicionistes privaos que nun les suelten fácil.

Na dómina medieval, había delles ciudaes que podíen acuñar moneda (Lleón, Burgos, A Coruña, Zamora, Toledo, Cuenca, Murcia, Sevilla, Avila, Santiago…) lo que vien a sofitar la importancia histórica que tuvieron, al ser un privilexu que namás podía dar el rei. Tener un taller monetariu na ciudá significa un poder políticu fuerte, una economía importante que xustificare’l so funcionamientu pol efectu multiplicador nel entornu.

Según defenden dalgunos numismáticos, la ciudá d’Uviéu tenía en tiempos de doña Urraca una ceca propia p’acuñar monedes. Hai monedes daquella época que tienen una O, y siempre s’atribuyeron a una ceca d’Ourense, pero estudios nuevos dicen que pue ser Uviéu.

Pol tiempu nel que salieron, yera cuando la monarquía lleonesa necesitaba lliquidez pola xuntanza con Castiella. Y la hipótesis cola que se trabaya anguaño ye que naquella dómina les acuñaciones del noroeste peninsular facíense en Llugo, Santiago y Uviéu, hasta qu’a la fin de la edá media se centralicen na ciudá d’A Coruña.

La Fundación León tien catalogaos dellos exemplares cola ceca O de la reina Urraca, fía d’Alfonso VI, del so fíu Alfonso VII “Raimundez”, de Fernando II l'hispánicu, d'Alfonso IX, hasta acabar con acuñaciones de Fernando III el Santu, anque hai dalgún que diz que se recuperaron les acuñaciones en tiempos d'Enrique II, ensin confirmar.

Les úniques muestres de qu’esti gran tinglao tovía ye una democracia vienen daes por fuerces estraparlamentaries: la paralización de PXOU de Llanes (Andecha), l'enxuiciamientu de Campelo (BIA) o’l xuiciu sobre “Construyendo Asturies” (Unidá). O por CSI, un sindicatu mui minoritariu, que foi quien a parar ayeri “la carrera profesional” que metieren a la trágala ente la pinza PSOE y UXT.

Coses que fieden a los ciudadanos, los políticos profesionales d’esti país pequeñu (pagámoslos ente toos y dedíquense namás a esto) déxenles pasar, seique porque a naide-y interesa tirar de la manta.

Absolvieron a Campelo, convertíu nun pim-pam-pum, porque tampoco pagaba la pena si nun se diba poder tirar más arriba. Y mira que nel xuiciu se dixeron coses curioses, pero…

Agora ta nos xuzgaos la causa del “Construyendo Asturias”, aquel best-seller qu’apaeció en cuasi toles cases de la rexón en campaña electoral, glorificando les obres del gobiernu rexonal. Unidá acaba de facer publiques delles cifres que son, cuanto menos, curioses.

Fízose una tirada especial pa cada sitiu, potenciando les coses de cada zona. Del total de 281.100 llibros que sacaron, pa Xixón fueron 110.000 exemplares, pa Uviéu 77.000, p’Avilés 34.000, pa Sieru 12.000, 19.500 pal Oriente y 28.600 pal occidente.

Cada páxina de publicidá tuvo un coste de 5.000 euros mas IVA. A la vista de la documentación Sedes, empresa pública rexonal, punxo la tercera parte de les perres, al meter doce páxines de publicidá (dos en caúna de les seis ediciones) y 220.000 encartes d’encuesta (60.000 + IVA), lo que supón un gastu de 146.856 euros.

A la vista de los datos qu’aportaron les empreses al xuzgao, cada llibru (papel couché, 150 páxines a tou color con dos semeyes per páxina) namás costó 1,15 euros + IVA. En vez de los 5 euros que costaría nuna imprenta normal. La verdá ye que la imprenta esa ye barata de verdá, nun m’estraña que fueren hasta Leganés a faceles (de xuru nun tien nada que ver qu’un consorte de conseyeru/a tien una imprenta ellí). Si queréis sacar un llibru, pidi-yos preciu, que ta tirao.

Ya s’empiecen a contradicir nes declaraciones, y naide se cree esos datos, pero vamos dalos por buenos, porque si non falta más d’un millón d’euros nesi pastel, y a ver d’ónde salieron.

Nun vos preocupéis, qu'a la fin nun va pasar nada. Un poco de ruíu y depués a tapalo.

Dientro de seis meses, en cuantes pase’l periodu d’información pública, el quesu gamonéu va pasar direutamente al rexistru de marques con Denominación d’Orixe Protexía de la UE.

La UE reconoz dos variantes: la del puertu y la del valle, y obliga a que se siga ellaborando na zona xeográfica que reconoz la denominación, Onís y Cangas. La variedá del valle faise tol añu, mientres que la variedá del puertu sólo se fai nes cabañes de los puertos ente xunu y setiembre. A partir del añu qu’entra van tar etiquetaos.

Esti branu tuvi falando con dalgún pastor de Cuadonga y quexábense de que se viende poco, anguaño ta a 33 euros el kilu, y tan falando de ponelo a 40 pal añu que vien (anque, como dicía ún: si nun hai pa 33 nun va haber pa 40). Tamién nos contó que namás quedaben cuatro vieyos que lo facíen y que, por muncho que falaben de da-yos ayudes, siguíen pagando 1000 euros poles cabañes y diez quesos (ónde acabarán esos quesos, entrúgome yo) al ayuntamientu.

Tamién contaben que cuasi cada añu subía’l Presidente Vicente y dellos conseyeros a velos y sacase la foto. Y que lo que notaben ye que, les soluciones diben allargándose nel tiempu, pero que cada añu había más xente nel séquitu.

Y qu’a toos-yos gustaba muncho, pero que cuasi nengún compraba.

Los grandes movimientos relixosos tan fundaos sobre obres lliteraries: los mormones, los cristianos o los islamistes son los exemplos más claros… ¿Porqué’l Soma, que cumple toles carauterístiques d’una relixón, nun tien un llibru de cabecera?

L’Asturies contemporánea foi inventada por una sola persona: Xovellanos, polo que nun ye raro que toos, a la mandrecha y a la manzorga, se quieran apropiar de los sos llogros. Si tienes nes tos files al pá fundador de la patria, tienes gran parte de la patria, razonen a la so manera raro.

Nel so famosu Informe sobre el beneficio del carbón de piedra y utilidad de su comercio, Xovellanos afirma qu’en nengún otru llugar ta más atrasada la industria qu’en Asturies, por culpa, sobre too, de la falta de conocimientos y a la falta de capitales. Pidía daquella la esplotación del carbón, pa lo que facía falta “abrir caminos firmes y cómodos para conducir el carbón desde las minas a los puertos de extracción”, y formar a la xente.

Mui resumío, lo que venía a pidir Xovellanos naquel informe yera una inyeición de capital de fuera (via estáu), una meyor formación de la xente del país pa poner en valor lo que teníen, y meyores carreteres pa poder esportar los escedentes. La cuenta la vieya, vamos, pero ye qu’hasta entós naide lo punxere por escrito. Y, lo que ye muncho más preocupante, nengún de tolos políticos que tuvimos la desgracia de tener dempués, y mira que pasaron años, tuvo una sola idea que se saliere del camín marcáu por Xovellanos.

Fai más de doscientos años, un home foi capaz d’inventar un país. D’entós p’acá tolos que nos gobernaron lo único que ficieron foi curiar les llaves de casa.

Acabose’l choyu del carbón, y agora ye la lluz y l’agua, pero siguimos igual pa que nada cambie.

Antonio Cuervo Castrillón foi un abogáu y fiscal de munchu valir pa la época que, ente otres coses, foi gobernador civil en A Coruña, Palencia, Murcia y Santander (que se sepa), pero tol mundu lu conoz por ser l’autor del poema La Searila, dedicáu a la so muyer, Maria Rosa Pérez Abella.

Antonio Cuervo Castrillón yera ún de los ocho fíos d’ún de los héroes escaecíos de la Guerra de la Independencia, José Rosendo Cuervo Castrillón y Villamil, comandante del batallón de los paisanos del Eo que lluchara contra l’exércitu de Mathieu.

Maria Rosa Pérez naciera un 15 de xunu de 1814, na casona del Ríu Seares, conceyu de Castropol, fía d’una familia venía a menos. Yera una moza mui guapa, y llamábenla la “Searila”.

La historia que llegó hasta nós diz qu'Antonio y Maria Rosa conociéronse un día de branu, mientres ella taba xugando colos pies nun regatu. El problema ye que les dos families nun se llevaben mui bien por temes políticos, asina que tuvieron unos amores un poco novelescos (d’esos de balcones con señales, y cites en cabañes na viesca), hasta qu’acabaron casándose nuna ermita el 8 de mayu de 1.835. La boda foi en secretu, según consta nos archivos parroquiales, y nun se fizo pública hasta un añu depués de la muerte de la muyer.

Daquella Antonio Cuervo trabayaba n’A Coruña, y yera cuando la primera guerra carlista, asina que nun se víen muncho, pero si abondo como pa qu’ella quedare preñada. Enferma de tisis, tuvo problemes nel partu, morriendo’l 31 d’ochobre de 1936 d’una hemorraxa, anque la neña, Claudia María, vivió.

Antonio Cuervo, al qu’avisaren de que la muyer taba de partu, reventó dellos caballos (cuatro, según dalgunos) intentando llegar a Seares dende A Coruña, pero cuando llegó alcontróse cola muyer yá enterrada. La lleenda diz qu’abrió la tumba y desenterró’l calabre pa garra-y un mechón del pelo, y que tuvo unes cuantes nueches rondando pel cementeriu.

Dempués trancóse en casa pa escribir un poema en castellán dedicáu a la muyer, el famosu poema de la Searila, que se fizo mui famosu y se cantaba per tola zona eo-naviega y gallega hasta los entamos del sieglu XX. Y pa encima la fía, Claudia María, morrió un día enantes de cumplir l’añu.

Dende entós hasta que morrió, el 2 d’abril de 1890, Antonio vistió siempre de llutu, y mandó que lu enterraren con una capa determinada. Cuando, munchos años dempués removieron los restos, alcontraron nel forru un mechón de cabellos de muyer y los restos d’una rosa muerta.

El poema

 Ye una elexía onde predominen los versos decasílabos, dividía en cuartetos simétricos, qu’abusa de los recursos espresivos de la época, anque pue ser guapamente’l nuestru “Annabel Lee”. Ente que lu escribió y hasta los entamos del sieglu XX fízose mui popular na zona, y yera un tema que cantaben dellos cantantes. Hai munches versiones (cuasi dos docenes) manuscrites del propiu autor, escrites en distintes dómines, que van dende’l tremendismu de los entamos hasta les mas reposaes del final, pero equí vamos apurrir la versión más estendía qu’afitó Evaristo Casariego.Da  un poco de repelús el pensar nuna persona tan seria na vida civil, y tan obsesiva nel amor, tola vida escribiendo y corrixendo un únicu poema a l’amada muerta, anque debe ser dalgo que diba col romanticismu de la época.La verdá ye que prestaríanos poder apurrivos dalgún cantar basáu nesta lletra, pero tan toos escaecíos. A ver si dalgún grupu d’anguaño s’anima a facer una versión.

Solitaria mansión del sepulcro.
Sólo en ti mi esperanza se encierra,
Que perdido mi amor, es la tierra
Un abismo de mal para mí.
Negro abismo, que ahoga implacable
En un mar de tristezas mi alma. !
¡Que de Dios la piedad me dé calma!
¡Ay, Searila, reuniéndome a ti! Un profundo clamor en mi pecho,
Que te llama y evoca constante,
Sin que pueda acallarlo un instante
De mi vida angustiada y febril.
Espantosas tinieblas me cercan
Y entre ellas venirte a mí veo.
¡Fantasía! ¡ Ilusión del deseo!
¡Que, ay, Searila, no vienes a mí! ¡Cuántas veces gozosas conmigo,
Embargada de amores suaves,
Escuchaste el cantar de las aves
En las dulces mañanas de abril!
Poco tiempo duró nuestra dicha,
¡Y cuán presto acabó mi fortuna!,
Pues no quiero tampoco otra alguna
¡Ay, Searila, viviendo sin ti! Pavorosa visión yo recuerdo
cuando trémula tú me decías
Que en fatídicos sueños veías
De tu tumba la lápida abrir.
Del destino, cruel anticipo,
Que alejaba de mí la alegría,
Se cumplió la fatal profecía...
¡Ay, Searila, pues vivo sin ti! ."En tus brazos morir, ¡que consuelo!
Conmovida otra tarde dijiste.
¡ Infelice! Y siquiera me viste,
Expirando apartada de mí.
Niña aún y tan sola muriendo,
¡ Cuán amargo el morir te habrá sido!
Sin oír el acento querido!,
¡ Ay, Searila, anhelado por ti! De la vida en el último aliento
Tu tristísima voz me llamaba.
¡Desdichado de mí! ¿Dónde estaba
Que a tu angustia no pude acudir!
Por los campos buscando tu huella
Yo corrí con frenético empeño,
y hoy, perdido, paréceme un sueño,
¡Ay, Searila, que viva sin ti! Yo corrí desalado y ansioso
Por caminos que incendia .la guerra,
Y al llegar, ¡ Ay de mi !, bajo tierra,
Yerta, inmóvil, Sin vida te vi.
A la luz de la lívida luna
Tu belleza, que intacta aún estaba,
Con pupila sin fuego miraba,
¡ Ay, Searila, posándose en mí!De tu yerta cabeza, la seda
Yo corte con mi trémula mano
y tus sienes de hielo, en vano,
Con mi llanto y mi beso encendí.
Entre flores, mi Rosa, una rosa
Con su pompa y sin par lozanía,
Roto el féretro yo te veía,
¡ Ay, Searila, mirándome en mí! Tu recuerdo mi alma devora,
y hasta el fondo taladra mi pecho,
Sin poderme sentir satisfecho,
Que apetezco cual nadie sufrir.
Lo apetezco y la vida me enfada,
y así más me consumo y me mato,
Pues no quiero me acuses de ingrato
¡Ay, Searila, si vivo sin ti! Abomino de vida sin cielo,
Donde ver de tu sol los fulgores,
Que risueñas no alegran las flores
Cuando el alma se siente morir.
Y alegrarme jamás yo no puedo
Ni pagarle al amor más tributo,
Ni otras glorias al mundo que el luto,
¡ Ay, Searila. que llevo por ti! Sola ahora y por todos dejada
En el lecho sin fin de la muerte,
Pues no hay nadie que aquí venga a verte
Si no viene tu amante infeliz.
Soledad a tu; lado es mi vida,
Que sin ti toda vida es desierto;
No respiro, mi ser está yerto,
¡ Ay, Searila, si no es junto a ti! Navegando la pálida luna
Por la bóveda inmensa del cielo,
Que comprende parece mi duelo
Y no quiere como antes lucir.
De la noche durante el silencio
Tu sepulcro besando acompaña
y en tristeza profunda me baña,
¡ Ay, Searila, velándote a ti! Mustia ahora la frente doblada
Sobre el pie de la lápida¡ fría,
Yo te espero, ¡ oh mortal agonía!,
Como el ángel que mira por mí.
Yo te llamo, el momento se acerca
Que en el cielo, felices y amantes,
Nuestras almas se junten como antes,
¡ Ay, Searila, pues muero por ti! Antonio Cuervo Castrillón

Lleer el restu d'esta entrada

Dalgún s’alcordará esti branu de la publicidá del Ayuntamientu de Xixón diciendo que yera una de les tres meyores ciudaes pa vivir, según una encuesta. Lo que de xuru nun van poner en nengún cartelu, nin siquiera van sacalo na Gaceta de Xixón, ye que tamién ye la ciudá española con peores niveles de dióxidu de nitróxenu na atmósfera, según nos diz l’informe: Calidad del aire: clave de sostenibilidad urbana.

http://www.sostenibilidad-es.org/observatorio%20sostenibilidad/

Nun ye raro entós que, añu tres añu, Asturies seya líder indiscutible nes estadístiques de muertes por enfermedaes respiratories n’España, nin que l’informe del Centru Nacional d’Epidemioloxía destacase l’alta concentración de casos de cáncer de pulmón, pleura, páncrees, texidos blandos y riñón, cuasi toos por culpa de factores medioambientales.

N’Asturies los centros de producción industriales tan mui averaos a zones residenciales, pasando les normatives medioambientales pol arcu de la cuenta resultaos.

Ensin embargu, equí los nuestros políticos siguen apostando pol caducu modelu de ser productor d’enerxía y materies primes: el Fornu Incinerador de Cogersa en Serín (la mayor fonte de dioxines y furanos), 7 nuevos grupos térmicos (2 Soto Ribera, La Perea, 2 en Nubleu, Aboño y Musel), la Regasificadora, les cuatro plantes de biodiesel, la cementera nueva d’Aboño…

Asturies va siguir siendo un paraísu natural, pero van enllenánoslu de mierda.

Carlos Bousoño (Boal, 1923) ye ún de los meyores poetes del franquismu, con tolo qu’eso tien nun tiempu tan planu lliterariamente falando. La mayor parte de la so fama bien dada pol so llabor como conferenciante y maestru. La so tesis doctoral, del añu 1949, foi sobre Vicente Aleixandre, del que foi discípulu y collaciu.

A partir d’agora va ser más conocíu como’l que ganó 5 millones d’euros vendiendo l’archivu de Vicente Aleixandre a la Xunta d’Andalucía, un archivu qu’incluye versos inéditos, cartes privaes, la so biblioteca y el certificáu del Nobel.

Según Bousoño, los cinco millones d’euros nun lu ficieron duldar siquiera, namás lo vendió pa responder “al cariñu qu’Aleixandre tenía a la so tierra natal”.

Maldites perres.

http://www.elmundo.es/elmundo/2007/10/04/cultura/1191503108.html

Frente al grandonismu de dalgunos, una güeyada al Catálogu de Publicaciones del añu 2.006 en llingua asturiana diznos que, en tol añu pasáu, namás se publicaron trece obres de narrativa, y eso contando una recopilación d’artículos de prensa (Véndese Pisu, de Milio Rodriguez Cueto).

Y, lo más grave de too, ye que de toes elles namás que SEIS pasen de les noventa fueyes.

Como pa sacar pechu.

 O seya que nun voi tar.

Xose Nel Riesgo ye autor de tres noveles. Cola primera, El cai nunca duerme (1989), regalónos una novela negra mui sólida con dalgún fallu de primerizu. Cola segunda, Parque temáticu (2005), una parodia de los alcaldes de pueblu qu’entama mui bien pero va perdiendo puxu. La tercera ye ésta, Escrito na ceniza, y ye d’esti mesmu añu.

Entama asina:

Por fin quedara solu. Pela primer vez dende qu’ingresara nel hospital recordaba, internándose nos desiertos enllabanaos de la memoria del camín andáu, qu’agora se dibuxaba nes blanques parees del cuartu.

Una puñalada insensible caltrió-y el recuerdu, revelándo-y que fuera un home valiente hasta nes coses y los detalles a los que, nel momentu mesmu de vivilos, nun-yos diera la menor importancia. Los árboles esmochaos del iviernu perenne de la vieyera trazaben una llende, desconocida, nel paisaxe de l’alcordanza. Una frontera que nun podía arrodiar nin tampoco nun tenía vuelta p’atrás. Una llinia zarrada de cañes que, por embargu, tenía una cande tresparencia, el misteriu d’un encantu, dexando aldovinar un espaciu más p’alló de los cantiles de la memoria.

L’entamu clasicu yá nos da’l tonu del llibru: un home nun hospital colos sos recuerdos.

Sigue, por exemplu, asina:

Al volver pa casa Nela foi tocando les piedres ensin saber que, en faciéndolo, taba sanando tristures de los tiempos devolviendo-yos l’alendar a les sobrepuertes d’aquelles queríes cases, que volvíen mugar rises de folixa con ecos de fragües de fierros trabayaos a güelpes d’Hestoria, suañada otra vuelta dende’l mangu mesmu de la Memoria de los pueblos.

Aquella nueche Nela supo d’au venía.

De la pelleya de los regodones del ríu. De les raíces de la escanda y de les fabes. De les flores de les castañales. Del tastu del pan. Del arrecendor de les mazanes coyíes de la mano. Del mofu de los teyaos. De los tueros de los carvayos. Del Beleñu y del Arfueyu. Del Mexacán y del Lloréu. Del Persil de les Bruxes y de la Xaranzana. De la cazumbre del Texu.

Adela’l Ferreru tien trenta años. Venti de vida y diez de tortura, los diez que lleva casada con Rufu la Venta, el mayor borrachu del mundu conocíu. Nun pasó un día dende que salieron per primer y última vegada xuntos de la ilesia que nun llegara aquel home a casa col celebru esllavazáu y con ganes de calca-y enantes de tirase nel catre.
 

Y va acabar, tres enseñanos delles estampes esllavazaes de la vida d’un pueblu que puen facer de metáfora de la historia d’Asturies, asina:

Tuvimos de palique, dándola ensin güesu, como a elli-y prestaba dicir, tola nueche. Cuando me despidí d’elli pela mañana del otru día, los sos güeyos azules como’l cielu yá nun teníen la fuercia d’enantes. Paecíen les augües aparaes d’un embalse apináu hasta los bordes. Díxome un “hasta otru momentu” alzando una mano engurriada polos sos setenta y cinco años de vida.

Yo barrunté que la so voz sonaba a un hasta siempres.

Foi la última vez que lu vi colos güeyos abiertos.

Al otru día marchó d’esti mundu, cargáu de memoria, cola sabencia esperta de cientos y cientos de miles de kilómetros de rectu camín, que nunca nun torció. Sélo bien, porque asina me lo enseñó.

Llámome Xuan Pravia, y soi’l fíu de Dolfo.

Y acabamos de zarrar un círculu.

La Universidá de Lleón fizo un estudiu, sobre la llinia que REE quier facer ente Lada y Velilla, que vien firmáu pol profesor titular d’Economía Financiera y Contabilidá Julio Lago.

L’estudiu diz que la llinia nun fai falta pa nada, y qu’amás diba facer un dañu mediambiental pa tola vida nos sitios per onde pase.

A la hora de falar de producción, diz que la capacidá de xeneración nacional supera nun ochenta por cientu les necesidaes del consumu, polo que nun ye cierto que seya dalgo necesario p’asegurar la producción, porque’l sistema qu’hai anguaño ta preparáu pa producir 79 millones de kilovatios al día y el consumu máximu diariu nunca pasó de 43,4 millones.

Sobre l’argumentu de que ye pa cubrir a un espoxigue de la demanda, recuerda que son moderaos y que, nos últimos tiempos, xenérase abondo como pa esportalo a Marruecos, Andorra o Portugal.

Sobre la calidá, diz que la disponibilidá del suministru tien una cobertura del 98 %, con un tiempu d’interrupción mediu por debaxo de los dos minutos. Mui llonxe del cuartu d’hora qu’apaez na llei. Y precisamente Asturies y Lleón tan ente les provincies españoles nesi sentíu.

L’estudiu tamién diz que ye “radicalmente falso” que la llinia eléctrica vaya a traer una mayor actividá empresarial. Diz que, nes últimes décades, el balance enerxéticu de Lleón ye mui superior na parte de producción que na de consumu, ensin qu’eso haya trayío a nenguna empresona d’eses que xinten kilovatios como si fueren pipes.

O seya, salvo qu’a dalguién-y dea por andar col interruptor p’apaganos la lluz y xustificar el negociu, como ya se fizo col banzáu de Tanes (dalguién abría les compuertes pela nueche pa xustificar Caliao), ye dalgo que nun fai falta.

Anque, la verdá, tampoco facía falta dir a la universidá pa dase cuenta d’ello.

Zarrá-y los güeyos y soñá-y conmigo.

La Xunta Xeneral del Principáu d’Asturies encamienta al Conseyu de Gobiernu a treslladar al Gobiernu del Estáu la posición del Parlamentu Asturianu de considerar que’l banzáu previsto en Caliao resulta innecesariu, inadecuáu y obsoletu nel marcu de la nueva cultura de xestión del agua sofitada pola Direutiva Marco del Agua.Too ello implica, ente otres coses, el desarrollu de les siguientes midíes alternatives al mencionáu banzáu:

a)      Promoción del aforru y del usu racional del agua.

b)      Meyora de la eficiencia de les redes de distribución, identificando los puntos de perda y  renovando les redes gastaes.

c)       Llantáu de tarifes por tramos y por sectores que bonifiquen l'aforru y penalicen el consumu escesivu.

d)      Aplicación d’usos alternativos pa les agües residuales de les depuradores.

e)      Promoción del usu eficiente del agua na industria, sofitando auditoríes de consumu.

f)       Estudiu completu de les posibilidaes de captación y calidá de les agües soterrañes.

g)      Estudiu de les posibilidaes d’aprovechamientu del agua de mina.

h)      Aplicación del Códigu Técnicu d’Edificación pa incorporar métodos d’aforru nes cases y locales públicos.

Maxinaos que’l PP ya IU faen qu’esta declaración salga alantre, escontra’l votu del PSOE. Maxinaos qu’ellí tenéis un clon de Zaplana pa soltalu cuando pasen estes coses, llamáu por exemplu Fernando Lastra, que s’encabrona tou y diz que los que votaron en contra son unos irresponsables porque ye dir contra’l gobiernu llexítimu, escaeciendo qu’esi gobiernu nun tien la mayoría, y que nuna democracia puen pasar eses coses guapamente.

Maxina-y too eso, y dempués abrir los güeyos, que ye verdá.

Ye una victoria pequeña, pero ye una victoria.

http://www.lne.es/secciones/noticia.jsp?pRef=1780_42_564015__ASTURIAS-Junta-rechaza-construccion-embalse-Caleao

Anque malapenes quede tiempu, equí vos apurro esto qu'alcontré nel pisu d'al llau, na casa del Trasgu d'Areces.

Pero aporta un día, si les circunstancies lo permiten (y en cuantes nun lo permiten, hai que les obligar) aporta un día en qu’ún se retira adulces, abandona’l mundiu de les parecencies, ponse a escribir, alcuéntrase con homes llibres o polo menos que tienen un deséu tan grande de selo que yá casique lo son. Nel interior del orden ñecesariu y inhumanu del mundiu crease una sociedá real de collacios pa fuxir de l’asfisia. Yo viaxo pela mesma razón qu’escribo, p’alcontrar amigos.

Jean Sulivan, La obsesión de Delfos, según torna de Xaviero Cayarga.

Los periódicos trayíen güei la noticia de qu'un paisanu alcontró nuna finca d’Oles un  par d’esteles funeraries de fai 7.000 años.

http://www.lne.es/secciones/noticia.jsp?pRef=1777_30_562656__ComarcaSidra-vecino-Oles-encuentra-finca-estela-funeraria-hace-70000

N’Asturies había bayura d’elles, pero munches usáronse pa facer muries o de cimientos en edificios nobles, asina que son mui poques les que llegaron hasta nós, y cuasi nenguna nel so sitiu orixinal.

Na vecina Cantabria hai munches más, tantes qu’una d’elles, la de Barros, ye’l símbolu non oficial de la comunidá.

Tienen qu’apaecer munches más, y tovía nos falta un estudiu seriu y rigurosu sobre’l tema.