Escucando estrelles

Hai coses que tienen que quedar pa la historia, asina que vamos a colgar equí los nomes del actual Conseyu d’Alministración de l’Autoridá Portuaria de Xixón, pa que depués nun vos cuente dalgún indocumentáu que ye una cosa privada.

Direutor de l'Autoridá Portuaria:  Jose Luis Diaz Rato

Presidente: Fernando Menéndez Rexach

Secretariu: Jose Luis Barettino Coloma

Vocal de los sectores económicos d’ámbitu portuariu: Antonio Fernández Rodriguez

Vocales de l’Alministración Xeneral del Estao: Bernardo Blanco Simón

       Ignacio Fernández Fidalgo

       Rolando Lago Cuervo

       Manuel Pelaez Lopez

       Ignacio García-Arango Cienfuegos-Jovellanos

Vocales del Ayuntamientu de Xixón: Paz Fernández Felgueroso

     Jose María Perez

Vocal del Ayuntamientu de Carreño: Manuel Ángel Riego González

Vocales d’organizaciones sindicales: Justo Rodríguez Braga

      Antonio Pino

Vocal d’organizaciones empresariales: Severino García Vigón

Vocal de Cámares de Comercio: Luis Arias de Velasco

Vocales del Principáu d’Asturies: Francisco González Buendía

     Julian Bonet Pérez

     Herminio Sastre

     Belén Fernández

     Jesús Urrutia García

     Montserrat Bango

     Francisco Villaverde

Mola ¿eh? maxino que vos sonará dalgún de los nomes.

Y agora voi dexavos un enllaz interesante, d’un puntu que dexó la política y quier facer méritos pa tornar, asina que diz verdaes:

http://www.lne.es/secciones/noticia.jsp?pRef=1837_35_582939__Gijon-Compadreo-Musel-saqueo-Gijon

Anque dalgún saque pechu diciendo lo contrario, a la chita callando tan amurallándonos la costa, privatizando pela cara un bien públicu pa siempre, pa qu’engorden les cuentes bancaries de dalgún xeta gracies a talones y favores. Nos años sesenta detrás del xeta solía haber dalgún ministru o altu xefe del movimientu, tres los d’anguaño suel haber dos o tres alcaldes, lo que ye muncho más democrático.

Nesti país, onde’l cementu ye lo único que caltién les neurones gastaes de dalgún de los nuestros políticos, noticies como que Greenpeace denuncie’l proyectu del campu de golf de Verdiciu (en 167 hectárees non urbanizables facer un campu con 27 furacos, dos hoteles y una montonera viviendes) por invadir el paisax protexíu del Cabu Peñes (incluyíu na Rede Natura 2000) ye de lo más positivo, porque mete l’agua en casa del Principáu enantes de que se pronuncie.

Da mas mieu Greenpeace que toles asociaciones de vecinos de la zona.

L’hindú Srinivasa Aaiyangar Ramanujan (1887-1920) ta consideráu ún de los meyores matemáticos de tolos tiempos.

De familia mui probe, pudo estudiar la escuela básica gracies a una beca, destacando ensiguida nes matemátiques. Al paecer a los quince años, dexáron-y un llibru  (Synopsis of Pure Mathematics, de Carr) con 6.000 teoremes ensin demostraciones, y él dedicóse a desarrollalos, por entretenese, llegando a la solución de toos por sigo mesmu, ensin nengún tipu d’ayuda.

Ye otru de los xenios que nun pasó pela universidá, porque suspendió les dos veces que se presentó (en 1903 y 1907).

En 1913, cola ayuda d’unos collacios, manda una carta n’inglés a tres destacaos matemáticos, con una muestra de los sos trabayos. La carta yera ésta:

Apreciáu señor:

Permítome presentame a usté como un oficinista del departamentu de cuentes del Port Trust Office de Madrás con un sueldu de 20 llibres anuales namás. Tengo cerca de 23 años. Nun recibí formación universitaria, pero siguí los cursos de la escuela ordinaria. Una vez que dexé la escuela, emplegué’l tiempu llibre del que disponía pa trabayar en matemátiques. Nun pasé pol procesu regular convencional que se sigue nun cursu universitariu, pero toi siguiendo una trayectoria propia. Fici un estudiu detalláu de les series diverxentes en xeneral y los resultaos a los que llegué son calificaos como “sorprendentes” polos matemáticos llocales…

Yo querría pidi-y que repasara los trabayos equí incluyíos. Si usté se convence de qu’hai dalguna cosa de valor, prestaríame espublizar los mios teoremes, ya que soi probe. Nun presenté los cálculos reales nin les espresiones qu’adopté, pero indiqué-y el procesu que sigo. Debido a la mio poca esperiencia, tendría en gran estima cualquier conseyu qu’usté me ficiera. Pido que m’escuse poles molesties qu’ocasiono.

Quedo, apreciáu señor, a la so entera disposición.         

                                               S. Ramanujan

De los tres matemáticos que la recibieron, dos nun la contestaron, l’otru yera Godfrey Harold Hardy, miembru del Trinity College de Cambridge, y tuvo la paciencia d’echa-y una güeyada a les fueyes con 120 fórmules y teoremes que-y mandaben. En cuantes entamó, nun pudo parar y cuenten que pasó tola nueche estudiándoles. Dixo que yeren obra d’un xeniu, y que lo qu’él podía entender yera bono, pero qu’había fórmules que nun yera quien a pescanciar y que teníen que ser verdaderes, porque naide diba tener tanta maxinación como pa inventales.

Entusiasmáu, Hardy invitólu a dir a trabayar con él a Inglaterra, pero la ma de Ramanujan nun lu dexaba colar, y renunció. Pero la ma tuvo un sueñu onde vía al fíu nuna sala grande, rodiáu por europeos y que la diosa Namagiri ordenára-y que nun s’espetare nel destín del so fíu, asina qu’acabó dando-y permisu.

Asina llega a Londres en 1914: un indiu probe, vexetarianu estrictu, que yera un xeniu en dalgunes coses de les matemátiques ya ignorante dafechu n’otres, porque nunca enantes les viera. Un matemáticu xenial, que munches veces yera incapaz de facer una demostración, simplemente echábase a dormir y al despertar tenía la solución a un problema col que los matemáticos llevaben engarrándose años, diciendo que-y l’habíen dictao los dioses.

Malapenes tres años depués convertíase nel primer indiu almitíu na Royal Society de Londres y nel Trinity college, anque tenía la salú mui débil pola tuberculosis y namás lo diba disfrutar tres años. En 1919 tornó a la India, onde foi recibíu como un héroe, pa morrer al añu siguiente, con trenta y tres años.

Pa la posteridá dexó 4.000 teoremes, en dellos Cuadernos, escritos nuna nomenclatura y notación particular, ensin nenguna demostración, lo que fai que seya un llabor de titanes descífralo y reconstruyilo, trabayu que tovía se ta faciendo anguaño (nel añu 1976 apaeció’l cuadernu perdíu colos trabayos del últimu añu: 600 teoremes).

Demasiao centráu na teoría de los númberos como pa ser consideráu’l meyor matemáticu de tolos tiempos, como dexó escrito Hardy tres la so muerte: Nun tien la simplicidá y la inevitabilidá de les más grandes obres. Podría ser más importante si fuere menos rara. Pero tien un don que nun pue negase-y: una fonda ya insuperable orixinalidá. Seique, Ramanujan fuera meyor matemáticu si lu descubrieren y educaren un poco na so mocedá. Entós habría descubierto más coses nueves y, ensin dulda, de mayor importancia. Por otra parte, sería menos paecíu a Ramanujan y más asemeyáu a un profesor européu, y asina la perda sedría seique mayor que la ganancia.

Foi un matemáticu fascináu pol númberu π, yá dende pequeñu, y munchos de los sos trabayos son algoritmos pa calculalu. Los sos trabayos sobre partición sirvieron de base pa los caxeros automáticos, por exemplu. Amás d’eso, foi’l creador de la que ta considerada la fórmula matemática más guapa del mundu, una variante de la fórmula d’Euler:

ei π + 1 = 0

Queda equí escrita pal que la entienda. ¿Nun ye lo más guapo que vísteis na vida?

Torno con mal tastu: perdime munches coses esti fin de selmana. Nun se, porque nun tuvi, si la manifa foi meyor y mayor qu’otros años. Xente de la que me fío dícenme que si, asina que voi creelos.

Seique porque los medios oficiales m’engañaron tantes veces.

Según la organización hubo 20.000 persones, según la policía 4.000 persones. Como ya sabemos cómo son estes coses, trai p’acá esa mano y vamos partilo al mediu: 12.000 persones.

Mírese como se mire son munches. Demasiaes.

Añu tres añu, hai miles de persones que salen a la cai a defender la llingua, anque llueva, ensin que-yos paguen buses nin bocadiellos, ensin sacar un duru d’ello.  Xente que vien de llonxe, de mui llonxe en dalgunos casos (un saludu pa la xente de Furmientu, por exemplu), namás por tar ehí.

Lo que nun cambia, añu tres añu, ye l’escaezu nos medios del Réxime, nin la toma de postures de los que manden.

Midiendo mui bien los pasos previos, Gutierrez y Fernández tomaron al asaltu la dirección de les Juventudes Socialistas, poniendo nel sillón al fíu de Chano Torre. Taba feo que les mocedaes tuvieren a favor de la oficialidá, asina que golpe de timón. Amás sirve pa colocar fíos (pudiendo colocalos nuna empresa d’Obra Civil a qué rompese la tiesta si los pues atechar nun sitiu seguru onde tien meyor horariu y va ganar más, tien coche oficial, seguridá social, desemplegu y viaxes pagos, y amás sírvete pa siguir controlando’l cotarru). Y pues sacar, de rebote un titular guapu:

http://www.elcomerciodigital.com/oviedo/20071125/politica/javier-fernandez-afirma-preservar-20071125.html

“Les raigones de la intolerancia tan llantaes na sobrevaloración de lo propio”, una guapa sentencia que vamos poder poner nel epitafiu políticu d’esti llumbreres que nunca hubiere llegao a nada si nel so partíu nun sobrevaloraren lo propio: los fíos y los sumisos, los que se vienden por cuatro perres y callen.

Nun país normal una manifestación como la del sábadu sólo se diba dar una vez o dos. Pa nós ye dalgo que se repite un par de veces al añu.

Pero claro, ¡¡¡this is Asturies!!!

Por motivos profesionales nun voi tar nesto:

Nin nesto otro.

Nin voi actualizar el blog hasta’l martes, asina que meté-y ruiu por mi.

L’ésitu comercial d’un anunciu publicitariu básase en facer que’l consumidor quiera camudar el so mou de vida.  Muévese de la conciencia en primera persona a la conciencia en tercera persona, l’home que toos queremos ser. La publicidá descubrió a esti home. Consumir América nun ye comprar, ye suañar. Los anuncios suxeren que’l suañu d’entrar na tercera persona del singular pue facese realidá.

Don DeLillo, Americana.

Voi apurrivos un enllaz interesante. Non tanto como’l de los cafes (que reconozo que me dexó traumatizáu) pero tamién ye prestosu.

Ye una páxina onde calcular la nuestra güella ecolóxica (o seya: el númberu d’hectárees que faen falta pa mantenenos a nós).

En cuantes metáis los vuestros datos vais davos cuenta que sois predator.

http://www.earthday.net/footprint/index.asp

Al que, delantre de delles fórmules verbales mui estereotipaes y recurrentes, comparta conmigo la costume de mirales como posibles afloramientos del sustratu ideolóxicu nel que s’asienten y se protexe la cotidianidá nun pue dexar de da-y nel oyíu una de les más escuchaes nos telediarios: “volver a la normalidá”. Ye una fórmula que destaca especialmente la función protectora de la ideoloxía, por cuanto presupón que siempre hai una “normalidá” a la que tornar, como una especie de permanente ya inatacable recintu amuralláu.

Rafael Sánchez Ferlosio, Trece Pecios, ABC 08/12/02

Nestos díes nel que’l top-ten de l'actualidá del asturianismu ta marcada polos musicopirates qu’arramplen col patrimoniu de toos, salen a la lluz otros que quieren pillar cachu:

http://www.elcomerciodigital.com/gijon/20071118/cultura/familia-manzanares-asegura-cultura-20071118.html

El señor Joaquin Manzanares, aparte d’un señor con una gran cultura, yera un vivu de la virxen, y amás d’eso yera un pirata del patrimoniu, que s’aprovechó de la falta de normatives na época y de la ignorancia de la xente pa ROBAR coses que yeren de toos, como les famoses ares sextianes que taben na Campa Torres, y qu’anguaño tienen guardaes en casa a cal y cantu tola familia (lóxico: esperen vivir d’eso).

Si toi, falando del Tabularium, una colección arqueolóxica importantísima, que ye patrimoniu de tolos asturianos y qu’esti señor fizo llevando monumentos del monte, reliquies d’ilesies y coses de paisanos con poca cultura.

Como tarden en paga-yos, la familia siempre amenaza col muséu Metropólitan de New York, que lo quier llevar. N’otru recién casu d’espoliu, el del Odissey, la llei actuó, pero ensin embargu col Tabularium naide se mete, porque tan sofitaos por destacaes personalidaes de la sociedá carbayona y polos medios de comunicación.

De xuru qu’esti ye un país cainita. D’otra manera nun s’entienden dalgunes de les coses que pasen:

http://www.lne.es/secciones/noticia.jsp?pRef=1824_38_578591__CUENCAS-Mieres-Lena-enfrentan-Aller-exigir-cambio-trazado-LadaVelilla

Resulta que los d’Ayer alcuerden nun plenu pidir que la llinia d’alta tensión vaya pel prau del vecín, o seya, pel valle de Güerna (total, ya tán xodíos más que de sobra) y non pol d’ellos. Esi ayuntamientu, onde hai una cantidá de llistos per metru cuadráu p’amedrantar, nun se quier engarrar colos amos (al cabu y a la fin, ellos namás lleven la finca), asina que nun diz que ye innecesaria, namás diz que lo que nun val pal so valle val pal paisax protexíu de Les Ubiñes.

Dos conceyos que tamién s’engarren n’otres coses: ún va facer un centru d’interpretación sobre La Carisa dedicáu a los romanos y l’otru va facer otru centru dedicáu a los ástures. ¿Nun vos suena de la novela Parque Temáticu de Xose Nel Riesgo?

En fin, más o menos asemeyao al marrón que tuvo que tragar el buenón de Quico Buendía: salir un día diciendo que la responsable de les obres d’El Musel foi, amás de les foles, la portuguesa HC que nun dexó sacar piedres d’una cantera. Y claro, al día siguiente sal la empresa diciendo que d’eso naranxes de la china, y que si se ponen farrucos quita perres. Y oye, que non, que yo nun dixi eso, que tuvi un mal día, dixo Buendía, que los periodistes son malos y quieren facenos la cama. Amás, si dalgo de verdá hubiere nello, o seya: si por culpa de la portuguesa HC s’encarecen una barbaridá (porque digan lo que digan dalgunos un sobrecoste del 40 % yelo) les obres d’El Musel ¿cómo diben asignar dempués obres en concursu a esa mesma empresa?... Y yá puestos ¿cómo van dexar qu’una empresa, por mui galáctica que seya, responsable d’esi sobrecoste se quede depués cola obra?

Nun lo contestes, que yera una entruga retórica y vivimos nun país cainita.

Una cosa ye la realidá y otra la mierda, que ye solo una parte de la realidá, compuesta, precisamente, polos qu'acepten la realidá moralmente, non sólo intelectualmente.

Manuel Sacristán en M.A.R.X (Máximas, aforismos y reflexiones con algunas variables libres) sección I, aforismo 16

Pa los que nun podáis dir al conciertu que se va facer en sofitu a Héctor Braga y a la música tradicional.

Si nun sabes de qué toi falando, calca equí: http://www.nomuzak.com/sites/conciertupolatradicion

Por supuestu, hai que petar el teatru, pero si nun podéis dir pol motivu que seya (como ye’l mio casu) tenéis dos opciones:

a)      Mercar papeletes de la Fila 0. Podéis mercales hasta’l 21 d’Avientu y cuesten 3 euros. Con ello vais xugar 4 cifres col sortéu de la llotería nacional del 22 d’Avientu, y pue tocavos una cesta de productos asturianos y un fin de selmana nuna casa rural de Picos. ¿Ónde se pue mercar? Pues nos meyores chigres d’Uviéu, Xixón, Avilés, Llangréu, Llaviana, Mieres…

b)      Donar la cantidá que queráis nel númberu de cuenta de CaxAstur: 2048-0010-12-0300276298 poniendo si queréis, quién lo da (anque nun creo que vos valga pa la desgravación del IRPF).

Ye por una bona causa. Hai que sofitar a Héctor Braga pa que pueda pagar los 8.000 euros al otru presuntu.

Cada poco lléguennos cantos de sirena que falen sobre la necesidá de privatizar servicios públicos. Ún nos que más emperre tienen los nuestros poderes públicos ye la Sanidá, pero ye dalgo que tamién se da na Educación de los 69 asesores.

N’Asturies ye un alderique nel qu’escoyeron la “técnica del orbayu”: dir sacando poco a poco noticies ya informes que sofiten la necesidá de la privatización, porque sinón va haber que “recortar”. ¿Cuándo negociaron les tresferencies nun lo sabíen?

El que los nuestros responsables políticos quieran reformar fondamente la sanidá xunto colos compraos axentes sociales que nos tocaron nesti requexu del mundu, ponme a temblar. Porque van acabar sacándolo alantre, si o si.

Resulta que son los mesmos que nos llantaron pol alma per sécula seculorum un sobrecoste en cada llitru de gasolina qu’echamos al coche (el famosu céntimu sanitariu) pa poder pagar les obres del HUCA de La Cadellada (un hospital con menos cames del qu’había, por ciertu), y de pasu la urbanización de la redolada (¿a naide-y escamó nunca que’l mayor propietariu de suelu nesa zona yera ún de los nomes que salía na cinta que-y grabaron a Campelo?) en manes de SOGEPSA (¿qué empreses tan ehí, por ciertu?).

Anque tan a medies, les obres del HUCA van tener un sobrecoste del 50 %, según publicaron ayeri. Volvemos a lo de siempre: cualquier empresa privada que dea un presupuestu por escritu a otra se lu come si non lu cumple porque los contratos OBLIGUEN, y equí danse obres públiques a la ufierta más barata (un 23 % menos que lo presupuestao, nesti casu) pa que depués haya que fartucalos a perres pa que nun quede too empantanao, y nunca pasa nada.

Serán les foles, que tamién llegaron a la capital, dixo l’otru.

Lo peor ye que, nesti casu, nun tamos xugando con perres de los fondos europeos. Equí tamos xugando cola balanza de les cuentes rexonales, y pa cubrilo o quiten perres d’otros llaos o suben los impuestos. ¿Cómo se contrarresta esto? Nel presupuestu pal 2.008 que quieren sacar alantre namás sube un 3 % la partida destinada al salariu social, pero sube un 15 % la destinada a la TPA, a mayor gloria del réxime. Circu, munchu circu, ya que nun hai pan pa toos.

A min, cola demografía avieyao que tenemos n’Asturies, cualquier noticia que toque la Sanidá dame repelús, qué queréis que vos diga, porque a ver qué pasa d’equí a unos años, si ficieron que tola mocedá tuviere que colar.

http://www.elcomerciodigital.com/gijon/20071112/economia/asturianos-firman-contratos-para-20071112.html

Y lo peor ye que paez que la xente tien síndrome d’estocolmo, y nun hai alderique social de nengún tipu. Últimamente nun ye un orbayu lo que nos ta cayendo enriba, ye un bastiazu de los gordos. Pero si tienes fartucos a los axentes sociales, a los periódicos y a les empreses. ¿Quién se va mover?

http://www.lne.es/secciones/noticia.jsp?pRef=1819_46_576614__SOCIEDAD-Y-CULTURA-empresas-HUCA-paran-obras-para-negociar-sobrecostes

La psicoloxía ye una ciencia que tien un futuru insospecháu, al nun conocer naide les sos llendes. Na so escalada hai un puntu d’inflexión importante: cuando les teoríes de Lleonor d’Aquitania, long-seller nel tiempu, se ficieron l’harakiri pa dexar sitiu a les aventures incestuoses de les endomorfines. D’entós p’acá los psicólogos anden crecíos. Acabáronse les charres de chigre onde s’algamaba un conocimientu universal ente culín y culín, agora mola más facer un estudiu y xustificalo de manera empírico.

Tres gastar miles de millones n’estudios en delles universidaes, llegaron a la conclusión de que los homes y les muyeres son distintos, cosa que sabe cualquier fíu de vecín. Agora la psicoloxía anda diciendo que’l “homo políticum” tien un desarrollu distintu del cerebru, y que los d’izquierdes tienen el mapa cerebral distintu que’l de los de dereches, qu’ehí si fai falta un bon GPS.

Yo a los políticos siempre-yos vi asemeyaos a los abogaos: ¿faelos asina l’estudiu de la carrera y el desendolcu posterior de la mesma o yá vienen predefiníos de serie y por eso escueyen la profesión?

Lo peor ye qu’enantes la política nun envelenaba’l sistema d’enriba abaxo como fai anguaño. Agora los xueces, la policía, los científicos o los periodistes son d’un llau o del otru, tienen el mapa cerebral d’una manera o d’otra, y hai qu’amosalo de dalguna manera. Asina que pue armase la de coyer por un quítame p’allá esa opinión, con cámares de TV en direutu, bobaes pa dar carnada periodístico toa una selmana, hasta que dalguién arme la siguiente.

Hai demasiada tensión. Y eso que tovía tan los llaboratorios de cada bandu cocinando les estratexes, los futuros escándalos de corrupción que van sacar a la lluz (hai una regla non escrita que diz que siempre salen enantes de les elecciones y depués tápase lo más posible, nun vaya a ser que dalgo chisque) y la manera de machacar la llibertá d’espresión de la otra parte.

Ai, mamina, la que nos espera d’equí a marzu.

Nós intentaremos nun caer nel xuegu namás que cuando nos preste, y vamos falar d’árboles, de lliteratura, de música y de delles coses inútiles más que nos ocupen sitiu na tiesta.

Ye una promesa.

La ciudá onde vivo tien poco más d’un cuartu millón d’habitantes.

Pal añu que vien tien previsto subir el sueldu un 2 % a tolos funcionarios llocales, y una suba al rodiu del IPC (3,3 %) nos impuestos que paguen los paisaninos d’a pie (otru día voi contar la estafa del catastrazu que tenemos al otru llau la esquina).

Nesa ciudá, pal añu que vien, los conceyales del partíu nel poder y tolos cargos de confianza van tener una suba nel so sueldu del 14 % (dietes, fartures y privilexos aparte).

Probinos, ye que sinón nun lleguen a la fin del mes.

Alcaldesa: 69.207,90 euros (6.851,38 euros más qu’esti añu)

Conceyales lliberaos (que son tolos del PSOE y cuatro del PP): 57.147,72 euros (7.283,03 euros más). Equí hai dalgún que nun abre la boca nos plenos nin pa masticar chicle.

Pa cargos de confianza (ya sabéis: esti ye collaciu y bon chaval y vamos cha-y un gabitu) van dir 311.000 euros (un 54 % más qu’esti añu) y pa dellos direutores 654.233,76 euros (un 28 % más qu’esti añu). O seya:

·         Direutor del gabinete de l’alcaldía: 54.138,14 euros.

·         Direutor de coordinación de proyectos: 53.019,14 euros.

·         Xefe de Rellaciones colos Medios de Comunicación: 47.706,46 euros.

·         Xefe de Protocolu: 47.706,46 euros.

·         Asesora del Tercer Teniente d’Alcalde: 47.706,46 euros (repasar esta llinia, please)

·         Direutor Xeneral de Servicios: 66.179,42 euros.

·         Direutor de Seguridá Ciudadana: 63.975,38 euros.

·         Direutor de Participación Ciudadana: 63.975,38 euros.

·         Direutor Económicu Financieru: 60.790,40 euros.

·         Direutor del Área Presupuestaria y Patrimoniu: 58.944,06 euros.

·         Direutor de l’Axencia de Promoción Económica y Emplegu: 58.944,06 euros.

·         Direutor de Mediu Ambiente: 57.764,50 euros.

·         Direutor del Área d’Igualdá y Mocedá: 57.147,72 euros.

·         Direutor de Recursos Humanos: 56.189,42 euros.

·         Direutor d’Urbanismu: 56.189,42 euros.

·         Direutor de Planificación Urbanística y Obres: 56.189,42 euros.

Como ya dixi, dietes, fartures y viaxes a Cuba aparte. Y que conste qu’equí nun tan incluyíos tolos carguinos nes empreses municipales, nin lo que ganen dalgunos por tar sentaos ensin facer nada en dellos Conseyos d’Alministración.

Ye la clas política que tnemos. Y dempués hai desviaciones nun presupuestu d’obra d’un 40 % (Musel) o d'un 50 % (HUCA) y naide tien la culpa, asina que nun hai dimisiones nin ceses nin nada. Equivócate tu diez euros na to declaración del IRPF, a ver qué pasa.

Mola depués cuando piden contención nos salarios pa los trabayadores ¿eh?

http://www.elcomerciodigital.com/gijon/20071111/local/asturias/nuevo-hospital-central-encarecera-200711110951.html

El mundu nun tien nome, dixo. Los nomes de los cerros y les sierres y los desiertos sólo esisten nos mapes. Nomámoslos pa nun perdenos. Y ensin embargu entamamos a inventar esos nomes porque ya nos perdiéramos. El mundu nun se pierde. Somos nós los que nos perdemos. Y ye porque esos nomes y eses coordenaes son invención nuestra que nun puen salvanos. Nun puen atopar por nós el camín perdíu.

Cormac McCarthy, The Crossing

Fai tiempu, nun pueblu mui, mui llonxanu de la fastera occidental d’Asturies, había un paisanu llistu que foi al rexistru de la propiedá y miró que nengún de los vecinos tenía les tierres escrituraes. Asina que llevó un par de testigos y punxo les meyores a nome d’él.

Descubrióse años dempués, cuando dalguién foi a arreglar la herencia del pá, y armóse la de coyer. El paisanu llistu tuvo que colar del pueblu. Tuvo un par d’años fuera y dempués tornó a vivir al pueblu d’al llau. Sigue teniendo una montonera tierres a nome d’él.

Lóxicamente, con estos antecedentes, dalguién tan llistu tenía qu’acabar de políticu y presentándose a alcalde del so conceyu, como cabezaleru d’un conocíu partíu. Perdió toles veces que se presentó (creo que fueron tres), porque nel so pueblu toos diben a votar a la contra.

Esto nun lo acabo d’inventar, ye dalgo real como la vida mesma.

Güei, nel selmanariu Les Noticies, los dos qu’escriben de música (Ismael Glez-Arias y Alberto Ablanedo) faen referencia a dalgún otru llistu que foi a la SGAE y rexistró a nome d’él dellos cantares tradicionales. Y como tan rexistraos, y ye llegal facelo, acaben de condenar a un bandurrieru asturianu que  namás tocaba cantares tradicionales nel so discu (Héctor Braga) a pagar una fartura perres a ún de los llistos que rexistrara les canciones enantes, por nun poner bibliografía nel llibretu.

Nun se qué vos paez a vosotros, pero a min ye dalgo que me paez moral y éticamente vomitivo. 

Prestaríame oyer les esplicaciones de Dani, Jose Angel  y demás llistos. El bien que faen a la música, la dignidá y too eso.

Que naide que fai eso espere que-y merque un discu más en tola puta vida.

L’espilforre de recursos usáu pa enmazcarar dalgunos negocios de la oligarquía político y empresarial que caltién  el poder nel nuestru país, paez que namás nos da noxu a dalgunos (pocos). Como nun alcuentren, ente toos ellos, una idea nueva, repiten modelos caducos cuantayá. Llaboral y la TPA, les xoyes de la corona nesti sen (falten tovía’l Calatrava y el Niemeyer), son cáscares vacíes con una programación plano, por muncho que nos les quieran vender. Tolo demás, como dicía l’otru, ye propaganda y museínos de cartón piedra y plexiglás, mientes la realidá que les arrodia muerre por falta de sustentu.

Otru gallu diba cantanos si destinaren la metá o la cuarta parte d’esi marafundiu perres pa curiar el patrimoniu natural, cultural ya históricu que tovía nun marafundiamos nin nos esfarraparon.

Eses coses nun dan negociu inmediatu, piensen, mirando pal turismu mediterráneo, escaeciendo que’l turismu de Francia, de Suiza, d’Escocia o d’Irlanda ta basáu n’otres coordenaes: mirar pol patrimoniu que tienen, como vienen faciendo dende fai munchu tiempu

Pero eso ye una cosa qu’hai que planificar, y los resultaos nun son inmediatos. Por eso naide fai nada.

Y non tan llonxe d’equí, partiendo de muncho menos, tan faciendo les coses muncho meyor.

A muncha xente gusten-y delles canciones porque-y recuerden otres canciones que yá conoz. Esta galbana ye mui común tanto na cultura como na vida. Los hábitos vuélvense un elementu importante: Leopardi falaba d'assuefazione (costume, vezu), dalgo que tamién ye mui importante na esperiencia de los homes. Un neñu tien qu’avezase a vivir na nuestra sociedá, a sentase de tal manera (los xaponeses faenlo d’un mou distintu). A un neñu entós edúquenlu pa que s’acostume, pero ye tamién importante frayar esos vezos, porque si vivimos una historia tan enllena de contradicciones y conflictos, el problema consiste en representar y da-y sentíu a eses contradicciones y conflictos.

Edoardo Sanguineti, nuna entrevista con Guillermo Piro.

Hai una historia perguapa, qu’apaez colgada en dellos blog. Déxovosla equí:

Cuando los lacontes, pueblu siberianu, alcuentren un osu, descúbrense la cabeza, salúdenlu, llámenlu xefe, vieyu o güelu, y prometen-y que nun lu van atacar y qu’enxamás van falar mal d’él. Pero si da señales  de tener intención de tirase sobre ellos, disparen-y, y, si lu maten, fráyenlu en cachos, ásenlu y xinten la so carne hasta escosala, ensin dexar de repetir: “Nun somos nós los que te comen, sinón los rusos”.

A.-F. Aulagnier, Dictionnaire des Aliments et des Boissons. 

La historia, d’un animismu primitivu y coñón, tornada al asturiano diba quedar dalgo asemeyao a ésto.

Cuando los políticos astures, banda endogámica, atopen un proyectu, llamen a la prensa, salúdenlu, llámenlu futuru, progresu o necesidá, y prometen que nun va ser malu y que munches coses dependen d’él. Pero si da señales de tener intención de sali-yos mal, defiéndenlu, y, si sigue alantre, fráyenlu en cachos, ásenlu y xinten la so carne hasta escosala, ensin dexar de repetir: “Nun somos nós los que te comen, sinón los elementos”.

Salú.

Cuando Virgin Travel Insurance fizo esti añu una encuesta pa buscar los 25 monumentos que más deceicionaron a los viaxeros cuando fueron a velos, los resultaos que sacaron fueron curiosos.

Los ganadores, nuna llista de venticinco, fueron Stonenhe n’Inglaterra (una maraviya desfecha poles autopistes que tien al llau) y la Mona Lisa nel restu del mundu (un cuadru enanu pol qu’hai qu’esperar pa poder velu, y nunca lu pues ver a gustu). Pero tamién apaecíen coses como’l Big Ben, la torre Eiffel, la Casa Blanca, les pirámides, la estatua de la Llibertá…

Nestos tiempos nos que la sociedá de consumu y prises que vivimos/sufrimos nos apurre tol mundu a la distancia d’un mandu a distancia o d’un ratón, tamos escaeciendo la idea del viaxe como dalgo prestoso en sí mesmu.

Querémoslo too, y querémoslo ya.

Nun ye raro atopar agora, per tolos llaos, a una montonera xente que lo único que quier ye sacar una semeya pa dicir que tuvieron ellí, y que namás sacala cola porque yá cumplió lo que quería: tener dalgo tanxible qu’enseñar a dalguién.

El conflictu de la Duro Felguera foi duru. Perduru pa doscientos y pico trabayadores que se vieron na cai ensin motivu, qu’intentaron defendese y acabaron chupando hosties de tolos antidisturbios de la metá norte de la península.

Toos sabemos lo que güei ye Duro Felguera, asina que pa qué vamos falar. Depués de toes aquelles movilizaciones, encierros y güelgues de fame, queden poques coses. Un par de nomes pa la historia: Pedro de Silva y Eurometals (por si dalguién quier afondar un poco). Tamién dio pa una guapa canción de Dixebra y pa un documental, Resistiremos, que gran parte de los trabayadores ven como un engañu.

Los trabayadores teníen una montonera de material, y refugaren dos ufiertes de xente de reconocíu prestixu como yeren Javier Maqua y Juan Diego Boto p’adaptar la historia al cine, porque nun-yos paecía que fuere lo qu’ellos queríen: un documental que contare lo que de verdá pasara, hasta les últimes consecuencies. Acabaron dando-y tol material a una moza, fía d’un de los despidíos, que ficiera un par de cortos enantes, cola condición de supervisar el resultáu final.

La moza fizo la película, y salió-y una versión blandina, ensin apegu a la realidá, al quitar partes conflictives colos responsables políticos de la época. O seya, esborró’l conflictu y nun atacó a los responsables políticos, nun fuere a ser que nun la punxeren en nengún festival.

Gracies a esa película, premiada y bien vendía, esa moza agora tien un nome nel mundu del cine y una productora, y tien un sofitu importante pa siguir faciendo coses.

Pero una gran parte de los trabayadores siéntese estafada. Y por eso protestaron nel estrenu de la película, dende la cai.

http://docs.google.com/View?docid=dcfscs69_1cr7bz3

http://es.youtube.com/watch?v=_BTnM6Zsy3Y

La portuguesa HC acaba presentar un proyectu pa poner otra central de ciclu combináu n’asturies. Con esta van ser diez.

Quieren ponelo nel Muselón, al llau de la regasificadora y del proyectu que ta faciendo Endesa.

La xente llee poesía. Xente que conozo, llee poesía p’alliviase de la conmoción y el dolor, pa sacar d’ella dalgo asina como un espaciu, dalgo guapo en términos de llinguaxe –dixo- , que-yos dea acomodu y serenidá. Yo nun lleo poesía. Lleo los periódicos. Meto la cabeza nes sos páxines y cada vez m’encabrono más, cada vez me vuelvo más lloca.

Don DeLillo, Falling Man

La de coses que s’aprienden na rede cuando tas ociosu.

Déxovos equí un enllaz pa que calculéis cuantos cafes podéis tomar d’una sentada enantes de morrer.

http://www.energyfiend.com/death-by-caffeine/

“Gallegos y asturianos primos hermanos” diz el refrán, anque los d’esti llau de la Ría del Eo (por más que'l presidente Vicente s'emperre en llamala como los gallegos)siempre dicimos qu’ellos son los hermanos y nós los primos, porque siempre tuvieron más puxu y más güeyu pa too.

El periódicu trai güei la noticia de que’l grupu de la cervecera Estrella de Galicia quier mercar Agua de Cuevas, una filial de Corporación Alimentaria Peñasanta (Capsa).

La empresa Agua de Cuevas fundóse en Felechosa, nel añu 1994, y tuvo permal hasta que nel 96 la mercó Capsa (ún de los sos permalos xestores agora ye un destacáu políticu, por ciertu). Agua de Cuevas ye una de les meyores agües de tol mercáu español, pero nunca se gastó un duru en promocionala fuera de les llendes del Principáu, y por eso les sos ventes son modestes.

Na actualidá hai cinco marques d’agua que s’embotellen nel principáu: Fuensanta (Nava), Borines y Quess (Piloña), Galea (Siero) y Agua de Cuevas (Ayer). Y tan en proyeutu otres dos: ún nel conceyu de Sobrescobiu pa vender agua de Redes y otru nel parque natural de Somiedu: Fuente del Oso.

 http://www.lne.es/secciones/noticia.jsp?pRef=1808_45_573092__Economia-cervecera-gallega-hace-oferta-Capsa-para-comprarle-Agua-Cuevas