Escucando estrelles

Anque equí los llumbreres que manden digan qu’esa crisis que nun nomen va durar hasta la primavera del añu que vien, munchos de los espertos dicen que pue duranos guapamente hasta’l 2009. Hasta’l Bancu Central Européu dixo que va acabar subiendo los tipos pa frenar la inflación. Y como los españolinos nun aforramos nada, les perres coles que nos empufábamos pa les hipoteques yeren euros foriatos: americanos, franceses y alemanes sobre too… y esos agora nun vienen, asina que toles entidaes tan intentando garrar perres a los sos clientes por si nos próximos meses namás tienen lo de casa (esa ye la esplicación de tolos cartelos que cuelguen nos escaparates) y vendiendo les sos participaciones industriales. Anque, la verdá, nun tienen porqué danos pena: mientres que’l P.I.B. español quedó nun 3,8 %, los beneficios de los bancos esti añu espoxigaron un 20 % hasta setiembre.

Y ante’l bastiazu que s’acolumbra, España ye’l país de tola eurozona (xunto con Irlanda) que más competitividá esterior perdió dende 1999, namás y na menos que 15 puntos enteros. ¿El motivu? L’aumentu de los nuestros precios (por dexar munches propines, seique) y la cotización del euru. España tien, agora mesmo, el segundu mayor déficit esterior de tol mundu (tres los USA), según datos del Bancu d’España hasta setiembre, el déficit anda rozando los 75.500 millones, o seya 9,8 % del valor del nuestru P.I.B., colo que vamos andar raspiando los 100.000 euros a final d’añu (esti datu vamos poder confirmalu nun par de meses).

La Comisión Nacional de la Enerxía diz que les tarifes eléctriques tienen que subir polo menos el 4,1 pa igualar l’IPC . Tamién nos contaron los del Gobiernu que diba ser malo que subieren los salarios l’IPC, porque de xuru que va baxar depués. Dicho un par de díes depués de saber que, d’un añu pa otru los directivos de les empreses del IBEX tuvieron una suba nel sueldu del 33 %) y que, según un estudiu de BBVA fechu públicu esta selmana, la construcción va echar a la cai pal añu que vien a 90.000 persones y a otres 160.000 pal 2009… meyor despedilos que subi-yos el sueldu.

Según un estudiu de Caja España, Asturies va acabar l’añu con ún de los espoxigues más baxos de toles rexones españoles, namás un 3,2 % (sólo ganamos a Baleares). Y ya ye la rexón española que más mocedá pierde, polo que la población nun para d'avieyar… Por ciertu ¿cómo se pue llamar a una lleenda urbana que demuestra ser verdá?

Per nun vos preocupéis, que los nuestros estrategues empresariales (esos que lleven coles uñes clavaes na poltrona venti años) quieren abrir mercaos en Sudáfrica y Angola: siempre habrá otru más probe pa poder aprovechase d’elli.

Felices fiestes.

Les nueves tarifes del canon (esi impuestu revolucionariu pa compensar a los autores pola copia privada) que se van aprobar faen que pasen per caxa los móviles, MP3 y MP4, y que baxe la tasa de CD y DVD.

Ye un impuestu inxustu que fai pasar per caxa a xustos y a pecadores.

Asina que, cola hipocresía per delantre, por si acasu nos da por facer una cosa illegal (copiar una canción, por exemplu), van cobranos. Debe ser l’únicu casu nel que se pague por si acasu vas facer dalgo malo… ¿y nun me da eso pie a facelo como dalgo polo que ya pagué? ¿nun fai eso que los DVDs con sistema anticopia seyan illegales si yo quiero sacar otra copia pa min?

Enantes, nos tiempos de les cintes de casette, tol mundu facía copies y naide s’escandalizaba, asina que ya vamos poniéndonos al nivel de los usamericanos. Agora si merques un reproductor de CDs, pagues canon, y si merques un discu CD, pagues canon, y si tienes un negociu y prendes esi aparatu que mercasti y pones el discu na tienda, pagues canon (y anque pongas la tele, que ya paga canon, tu la prendas, vas volver a pagar canon).

¿Y a quien lo pagues? A una sociedá privada con ánimu de lucru como ye la SGAE, que ye la encargada de cobrar y xestionar esi canon, cobrando lo de los sos afiliaos, lo de los non afiliaos, lo de los foriatos y lo de la caxa los muertos… pa que dalguién, que tuvo un éxitu fai venti años y nun volvió calcala en tola so puta vida, pueda vivir de rentes, mientes que los que faen música/cine/lliteratura y se lo tan currando anguaño nun son quien a sacar la cabeza porque a los que manexen el cotarru nun-yos interesa.

http://blogs.publico.es/dominiopublico/184/el-canon-la-nueva-marbella-de-la-propiedad-intelectual/

Según Arthur Schopenhauer, hai tres clases d’autores:

1)      Los qu’escriben ensin pensar, escribiendo de memoria o direutamente a partir de llibros ayenos; son los más numberosos.

2)      Aquellos que piensen mientres escriben y piensen pa escribir; hai abondos.

3)      Los que pensaron enantes de ponese a escribir, y sólo escriben porque lo pensaron enantes; nun hai munchos asina.

La cita ye de los Manuscritos Berlineses, una guapa colección d’aforismos.

Como nel guapu y famosu cuentu de Nathaniel Hawthorne, la prensa anda contándonos estos díes la vida de John Darwin (hasta tien el nome guapu), un piragüista británicu al que dieren por muertu n’alta mar allá pol añu 2.002 y que se presentó de sutrucu nuna comisaría fai una selmana diciendo que nun s’alcordaba de nada (como aquel mozu del piano, ¿alcordáisvos?).

Pues resulta qu’agora acaben de descubrir que l’enigma namás yera un casu d’estafa. El tal John Darwin taba enllenu de deudes, asina que nun se-y ocurrió otra cosa que finxir que desapaeciera n’alta mar, ensin contar nada a la muyer, que s’enteró como una selmana depués de que taba vivu y decidió nun dicilo “por amor” y poles perres d’un seguru de vida que cobró.

El casu ye que depués de facese’l muertu, el paisanu viviera tol tiempu na casa d’al llau, como Wakefield, pero sabiéndolo la muyer. Les dos cases taben comunicaes por una buraca, que tapaben con un armariu pa que nun se notare cuando dalguién los visitaba.

Pero John Darwin nun taba namás trancáu en casa (lleendo, viendo la tele y faciendo bricolaxe), sinón que salía dalgunes veces a dar una vuelta (disfrazáu y faciéndose’l coxu). Y hasta mantuvo dalgún romance nel estranxeru. Dalgo que la muyer nun-y perdonó, y como tenía toles perres a nome d’ella, coló a vivir a Panamá, asina que’l probe John Darwin nun tuvo más remediu que resucitar porque nun tenía un chapu.

Los dos fíos de la pareya, que nun vivíen cola ma, nin siquiera lo sabíen, pero agora que se descubrió tol enguedeyu, acaben de sacar una nota diciendo que los pás que-yos tocaron son fatos dafechu y que nun quieren saber ná d’ellos.

A ver cuanto tarden en contanos la película.

Podríamos falar d’esa rellación qu’acaben de facer pública con edificios emblemáticos qu’hai que conservar y que llega un poco tarde pa dalgún que ta ya esgonciáu o que yá nun esiste, pero ya lo faen otros muncho meyor que nós:

http://www.lne.es/secciones/noticia.jsp?pRef=1846_52_586029__Opinion-Experimentacion

Asina que vamos comentar l’enésimu ataque dominical a la llingua, nel mediu de siempre (La Nueva Engaña) por parte, nesti casu, d’ún de los políticos más influyentes na solombra del Gobiernín, namás y na menos que’l cultu Fernández León:

Hay soluciones estatutarias suficientes para que el asturiano sea una lengua y sus hablantes tengan todos los derechos sin necesidad de reconocer la oficialidad.

Qué queréis que vos diga, si la prórroga del presupuestu rexonal fai que lo sienta la TPA y tol aparatu propagandísticu d’esta xente, y pa encima dalgún de los de la FADE tien qu’entamar a ponese les piles, bienvenío seya, a ver si entamamos ceo a ser un sitiu normal.

La Pantera de Tuilla, esi sindicalista pata negra al qu’agora tan faciendo la cama, ve premiáu’l so llabor con una medayina al Méritu nel Trabayu. Anda, toma y vete pa casina.

¿Esti nun morriera cuando diben a trancar el primer pozu? entrugará dalgún despistáu.

http://www.lne.es/secciones/noticia.jsp?pRef=1845_42_585693__ASTURIAS-Fernandez-Villa-Diez-Alegria-Esther-Alvarez-medallas-Trabajo

Home, quitando los sos méritos n’otros campos, nel trabayu-trabayu pocos tien, dicen los que lu conocen. Lleva tola vida viviendo de prebendes oficiales.

Una paradoxa del sindicalismu asturianu: cuasi tolos que representen y defenden a los trabayadores tan prexubilaos o xubilaos, colo que trabayadores-trabayadores nun ye que seyan muncho, por muncha medaya que-yos dean.

A ver si esto vos paecía bien

Tuvieron que ser los vecinos los que lo pararen

 http://www.lne.es/secciones/noticia.jsp?pRef=1842_40_584610__ORIENTE-estuco-color-restauracion-iglesia-Abamia-Corao-sobrevive-polemica

Y el llumbreras tovía lo defendía.

La orografía siempre xugó a la contra na nuestra tierra, lo que fizo que tovía anguaño pervivan restos de lo que foi la vivienda n’otra dómina (payoza, casa mariñana…), races autóctones (xalda, asturcón, casines, vaques roxes…), la escanda, vezos, vistíos, ferramientes, dances, canciones, lliteratura oral…

Esa circunstancia dábase ya enantes, lo que fizo qu’en munchos castros apaezan restos tardorromanos qu’averen la so ocupación hasta’l sieglu V, y hasta reocupaciones serondiegues. Un exemplu claru ye’l castru de Mohías, que se supón habitáu hasta’l sieglu IX.

Na Crónica Idacina, cuando fala de la ocupación de la península por vándalos, suevos y alanos nel añu 411 diz: Hispani per ciuitates et castella residui a plagis barbarorum per prouincias dominantium se subiciunt servituti.  Y cuando fala de les campañes de Hermerico del añu 430 diz: Sueui, sub Hermerico rege, medias partes Gallaeciae depraedantes, per plebem, quae castella tutiora retinebat, acta suorum partim partím caede, partim captiuitate, pacem quam ruperant familarum quae tenebantur redhibitione restaurant.

Na campaña de Teodorico II nel añu 457, el castru Coviacense (Valencia de Don Xuan, Lleón) taba habitáu, y presentó tanta resistencia que mereció una mención: Unum Couiacense castrum tricesimo de Asturica miliario a Gothis diutino certamine fatigatum auxilio de¡ hostibus et obsistit et preualet. quam plurimis ex eorum manu interfectis, reliqui reuertuntur ad Gallias.La Crónica Rotense d’Alfonso III , a la hora de  falar de les campañes d’Alfonso I diz: Qui (Adefonsus) cum fratre Foilane sepius exercitu mobens multas ciuitates bellando cepit, id est, Lucum, Tudem ( .. ) Cinasaria et Alesanzo seu castris cum uillis et uiculis suis omnes quoque Arabes interficiens X~pianos autem secum ad patriam ducens.

Mientres que la Crónica Ovetense diznos que:  (Adefonsus) simul cum fratre suo Froilane multa ad aduersus Sarracenos presa gessit atque plurimas cíuitates ab eis olim oppressas cepit, id est, Lucum, Tudem ( .. ) Septempublica et cunctis castris cum uillis et uiculis suis; omnes quoque Arabes occupatores supradictarum ciuitatum interficiens X~pianos secum ad patriam duxit.

Y munchos de los diplomes astures de los sieglos VIII y IX citen villes y castros, siendo dalgún de nueva construcción y dalgún d’orixe prerromanu.

Ye un de los reis del inxeniu de tolos tiempos, amás de ser un grandísimu escritor y un periodista brillante. El so llibru El Diccionariu del Diablu, del que saco la siguiente definición, foi/ye plaxiáu perriba y perbaxo ensin nengún tipu d’escrúpulu por humoristes y escritores ensin talentu. Siendo mui irregular, dalgunes definiciones son brillantes y otres déxennos una sonrisa amargosa na cara.

POLÍTICA: 1.- Llucha d’intereses enmazcarada d’alderique de principios. Xestión de los asuntos públicos con vistes al beneficiu priváu. 2.- Mediu de ganase la vida preferíu pola parte más degradada de les nuestres clases delictives.

Ehí te queda.

 Güei, La Nueva España trai coses interesantes, porque paez ser qu’un rellumu fízolos caer de la burra y descubrir la verdá (¿será que como los constructores nun tienen lliquidez tampoco paguen agora anuncios?).Que nun vos pille embaxo, pero paez ser qu’El ladrillo toma tierra en Asturias , asina qu’agora los constructores tan temblando y por una vez pónense a pensar: La patronal prevé que la edificación baje el 30 por ciento: casi 5.000 viviendas menos . Lóxico, cada vez son mas los rapazos que colen, y hasta dalgún prexubiláu prefier gastalo al sol d’otres tierres. Si amás nun hai madrilanos pa tantu pisu, por más que n’agostu tea esto petao.Y ye que les cases tan cares, anque siempre digan que la culpa tiénenla los dueños del suelu, la verdá ye que Los impuestos suponen el 17% del precio final de la vivienda . Mira tu, pero de too esto lo que más pena me da ye que La caída de ventas amenaza los ingresos fiscales del Principado Pues que vendan los Phaetones, digo yo que tovía-yos pueden dar algo por ellos, y la tele esa grandona que mercaron.A ver si vamos tener crisis namás los d’a pie.

Tres lleer el guapu post que colgó ayeri'l collaciu Trasgu d’Areces (http://trasgu.nireblog.com/post/2007/11/30/cine-asturianu-ulo), alcordéme d’El Vivo Retrato, peli maldita onde les haya y que foi ún de los primeros intentos serios de facer cine dende Asturies, pa lo que consiguieron enredar a tola intelectualidá astur de la época.

Asina, a lo tonto y a lo bobo, consiguieron la que ye una de les peores películes de tola historia del cine español, lo que nun ye pocu méritu.

Pa entamar ye una película de ciencia ficción, contada nun llargu flash-back. Arranca nel añu 2045, con un clon de Luis Eduardo Aute (faciendo de si mesmu) contándonos la historia. Y la historia ye que cuando la Segunda Guerra Mundial, les dos mayores autoridaes mundiales en clonación van nun barcu que naufraga y sólo queden ellos dos nun isllote. Al mayor cómelu un marraxu y l’otru llega a la costa asturiana (concretamente al famosu bar El Molín del Puertu) rescatáu por unos contrabandistes.  Como namás fala alemán, la única que se pue comunicar con él ye una de les putes del pueblu, que tuviera trabayando n’Hamburgo, y claro'l mocín y la mocina namórense. Andando’l tiempu, envede tener un críu polos métodos tradicionales, faen un clon nuna probeta nel llaboratoriu que monten na parte trasera d’un bar. Y asina entamen un negociu de clonación (¡a partir de semeyes, y camudando fetos de putes!), p’abastecer a families que perdieron a los fíos, amparaos pola mesma ilesia católica. El negociu van poder mantenelu hasta l’añu 1986, faciendo clones d’artistes (Errol Flynn, Paul Newman, Alain Delon, John Lennon…) cuando la policía-yos descubre’l pastel, y entós un clon d’Adolf Hitler (ún de los primeros trabayos del alemán) convéncelos pa qu’embarquen rumbu a Colombia…

El mesmu día del so estrenu, ya se dixo que yera la peor película de la historia, asina que ficieron un montaxe distintu pa facer la distribución comercial (quitando delles escenes). Nun ta editada en videu y sólo la pasaron una vez pela televisión, pero hai copies disponibles na mula, por si dalguién quier vela.

Al paecer, la película ta basada nun curtiu previu (La Cigüeña Bondadosa) de Mario Menéndez y Fran Vaquero, qu’algamó’l premiu al meyor curtiu nel certame IMAGFIC del añu 1980. Yeren tiempos difíciles.

Nos papeles principales taba Victoria Vera (faciendo dos papeles: muyer y clon masculín), Javier Loyola, Jack Taylor, Andreas Prittwitz (saxofonista de Los Locos, ente otros), Cesar Sánchez, Paco Hernández, Maria Elena Florez, Ceferino Cancio, Jose Antonio Lobato, Etelvino Vazquez, Araceli García, Rosabel Berrocal, Andrés Presumido, Clara Ferrer, Paco Sánchez, Hector Piñera, Oscar Rubiera, Enrique Tessier, y cola colaboración de Luis Eduardo Aute y de dellos periodístes como Juan Cueto (fai de guardia civil), Fernando Poblet, Manolo Ferreras, Javier Riollo, Juan Bonifacio Lorenzo, Francisco G. Orejas, amás de numberosos cameos de xente conocío (na época).

La decoración yera cosa de Chus Quirós, el montaxe de David Raposo, la música grabose nos estudios Eolo y amás del mencionáu Prittwitz, salen René de Coupaud y Pedro Bastarrica, ente otros.

El guión yera cosa de Francisco G. Orejas, Mario Menéndez y Fran Vaquero. Y la dirección, por dicir dalgo, firmola Mario Menéndez.

En resume: una peli pa frikis. Marca-yla na Mula. Merez la pena vela polos paisaxes y l’ambientación, mui reconocible, y por ver dalgún cameo de xente serio faciendo’l panoli.