Escucando estrelles

Una güeyada a les llistes pa les próximes elecciones que van presentar los partíos per Asturies da pena y dolor porque siguimos tamos peor que va venti años: son los mesmos nomes de va venti años, cola mesma falta d’idees d’entós (estes coses suelen dir siempre a peor), pero venti años más vieyos.

Toles llistes atufen a alcanfor y a ranciallo. Maxina-y per un momentu que les llistes son abiertes… de les papeletes que presenten tolos partíos n’Asturies ¿daríavos pa marcar a más de… tres?

Siempre qu’hai elecciones dalgún rescata’l tema de si sería meyor camudar el sistema electoral español de llistes cerraes por otru con llistes abiertes, onde los votantes puedan elixir direutamente a los que quieren que salgan, ensin mirar pal llugar qu’ocupen na llista. La llista abierta ye una ponte ente’l candidatu y el votante, que fai que los aparatos de los partíos pierdan poder, porque ya nun van poder controlar quien va salir dependiendo del puestu onde lu manguen.

El sistema de llistes abiertes furrula en sitios como Finlandia, Suecia, Suiza o Luxemburgu, ensin que vayan a la ruina nin nada paecío.  Les llistes abiertes pa lo que valen sobretoo ye pa que’l políticu trabaye y se faga notar na cai (non nes moquetes), colo que’l llau escuru ye cayer nes manes d’un grupu de poder o direutamente nel populismu.

N’España, como’l réxime electoral español nun se pue camudar por iniciativa popular, los cambios tienen que facelos los grandes partíos, dalgo que nesti casu nun van facer nunca motu propio porque ye un disparu direutu contra la so llinia de flotación, y nun van ceder poder nin argumentos disciplinarios.

Hasta agora nengún partíu políticu lo contempló. Diba ser prestoso escuchar les argumentaciones de dalgún.

Anque lo que de verdá diba prestar a esgaya yera que, por exemplu, les papeletes en blancu fueren pa dexar un escañu vacíu. Los parlamentos malpenes lo diben notar, porque la metá de les veces tan ermos, pero díbamos tener unos cuantos pelamangos menos chupando del bote y aforrar una montonera perres.

Esta selmana tráxonos la confirmación, via carbonu 14, de que'lcastru de Cuaña yá yera un llugar civilizáu nel sieglu IV Enantes de Cristu, muncho enantes de que vinieren los romanos, porque son d’esa época los conxuntos termales y les muralles (con un 95% de probabilidá ente’l 740 y el 380 E.C.).

Nun fai munchos años, dalgún de los historiadores de la mui noble y benemérita ciudá negaba perriba de toles coses que los ástures pudieren tener un ciertu grau de civilización: molaba más dicir que yeren unos brutos a los que los romanos civilizaron a base de cohortes. Asina sofitaben les tesis españolistes de Claudio Sanchez Albornoz. Nun vaya ser.

Asina que dalgo tan básico como ye’l carbonu 14 pon les coses nel so sitiu, nesi castru y nos de tola cuenca del Navia, anque dalgún de los lluminaries d’entós siga ocupando sitiu na so cátedra ensin problemes.

Son munches les posibilidaes enterraes nel Parque Históricu del Navia (ensin dir mas llonxe, non muncha xente sabe qu’al otru llau del ríu hai otru pobláu ximielgu ensin escavar). El casu ye que, si hasta agora naide quixo datar con una prueba tan básica como ye la del carbonu 14 les termes (conocíes yá dende’l sieglu XVIII) ye porque non interesaba.

Cuaña tien toles posibilidaes pa ser un focu turísticu de primer orde, namás que reconstruyendo una parte y escavar la otra, como se ta faciendo per toa Europa. Pero eso tampoco interesa.

Como diz el cantar, un pueblu ensin alcordanza nun tien futuru a la llarga.

Ye de chiste: la conseyería de Riopedre y los 69 asesores diznos que sobren maestros.

http://www.lavozdeasturias.es/noticias/noticia.asp?pkid=391648

A la hora recortar, siempre per baxo.

Cuando yo yera un rapaz, na España de 1931, vivía en Aranjuez un Maestru Nacional llamáu D. Justo G. Escudero Lezamit. A puntu de xubilase, diba a la escuela hasta los sábados pela mañana anque nun tenía clases porque ellí, nun despachín que-y cedieren, atendía la so biblioteca circulante. Yera de so porque creárala él solu, con llibros daos por collacios, instituciones y pás d’alumnos. Los sos clientes yéramos mozos y adultos, homes y muyeres a los que namás cobraba cincuenta céntimos al mes por prestar a caún un llibru a la selmana. Ellí descubría Dickens y a Baroja, lleí a Salgari y a Karl May.

Munchos años depués fici una visita a una bibliotequina d’un pueblu madrilanu. Nun paecía mui frecuentada, pero ficiérase cargu diba poco una moza titulada qu’inventara crear un esquinu esclusivu pa los críos con un cachu de moqueta pa sentalos. Al entamu les más acoyeron la idea con simpatía porque sirvía-yos de guardería. Tres recoyer a los sos fíos del colexu dexábenlos ellí un cachín mientres terminaben de facer les compres, pero cuando tornaben a por ellos, nun yera raro que los críos, intrigaos pol final, pidieren quedase un ratín más hasta finar el cuentu que taben lleendo. Na espera, les madres fisgaben, garraben dalgún llibru, mirábenlu y delles veces tamién elles quedaben enganchaes. Tiempu depués entéreme que la esperiencia diera los sos frutos: dalgunes llectores yeren muyeres que nunca lleeren un llibru enantes de qu’una simple moqueta en manes d’una bibliotecaria moza-yos descubriera otros mundos.

Y tovía más años depués descubrí otru prodixu nun gran hospital de Valencia. La biblioteca d’atención al paciente, cola qu’allivien les llargues esperes y angusties tanto de familiares como de los propios enfermos, creóse por iniciativa y voluntarismu d’una empleada. Con un carrín del supermercáu cargáu de llibros donaos, pasiándose peles distintes plates, con llargues pelegrinaciones y lluches cola alministración intentando convencer a burócrates y médicos non siempre abiertos a otres consideraciones, de que’l conocimientu y el placer que da la llectura pue ayudar a la curación, al cabu de los años llogró dotar al hospital y a los sos usuarios d’una biblioteca con un serviciu de préstamos y unes actividaes que-y valieren, además del prestixu y l’almiración de cuantos pasamos per ellí, un premiu del gremiu de llibreros en reconocimientu al so llabor en favor del llibru.

Evoco agora estos tres d’ente los munchos exemplos de tesón bibliotecariu, al entérame de que torna l’amenaza del préstamu de pagu. Preténdese obligar a les biblioteques a pagar 20 céntimos por cada llibru prestáu en conceptu de canon pa resarcir (eso dicen) a los autores del desgaste del préstamu. Quédome ablayáu y nun entiendo nada. Na vida corriente, el que paga una suma ye porque:

a)      Saca dalgo a cambiu.

b)      Ye oxetu d’una sanción.

Y yo entrúgome: ¿qué saca una biblioteca pública, una vez pagada l’adquisición del llibru pa prestalu? ¿O ye que debe ser multada por cumplir cola so misión, que ye xustamente ésa, la de prestar llibros y fomentar la llectura?

Por otru llau, ¿qué se-yos desgasta a los autores na operación? ¿Acasu dexaron de cobrar pol llibru? ¿Se-yos va lleer menos por ser llectures prestaes? ¿Van vender menos o va sirvi-yos de publicidá’l préstamu como cuando una fábrica regala los sos productos? Pero, sobre too: ¿Se quier fomentar la llectura?, ¿Europa prefier autores más ricos pero menos lleíos?

Nun entiendo a esta Europa mercantil. Personalmente prefiero que me llean y soi yo quien se siente deudor col llabor bibliotecariu na difusión de la mio obra.

Sepánlo los que, ensin preguntame, pretenden defender los mios intereses d’autor cargándose a les biblioteques. Firmé en contra d’esa midía en delles ocasiones y xúntome nuevamente a la campaña.

¡NON AL PRÉSTAMU DE PAGU NES BIBLIOTEQUES!

Estes pallabres qu’acabáis de lleer nuna mala torna, son de Jose Luis Sampedro, escritor, filósofu y bona xente.

Al escritor Terry Pratchett diagnosticaron-y l’añu pasáu que tien alzeimer, asina que prestaríame entamar esti añu con un pequeñu homenaxe al segundu autor más vendíu n’Inglaterra (tres la Rowling) en forma de cites:

Nun importa lo rápido que viaxe la lluz; siempre s’alcuentra con que la oscuridá llegó enantes y ta esperándola.

Del llibru El Segador.

Rincewind podía pidir piedá a gritos en diecinueve llingües, y simplemente gritar n’otros cuarenta y cuatro.

Del llibru Tiempos Interesantes.

A grandes rasgos, la única habilidá que los alquimistes d’Ankh-Morpork descubrieren hasta’l momentu yera la capacidá de convertir oro en menos oro.

Del llibru Imágenes en Acción.

Pero si vos prestaben los sos llibros, o queréis entamar con ellos, nun dexéis d’entrar na páxina de LA CONCHA DE LA GRAN A’TUIN: http://dreamers.com/mundodisco/

Son munches les maneres que pues escoyer pa contar una cosa o pa sacar a la lluz un datu. Si hai una subida del euribor, nesti requexu del mundu los periodistes van ponenos nel periódicu: los asturianos van pagar más poles hipoteques, con lletres gordones, seique porque nos va la marcha y nos presta sufrir (a lo meyor por eso votamos como lo facemos) o seique porque nos tomen por subnormales (que tamién).

Asina que puedo poner dalgo asemeyao a esto:  Asturies roza la converxencia económica, que ye un titular amable colos que nos gobiernen, y que cuando dalguién mira’l periódicu por altu da-y la sensación de les coses se tan faciendo bien.

http://www.lne.es/secciones/noticia.jsp?pRef=1864_45_591767__Economia-Asturias-roza-convergencia-economica-gracias-empuje-industria

O pues contar que tamos por debaxo de la media, malapenes perriba de Melilla. O contar que, de toles comunidaes de la cornisa cantábrica, somos los peores con muncho (Cantabria, Galicia y el País Vascu son la segunda, la tercera y la cuarta comunidá con más puxu, Asturies ye la númberu trece).

Nun ta de mas alcordanos que dende l’añu 1955, que foi’l puntu más altu, les tases de PIB por habitante nun dexaron de baxar hasta asitiase, nel añu 2000, nes cotes más baxes: un raquíticu 84 por cientu. Si agora tenemos una cota del 90 quier dicir que medramos seis puntos  en seis añinos.

Diz la estadística que los asturianinos teníamos una renta per cápita de 19.820 euros nel 2006 (la media nacional ta en 22.260 euros), o seya que tamos sestos pela cola (equí gánennos hasta Ceuta y Melilla). Pero lo peor ye que, pese al grandonismu xixonés de dalgún dirixente, ye que l’espoxigue en Renta per cápita (el segundu mayor del país) ye debíu al estancamientu de la población (hala, ya tamos otra vez coles lleendes urbanes).