Escucando estrelles

La paralización de la llinia Soto-Penagos por nun tener estudiu d’impactu ambiental ye una bona noticia, un garrar aire onde nun lu había… Tiempu llegará pa que cocinen a tou meter un estudiu d’impactu ambiental fechu a midía, pero mientres tanto demuéstrase que quixeron facelo a la trágala según la llei del embudu.

Anque REE y tol Plan del Gas Arecista acabe ganando, pasándose les lleis pol arcu de trunfu, nun ta de más allegranos pol respiru. Dende equí doi les gracies a tolos que llucharon porque la cordura asomare la tiesta.

Y pa celebralo déxovos una guapa viñeta d’un tal Cedeño, qu’ilustra dos maneres de suicidase. Xenial.

Echa a los que tan preparaos, al futuru (el cuarenta por cientu de tola mocedá en cinco años, ehí ye nada), a los descontentos que puen votar en contra del to chiringu (y que tan obligaos a empadronase n'otros sitios pa facer la vida).

Quédate colos tuyos, colos prexubilaos, colos xubilaos, colos sindicalistes que nun dexen el puestu nunca, colos empresarios que enxamás seríen nada ensin les perres que-yos disti, con tola prensa vendía por trenta monedes de plata y un contratu publicidá.

Gobierna, niega tolos datos de la realidá testerona que te quier poner nel to sitiu. Miente, engaña, manipula. Dinos otra vez que somos la comunidá meyor preparada contra la crisis. Que'l futuru ye estrozar tolo nuestro y poner equí les empreses que naide quier. Vuelve a contanos qu'hai que reformar la Sanidá porque nun hai cotizantes. Que vamos invertir en I+D+I.

Cuentanos otra vez lo de les lleendes urbanes, anda.

http://www.lne.es/secciones/noticia.jsp?pRef=2008042700_42_630928__ASTURIAS-Casi-19000-jovenes-abandonaron-Asturias-2007-para-trabajar-otras-comunidades

Hai coses que, cuando ún s’entera, dan ganes de glayalo bien alto.

Resulta que CajAstur, la entidá financiera que dicen que ye de tolos asturianos, tien un conseyu d’Alministración onde hai 30 persones: 8 d’Ayuntamientos (alcaldes), 7 d’entidaes fundadores (más políticos), 12 de los impositores (sindicaleros y families de políticos) y 3 empleaos (más sindicaleros). Estes persones tienen que xuntase cada ciertu tiempu pa rise de les comisiones que van cobrar a los clientes y coses asina. Por cada xuntanza cobren unes perres que salen de los aforros de tolos pininos que guardamos les perres ellí (hai dalgún que lleva con esti choyu venti años).

Pues resulta qu’esti vienres la xuntanza van facela en BARCELONA, esos trenta mas la Comisión de Control, porque como cuerre Fernando Alonso en Montmeló y tienen un contratu de patrociniu (como tien poco…), hai que paga-yos a tolos miembros del Conseyu d’Alministración (y pareya) un fin de selmana too pago (¿será por perres, ho?) con hotel de luxu, entraes a los entrenamientos y a la carrera. Guapamente más de cien persones. Nun se cuánto pue costar, nin nos vamos enterar pola prensa, pero pue salir por un güevu.

¿D’onde salen eses perres? De los prubinos d’a pie que tenemos los aforros ellí. Echando cuentes a min, por tener dos tarxetes y una cuenta con cuatro perres y dellos recibos, llantáronme l’añu pasáu cuasi setenta euros sumando toles comisiones.

Asina que, en cuantes tenga un día llibre, voi cancela-yoslo too pa dir a otru bancu. De xuru que los otros van facer lo mesmo, pero a lo meyor nun m’entero.

Y tengo la meyor escusa del mundu pa dexavos esta semeya, que me encanta.

Voi dicilo en voz baxa nesti día: hai imáxenes que valen más que mil palabres.

Echando una güeyada al manual pa facer la declaración de la renta d’esti añu, hai una cosina que me llamó l’atención: a partir d'esti añu toles aportaciones directes y les cuotes d'afiliación a los partíos políticos desgraven directamente de la base imponible.

Neso mira tu, punxéronse d’alcuerdu.

De xuro que si vos cuento qu’a lo meyor nesti requexu del mundu tamos vivos por culpa d’un marineru rusu vais tomame por cualquier cosa, pero asina son les coses. Ta contao milenta veces en llibros y películes, pero nun ta de más contalo una más.

Nel añu 1962 la Guerra Fría yera lo mas in porque tol mundu falaba d’ello. Los rusos llantaren plataformes de misiles en Cuba apuntando pa los USA, y el presidente Kennedy ordenó’l bloquéu comercial de la isla col portaviones USS Randolph y 11 destructores. Xusto nel momentu que taba de camín a Cuba un convoy de cargueros soviéticos con más misiles, escoltaos por submarinos B-59.

El sábadu 27 d’ochobre de 1962 foi’l día más caliente d’aquella crisis. A un avión espía U-2 derribáronlu sobre territoriu cubanu y a otru atacárenlu sobre Siberia aviones Mig soviéticos. Asina que l’Estáu Mayor de los USA taba baraxando invadir Cuba pa da-yos hasta nel carné d’identidá cuando la flotilla encargada del bloquéu atopóse col convoy de barcos soviéticu. Un destructor americanu dio l’altu a un cargueru escoltáu por un submarín B-59. El submarín llanzó entós un disruptor de sonar que’l capitán del destructor confundió con un torpedu, polo que soltó una montonera cargues de profundidá.

Lo malo ye que los tres submarinos qu’acompañaben al convoy soviéticu teníen torpedos con cabeces nucleares, y p’acabar de xoder la marrana teníen autorización pa usalos ensin necesidá de pidir autorización a Moscú (dalgo abegoso pola tecnoloxía de la época): bastaba namás que los tres principales oficiales del submarín dieren el vistu buenu.

El capitán del submarín atacáu, Valentín Grigorievitch Savitsky, sotricáu d’un llau a otru poles cargues de profundidá, pensando que la guerra yá entamara, convoca a los otros dos oficiales de mas rangu: l’oficial políticu Ivan Semonovitch Maslennikov, y el segundu capitán Vasiliy Alexandrovich Arkhipov. Según se contó depués, el submarín yera un caos: llevaben 17 hores somorguiaos y entamaba a falta-yos l’aire, dalgún marineru yá s'esbaneciera y tolos oficiales pidíen al capitán que soltare los misiles d’una puñetera vez.

Asina que, xuntaos los tres oficiales pa decidir qué facer, el capitán y l’oficial políticu voten por disparar (de xuro que yeren de la cuenca y del Soma: cago mio madre, van enterase esos mierdes de lo que ye un misil nuclear soviéticu) Pero’l nuestru héroe, Vasiliy Arkhipov votó que non y consiguió calmar al capitán, diciendo que yera meyor esperar a ver qué pasaba.

Al poco pararon les cargues de profundidá gracies a que dalguién dende Washington punxere dalgo de cordura, y el submarín pudo salir a la superficie. Y al día siguiente Khurshchev retiraba los misiles de Cuba a cambiu de que los americanos quitaren los que teníen en Turquía.

Y non hubo fueos artificiales nin fin del mundu. Non poles negociaciones de los xefes d’estáu, sinón porque nel submarín había un paisanu con sentíu común que vio lo que tenía que facer nesi momentu críticu.

Vamos ver si na negociación del nuestru Estatutu hai dalgún Arkhipov o van ser toos capitanes ineficaces y comisarios políticos hooligans, como tamos avezaos. 

http://en.wikipedia.org/wiki/Vasiliy_Arkhipov

Por eso siempre tuvi la sensación de que sólo se quexen los que saben llamentase pa sacar dalgún beneficiu y son capaces de consiguir que’l trucu-yos salga bien. Sólo protesten por necesidá psicolóxica o por avaricia. En cambiu, los que tienen motivos de verdá pa quexase suelen guardar silenciu, porque nun consiguen nada, como siempre pasa, nin siquiera la ocasión de quexase o de sacar dalgo nidio de les sos llamentaciones faciéndose oyer (…).

-La miseria vien en gran parte de dientro d’ún mesmu, y por regla xeneral nun ye culpa de nada nin de naide –dixo mio ma.

Como heredé esa forma de ser, nunca m’agradó la xente que sal alantre a base de quexes, nin siquiera los artistes. Cuasi tol arte d’anguaño ta montáu, non sobre’l talentu artísticu, sinón sobre la capacidá que pueda tener la xente p’andar con esi lloriquéu constante. Tol mundu lo considera natural, anque a los artistes sólo-yos sirve por un tiempu curtiu a lo llargo de la so carrera, y pue llegar a facelos famosos pero non interesantes nin reconocíos. Enantes, l’artista ruxía como un lleón; agora participa nel coru habitual de llamentaciones y d’esi mou consigue l’aplausu de so ma y una bona subvención que-y impide dir por ehí col culu al aire.

Gudbergur Bergsson

Como’l tecláu nun tien caracteres pa escribilo, nun pongo’l títulu orixinal. N’España ta traducío como La Magia de la Niñez, por Tusquets Editores. Ye una de les noveles más guapes que tengo lleíes, y la cita ta sacada de cuando’l protagonista, de críu, intenta entender porqué tolos años el pá-y fai un mui bon regalu per Navidá a los fíos del patrón pal que trabaya, siendo una persona rica a la que desprecia y ellos probes. La novela ye una torna a la casa d’una infancia mísero nun pueblín d’Islandia, intentando entender la personalidá de los pás col posu que dan los años, narrao ensin dramatismos, con sobriedá nórdica y sentencies xuicioses, lo que la fai más auténtica.

Per tolos llaos nos piden contención nos salarios nes negociaciones de los convenios colectivos, pa nun esfarrapar la economía (ye curioso que cuando va bien, a la patronal nunca-y da por repartir beneficios).

Güei súbennos el preciu del gas:

http://www.20minutos.es/noticia/368743/0/gas/natural/subida/

Hasta mio güela sabe que, si cobro lo mesmo y la cesta de la compra y los impuestos nun paren de subir, voi/vamos pasalo un poco peor.

http://www.lne.es/secciones/noticia.jsp?pRef=2008041200_45_626230__Economia-Alimentos-transporte-gastos-casa-suben-Asturias

Sobre too pa los prubinos con hipoteca:

http://www.lne.es/secciones/noticia.jsp?pRef=2008041200_45_626226__Economia-euribor-provisional-escala-maximo

Y pa los que queden en paru:

http://www.lne.es/secciones/noticia.jsp?pRef=2008041200_45_626228__Economia-CEOE-estima-habra-hasta-800000-parados-deterioro-economia

O seya:

http://www.elcomerciodigital.com/gijon/20080413/economia/crisis-trae-ajuste-cuentas-20080413.html

Parafrasiando al Kurt que xuxuriaba “l’horror, l’horror”, veome agora diciendo “la edá, la edá”.

Si fai venti años me ponen esta versión del Smoke on the Water, tocao con instrumentos musicales y orquestona, echo a correr. Y agora préstame. Tovía nun se si me gusta (si nun fuere poles voces, diba tenelo mas claro), pero préstame.

La edá, la edá.

Forges llantó güei esta guapa viñeta n'El País.

Según un censu del añu 2006, n’Asturies hai unos 15.000 horros, paneres y cabazos. Amás de molinos, batanes, ferreríes y demás inxenios hidráulicos.

Puen optar a estes ayudes toles construcciones que seyan d’enantes del añu 1940 y, esti añu, per primer vez ta claro’l sistema de valoración. La singularidá, el valir históricu y el mantenimientu del usu primitivu dan 30 puntos, 25 mas pol respetu al estilu na restauración, 15 puntos por vinculación a víes o núcleos históricos y otros 10 puntos si dexen visitalu depués de fecha la restauración.

Y una cláusula nueva que van tener a partir d’agora tolos beneficiarios d’ayudes por un importe de más del 20 % de la restauración: “autorizar de baldre  y per una sola vez, al Ente Públicu de Comunicación del Principáu d’Asturies, a la RPA y a la TPA, a la comunicación público, incluyía la puesta a disposición interactiva de les actividaes oxetu de subvención”. Dicha cláusula van dir poniéndola en toles actividaes subvencionaes pola Conseyería.

Pues bien, esti añu les perres destinaes pa restaurar horros, paneres y cabazos son menos de la metá del añu pasáu (que fueron 639.000 euros, por 280.000 d’esti). La culpa échenla a la prórroga presupuestaria (esa mesma que nun impide gastar 400.000 euros nun viaxe de placer pa cebar a los que firmaron l'ACEBA).

Ta claro qu’al ritmu que vamos (calculen que se pierden 300 horros, paneres o cabazos al añu) nun nos van durar muncho.

Siempre nos van poder esplicar cómo construyir choces africanes.

Esti articulín de LNEngaña de güei, del que dexo l’enllaz, fírmalu Jose Ignacio Gracia Noriega:

http://www.lne.es/secciones/noticia.jsp?pRef=2008040400_42_623612__Asturias-valor-economico-lengua

Hai ehí escondía una frase guapa que resume una de les obsesiones de Jose Ignacio Gracia Noriega:

“Ya no se trata de que la lengua sea la compañera del Imperio, sino que es un factor de la expansión económica. Para entender esto, basta con imaginarnos a un empresario asturiano escribiéndole a un cliente japonés en bable. Naturalmente, no se lo imaginan, porque una cosa es la bolera y otra los negocios”.

Ye una pena que tan altu señor (Jose Ignacio Gracia Noriega) nun vaya a lleer estes llinies, non porque nun sepa navegar pela rede (que tamién), sinón porque tan escrites nuna llingua de bolera. Envede suañar con un Imperiu onde toos-y rindan la debida pleitesía, tien que conformase con escribir (mal) nun castellanu garrulo les sos faltosaes, con una maquina d’escribir más vieya qu’él.

La pena ye que dalgunos dan-y más importancia de la que tien. Nun merecería nin estes llinies si nun fuere porque hai un periódicu que-y da una páxina entera, tolos díes.

Nun fai falta ser sordu pa nun oyer ruíos fuertes, lo único que fai falta ye qu’haya ruíos cerca de les tos oreyes. Los soníos pequeños oyíos xunto a les oreyes escuenden la tronada que resuena alrodiu. Nun fai falta ser ciegu pa nun ver; lo único que fai falta ye tar distrayíu. Una lluz más brillante averada pue apartar la nuestra güeyada d’una traxedia que ta pasando delantre nuestro.

(…) Los sabios de la tribu solíen mostrase partidarios de llargos periodos ensin ritos nin celebraciones, ensin acontecimientos públicos nin ceremonies, pa que’l pueblu nun se distraxera y asina s’amosare más abiertu a los signos de les coses que se taben acercando o que yá yeren presentes, ellí, agora. Pero estes suxerencies fueron escaecíes col pasu de los años porque la necesidá que’l pueblu sentía d’acontecimientos, de distracciones, yera mui grande, y peores los daños qu’ocurrieren si insistieren na so fame d’acontecimientos. Asina que la tribu perdió res a res la facultá de la tranquilidá comunitario que permitía una mayor percepción de los acontecimientos por venir, la receptividá a los signos, los augurios y les alvertencies.

Había una gran inquietu nes corrientes soterrañes de la era. La tribu sentíalo, pero nun lo sabía. Los mayestros de la tribu sentíenlo, sabíenlo, pero nun podíen identificar la so forma. Taben paralizaos pol futuru. Yeren como paisanos que miren hacia l’interior d’un abismu y yá nun saben si tovía tan mirando o si tan cayendo o si tan suañando. Éstes yeren les condiciones perfectes pa ser poseyíos pol abismu que taben mirando; hasta que se volvieren ún con él, y cayeren dientro, al traviés del autoencantamientu.

Cuando un pueblu percibe la so propia estinción ¿qué fai? O bien tírase a una orxía de distracción o bien trata de resistir la inevitable visión que fizo que sucediera lo temío, o nun fai nada, como si nada percibiera, o crea, nuna sublime obra de fiebre d’esperanza, obres máxiques pa disviar el desastre, o pa caltener la so memoria, de manera que la tierra nun escaeza que nel pasáu esistió y foi apasionáu baxo’l sol. 

Estes guapes palabres, que toi tentáu d’aplicar namás a Asturies anque falen de tolos pueblos, tan sacaes del llibru Starbook (traducíu al castellán como El mago de las estrellas), de nixerianu Ben Okri. Merez la pena.

Acabáramos.

Tan falando de desaloxar a un pueblu enteru por razones medioambientales. Como cuando Chernóbil.

¿En qué república bananera ta pasando esto?

Pues al llau de casa… Ente’l Gobiernín d’Asturies y l’Ayuntamientu de Carreño tan estudiando la posibilidá de desaloxar a la probe xente que queda na parroquia de Carrió, asitiada nel valle d’Aboñu. Ye una parroquia que foi rural nun fai tanto, anguaño estrozada por una depuradora, una térmica y una cementera qu’enllenaron de parques minerales y de tráficu de camiones la vida de tolos díes.

N’Asturies tamos avezaos a echar a la xente de les cases pa favorecer a los constructores, pero nun se yo si hai munchos casos de desaloxu d’una población entero por favorecer dellos intereses empresariales.

Déxovos equí un guapu vídeu de Pablo Quiroga sobre’l tema: