Escucando estrelles

Un perguapu documental sobre los cántabros. Déxolu equí en ocho partes.

Nun se vosotros, pero yo toi fartucu abondo de tolos gurús que nun paren d’ufiertanos agora soluciones a la crisis, de tolos que nos dicíen que ya lo víen venir… cuando velo venir vímoslo toos, pero naide nun fizo nada. A min dame que pensar que nengún d’ellos vaya a pasales putes daveres, son analistes de columna, de tertulia, ¿agora toca falar d’esto?, vamos a por ello, y con cuatro nociones yá tan pontificando (¿señálome?).

Naomi Klein o Leopoldo Abadía dan esplicaciones cencielles de tol problema, pa que tol mundu vea’l fedor nel que nos metimos. Cuando son los tiempos bonos, ye mui rentable’l dexar facer (laissez faire, diría dalgún), pero cuando les burbuyes españen, entós tiramos tola ideoloxía ultralliberalista a la basoria, quitamos la semeya de San Milton Friedman pa onde nun se vea, y llamamos a Papá Estáu pa que nos llimpie la mierda, nos dea la teta, y en cuantes teamos fartucos, nos dexe solos otra vegada pa siguir enredando.

Lo que pasa ye que si l’estáu s’endeuda pa salvar a los especuladores, facemos que’l presupuestu tenga que recortar per otros llaos, lo que tornao del romanu palatinu ye más o menos esto: el futuru va traenos recortes no social y privatizar lo poco que pue quedar de lo público. O seya, dexar en manes d’estos mesmos especuladores dalguna de les (poques) coses nes que tovía nun metieron la cuchara.

¿Ye llícito que l’estáu intervenga pa salvar especuladores? ¿Nun hai naide responsable de nada? ¿Ye normal qu’un altu directivu que fizo perder miles de millones tenga un contratu blindáu, enllenu cláusules que lu faen millonariu de toes toes? ¿Nun se pue sofitar a los que se van quedar ensin trabayu o na puta cai envede a toa esa morralla?

Y, por otra parte…

Especulación pura y dura: ensin regles, ganancia a mui curtiu plazu, traficando coles influencies a tutiplén… El modelu que prauticaben les grandes empreses tamién caló nes idees de la xente d’a pie. ¿Cuántes veces oyistis qu’hai qu’arriesgar pa ganar perres? ¿Cuántos nun conocéis que, teniendo un pisu, mercaben otru sobre planu por ganar perres?

El mio hermanu contóme fai bien poco una práctica que me paez que, por suerte, tovía nun llegó a Asturies, anque maxino que nun va tardar. Trátase de métodos de financiación alternativos, onde, siguiendo una estructura piramidal, caún de los que va entrando pon mil euros enriba la mesa y comprométese a meter otru par de primos que pongan otros mil caún. La gracia ta en que, el que ta na pica la pirámide cola cada poco, pillando la pasta de diez o doce inxenuos, dexando’l puestu a otru espabiláu que va controlar tol cotarru pa poder facer lo mesmo… O seya, como los trileros, pero xugando cola ambición de la xente: yo métome, dexo que m’estafen y depués voi estafar yo a otros.

Cuando me lo contaba yo ablucaba en colores… Si esto había una montonera xente que lo vía como normal nun m’estraña que llegaremos a esto… Si faigo una cadena de venta de pisos y vendo a otru que lu va vender… ye como’l xuegu de les sielles. Equí toos ganen, hasta que para la música y tan toos sentaos y queda’l curritu de pie. Esi del que se ríen toos, porque cuando les coses diben bien nun-y subieron el sueldu, y agora que van mal déxenlu na puta cai.

La culpa ye soltera, pero cortexámosla tiempu abondo como pa nun tener la nuestra parte de culpa…

Son una montonera les decisiones que tan sangrando a la xente del campu, si entrugues a dalguién que se dedique a ello, van contate que lo tan faciendo a posta. Que sobren, esa ye la sensación que tienen. Y asina ye mui duro trabayar tolos díes.

http://www.lne.es/secciones/noticia.jsp?pRef=2008092800_40_679906__Oriente-Doscientos-ganaderos-piden-dimision-Consejera-abocar-sector-desaparicion

Anque nun seya la única, lo de la llingua azul ye una de les crisis peor xestionaes. Nun ficieron nada y depués fízose demasiao grande pa que lo controlaran. Y agora engañen a la xente, pero entruga-y a cualquiera que tenga unes cuantes oveyes o dalguna vaca, a ver qué vos cuenten.

Llástima que seya xente a la que nunca se-yos entruga. Y qu'haya coses que nunca van salir en nengún llau.

N'otros llaos, pasa. N'Asturies, referencia mundial en tantes coses, ye dalgo imposible que pase. Ónde va parar.

http://www.lne.es/secciones/noticia.jsp?pRef=2008092700_42_679585__Asturias-Principado-asegura-incineradora-contaminara-leche-como-pasa-Francia

Una comunidá ye siempre la responsable de los sos gobiernos. Los que dirixen nun dexen de ser una minoría que representa’l desarrollu de la voluntá popular: la so actividá y, en mayor midía, la so pasividá.

Eso fai que la población vea razonable echar la culpa a los que dirixen en cuantes les coses vienen un poco torcíes. Que carguen con culpes que son d’ellos y culpes d’eses solteres que nun se sabe mui bien a quien espeta-y, y ellos tan ehí pa eso, cobren por eso.

Los que manden, acostúmense a un ritmu de vida al que namás pudieron llegar al traviés de la política (polos sos propios medios, como trabayadores por cuenta ayena, nengún) y creen una rede clientelar mui espesa. Asina que, cuando les coses entamen a dir mal, y nun podemos caltenelo, subimos los impuestos.

Camiento too esto porque, el mesmu ayuntamientu que tranca la piscina de Panchano (la única na zona centro) pa que la xente vaya a esa mierda de diseñu que ye’l Centru de Talasoterapia, una piscinona con ximnasiu (asina aumentamos les tases d’ocupación), envede recortar gastos que nun van a parte nenguna, quier subir los impuestos un 5 %.

http://www.elcomerciodigital.com/gijon/20080924/gijon/tasas-impuestos-municipales-subiran-20080924.html#

Polo dicho nel puntu 2, y por otres munches coses (y ensin falar d’Emtusa), tamos en contra dafechu.

A diferencia d’Alice, Garp yera un escritor de verdá, non porque escribiera meyor qu’ella, sinón porque sabía lo que tou artista tien que saber. Como dixo Garp: “sólo se medra llegando a la fin de dalgo y entamando otra cosa”. Anque los asina llamaos finales y entamos seyan ilusiones. Garp nun escribía más rápido qu’otros nin más qu’ellos; cenciellamente, siempre trabayaba cola idea d’acabar.

La cita ta sacada de The world according to Garp, la novela que diba facer famosu a John Irving, ún de los meyores novelistes d’anguaño, y en munches de les idees del protagonista sentimos al mesmu autor falándonos. Nun ye casualidá que Garp na so primer obra tamién fale de Centroeuropa, d’osos y de zoolóxicos, por exemplu.

Dicen que foi esta:

Los colores del prerrománico

Paez ser que tan morriendo tolos fresnos nel conceyu Somiedo.

http://www.lne.es/secciones/noticia.jsp?pRef=2008091900_41_676841__Occidente-fresnos-Somiedo-mueren

Anque nun lo paeza, la canción ye del añu 1989, y ye una canción guapa daveres d'Hertzainak, de la que grabaron tres versiones.

La lletra (que torné del castellán que m’apurrieron) paez una canción d’amor que recuerda muncho a la del “Love Will Tear Us Apart” de Joy Division. En realidá yera una canción que falaba de la disolución del grupu. Diz dalgo asemeyao a esto:

CONFESIÓN

Los meyores momentos nun duren,

al cabu y a la fin sólo somos humanos.

Depués de la calma llega la tempestá.

Nun va haber primaveres nueves pa nós.

El tiempu avanza ensin parar

y agora nun podemos mantener lo que fuimos

convertímonos en esclavos de la rutina,

cariñu, vamos lliberanos lo mas ceo posible.

Ensin danos cuenta convertímonos en vulgares.

ensin danos cuenta llegamos al llímite.

El mundu cayónos enriba,

cariñu, lliberémonos lo mas ceo posible.

Nun sabemos ónde ta lo meyor

busquémoslo n’otros sitios.

Si, prométote que nunca t'engañé

y tate seguru que nunca te podré escaecer.

Confieso que tu fuisti lo meyor de la mio vida

pero agora, mio mante, lliberémonos ceo.

(Si, prométote…)

   AITORMENA 

Ez dira betiko garai onenak azken finean gizaki hutsak garaBarearen ostean dator ekaitzaUdaberri berririk ez guretzatDenborak aurrera etengabianta orain ezin eutsi izan giñanarutinaren morroiak bihurtu garalaztana lehen baino lehen aska gaitezan.  Ohartu gabe arrunt bilakatuta Ohartu gabe heldu gara mugaraMundua jautsi zaigu gaineralaztana lehen baino lehen aska gaitzetan. Ez dakigu non dagoen hoberenaBila dezagun beste lekuetan.   Bai, zin dagizut ez dizudala inoiz gezurrik esan etazaude zihur ezin izango zaitudala ahaztu inoizaitortzen dut izan zarela  ene bizitzaren onenabaina orain, maitia lehen baino lehen aska gaitezan. [Bai, zin dagizut...]   

Déxovos equí la versión “culta” (grabada pol cantante d’Hertzainak col cuartetu de cuerdes Guridi) pa que la cantéis a karaoke na so versión orixinal. J

Como siempre tamos contra la censura, en toles sos formes.

Presta lleer coses de xente intelixente, anque nun teas mui d'alcuerdu colo que dicen nin del discursu qu'arrastren.

http://www.lacartadelabolsa.com/index.php/archivo/articulo/horizonte_temporal/

Pues equí hai destinaos diez milloninos d'euros que van desapaecer pel mesmu llau qu'aquelles subvenciones del carbón de les que nunca mas se supo, les de los camiones tapaos dende'l Musel y la pistolina nel caxón.

http://www.lne.es/secciones/noticia.jsp?pRef=2008091700_35_676055__Gijon-Industria-espera-documentos-Mina-Camocha-para-autorizar-abandono

Primero Paz, y depués Gloria.

Amén

(munchu güeyu, qu'hai spóilers a maza)

Lo que ta pasando estos díes cola polémica d’El Musel ye una ópera bufa, que pue aspirar guapamente al guión a la meyor comedia del mundu mundial.

Vamos intentar facer un mapa.

Un grupu, Los Verdes, que cuando taba xuncíu a IU nel gobiernu, miró pa otru llau col estrozu que se diba facer nel Musel, cola Zalia, la Regasificadora y tolo que vien tres d’ello, tuvo la santa decencia de denunciar el sobrecoste. Como Saul (¿foi él?) cuando cayó del caballu y vió la lluz, asina mesmo, pero ensin epifanía.

Un sobrecoste de más de 250 millones d’euros, ensin que naide diere, a día de güei, una esplicación clara y cenciella, pa qu'hasta los que nun somos políticos podamos entendela. Y depués quieren dir a la UE a pidir financiación pa esos sobrecostes engañando, diciendo que son una segunda fase de la obra. Y too pa llucrase cuatro empreses, garra les perres y corri, enmierdando pa siempre a los que vivimos equí. Oye, mira, pues non.

En nenguna cabeza cabe que se pueda perder tanta pasta, si hasta robaben fierro a camionaos como salió denunciao fai bien poco (y nun se supo namás, por cierto). Estes coses sábense con tiempu abondo, anque depués nos dosifiquen la información al restu los mortales (tan mui estudiaos los tiempos d’apaición en prensa) porque nun tamos preparaos pa saber la verdá.

O yeren unos incompetentes, toos, por nun tener capacidá técnica pa prevelo, o sabíenlo dende l’entamu y miraron pa otru llau. Nun se yo que ye peor.

Pero la culpa siempre ye d’otros: de les oles, de la piedra, de HC, de los contratistes o de los políticos, cuando hai un tíu supuestamente preparáu, que ye direutor del Puertu y ye amás el que ta dirixendo les obres (too queda en casa, bobu)

Y ye too pa poner la puñetera regasificadora. El puertu importa-yos una mierda.

Y entós a qué coyones hai qu’andar cada poco subiendo la lluz (van proponenos otra subiduca pa final d’añu) porque dicen que-yos cuesta perres porque la dan barata, cuando añu tres añu espublicen una suba nos beneficios. Si tan usando pola cara los recursos (montes, ríos, mar, tol tarrén que-yos peta) gratis, vamos anda. Equí recomendamos lleer un clásicu: http://ateyavana.nireblog.com/post/2007/07/26/la-tarifa-electrica :-)

Agora solicitaben namás 135 millones d’euros a Europa, y Europa, esi ente abstractu y omnipotente, díxonos que non. Porque si presupuestes una obra en 580 millones y depués gastes la mitá mas, dalguién tendrá la culpa, como en cualquier otra cosa: el que lo estudió, el que lo sacó asina, el que se presentó con esa ufierta (y se comprometió a facelo) y el que nun controló’l gastu… porque si toos lo sabíen, entós tamos falando d’otra cosa muncho más fea. Y entós lo que fai falta ye lluz y taquígrafos.

Porque por cinco mil euros que dicen que costaba un caxetín de tráficu, mandamos a dos sindicalistes a la cárcel ¿Alcordáisvos?, pero claro foi culpa d’un funcionariu bobu.

Pero pa qué protestáis, cabrones, que les perres nun les ponemos nós, que nos vienen de fuera, d’esi ente abstractu y omnipotente que pare les perres por ciencia infusa.

http://www.lavozdeasturias.es/noticias/noticia.asp?pkid=444710

http://www.elcomerciodigital.com/gijon/20080913/gijon/considera-suicidio-frenar-musel-20080913.html

Tan toos d’alcuerdu… ¿Còmo nun van a tar?

Ta complicao metese en xardines, porque l’Autoridá Portuaria tien una xestión propio, y un conseyu qu’asume les consecuencies de lo que firma ¿non?. Y pa saber quién ta, tornamos a los clásicos: http://ateyavana.nireblog.com/post/2007/11/30/conseyu-dalministracian-de-lautorida-portuaria-de-xixan (ye que toi que lo vierto).

O seya, toos a tirar del tetu. ¿Cómo nun van a tar d’alcuerdu?

Pue haber sanciones europees, y paez que diba ser bono que les hubiera, más que nada pa que nun se nos quede cara de tontos y poder siguir confiando en qu’hai xente serio faciendo política, anque tean lo más cerca en Bruseles.

Pa más información: www.losverdesdeasturias.org.

Lo normal, nun país normal, diba ser criminalizar al infractor y non al que se chiva. Pero esti nun ye un país normal ¿nun t’enterasti tovía?.

Hai quien diz que lo que ficieron Los Verdes foi mover una palanca en Bruseles p’algamar unos puestinos n’Asturies, que tol mundu conoz lo que dixo Arquímedes: daime una palanca y fáigome Alministración.

Si hasta’l mesmu fíu de Chus Pesetes, tercer teniente d’alcalde de Xixón, (tres consultar colos tres asesores, tres, que-y pagamos ente toos) contólo estos díes: él opúsose a la variante 3C cuando yeren oposición, y depués, cuando taben nel gobiernu, aprobáronla, lo que demuestra que taben dende l’entamu col Superpuertu y tal, y tal. Podéis lleelo equí (alvierto que contién material esplícitu):

http://www.lne.es/secciones/noticia.jsp?pRef=2008091500_35_675392__GIJON-pugna-politica-sobre-Musel-genera-duros-ataques-entre-gobierno

Oye, mira tu, xusto cuando tan cortexando la FSA ya IU, a piques d’averase al altar y dicir “si, quiero”, van Los Verdes y ponen pates arriba too cola denuncia.

¿Y esto va tener consecuencies pa lo otro? Home, pues claro, agora ta nidio que va haber pactu, pa poder neutralizar a los que más te tan tocando les narices. Si los d’IU nun son namás qu’una noveluca desfasada de Pirandello, cuatro personaxes en busca d’autor que se vienden por un platu llenteyes, qu'o firmen el papelín o llévalos la corriente.

Y si pa firmalu hai qu’escaecer lo d’El Musel, la Zalia, Caliao, la incineradora, la llingua y nun se cuantes coses más, namás te voi dicir: ónde hai que firmar, coño, que yo tengo familia.

http://www.elcomerciodigital.com/gijon/20080912/politica/astucia-izquierda-unida-20080912.html

Asina que la solución ye nidia. Habemus pactu y facemos lo que nos da la gana. Los del SOE echen la culpa a los d'IU-BA-LV y estos echen la culpa los de verde, y éstos echen la culpa a una escisión, y la escisión echa la culpa al funcionariu bobu que foi a echar l’espediente por trámite alministrativu.

Ente toos la mataron y ella sola morrió.

La única que tuvo bemoles pa denunciar toa esta cuchera dende l’entamu foi Alicia Castro cuando taba en Madrid, y dieron-y hasta nel cielu na boca. Acabó dexando la política y pastoriando los negocios de la familia (a los que tamién dieron cachu, por ciertu).

Triste, mui triste too.

Les coses son mas o menos asina. Ensin Musel nun hai regasificadora, y ensin regasificadora…

O seya, que se va facer de toes toes.

ADDENDA: http://mas.lne.es/foros/index.php?showtopic=13162 (porque nunca ta de más alcordanos de delles coses)

Más vieyo que la tos, vamos, pero furrula.

Un anunciu fechu pa homes. Vamos vender un coche, asina qu’enllenamos la pantalla de tíes buenes, pero nesti casu, l’axencia de publicidá (RJ41) fizo una cosa digna.

Mangaron una montonera cámares nel SWATCH FIVB Beach Volley Worl Tour, en Gstaad, Suiza, y envede grabar a los xugadores, grabaron a les cheerleaders. Depués ficieron un montaxe en blanco y negro y amestáron-y el God’s gonna cut you down, de Johny Cash, y quedo-yos una cosina aparente y guapa de ver, tal qu’esto:

Quédate col datu qu’en Suiza tamién hai vóley-playa.

Yá ves cuantes coses apriendes echando una güeyada per equí de vez en cuando.

Salú.

Un anunciu cachondu pal fin de selmana.

Creo que’l grau d’aburrimientu, si pudiera midise, ye güei muncho más grande qu’enantes. Porque les profesiones d’enantes, al menos la mayoría, yeren impensables ensin una dedicación apasionada: los llabriegos namoraos de la so tierra; mio güelu, el magu de les meses guapes; los zapateros que conocíen de memoria los pies de los vecinos del pueblu; los guardaviesques; los xardineros; supongo qu’hasta los soldaos mataben entós con pasión. El sentíu de la vida nun yera un interrogante, formaba parte d’ello, d’un mou mui natural, nos sos talleres, nos sos praos. Cada profesión creara la so propia mentalidá, la so propia manera de ser. Un médicu nun pensaba como un llabriegu, un militar comportábase d’un mou distintu a un mayestru. Güei somos toos iguales, toos xuncíos pola común indiferencia pal nuestru trabayu. Esta indiferencia pasó a ser pasión. La única gran pasión colectiva del nuestru tiempu.

De Milan Kundera puen dicise munches coses, y non toes bones, pero la verdá ye que nos sos testos atopamos munches veces idees, coles que pues tar d’alcuerdu o non, que pues entesacar guapamente como cites. Esta ye de la novelina L’identité, del añu 1997, y apaez en llabios de Jean-Marc, ún de los protagonistes, nuna charra cola moza nun restaurante.

Una buena

(nótese la demonización de lo verde)

http://www.lne.es/secciones/noticia.jsp?pRef=2008091000_35_673783__GIJON-presidente-Musel-admite-riesgo-niegue-fondos

Y una mala

http://www.lne.es/secciones/noticia.jsp?pRef=2008091000_41_673873__Occidente-Asturias-quedara-sanean-advierten-propietarios

El neolliberalismu consiste no siguiente: llibertá de mercáu cuando tengo beneficios, too pa min y l’estáu qu’estorbe lo menos posible, y cuando vienen mal daes, hai que sofitame, pa qué pago impuestos.

Agora paez ser que’l turismu, lo qu’esperaben que fuere la gallina los güevos d’oru pegó un baxón. Y si lo demás diba mal, que’l sector servicios falle (dalgo, por otra parte, esperable por cualquiera menos polos aficionaos que nos gobiernen) déxanos en porrica.

Asina qu’hai que meter perres nel sector, ACEBAlos bien, vamos facer un Cluster, ser pioneros n’España (siempre somos pioneros, nun sé cómo nos arreglamos) na busca d’un turismu de calidá, de rentes altes, xente que pueda viaxar cuando-y da pola gana y que gaste a tutiplén.

Mirái la noticia (la risión ye lo de la Cuenta-Aforro-Turismu, institucionalizar el calcetu)

http://www.elcomerciodigital.com/gijon/20080905/asturias/principado-trata-atajar-crisis-20080905.html

Si’l turismu baxa ye porque la xente viaxa menos, porque nun hai pa too y si pues aforrar con un bocata pa qué vas pagar a preciu d’angula un menú del día malu de los que te tiren en tantos llaos. Y qué pue ofrecer una rexón que vendía un paraísu natural y ta perdiéndolu a marches forzaes, colos iconos de los cartelos esbarrumbándose, y marafundiando tou esi patrimoniu.

Envede respetar la natura que nos queda, sofitar l’arquitectura tradicional que nun vas atopar en nengún otru sitiu, poner en valor xoyes como Obona o los castros, facer valir la gastronomía autóctono, y ofrecer al que vien de visita un productu diferenciáu, que si nun vien equí nun lu va atopar en nengún otru llugar del mundu, vamos marafundiar una montonera perres en nada.

Enterramos dineru nun enxendru como La Laboral, en maquetines del Niemeyer y en chorraes, y asina nun vamos a nenguna parte.

Bienaventuraos seyan tolos Cluster, tolos estudios y xornaes, porque asina los de siempre van siguir comiendo.

¿Y d’ónde van salir agora les perres pal turismu? Pues de la cultura, que la Conseyería ye la mesma y tien el presupuestu zarráu.

Si ye que nun aprienden, anque-yos metas el focicu dientro.

Mientres, ensin que la xente fale d’ello (ye meyor contar quién ye más romanu, si Xixón o Uviéu http://24horas.excite.es/cultura/68888/ASTURIASGijon-El-nuevo-museo-en-Tabacalera-se-retrasa-ante-los-nuevos-hallazgos-arqueologicos-de-origen-romano) nuna  de les rexones onde más se lleva gastao en cursinos, xornaes y estudios de seguridá llaboral del mundu mundial, llevamos yá siete muertos trabayando no que va d’añu.

Pero tranquilos, que toca Rudezmu, y va traenos promeses y titulares a esgaya.

Vamos alcordanos:

http://ateyavana.nireblog.com/post/2007/11/08/sobrel-turismu

Rafael Chirbes ye’l meyor novelista español d’anguaño. Nun almito discusión posible. Tien la técnica y l’instintu de los novelistes de raza, d’esos qu’habría que declarar en peligru d’estinción, y amás d’eso tien el puntu de mira bien asentáu.

Cola so novela última, Crematorio, retrata una radiografía de la España más actual, personificada na figura d’un constructor (cómo non), Rubén Bertolomeu, que ta omnipresente nel relatu, peñeráu pola mirada de tolos que lu arrodien.

Les siguientes cites son del últimu soliloquiu, que l’autor pon en boca del propiu Rubén:

…Toles mocedaes se paecen, ye na maurez cuando entama la diferencia, diferenciámonos en cómo resolvemos la comezón orixinaria, en cómo abordamos el cruce de caminos que se nos presenta a la salida de la mocedá. El tiempu que perdimos. La imposibilidá de recuperalu. Nun tener claro si lo que ficimos foi perder o ganar. Ún nunca sabe si hai otra forma de maurecer que nun seya perdiendo tou esi tiempu, emperrándose neses discusiones pour critiquer le monde avec désinvolture, col yo siempre por delantre, el yo como bandera y como oxetivu, anque la vida  depués acabe discurriendo al marxe

.… Pero agora l’ideal, la mentira qu’ún se forma na tiesta, yá nun tien que ver col arsenal de valores románticos d’entrega, sacrificiu, too aquello que pañó de les lliteratures del XIX el republicanismu español, y que cultivamos los antifranquistes de la mio xeneración y los de la xeneración de Matías: lo d’agora tien que ver col egoísmu, colo qu’ún quier tener, col consumu, coles campañes que diseñen les axencies publicitaries. Son, quiérase o non, ideales más miserables, anque quién sabe si tamién menos dañinos y que, anque paeza estraño, resúltenme más cercanos, a lo menos más comprensibles. Si dalgo deprendí ye que l’home nun ye exautamente dueñu de los sos actos

.… Los nuestros pás falábennos de les privaciones que padecieren na guerra, del fríu, de la fame, de la sarna y los pioyos, pero nunca de los tipos a los que colocaron de cara a un paredón pa pega-yos un tiru na nuca. Ficiéronlo. La guerra foi asina. Sólo cuando había que matar el pollu o’l coneyu en casa dicíen qu’ellos preferíen nun velo, o, pol contrariu, desplegaben una maña que naide-yos sospechaba na familia pa matar al animalín, y que falaba d’un personaxe desconocíu, al que, nel so día, la fame, el deber, la coldicia o'l mieu obligaron a facer dalgunes coses que taben muncho meyor escaecíes.

… La construcción, quiciabes la meyor metáfora del capitalismu. Medrar supón destruyir, y d’eso nun tengo yo la culpa: medrar ye non parar de medrar y construyir ye nun parar nunca de destruyir. Destrúyese dalgo pa construir dalgo. ¿Acasu nun destruyíen los que facíen los bancales? Ficieron polvu los montes. Agora llamáislo arquitectura seca, arquitectura de piedra seca, veneráislo, sagrada, milenaria arquitectura de piedra seca, y pretendeis que la Unesco la declare patrimoñu de la humanidá, pero ésa foi la gran destrucción de la viesca mediterránea primitiva, del maquis orixinariu. Fai milenios que se destruyi esta tierra. Nun queda nin un rincón que nun hayan violao. Mira equí mesmo, dientro de Misent. Nun hai más que lleer los periódicos. Nuna obra, destruyen una villa romana, destruyen un hamán almohade, una muralla califal (…) Eso dicen los periódicos que facemos los constructores. Como si l’hamán o la muralla califal nun destruyeren enantes la muralla o’l templu que los precedió. ¿Cuál ye l’estratu nel que s'atopa la verdá?, ¿en cuál debería la humanidá habese parao pa ser auténtica?.

La meyor de toles llectures (y fueron munches) del branu, ensin dulda.

Na nuestra lliteratura echamos en falta dalgún novelista que siga la estela de Rafael Chirbes, l’únicu que ta faciendo dalgo asemeyao nes nuestres lletres ye Xandru Fernández.

Ye lo que tien tener historia, tires un edificiu y apaecen siempre coses debaxo.

L’apaición d’una fonte prima hermana de la de Foncalada, pero datada cuatro sieglos enantes, fizo que güei LNE se tire a tumba abierta a les especulaciones.

Presta, porque consulten a espertos que-yos piden calma (la postura de Narciso Santos Yangüas ye modélica), y ellos ponen les sos declaraciones, pero como de lo que se trata ye de vender periódicos pasen del tema ,y d’ehí’l despliegue informativu.

Mola más el rollu romanu, ensin dulda. Ye otra vuelta más, el desaniciu de lo nuestro.

Pongo tres enllaces. Hai mas.

http://www.lne.es/secciones/noticia.jsp?pRef=2008090400_31_671988__OVIEDO-fuente-siglo-revela-Oviedo-existia-epoca-romana

http://www.lne.es/secciones/noticia.jsp?pRef=2008090400_31_671990__vuelco-historia

http://www.lne.es/secciones/noticia.jsp?pRef=2008090400_31_671993__OVIEDO-hermana-gemela-Foncalada

A la fin, la Vetusta provinciana de Clarín nun taba tan llonxe.

PD: Pasé de poner l’articulín de Neira, que se pague la medicación solu.

Una piecina más d’esti mecanu que nos tan armando en secretu ensin que la xente faiga nada.

Van construyir un gaseoductu ente la regasificadora del Musel y Llanera ensin sacar estudiu d'impactu ambiental, nin coses rares d’eses que nun faen otra cosa que retrasar y encarecer les obres.

Pa los que tengáis un minutín, llee-ylu por favor, que ta too perclaro y la verdá ye que nun tien desperdiciu nengún

http://www.boe.es/boe/dias/2008/08/19/pdfs/A34928-34931.pdf

Total, consultáronlo a la Conseyería de Mediu Ambiente y nin siquiera contestó, pa qué,  y entrugaron tamién a un par d’asociaciones ecoloxistes (nuna rexón onde hai bayura d’elles, pa encargar les coses a una u otra según lo que quieras algamar) tamién ensin respuesta. Asina que pa que van gastar tiempu namás por una franxa de 24 metros d’anchu QUE DIBA ATRAVESAR XUSTO PEL MEDIU’L YACIMIENTU DE VERANES (y la Dirección Xeneral de Patrimoniu Cultural de la Conseyería de Cultura nun s’entera y diz que tiren p’alantre, que llibren) hasta qu’un llistu del Ayuntamientu diose cuenta, tres pasar por milenta manes enantes. Menos mal.

Y con tantes instituciones cebaes, al final van tener que ser los paisanos los que lo defendan.

http://www.elcomerciodigital.com/gijon/20080829/gijon/parroquias-afectadas-gaseoducto-musel-20080829.html

O seya, los paisaninos d’a pie contra toles Alministraciones interesaes.

David contra Goliat, again.

Lo fácil que  ye confundir cultura con erudición. La cultura en realidá nun depende de l’acumulación de conocimientos, hasta en delles materies, sinón del orde qu’estos conocimientos guarden na nuestra memoria y de la presencia d’estos conocimientos nel nuestru comportamientu. Los conocimientos d’un home cultu puen nun ser mui numberosos, pero son armónicos, coherentes y, sobre too, tan rellacionaos ente si. Nel eruditu, los conocimientos paecen almacenase en cuartos separtaos. Nel cultu distribúyense d’alcuerdu a un orde interior que permite’l so camudar y el so guañu. Les sos llectures, les sos esperiencies alcuéntrense en formientu y enxendren de contino riqueza nuevo: ye como l’home qu’abre una cuenta con interés. L’eruditu, como’l coldiciosu, aforra’l so patrimoñu nuna media, n’onde sólo hai mugor y repetición. Nel primer casu, el conocimientu enxendra’l conocimientu. Nel segundu, el conocimientu amiéstase al conocimientu. Un home que conoz dafechu tol teatru de Beaumarchais ye un eruditu, pero cultu ye aquel qu’habiendo namás lleío Las Bodas de Fígaro dase cuenta de la rellación qu’esiste ente esta obra y la Revolución francesa o ente’l so autor y los intelectuales de la nuestra época. Por eso mesmo, el miembru d’una tribu primitiva que tien del mundu diez nociones básiques ye más cultu que l’especialista n’arte sacru bizantinu que nun sabe nin frir un par de güevos.

Y más alantre, al falar d’un autor que pon cuarenta y cinco cites nun artículu d'ocho fueyes, diz:

Al mio xuiciu la mayoría d’eses cites yeren innecesaries. La cultura nun ye un almacén d’autores lleíos, sinón una forma de razonar. Un home cultu que cita muncho ye un incivilizáu.

El peruanu Julio Ramón Ribeyro ufierta, nel so llibru Prosas Apátridas, el posu qu’una vida lliteraria-y dexó de la vida. Son meros apuntes a vuela pluma d’un paisanu que vive y respira lliteratura, y munches veces fáense cansinos, pero son auténticos y aporten coses siempre.

A esti incivilizáu polo menos.