Escucando estrelles

Cuando toles empreses teníen beneficios, austeridá salarial pa los trabayadores, agora pienso que nun van tardar tanto en pidinos recortes.

Los primeros son los políticos, pa dar exemplu.

Ehí tenemos a tolos diputaos predicando conxelación salarial y austeridá. Pa dar exemplu conxelen el sueldu y publicítenlo en tolos medios. Nun nos cuenten que cola mesma subieron toles dietes y complementos, amás de delles ayudes pa cuando queden na cai, con una mano delantre y otra na cartera.

El probe presidente del parlamentu autonómicu catalán tuvo que quitar tol tunéu que punxera al A-8 oficial, delles chorradines (escritoriu, reposapiés, tele, mp3 y bluetooth ) que costaben 9.200 euros. Y too porque la xente nun entiende qu’anque teamos en crisis y nun paren de vendenos austeridá, hai que dar imaxe.

Lo de la imaxe sábelo meyor el presidente de la Xunta, Emilio Pérez Touriño, qu’acaba mercar un coche valoráu en 480.000 euros pa incorporar a una flota onde yá tien aparcaos un par d'A-8 y un A-6 (esti debe ser pa cuando va pelos pueblos).

Austeridá, austeridá.

En Madrid, por exemplu, cientu y pico cargos municipales suben el sueldu, pero según la propaganda nun ye eso, sinón una actualización de les subes del añu 2006 y 2007. Ye lo mesmo que, cuando n’época electoral ta prohibío por llei inaugurar obres, y lo que faen son “puestes en valor” con pinchinos y discursos. Lo mesmo, pero mui distinto, ónde va a parar.

En Castellón gasten catorce kilos de los d’enantes (queda meyor que dicir 84.480 euros) en corbates (nun lo toi inventando, tenéislo equí: Levante-El Mercantil Valenciano)

Y depués, claro, hai que subir los impuestos. Tan espetándonos subes en tolos impuestos como sin dase importancia. Qu’aprieten el cintu otros.

Y ye que mola ser políticu.

Tomemos como exemplu un conceyu que tien namás 2.300 habitantes redondiando pa riba, con un trabayu de la hostia y tres conceyales lliberaos que cobren ente los tres 200.000 euros. Ye nun conceyu con quesu:

http://www.lne.es/secciones/noticia.jsp?pRef=1859_40_590395__Oriente-vicealcalde-Cabrales-URAS-cobrara-86000-euros-20000-regidor

Como nun da pa too, ta claro, hai que volver a subir les tases.

Cuando miramos el telediariu nun podemos facer otra cosa que plasmar ante la imaxe anacrónica d’una reina española vistía de negro y con mantiella, recibiendo una petición por carta entregada en mano por una madre, como si fuere una imaxe de fai quinientos años. Yera una ma lluchando pol fíu, un cabu al que la censura militar quería llaminar y que, gracies a eso, salió absueltu. Asina lo vendieron, polo menos.

Asina que nestos tiempos escuros, onde siguimos falando de la Cruz de la Victoria, del paro, de la sumisión incondicional a la monarquía, de Franco y de García Lorca, de censura, del Opus, de refundación del PC… dame por pensar que tamos tornando p’atrás.

Paez que da mieu’l mañana.

Una viñeta xenial de Manel Fontdevila 

 Y otra mui bona del arxentinu Alberto Montt

Quiciás la degradación de la política se dea porque los políticos creen tar solos y piensen sólo en sí mesmos.

Vittorio Foa, foi ún de los insobornables Pepito-Grillo de la izquierda italiana, dende’l fascismu hasta que morrió esta selmana, con 98 años.

Tres lleer nel selmanariu Les Noticies de güei l'editorial-columna de Bello y l'artículu de la páxina 3, toi por meteme a Pitonisu.

Y yá que tamos con clásicos, déxovos otru pal finde. Ye un videoclip hindú que "homenaxea" al Thriller de Michael Jackson. Ensin comentarios. Val más que lu veais ensin la música, aviso.

Apaeció la primer novela escrita n'asturiano nuna casona de Llanes. Ye del añu 1875 y d'una muyer, coses les dos qu'a dalgún van fadialu nel alma.

A saber cuantes otres xoyes queden metíes en desvanes y horros, y nun van apaecer nunca. 

http://www.lne.es/secciones/noticia.jsp?pRef=2008102400_40_688713__ORIENTE-Hallada-casona-Llanes-primera-novela-publicada-asturiano-1875

Tan tolos ingredientes nel platu, y paez ser que sólo fai falta esperar un poco a que faga flo-flo y preparen meyor el terrenu.

Y la verdá ye que los que lo necesiten como’l comer (nunca meyor dicho), como bones meretrices, van salir baratos. Acepten espulsar a los tres de Cangas, que se negaron a dexar al mafiosu dientro’l piteru, y van llavar la cara diciendo que mientres ellos tean nun se va facer Caliao nin Regasificadora nin dalguna cosina más, ensin contanos que namás va ser un aplazamientu, porque agora mesmo nun hai un duru nin pa pipes, pero que la cosa sigue p’alantre.

Asina que nos próximos díes, atentos a los artículos d’opinión y a les noticies.

Unes veces va danos ascu y otres prestanos. Tai atentos.

El recuerdu ta nel escaezu y l’escaezu nel recuerdu, pero la incertidume atópase en toes partes, porque cada época tien namás una carauterística determinada, y quien cree recordar dos époques y ser testigu de les tresformaciones tien una esperiencia basao namás nel recuerdu.

Gudbergur Bergsson

Hubo un tiempu nel que Kundera gustábame muncho. Yera un autor bonu eleváu a la categoría de best-seller , lo que facía que munchos renegaren d’él. Agora fai tiempu que nun lu visito, pero se que llegará’l día nel que torne a lleelu, porque últimamente nun faigo namás que relleer, y entós voi probar si de verdá aguanta.

Dícennos que foi un chivatu del réxime comunista. Que nel añu 1950, cuando yera delegáu de la residencia estudiantil de Praga, foi a dormir ellí un tal Miroslav Dvoracek, axente doble americanu, y unes hores dempués yera deteníu y condenáu a 22 años de prisión (cumplió catorce). La noticia llanzola’l selmanariu políticu Respekt, y aportaba copia de la denuncia policial, col nome de Kundera, o seya que tien los parabienes del gobiernu de turnu. Hai quien diz que ye falsa.

Foi Oscar Wilde, o polo menos dizse que foi él, el que dixo que la moral nun pinta nada na lliteratura, y menos tovía pinten les opciones étiques de cada autor. Pa la lliteratura de Cela nun tien importancia que fuere un censor, un chivatu y un rastreru qu'usó la so revista Papeles de Sor Armadans pa congratulase con tolos autores exiliaos, cuando yá entamaben a soplar nuevos aires. Pa los poemes d’Alberti nun pinten nada que fuere chequista o que señalare dende la columna “A paseo” a xente que dempués apaecía nuna cuneta con un tiru na nuca. O que Gunter Grass fuere ún de los bigardos de les mocedaes de la SS. O a lo meyor si.

A lo meyor díbemos poder resumir la cultura del sieglu XX como’l serviciu convencíu al poder establecíu, analizando depués el so altor profesional en función d’a qué réxime s’abellugare, dende la comodidá de tiempos meyores.

¿Va afectar eso a la llectura que voi facer andando’l tiempu de La Broma, por exemplu? Ye inevitable que si, paezme, pero non por eso voi dexar de relleelu.

El pasáu solombriegu tien la forma de toles coses que nunca ocurrieron. Invisible, derrite’l presente como fai la lluvia al traviés de la piedra calizo. Una biografía de la señardá. Guíanos como’l magnetismu, un tórculo del espíritu. Asina ye como ún rómpise por un golor, una palabra, un llugar, la semeya d’un monte  de zapatos. Pol amor que tranca la boca enantes de pronunciar un nome.

Nun presencié los acontecimientos más importantes de la mio vida. La mio historia más fonda debe contala un ciegu, un prisioneru del soníu. Dende detrás d’una paré, dende debaxo de la tierra. Dende la esquina d’una casa pequeña nuna islla pequeña que sal como un güesu de la piel de la mar. 

Hai coses que me llamen l’atención: andando Rede alantre, entérome que la novela Pieces en Fuga (Fugitive pieces), de la canadiense Anne Michaels,  tien una adaptación al cine estrenada esti añu, polo que va lleganos dientro poco (si tien ésitu).  Asina que póngome a buscar el llibru pa relleelu, porque tengo’l recuerdu de que foi ún de los llibros más guapos que tengo lleíos, y nun lu atopo por parte nenguna. Maxino que-y lu dexé a dalguién (suelo dexar los llibros que más me presten, ergo pierdo munchos) pero nun m’alcuerdo d’a quien foi.

D’esi llibru agora namás me queda esti cachu, que me gustó tanto daquella que copié na mio llibretina de cites. Espero que la peli seya bona, pa que polo menos reediten el llibru y asina poder mercalu otra vez.

pa unes coses, pa otres non.

http://www.lne.es/secciones/noticia.jsp?pRef=2008101300_35_684830__Gijon-delegacion-Ayuntamiento-visita-Palestina

Cuando diben a Cuba enllenaben un avión, o seya que pa esto más o menos.

Si hai dalguién anguaño faciendo lletres comprometíes dende la izquierda, a la espera de que los RATM nos reeduquen (Re-Education (through labor)) ye la rapera marsellesa Keny Arkana, la componente más destacada del colectivu “la rabia del pueblu”.

Tres delles maquetes, el so debut oficial “Entre Ciment et Belle Etoile” (2006), tenía una canción tremenda, que foi’ primer single y foi abondo pa llanzala a la fama gracies al boca a boca. Titúlase La Rage, y equí teneis el videu subtituláu.

Esti añu hubo una campaña orquestada dende’l Frente Nacional pa desviar esi tema hacia los sos intereses fascistes, y la reacción de la cantante foi dexar les coses clares n’otra canción, directa contra Le Pen. Titúlase “Le Front de la Haine” (el frente del odiu).

Tien otra canción, Victoria, que fala de los desapaecíos n’Arxentina. Tamién ta subtitulada.

Pequeña pero matona. Pue contase de munches maneres, pero asina queda claro de sobra.

Tengo un collaciu que flipa con tolo franchute. Siempre me ta pasando nomes de grupos y cantantes prestosos, hasta llega a cánsate tantu entusiasmu. Foi’l que punxo tres la pista de Manau, que nun pararon de sonar una temporadina na mio casa. Lo último que me pasó, y nunca-y lo voi agradecer abondo, foi Keny Arkana. Gracies, Carlos, va por ti

Tola vida fuere un chupatintes que nunca trabayara. Carretare llibros un tiempu ensin facer namás, pero salió más finu que l’alambre. Metióse bien ceo na política y agora taba nel Parlamentu, chupando del tetu de la rexón, que tien mas caldar que’l d’una paisana de pueblu.

-Voi llamalu, yá veréis –repitió.

Toos sabíamos que nun-y diba facer casu. Dende que taba nel Parlamentín, solo viniera a vela una vez pa da-y el pésame cuando’l paisanu yá vistía’l piyama de pinu. Llegara nun cochón que paecía una nave espacial, tou traxeáu y con dos mozos detrás, altos y foscos como castiellos. Toos llevaben gafes de sol, como nes películes qu’echen pela tele. La verdá ye que, envede meter mieu, como yera avientu, foi una risión y dio que falar abondo. Y eso que’l sobrín de Nemesia siempres daba la impresión de tar namás a un par de mítines del franquismu.

Ye dalgo que dicen siempres los poetes y les canciones: trenta años, anque seyan de democracia, pa dalgunos nun son nada. 

La cita ye del llibru “Los meyores cuentos del mundu y otres proses mongoles”, de Jose Luis Rendueles, un conxuntu heteroxeneu abondo. Ta sacao del cuentu “Pa nun char gota”, pa min el mas frescu del llibru.

Armando Besga Marroquin ye historiador y un indixenista confesu, si podemos dicilo asina, les sos tesis sobre la pervivencia de los pueblos del norte peninsular hasta los tiempos de la reconquista tomábense en coña nun fai tanto… pero agora mírenlu con dalgo de respetu.

Ayeri dio una charla nes xornaes sobre La Carisa, onde dixo qu’ente los romanos y los musulmanes, depués de que nos colonizaran suevos y vándalos y de que fueren derrotaos nel añu 456 polos visigodos, estes tierres entamaron “una independencia escura y tranquila”, como si s’escaecieren d’ellos. Y recalcó qu’especular coles razones poles que se rebelaben nun lleven a parte nenguna, qu’eses coses hai que demostrales.

http://www.lne.es/secciones/noticia.jsp?pRef=2008101000_46_684015__Sociedad-y-Cultura-Adios-topico-astures-primitivos-indomitos-siglo

Y equí debaxo déxovos un artículu d’opinión con una hipótesis interesante.

http://www.lne.es/secciones/noticia.jsp?pRef=2008101000_52_684106__Opinion-Abamia-monte-Vindio-orografia-toponimia-fuentes-documentales-deduce-Abamia-pudo-guerras-cantabras-torre-vigia-cerco-monte-Vindio

L’Homón de Faro

Lo que llamen L’Homón de Faro ye una muralla de 400 metros de llargo, enfrente del campamentu romanu de La Carisa, construyío ente finales del sieglu VI y entamos del VIII, tovía nun lo tienen claro, pero que s’asienta sobre restos de tiempos romanos nos que se ve un gran incendiu y destrucción. Lo que más llama l’atención ye que ye mui asemeyada a otra muralla nel Camín de la Mesa, que tien la mesma datación.

El problema de la datación ye una de les conclusiones a les que quieren llegar les xornaes que se tan faciendo anguaño, porque pudieron llevantase pa enfrentase a los visigodos o a los árabes, y la cosa cambia. Lo que nun cambia ye qu’había un frente común (son les dos principales víes d’entrada  de l’antigüedá) y una estratexa que sal d’estructures de poder preesistentes.

http://www.lne.es/secciones/noticia.jsp?pRef=2008100900_46_683624__Sociedad-y-Cultura-misterios-Homon

Resumiendo, ayeri ún de los ponentes dixo que quien diseñara la barrera defensiva yera un militar profesional que sabía muncho de defensa.

Nel Homón de Faro había dos barreres defensives, la primera nun llegó a acabase, pero la segunda impresiona. Nel estremu inferior tenía una torre de planta cuadrada que podía tener unos seis metros d’altura y dos o tres pisos. La muralla yera de módulos, y la defensa basábase en que l’enemigu nun podía desplegase, y sólo podía atacar pel puntu más seguru, colos llaos bien protexíos.

Hai quien diz (Jorge Camino) qu’hai restos de combates, zapa ya incendios, anque otros dicen qu’hai muncha munición de cantos rodaos ensin usar, polo que lo más seguru llegaren a un acuerdu pacíficu. Estes piedres yeren pa llanzales con hondes o fustíbalos (hondes con palu que puen llegar a los doscientos metros).

Los arqueólogos qu’estudien el campamentu romanu de Curriechos, al pie de La Carisa baraxen agora que pudo ser la plaza fuerte que los ástures atacaron cuando la rebelión contra Publio Carisio, nel añu 22 enantes de Cristo, agarrándose a una cita de Dión Casi que diz: los astures, en cuantes fueron rechazaos del llugar fortificáu que taben asediando y, tres ello, vencíos en combate, ya nun siguieron la sublevación y sometiéronse nel intre.

http://www.lne.es/secciones/noticia.jsp?pRef=2008092800_38_679900__CUENCAS-astures-enfrentaron-tres-ocasiones-romanos-Carisa

Anguaño tan a la espera de saber si los restos de quema qu’hai baxo l’Homón de Faro son d’época romana daveres, porque entós taríamos falando d’una llinia defensiva que tuvo n’usu más de setecientos años, dalgo polo menos curioso y que pue llantar munches duldes.

  Castru de San Isidru

El castru de San Isidru, na raya ente los conceyos de Samartín d’Ozcos y Pesoz, paez ser que yera un puestu de control militar romanu fundáu na segunda mitá del sieglu I, asitiáu nuna posición estratéxica, a 35 kilómetros de la costa (una xornada de viaxe) y nel mediu d’una zona d’esplotaciones auríferes. Anque nun tendría sitiu pa más de doscientos homes, les muralles impresionen, con unes bases que lleguen a los tres metros.

http://www.lne.es/secciones/noticia.jsp?pRef=2008092000_46_677261__Sociedad-y-Cultura-Isidro-segunda-Carisa

La estructura defensiva del castru de San Isidru yera una muralla con paséu de guardia pol so recorríu interior, un par de foxos y delles llinies de piedres llantaes pa fadiar l’acercamientu.

Estes pizarres llantaes na tierra siempre llamaron muncho l’atención, porque son úniques en tolos castros ástures. Sirvíen pa caltener a la caballería y pa fadiar a la infantería, colo que yera fácil descontar un ataque por sorpresa.

Lo que llama l’atención ye que nel sieglu I los romanos tovía se comportaben como invasores militares nun territoriu hostil.

 Castiellu de Gauzón

Nel Peñón de Raíces, punxéronse a escavar los restos del castiellu de Gauzón, el sitiu onde dicen que se cubrió de xoyes la Cruz de la Victoria. La cruz trai una fecha,  añu 908, pero’l carbonu catorce ye testerón y diznos que la fortaleza ye del sieglu VII, o seya que doscientos años enantes de lo que se pensaba.

http://www.lne.es/secciones/noticia.jsp?pRef=2008092100_36_677501__Aviles-tesoros-castillo-Gauzon-Puzle-ceramica-piedras-huesos-restos-organicos

Y esti yacimientu pue quedar desfechu pola Ronda Norte que va comunicar el Puertu d’Avilés cola Variante.

http://www.lne.es/secciones/noticia.jsp?pRef=2008100300_36_681568__AVILES-hallazgos-castillo-Gauzon-Carisa-permiten-reinterpretar-Asturias-medieval

A lo meyor, la historia nun foi como nos la contaron hasta agora.

Lleer el restu d'esta entrada

Hernán Casciari ye arxentinu y corresponsal d’El País. Ye l’autor d’esti testu, que yaá tien un tiempu, y que me mandaron nun d’esos correos-spam que tan de moda y paecióme prestosu, asina que traduzo y cuélgovoslu debaxo.

EL MUNDU SEGÚN CASCIARI

Lleí una vez que l’Arxentina nun ye meyor nin peor qu’España, sólo más moza. Gustóme esa teoría y entós inventé un trucu pa descubrir la edá de los países basándome nel “sistema perro”.

Dende chicos esplicáronnos que pa saber si un perru yera mozu o vieyu había que multiplicar la so edá biolóxica por 7. Nel casu de los países hai que dividir la so edá histórica ente 14 pa saber la so correspondencia humana. ¿Llioso?

Nesti artículu pongo dalgunos exemplos reveladores.

Arxentina nació en 1816, polo tanto yá tien 190 años. Si lo dividimos ente 14, Arxentina tien “humanamente” alredor de 13 años y medio, o seya, ta na edá del pavo.

Ye rebelde, paxera, nun tien memoria, contesta ensin pensar y ta llena d’acné (¿será por eso que-y dicen el graneru del mundu?)

Cuasi tolos países d’América Llatina tienen la mesma edá y, como pasa siempre nestos casos, formen pandielles.

La pandiella del Mercosur son cuatro rapazos que tienen un conxuntu de rock. Ensayen nun garaxe, faen munchu ruíu y enxamás sacaren un discu.

Venezuela, que yá tien tetines, tá a puntu de xuntase a ellos pa facer los coros. Na realidá, como la mayoría de les moces de la so edá, quier tener sexu, nesti casu con Brasil, que tien 14 años y el miembru grande.

México tamién ye adolescente, pero con ascendencia indíxena. Por eso ríise poco y nun fuma nin un inofensivu porru, como’l restu de los sos collacios, sinón qu'esmordigaña peyote, y xuntóse con Estaos Uníos, un retrasáu mental de 17, que se dedica a atacar a los rapazos famientos de 6 añinos n’otros continentes.

Nel otru estremu ta la China milenaria. Si dividimos los sos 1.200 años por 14 sacamos una señora de 85, conservadora, con golor a pis de gatu, que se la pasa comiendo arroz porque nun tien –por agora- pa mercar una dentadura postiza. La China tien un nietu de 8 años, Taiwan, que-y fai la vida imposible.

Ta divorciada dende fai tiempu de Xapón, un vieyu bederre, que se xuntó con Filipinas, una mozuca calentona, que siempre ta dispuesta a cualquier aberración a cambio de perres.

Depués, tan los países qu’acaben de cumplir la mayoría d’edá y salen a pasiar nel BMW del pá. Por exemplu, Australia y Canadá, típicos países que medraron al abellugu de pá Inglaterra y ma Francia, con una educación estricta y coqueta, y qu’agora fáense los llocos. Australia ye una atolinada de poco más de 18 años, que fai topless y tien sexu con Sudáfrica; mientres que Canadá ye un rapaz gai emancipáu, qu’en cualquier momentu adopta al bebé Groenlandia pa formar una d’eses families alternatives que tan de moda.

Francia ye una separada de 36 años, más puta que les gallines, pero mui respetada nel ámbitu profesional. Tien un fíu d’alpenes 6 años: Mónaco, que va camín de ser putu o baillarín… o les dos coses. Ye amante ocasional d’Alemania, camioneru ricu que ta casáu con Austria, que sabe que ye cornuda, pero nun-y importa.

Italia ye viuda dende va tiempu. Vive cudiando a San Marino y al Vaticano, dos fíos católicos idénticos a los mellizos de los Flanders. Tuvo casada en segundes nupcies con Alemania (duraron poco: tuvieron a Suiza), pero agora nun quier saber nada colos homes.

A Italia prestaría-y ser una muyer como Bélxica: abogada, independiente, qu’usa pantalón y fala de política de tu a tu colos homes (Bélxica tamién fantasea a veces con saber preparar espaguetis).

España ye la muyer más guapa d’Europa (posiblemente Francia-y faga sombra, pero pierde espontaneidá por usar tantu perfume)… Anda muncho en tetes y va cuasi siempre borracha. Polo xeneral, déxase follar por Inglaterra y depués fai la denuncia.

España tien fíos per toes partes (cuasi toos de 13 años), que viven llonxe. Quierlos muncho, pero molesta-y que, cuando tienen fame, pasen una temporada na so casa y abran la nevera.

Otru que tien fíos pel mundu ye Inglaterra. Sal en barcu pela nueche, tírase a les fáciles y a los nueve meses apaez una islla nueva en dalguna parte del mundu. Pero nun se desentiende d’ella. En xeneral, les isles viven con la ma, pero Inglaterra da-yos de comer. Escocia ya Irlanda, los hermanos d’Inglaterra que viven nel pisu d’enriba, pásense la vida borrachos y nin siquiera saben xugar al fútbol. Son la vergoña de la familia.

Suecia y Noruega son dos lesbianes de cuasi 40 años, que tan buenes de cuerpu, a pesar de la so edá, pero nun-yos dan bola a naide. Garren y trabayen, pues son llicenciaes en dalgo. Delles veces faen tríu con Holanda (cuando necesiten porros); otres, fáense les histériques con Finlandia, que ye un tipu mediu andróxinu de 30 años, que vive solu nun áticu ensin amoblar y nun para de falar pel móvil con Corea.

Corea (la del sur) vive pendiente de la so hermana esquizoide. Son mellices, pero la del norte tomó llíquido amniótico cuando salió del úteru y quedó idiota. Pasóse la infancia usando pistoles y agora, que vive sola, ye capaz de cualquier cosa.

Estaos Uníos, el retrasadín de 17, vixílala muncho, non por mieu, sinón porque-y quier quitar les sos pistoles.

Israel ye un intelectual de 62 años que tuvo una vida de mierda. Fai unos años, Alemania, el camioneru, nun lu vió y llevólu por delantre. Dende esi día Israel púnxose como llocu.

Agora, envede lleer llibros, pasa’l tiempu na terraza tirándo-y piedres a Palestina, que ye la moza que llava la ropa na casa d’al llau.

Irán ya Irak yeren dos primos de 16 que robaben motos y vendíen los repuestos, hasta qu’un día robaron-y un repuestu a la motoneta d’Estaos Uníos y se-yos acabó’l negociu. Agora tan comiéndose los mocos.

El mundu taba bien asina, hasta qu'un día Rusia xuntóse (ensin casase) cola Perestroika y tuvieron como docena y media de fíos. Toos raros, dalgunos mongólicos, otros esquizofrénicos.

Fai una selmana, y gracies a un despelote con tiros y muertos, los habitantes serios del mundu descubrimos qu’hai un país que se llama Kabardino-Balkaria. Un país con bandera, presidente, himnu, flora, fauna… y ¡hasta xente!.

A min dame un poco de mieu qu’apaezan países de corta edá, asina, de sópitu. Que nos enteremos de costáu y que, hasta tengamos que poner cara de que yá sabíamos, pan un quedar como ignorantes. Y yo entrúgome:

¿Por qué siguen naciendo países, si los qu’hai tovía nun furrulen?

Lleer el restu d'esta entrada

Datos del INE(www.ine.es):

• Asturies foi la comunidá que menos medró n’España nel añu 2007.
• La segunda peor comunidá (tres Baleares) nel espoxigue del PIB nel periodu 2000-2006 (2,81 % frente al 3,36 % de la media hispana).
• Tenemos la tasa de natalidá más baxa de toa Europa. Tamién tenemos la tasa de mortalidá más alta. Tenemos el menor númberu de fíos por muyer n’edá fértil d’Europa (0,97). Asina que’l nuestru saldu vexetativu (nacimientos menos muertes) ye’l mas ruin del país y el terceru peor de toa Europa si queremos mirar a otros países (gánennos Bulgaria y Letonia).
• Un informe del BBVA (Competitividá, espoxigue y capitalización de les rexones españoles) colócanos nun puestu 15 ente 18 en “prosperidá rexonal y meyora nel bienestar de la población” (baxamos dos puestos con respeuto al estudiu del añu 1986). Según esti estudiu vamos en caída llibre en “infraestructures y accesibilidad”, en “Recursos humanos” y en “Innovación tecnolóxico”. Y hasta se permiten afirmar qu’Asturies tien ún de los peores entornos productivos de tol país.

Yá veréis la que s’arma cuando s’entere Areces.

Nel Centru Cultural e Social de Caixanova en Vigo, y hasta’l mes d’avientu, pue vese una guapa esposición: Galicia 25. Unha cultura para un novo século, organizada pol Consello da Cultura Galega pa celebrar el so 25 aniversariu y tamién el 25 aniversariu de la Lei de Normalización Lingüistica. Patrocina Caixanova, y na inauguración taben el presidente de la Xunta y la conseyera de Cultura. Lo mesmo qu’equí, vamos.

La evolución de la producción lliterario en Galicia foi clara. Nel añu 1975 produxéronse 68 llibros en Galicia, mientres qu’anguaño les 47 editoriales que tienen censaes producen unos cinco llibros diarios. En datos, nel añu 2006, l’Asociación Galega d’Editores espublizó 1.600 títulos, de los que’l 83,1 yeren en gallego, con una tirada media de 2000 exemplares.

Una viñeta xenial d'Eneko

El comité veterinariu de la UE, nuna xuntanza fecha’l 29 de setiembre, reconocía que la enfermedá de la llingua azul ta descontrolada y nun se va poder erradicar en años.

Equí, que furrulamos como si fuéremos ayenos al restu del mundu, nun ficimos nada. El vieyu principiu hispanu: qu’inventen ellos, eleváu a la enésima potencia nesti reinu de taifes que ye anguaño España, Asturies, cada conceyu…

La llingua azul ye un nome xenéricu pa englobar 24 enfermedaes distintes  que se correspuenden colos serotipos conocíos del virus. N’España entraron cuatro serotipos: 1, 2, 4 y 8, y puen llegar dellos más. El mayor riesgo dalu la convivencia nun mesmu animal del serotipu 1 y del serotipu 8, porque la suma de los dos danos un serotipu distintu por hibridación.

Xeneralmente lo síntomes apaecen a los dos meses de que los animales s’infestaren, polo que vacunalos a eses altures ye inútil dafechu.

La única midida posible ye la distribución masiva de cartafueyos con tola información de los síntomes de la enfermedá ente los ganaderos (dalgo que se fizo en Inglaterra y Holanda, nel nuestru país namás en Extremadura), la vacunación total de tola cabaña ganadera, y l'usu masivu d’insecticides que machaquen al culicoides obsoletus, que ye como se llama’l mosquitu que más ta tresmitiendo’l virus per equí.

N’Asturies nun se ta faciendo nenguna d’estes tres coses.

Los ganaderos vense solos, y ye normal que protesten:

http://www.lne.es/secciones/noticia.jsp?pRef=2008100600_40_682489__Oriente-Cien-ganaderos-piden-Infiesto-dimision-Belen-Fernandez-gestion-lengua-azul

Ye lo que tienen los entornos, si nun los protexes, pasen estes coses.

La entruga ye ¿interesa?

http://www.lne.es/secciones/noticia.jsp?pRef=2008100200_40_681232__ORIENTE-promotora-ofrece-terreno-para-hacer-chales-junto-iglesia-Abamia

Déxovos equí un par viñetes sobre la situación económico de MEL, un humorista xenial que dexa tolos díes les sos columnes nel Diariu de Cadiz.

 Y tamién esta otra, que paez fecha por ún de la Cuenca.