Escucando estrelles

 Mui bona la entrevista a Julio Lago en LNE:

 http://www.lne.es/secciones/noticia.jsp?pRef=2008113000_38_701953__CUENCAS-politicas-energeticas-Principado-carecen-logica 

http://www.lne.es/secciones/noticia.jsp?pRef=2008113000_38_701954__Cuencas-tendido-electrico-dara-golpe-irreparable-patrimonio-natural

Una mui bona campaña de marketing:

Si te prestó "Patria sin sol", que sepas qu'Arma X (de los X de tola vida) sigue faciendo coses:

http://profile.myspace.com/index.cfm?fuseaction=user.viewProfile&friendID=67106938

Una Empresona X (por exemplu un bancu o una cadena de supermercaos) tien una montonera llocales.

Entós creen otra empresa paralela, vamos llamala 2, tando detrás los mesmos con dalgún home de paya, a la que venden nun paquete toos esos llocales. Al preciu qu’ellos digan, porque los otros nun gorguten.

Dempués alquila esos mesmos llocales a la empresa 2, poniendo que los gastos de mantenimientu y seguru cuerren a cargu del propietariu. Al preciu que meyor-yos vaya.

Con esto, aforren unos costes grandes al añu, pasando a pagar namás un alquiler (un coste qu’amás desgrava), y desinvierten: saquen lliquidez a costa de quitase d’enriba activos molestos.

El resultáu ye una empresa saneada, que se pue vender ensin problemes al nun tar amarrada a cargar con delles propiedaes que puen echar p’atrás al comprador.

Y si la empresa 2 se flunde nun pasa nada, porque pagó la pena. Al home de paya yá lu colocaremos en dalgún otru sitiu cuando pase too, amás mientres duró la cosa vivió de p.m. y que-y quiten lo mandao.

Perres en negro a un paraísu fiscal y carretera y manta.

PD: Onde diz Empresona tamién pue dicir Alministración.

Tan faciendo Terminator Salvation. Maxino que va ser un pestiñu de munchu cuidáu, pero'l cartel p'anuncialo mola muncho.

Si nun viste nada espectacular ye que tienes el flash vieyu.

Coldplay ye un grupu de moda.

Ente otres coses, el cantante tien bon oyíu:

 Joe Satriani val de sobra

Kraftwerk pue ser un homenaxe

Pero Ashlee Simpson…

Ye tan cómico que paez un inventu.

Fai dos díes, un funcionariu fai una llista con 63 persones “eventuales” al serviciu del Gobiernín, d’esta xente que los partíos coloquen ente Presidencia y delles conseyeríes (cuasi toos primos, hermanos, consortes y demás familia) na llista había datos personales: nome y NIF, grupu y nivel, complementos y sueldos de tolos cargos de confianza. Tamién llevaba un mensaxe claru: “te mando los eventuales que tenemos ahora mismo en nómina. Dentro de un par de días no sé lo que habrá”. Aterrador.

El que mandaba’l mensaxe yera’l xefe de nómines, y cerrábalu con un prometedor “besos, muñeca”.

En cuantes se dieron cuenta de que lo mandaren a tolos llaos, los servicios informaticos del Principáu bloquiaron tolos correos de los funcionarios y avisaron a tolos medios de que’l que lo espardiere podía tener problemes serios, via Llei de Protección de Datos (esa que nun val pa nada útil, pero que pue llantate unes multes del copón), que coles coses de xintar nun se xuega. Como si fuere una república castañera.

Pero’l mal taba fechu.

Agora la xente anda un poco revuelto. Una prima de la Migoya quier saber porqué ta tola familia y ella non. Los funcionarios quieren esplicaciones de porqué dalgún que nun sabe facer la O con un canutu cobra más qu’ellos, que tienen estudios. Los votantes d’a pie quieren saber, como ye lóxico y normal, a quién se ta pagando colos sos impuestos. Y la muyer del funcionariu (que taba na llista) quier saber quien ye la moñeca.

La llista yera entera de la FSA, la tonta yera la nuestra.

Yeremos unos cuantos: xente de Naval Xixón, los que tan contra la regasificadora y les térmiques, los rurales de Xixón... guapamente había más xente fuera protestando que los que taben nel teatru. Y facía muncho que nun via montonera tala de polis, la verdá.

Al mirar los medios, en dalgunos nun esistió nada d'eso.

1, 2, 3, xuguemos al esconderite inglés.

Mientres los miembros del Gobiernín y dellos collacios andaben buscando a Alí-Babá pa ver si los mete en nómina, qu'esperiencia yá tienen, los asturianinos que quedaron equí tienen que defender lo de casa.

Y agora que tornen los chivatos, pido tres hurres por Gonzalez de Castro, defensor caberu de causes perdíes.

(la semeya, guapa daveres, ye de Ricardo Solís y ye d'ayeri mesmo)

Pa qu’un pueblu manifieste la peculiaridá de la so freba, los filos qu’entellacen la so urdime, l’observador ha de testimoniar la so actuación, el so devenir a lo llargo del tiempu o ser quien a identificar con vista sutil les respuestes de los sos individuos ante los xingones de la vida. Si ye que les reacciones amosaes nun van marcaes pol porgüeyu, tampoco por un esperable sentíu primariu de trescendencia, pero son, a una mala quiciabes a dexar una güelga qu’aguapie la faz de la tierra o qu’esborre un repuelgu vieyu d’ella, ye bastante p’afirmar la so escepcionalidá.  

Acabo mercar La fábrica de lluz, de Xuan Santori, asina que tovía nun lu lleí, pero picotiando en delles páxines yá se que me va prestar.

Esta cita ye la primer páxina del llibru, la verdá ye qu’invita a siguir lleendo ¿non?

Mientres a esti llau del cordal PP y PSOE sofiten les llinies d'alta tensión, na parte de Lleón tan los dos en contra.

Ellí tienen les coses clares: nun tan dispuestos a asumir coste medioambiental y quieren réditos económicos pa la rexón.

Equí sóbranos con un platu lenteyes.

http://www.lne.es/secciones/noticia.jsp?pRef=2008111200_38_695354__Cuencas-PSOE-Leon-rechaza-SamaVelilla-pide-necesaria-vaya-soterrada

Rectificar ye de sabios, dicen. ¿Quién se fai cargu agora?

Debe ser que sobren les perres.

Y güei les patronales eléctriques (si, eses mesmes que nun paren de ganar dineru) proponen una suba del preciu de la lluz pal añu que vien del 31 % (esti añu subió más del 8 %), pol coste de fabricar y transportar, asina que vamos llantalo too n’Asturies, que’l gobiernu quier basoria a maza martiellu, pa depués llevar la enerxía a Madrid, onde nun quieren centrales por contaminantes. Asina los costos son mayores, y total van subvencionalos. Ye fácil apostar si xuegues con perres d'otros.

Equí hai demagoxa per un tubu si tienen accesu illimitáu y gratis a los recursos naturales que son bien común, y siguimos pagando igual.

Ascu de país, la verdá.

Trescribo equí la intervención de Julio Lago Rodríguez, profesor d’Economía Financiera y Contabilidá de la Universidá de Llión.

Hai que tener en cuenta que ye la trescripción lliteral de lo que faló, y que nel entamu, repartió unes fueyes con dellos datos y gráficos.

En primer llugar, quiero agradecer la oportunidá que me da la Xunta Xeneral del Principáu d’Asturies pa facer unes reflexones, esplicaciones sobre lo que ye’l sistema eléctricu español y posteriormente estrapolales a lo que ye la estratexa enerxética del Principáu d’Asturies. Tratando d’axustame’l tiempu que marcó la Presidencia, paso a esponer les idees siguientes:

Miren, pa tener una visión de lo que ye un sistema eléctricu rexonal habría que tener primero una visión de lo que ye’l sistema eléctricu nacional. Nesti sentíu, quiero destacar como primer puntu’l siguiente: conocer la capacidá de xeneración que nesti momentu tien instalao’l país, la economía española, el sistema eléctricu peninsular, al rodiu de 86 millones de kilowatios. Esi datu, que ye esa capacidá de xeneración o potencia instalao, habría que contrastalu, pa conocer la bondá d’esi sistema eléctricu colo que pue  ser la punta de demanda, el momentu del día de mayor consumu. Pues pongan atención porque nesti momentu nunca’l país consumió más, faciendo usu de potencia en dalgo más de 46 millones de kilowatios. Entós, ehí se ve ya nidio qu’hai una diferencia notoria abondo ente lo que pue ser capacidá de xeneración y demanda. Hasta, esti primer indicador matízase con un segundu indicador que consiste –brevemente- en considerar la potencia disponible porque ye verdá que toa esa capacidá de xeneración nun siempre ta operativa. Pue haber centrales fuera de serviciu por averíes, por razones de mantenimientu o parques eólicos que por falta d’aire nun contribuyan, y entós la propia Rede Eléctrica, que ye la compañía encargada de xestionar el sistema, fai esti índiz de cobertura, entós axusta lo que ye la potencia total, por dicilo asina, la capacidá de xeneración potencial, la potencia disponible a cada periodu de tiempu, y contrastala con esa punta de demanda. Pues entós quiero poner de manifiestu qu’esi índiz de cobertura que fai la propia Rede Eléctrica d’España, y tengo equí l’informe últimu del añu 2007, ta mui per riba del mínimu deseable dende l’añu 2003. Vien a indicar esti aspectu, esti segundu indicador, en ciertu moldu que’l sistema eléctricu nacional tien una solidez, tien una fuerza como contrasten los datos qu’enantes comentara.

Asina, nun quiero pasar por alto d’aportar una propia información que Rede Eléctrica d’España nel so informe anual, el que tengo delantre de la mesa, relativa a lo que ye la calidá del serviciu eléctricu. Lleo testualmente, son unes llinies: “en rellación cola rede de tresporte, ye importante destacar l’alta calidá del serviciu qu’ufierta, evaluada en función de la elevada disponibilidá de les instalaciones que la formen y de les reducíes interrupciones del suministru debíes a incidencies en dicha rede”, nun ye más que confirmar los dos datos qu’enantes-yos daba, y que ponen de manifiestu que la calidá del nuestru sistema eléctrico peninsular ye daveres bona.

Un cuartu aspectu, que tamién en ciertu mou quiero pone-yos de manifiestu, ye lo que foi la tendencia de la demanda eléctrica nel país. Fíxense, el propiu informe de Rede Eléctrica, que vuelvo a usar, pon de manifiestu na so páxina 20 cómo dende prácticamente l’añu 2003 l’espoxigue de la demanda esperimenta incrementos decrecientes.  De manera más concreto, pa que lo puedan entender, nel añu 2003 medró al rodiu del 6 por cientu, l’añu pasáu, 2007, que ye l’últimu exerciciu zarráu, fízolo al 3,1 por cientu. Esi ye’l datu qu’en ciertu moldu tamién habría que considerar pa examinar o analizar la bondá, la calidá d’un sistema eléctrico.

Tamién quiero comentar una serie de diagnósticos d’espertos qu’atropé, porque paezme que son de munchu interés, que faen hincapié nesta característica, nesta fortaleza qu’anguaño tien el sistema eléctricu nacional, destacaría la opinión d’Honorato López Isla, que ye’l conseyeru delegáu d’Unión Fenosa, la tercer eléctrica del país. En payares del 2007, fai agora un añu, ordenó parar la construcción de nueves centrales na so empresa por esta circunstancia qu’enantes taba comentándo-yos. Diz nel diariu Expansión, el diariu d’información económico, que’l sistema eléctricu nacional –lleo testualmente- furrula de media al 50 por cientu de la so capacidá, y como consecuencia d’esa sobrecapacidá, d’esi escesu que se ta constatando, aplaza la instalación de nueva xeneración eléctrico, pol motivu que comento. Asina, ye mui ilustrativu cómo Rede Eléctrica (fíxense, si usen les dos fueyes que-yos di, por favor) permite conocer el consumu y la producción d’electricidá en tiempu real. Les nueves tecnoloxíes de la información faciliten esa consulta. Tienen ehí los gráficos: ún ye del día de güei, el 4 de payares del añu 2008, y ven nesa gráfica, la primera (ta sacao de fai unos minutos), la llinia, la gráfica mariella, ye’l consumu real de kilowatios, lo que nestos momentos taríemos consumiendo. Pues na columna de la manzorga ven que ta al rodiu de los 36 millones de kilowatios, 36.000 megas son 36 millones de kilowatios. Recuerdo: la capacidá de xeneración anda sobre los 86 millones y, anque too nun pueda tar disponible poles circunstancies que comenté enantes, esi índiz de cobertura dende l’añu 2003 ta per riba del mínimu deseyable, el marxe qu’hai.

Y hai una segunda fueya, que tamién ye mui ilustrativa, que ye del 17 de payares del añu 2007. ¿Porqué esa fecha? Porque ye’l día nel que se batió un récord de consumu eléctricu nel nuestru país. Nesi momentu, si miren, la gráfica mariella, que ye la que da’l consumu, tuvo cariciando los 46 millones de kilowatios, nun llegó: 45.540. Y la nota de prensa, que me paez que ye d’interés recordala, que Rede Eléctrica sacó nesi día, alvierte lo que foi esi récord de demanda eléctrico peninsular y apunta testualmente: “el sistema eléctrico furruló con total normalidá, ensin que s’haya rexistrao nengún incidente”. Ye un datu que creo que ye oxetivu dafechu, y que vien a avalar los análisis qu’enantes-yos dicía.

Asina, Céntrica Enerxía, que ye la principal empresa comercializadora del país, pol so Direutor Xeneral, Enrique Jiménez, el 3 de xineru de 2008, alvierte de la sobrecapacidá de xeneración que tien el sistema eléctricu nacional. Afita na idea qu’enantes dicía.

Y, más recién tovía, n’abril de 2008, el 11 , nun foru d’economistes y d’inxenieros industriales, Foro Expansión Actualidad Económica, vuelve a alvertise d’esta característica, d’esta cualidá: capacidá de xeneración más qu’abondo con un marxe grande. Son fechos que de dalguna manera dan una idea mui precisa de les característiques que tien nesti momentu'l sistema eléctricu del nuestru país.

Agora entro, curtio yá, a facer unes referencies a los proyectos enerxéticos d’Asturies.

Ye un aspectu que llevo estudiando… Igual qu’en Lleón, hai una problemática enerxético mui asemeyada equí y en realidá fízome tamién a saber lo que yera esti análisis comparáu.

Creo que ye conocío por toos que s’anunciaron unes centrales de ciclu combináu na rexón asturiana, en cuantía importante, con una planta regasificadora que diba aportar combustible, gas natural, pa producir kilowatios. La petición d’instalaciones (que me corrixan si nun ye asina), lo que yo consulté fai poco, ye que prácticamente va llegar a triplicar, a multiplicar por tres el nivel que nesti momentu tienen ustedes. La potencia instalao, la capacidá de xeneración d’Asturies ta al rodiu d’unos 3.800 megawatios; 3.290 de réxime ordinariu y 539 de réxime especial. Incorporar nesti momentu más capacidá de xeneración, más potencia instalao conociendo esti mercáu eléctricu qu’anguaño tan unos niveles más qu’aceptables p’atender la demanda, nun tien en principiu muncha lóxica económica, nun tien sentíu. Trato de facer unos diagnósticos dende’l planu profesional, como economista o como persona qu’estudió’l sector eléctricu dende fai yá tiempu; hasta, fíxense, respeutu a les plantes regasificadores, creo qu’hai otru datu que ye necesario que se conoza pola opinión pública, y ye’l relativu a la realidá de les plantes de regasificación que tien el país. Tengo na mio mano l’informe d’Enagás 2007, qu’ehí pon de manifiestu, y son los datos oficiales, la situación d’estes plantes. En concreto, fíxense, el país tien plantes de regasificación en Barcelona que ta usada al 30 por cientu de la capacidá nominal; Huelva, al 42 por cientu; Cartaxena, al 29 por cientu; Bilbao, al 54 por cientu; Sagunto, al 73 por cientu; y Mugardos, en Ferrol, al 29 por cientu.

Una simple llectura d’estos datos vien a poner de manifiestu que, efectivamente, con un sistema enerxéticu nacional que yá ta bien, que tien hasta infraestructures gasistes que nun tan aprovechaes a plenu rendimientu, el plantear una nueva regasificadora en Xixón, amás, cuando nel Norte yá hai dos entraes de gas (la de Coruña y la de Bilbao) ye otru aspectu que de dalguna manera tendría que facer reflexonar si ye una estratexa adecuao o non, porque nun hai dulda de que ye volver otra vez a sobresaturar, facer mayor lo que ya tien un nivel más qu’abondo.

Nun se pue tampoco –voi terminando- pasar otru datu qu’ustedes conocen. La rexón d’Asturies esporta de manera secular bona parte de lo que produz. Nestos momentos, al rodiu del 30 por cientu de los kilovatios qu’equí se xeneren mándense –de manera solidario, si quieren- a otres rexones del país. Nun hai dulda que’l mover esi kilovatiu qu’equí nun se gasta, hacia lo que ye Madrid, hacia’l País Vasco, hacia Cataluña, hacia Valencia, hacia Cantabria, que son les rexones que tienen déficit eléctricu, obliga a construyir unes infraestructures de transporte, llinies d’alta tensión y asemeyaos, y de dalguna manera, vuelve a ponese de manifiestu si se tan faciendo los planteamientos adecuaos, que seríen racionales. Paez obvio dicilo, pero ye fácil pensar que, por lóxica económico, la instalación de nueva capacidá de xeneración, de facer falta, s’orientara hacia les zones que tienen esi déficit eléctricu, les cinco qu’enantes cité, máxime cuando tres d’eses rexones deficitaries (el País Vascu, Cataluña y Valencia) tienen nos sos territorios plantes regasificadores que falta muncho pa usar al cien por cien. Los porcentaxes cítelos enantes: País Vasco ta, Bilbao, al 54 por cientu, tien capacidá tovía pa usase en mayor midía; Cataluña, Barcelona, ta al 39 por cientu; y Valencia, la de Sagunto, ye la que más, pero ta al 73 por cientu. ¿Qué necesidá hai de poner más instalaciones d’esti tipu, plantes de regasificación coles sos centrales de ciclu combináu, cuando la situación ye la que toi describiendo? Fago hincapié en que son los datos oficiales, nun me salgo pa nada de lo que ye esi guión, les cifres, los informes qu’anualmente espublicen Rede Eléctrica d’España y Enagás.

Un últimu detalle, que creo que tamién tien interés. Miren, esta petición que-yos dixi enantes, esa lóxica económica de poner los centros de xeneración nes centrales, nos puntos de consumu, púxola de manifiestu fai bien poco Victoriano Casajust, ex Direutor de Rede Eléctrica d’España, que nun informe recién sobre’l sistema eléctricu español señala no qu’alvertí enantes, no qu’un poco dicta’l sentíu común, pa evitar eses llinies d’alta tensión que son costoses por razones económiques y ambientalmente nun hai dulda de que tienen  una incidencia, y evitar les perdes de transporte nel movimientu d’esos kilovatios que depués pesen na determinación de la tarifa eléctrico, nun tien lóxica nenguna, poles razones espuestes poles persones del propiu sector eléctricu, les que tan señalando nestes reflexones.

Pidiría, p’acabar, sentíu común, sensatez, cordura, pues tase a tiempu de rectificar, en principiu, nun hai nada tovía fecho y, poles razones espuestes, el plantegamientu de planificación enerxético que se fizo creo, modestamente –y déxenme dicilo asina- nun ye’l más adecuáu, poles razones espuestes. Y eses equivocaciones al final terminámosles pagando toos, via tarifa eléctrica o vía tarifa del gas.

Munches gracies pola atención prestao.

Lleer el restu d'esta entrada

Póngovos equí delles cosines que me paecen interesantes de les Comparecencies Informatives sobre la Estratexa Enerxético d’Asturies con horizonte al 2012.

De la intervención del profesor Jose Alba Alonso, profesor d’Economía Aplicada de la Universidá d’Uviéu

Siempre hai que calcular los costes que se producen pol usu de los recursos naturales, porque’l coste cero nun esiste. Y entós, delantre d’un plan d’estratexa enerxético como ésti, nun sólo interesen los costes de producción y consumu, tamién interesa saber los bienes públicos, recursos naturales o medios financieros públicos van a usase pa ello.

Cuando un sector interveníu como ye l’eléctricu pon una llinia d’alta tensión pel mediu del Monsacro, nun mira les coses pa llantar les torres por una zona con menos desnivel porque entós necesita más pilastres y eso sube los costes, entós, p’aforrar tira pel mediu’l monte…Y depués cuando’l Principáu quier facer una campaña de turismu, vese obligáu a quitar les torres d’alta tensión de les semeyes de los folletos, porque sinón nun diba venir naide.

Si queremos ser turísticos, con unos cuantos años xenerando una marca (paraísu natural) que furrula, nun se pue tirar a la basoria. El principal interés que puen tener los turistes pa venir ye’l paisaxe, y si lu esfarrapamos eso tien un costu mui importante. Un coste que naide ta calculando.

Lo del cálculu del coste ye complicao, porque esos costes nun son los mesmos en toa sociedá y en tou tiempu. Agora percibimos como costes coses que fai venti o trenta años nun se víen asina (por exemplu, les playes o los montes).

Ayeri, falando del paripé na Xunta polo de la Estratexa Enerxética, un collaciu dicíame que lo que más ascu-y daba de tol asuntu yera que tolos grupos políticos sabíen del tema y lo taparen. Y que si lo taparen yera porque nun teníen la conciencia tranquilo. Si tienes un plan tan bonu pal futuru del país, nun pares de falar d’ello pa que te pasen la mano pel llombu.

Equí, pol contrariu, aprobáronlu a l’agachapanda fai más d’un añu, tuvieron negando qu’esistiere y l’impresentable de Chano fizo tolo posible na so penosa intervención pa negar que yá tuviere aprobao, pa reconocelo a la fin. Señores y señores. El plan ta aprobáu y, como mui bien dixo Chano, si dalguién s’opón a les eléctriques, pue acabar con una demanda por perxuicios del copón. A ver quién ye’l guapu que reclama.

Va quedar nes hemeroteques, pero pocu consuelu ye. Y yo pensaba na llingua, que ye lo mesmo.

Y mientres falaba d’estos chanchullos que tapen siempre los políticos, yo pensaba no bien que viven por representanos, siendo xente que munches veces nun val nin pa pañar pesetes.

Bono pa eso si.

Porque me paez que lo merez, cuelgo equí la portada del discu nuevu d'Héctor Braga.

Nótese'l primer planu de la semeya. Nun tenemos más que dicir.

Quito’l sombreru delantre la intervención de güei del profesor d’Economía Financiera y Contabilidá Julio Lago nel Parlamentín pa debatir la Estratexa Enerxética. A lo meyor porque nun ye d’equí. Foi una intervención trabayada, enllena datos, y defendióse perbién de les entrugues tontes que-y ficieron los grupos políticos (la d'Iglesias de pena, qué cortu ye esti home, y los del Soe pasaron).

Tolos planes previstos n’Asturies (dalgún con más de diez años d’edá) falen de triplicar la producción d’enerxía. Y anguaño NUN HAI MERCÁU porque la enerxía ye un bien de consumu inmediatu, y como’l mercáu lo que fai ye correxir eso y solo se pue gastar lo que se consume, van construyise centrales que van tener que tar PARAES munchu tiempu. Y punxo como exemplu la burbuya inmobiliaria: dende l’añu 2000 sabíase que diba tener que parar, pero toos siguieron construyendo, pensando que nun-yos diba tocar a ellos. O seya, construyimos p’aprovechar ayudes (53 millones d'euros) y tener xente ocupao, y depués yá pensaremos un plan B.

Y tamién Marisol, de l’Asociación Picos de la Liebre, que punxo’l puntu de cordura.

Los políticos, de pena. Chano demagogu y faltón, pero ye lo que tenemos.

Nun entiendo cómo teniendo’l meyor sistema financieru del mundu mundial (sic) haya que da-yos pasta a los bancos por valor del 15 % del nuestru PIB namás que pa tapar pufos y atender vencimientos. Y naide protesta porque nun se faga público, con lluz y taquígrafos, nun digo nada.

A min préstame más el modelu alemán: el bancu que necesita pasta renuncia a repartir beneficios y bonus, y tien que llindar les nómines de los direutivos. Y sobre too, ta obligáu a inventariar los activos pol so valor REAL. Y oye tu, que paez que too tien igua ensin pasar por esi aru.

Descuida, que tres too esto, van siguir los paraísos fiscales y la inxeniería financiera.

Nel dichosu acuerdu, nun hai nin una referencia a la llingua.

Y mira que diba ser abondo con que lu presentaren, namás, na llingua.