Escucando estrelles

Paez ser que tan morriendo tolos fresnos nel conceyu Somiedo.

http://www.lne.es/secciones/noticia.jsp?pRef=2008091900_41_676841__Occidente-fresnos-Somiedo-mueren

http://www.elmundo.es/elmundo/2008/03/28/ciencia/1206729742.html

Xanu, nun vas nin poder escondete na to viesca.

Nestos díes de barullu informativu, con bayura de fartones en coches tintaos, apetezme contar que’l gran protagonista d’Asturies estos díes ye un árbol: el texu d’Abamia.

El texu d’Abamia ye varies veces centenariu y ta, ente otros más mozos, al llau de la ilesia de Santolaya d’Abamia, onde anden faciendo unes obres non mui afortunaes.

Los vecinos y dalguna asociación denunciaron que-y cortaren la mayor parte de les raíces d’un llau pa facer una zanxa, y como pa la otra parte ta una carretera, ye mui probable que l’árbol quedare firíu de muerte.

La Conseyería diz que d’eso nada, que ya ta too tapao y nun se ve.

Un árbol asina tarda años en morrer. Un arquitectu como Javier Arbesú pue facer que les coses vayan muncho más ceo, y si pa encima los que-y teníen que tirar de les oreyes lu tapen, pa qué quies más.

Por contar dalgo un poco más prestoso, en Llaciana hai delles viesques con bidules centenarios, y van pasar a formar parte d’un proyectu pilotu que pretende facer que los propietarios caltengan les viesques y a cambio puedan desgravar na declaración de la renta, dalgo que yá se fai sitios como Canadá.

http://www.abamia.net/

http://www.uam.es/otros/consveg/documentos/tejo_asturias.htm

La comarca de Cocagne ye como un triangulu ente Toulouse, Albi y Carcassonne, nos Midi-Pyrenées. Ellí, a lo llargo de sieglos, concentróse’l cultivu del glasto, una planta conocida como Isatis Tinctoria, que s’usaba pa sacar un guapu color azul y que quier munchu sol.

La producción d’esi colorante fizo rica a tola rexón (en Francia la espresión un pays de Cocagne ye como dicir en castellán un país de Jauja).

Un refrán mui vieyu dicía: “au Pays de Cocagne, plus on dort plus on gagne”, que traducío ye: “na comarca de Cocagne, cuanto más se duerme, mas se gana”. Antanu, les fueyes del glasto secábense y moldiábense en forma de boles a les que llamaben cocagnes pa poder manexales bien. Dicíase que cuantu más tiempu se dexaren reposar (ente otros compuestos, usábase orina humana, rica n’amoniacu), más vivu yera’l tinte y más caru se podía vender. D’ehí salió la idea de que, esperando, ún podía llegar a facese ricu.

La fiebre azul entamó nel sieglu XIII, cuando la realeza abandona’l colorao y opta pol color azul, asociáu a la pureza de la Virxen María. La mayor parte de la producción taba en manes de ricos y poderosos comerciantes qu’edificaron palacios luxosos fechos con ladriyos de color rosa. La bayura d’ellos fai que, tovía angüañu, a Toulousse se la conoza como la Ciudá Rosa.

La mayor prosperidá foi ente’l sieglu XV y el XVI, cuando los sacos de pigmentu (l’oro azul de les cróniques) mandábense a toa Europa. Dempués alcontróse con un competidor inesperáu: l’índigu que traxeron los españoles de les colonies americanes. L’azul d’esta otra planta yera dalgo violáceu, pero yera muncho más rápidu y fácil de sacar que’l glasto, y muncho mas baratu. Poro, el so cultivu foi amenorgando. L’últimu intentu pa facelu espoxigar foi con Napoleón que, col bloquéu continental, nun tenía índigu y vistió a los sos soldaos con azul de glasto.

El drechu de Poznera ye ún de los que ta reconocíu ente les figures xurídiques tradicionales asturianes, y consiste en que los vecinos podíen plantar y aprovechar árboles nes tierres comunales, siendo la propiedá del tarrén del pueblu, pero l’árbol y tolo que produxere yera del que lu plantaba. A estos árboles llamábenlos entepolaos, y munches vegaes poníase-yos una marca pa identificalos. Quedaben reconocíos ante notariu al tresmitilos a los fíos (hai bayura d’exemplos).

Esta costume tien los sos raigaños na edá de bronce (nun vamos a dicir que vien de los celtes porque dalgún purista igual nos pega, pero podíemos dicilo guapamente): el que plantaba un árbol yera’l dueñu y lligaba de dalguna manera’l so destín al árbol. Amás d’aprovechase d’él tenía que mantenelu pa que nun molestare, y pasalu a los fíos cuando él morriere, ensin poder cortalu.

Esti drechu usóse sobre too coles castañales, un árbol que dio de comer a munches xeneraciones d’asturianos.

La pallabra poznera nun apaez nel sacrosantu diccionariu de l’Academia. Que yo sepa tien tres significaos: amás de ser el drechu que vos acabo contar, pue ser tamién el furacu que se fai nel suelu y nel que s’echa cuchu pa plantar un árbol, Arias, nel diccionariu de LNE, recueye que pue ser tamién la caña que s’espeta nel suelu y xorrez ensin raíz.

Conócenlu como “palu de tambor” pola forma de les vaines que da. Ye la moringa oleífera, un de los árboles de más provechu de tol mundu. Ye orixinariu de la India, anque ya lu hai per tol trópicu, onde se ta convertiendo nún de los principales alimentos con vistes al futuru.

Úsase dende cuantayá.

Les vaines, les fueyes, les flores, la grana y les raíces úsense como alimentu en munches partes del mundu. L'aceite que se saca de la grana de moringa pue usase pa cocinar, pa facer xabón, cosméticos y como combustible. Tamién s’usa na medicina y como coagulante natural.

Pa facenos una idea, les fueyes d’esta planta tienen, a igual cantidá, 7 veces la vitamina C de les naranxes, 4 veces el calciu de la lleche, 4 veces la vitamina A de les zanahories, 3 veces el potasiu que tienen los plátanos y 2 veces la proteína que’l yogur.

Medra bien en suelos probes, soporta perbién la seca y dase en condiciones árides.

Ye una de les apuestes que se manexen anguaño p’acabar cola malnutrición del tercer mundu.

Llámenlu viagra natural, y ta a piques de desapaecer. Ye l’omuboro (citropsis articulata), un árbol propiu de climes tropicales y qu’anguaño sólo s’alcuentra en dalgunes reserves naturales d’Uganda, Sudán, Tanzania, Nigeria o Camerún.

Los sos efectos son claros: basta cocer les raíces y beber el fervinchu resultante pa que la llíbido esconsoñe y quede ún enllenu de potencia sexual.

Ye bien conocíu ente los africanos que, a base de cortar poco a poco les raíces tan faciendo que los árboles nun xorrezan y acaben morriendo. Y nun hai repuestu porque naide los planta, asina que ye un árbol condergáu a desapaecer, salvo que la industria farmacéutico-y vea salida.

Pero nun podemos llantar ún nel nuestru xardín, por aquello de que la especie nun desapaeza. Pa dase necesiten una temperatura medio d’ente 25 y 30 graos; una humedá ambiental del 75-80 % y un suelu con un PH acedu.

Llástima, yo yá diba tirar el bote de viagra a la basoria.