Escucando estrelles

N’Arxentina hai un periodista mui famosu, Oscar Negro Gonzalez Oro, que fizo un montaxe sobre un editorial mexicanu, avisó d’ello, pero dempués pasó como colo del Gran Wyoming, que corten y ponen lo que quieren, y agora anden acusándolu de plaxu.

Mango equí un montaxe onde se superponen les dos versiones, porque me paez qu’asina garra muncha más fuerza, al contraponer dos países. Merez mui muncho la pena, y cuando lleguéis al final vais ver que nun tamos tan llonxe de ser eso que diz, anque seyamos Asturies, na otra punta’l mundu.

Da que pensar, la verdá.

Una pequeña barbaridá, que por desgracia ye tan real como la vida mesma:

Lo del Musel vamos tener que facer chanchullos pa pagalo (nesi sen va l’editorial de LNE) porque nun ye plan de dexalo empantanao, y apaguen los fornos siderúrxicos (lo que trai regulación d’emplegu y una montonera d’empreses auxiliares a tomar vientu, más que colo naval).

Una ciudá como Xixón pierde’l 74 % del so texíu industrial nun añu. Agora namás queda’l turismu, y vamos fialo too al tiempu, a si fai sol o llueve.

Nun hai que buscar culpables, dicen los que nos manden, que ye una crisis que vien de fuera, pero la verdá ye que si lo ficieron tan mal cuando veníen bones, mieu me da tenelos al frente cuando vienen males.

Digo yo, que nun soi namás qu’un votu cada cuatro años, qu’últimamente l’Ayuntamientu de Xixón ta dando noxu y pena. Toos, de riba a baxo.

Entama a facer obres pa la Semana Negra nuna finca que tovía nun ta claro de quién ye. Dempués estalla lo del ex-arquitectu municipal, a lo primero deféndenlu y echen contra la xente que lo denuncia, y en cuantes ven que la cosa pinta feo, entamen a marcar distancies. Saquen l’anunciu de les obres del Molinón, paraes dos años ensin que naide ficiera nada, pa desviar l’atención. Y agora enterámonos qu’había munchos más chanchullos. Y la guinda ye que faen un plenu pa tratar del tema de los pelotazos urbanísticos, y prometen mandalu al fiscal, dalgo anunciao nes ruedes de prensa, pero oye resulta que falló l'aparatín.

Fiede, y da la impresión de que fai falta una escoba mui grande.

Mienten más que Pinocho, y les pataes que debe haber perbaxo la mesa nin Luis Sierra les metía. Pero tamién tienen mala suerte. De xuro que si ponen un circu, medren-yos los enanos.

Hai que dase con un cantu nel dentame: el xuzgáu 3 de lo Penal d’Uviéu condenó namás a una multa a Txomin Goñi. Son mil euros por perturbar l’orde públicu y 180 euros d’indemnización por lesiones a la policía municipal.

Ye una pena qu’haya que tar contentos porque un paisanu que va a un plenu del so pueblu con una camiseta con un lema ratificáu polos tribunales salga, primero a osties y después multáu. Pero ye Llanes, la Marbella del Norte.

Tamién ronca’l mangu que haya coses que tovía nos quieran dicir que nun son illegales. A ver si siguen tirando de la manta y entamamos a llimpiar dalgo.

Pues resulta qu’a Sanjurjo, esi que dalgunos poníen como candidatu a suceder a l’alcaldesa de Xixón, rapaz formal y cumplíu onde los haya, bastó-y que-y punxeren un micrófonu delantre la boca pa estrozar pa siempre la so carrera política.

Amosó tar poco enteráu de les coses que lleva, tener poca educación, y dexó pasar una guapa oportunidá pa zarrar la bocona, porque cuanto más se sabe, ye peor.

Que sigan falando, qu'asina enterámonos de qué tipu xente ye la que nos manden votar.

Rabanal faló ayeri de conxelar el sueldu a los funcionarios. Claro, a los que son poco más que mileuristes  tamién, yá se sabe que nun trabayen siquiera.

Hai que tener xeta, son los mesmos que l’añu pasáu subieron 5000 euros pola cara  a los altos cargos políticos, porque nun yera xusto que tuvieren mandando sobre xente qu’estudió y sabe del tema y cobraren más qu’ellos, que namás van tar cuatro años. Los mesmos que tienen una montonera asesores tres cada despachu, los mesmos que nun tienen namás que chiringos per tolos llaos pa colocar inútiles.

A lo meyor recortando per ehí meyoramos abondo. Hai qu'entamar dende riba, nin.

Dicen que l'actuación del ex-xefe d'urbanismu foi llegal y nun se ve delitu per nenguna parte.

Val, quito la cara tontu que me quedó y afirmo qu'ética y moralmente ye despreciable, y qu'asina vamos mui mal.

Hai coses que güelen mal. Mui mal.

La cosa destapose ayeri nun periódicu de Madrid con ganes de revolver, quiciabes porque equí los periódicos tan bien cebaos y hai coses que, anque se sepan, nunca salen. Y, cuando salen, ye porque interesa y hai dalguna historia que nun vamos conocer tres ello.

La Nueva España cuéntanoslo güei, y paez qu’anden un poco perdíos nel tema.

El periódicu de la ciudá, manteníu pol propiu Ayuntamientu, daba la vuelta a la noticia, notase-yos un poco dolíos, quiciabes porque yera un paisanu al que sacaben nes sos páxines. Al poner de titular que l’Ayuntamientu va llevar el casu a la fiscalía, da la imaxe de que nun tien nada que ver. Ensin embargu, la Plataforma d’afectaos de Cabueñes diz que nel Ayuntamientu nun-yos facíen casu.

El supuestu delincuente diz que nun ve ónde ta'l problema. Yo si, yá quisiera poder mercar una fincona asina, nesi sitiu, por eses perres, y recalificala.

A min lo que más gracia me fai ye que recalquen en tolos llaos que’l supuestu delincuente ta n’excedencia, trabayando ente otros pa SOGEPSA, que como tol mundu sabe ye un inventu del principáu y cuatro espabilaos.

El famosu PGOU xixonés nació gafáu dende l’entamu. Nun hai más qu’alcordase de les famoses Marches Verdes. Diseñaronlu como un xigantescu pelotazu, y efectivamente hubo unos cuantos espabilaos que garraron terrenu por cuatro perres y vendieronlo ganando muncho, polo xeneral a empreses madrilanes que nun sabíen ónde se metíen. Los que ganaron la pasta ye xente que lo suel ganar ensin facer nada, y son siempre los mesmos.

Por eso nun taría de más qu’entrare la Fiscalía a sacu, como ye la so obligación, pa investigar lo d’esti funcionariu exemplar y tolos que s’enriquecieron, porque diben salir unes cuantes coses curioses daveres.

¿Apostamos a que nun va pasar nada?