Escucando estrelles

Anque malapenes quede tiempu, equí vos apurro esto qu'alcontré nel pisu d'al llau, na casa del Trasgu d'Areces.

La tercera entrega de los artículos que Gregorio Morán dedica a Asturies nel periódicu catalán La Vanguardia nun defrauda. Como toles bones triloxíes, la primera ye bona, la segunda escura y la tercera ciarra la hestoria dexando un bon tastu na boca.

Creemos que nun va haber más, pero vamos tar atentos.

Equí vos dexo delantre l’espeyu:

http://www.lacoctelera.com/reggio/post/2007/09/29/ay-mi-quien-me-paga-pitas-y-iii-gregorio-moran-en

pa rinos de nós mesmos, anque seya una carcaxada amargosa.

Dientro d’unes xornaes de l’Autoridá Portuaria de Xixón que se tan celebrando esta selmana, vino a dar una charla Francisco Macía Tomás, subdireutor xeneral de Planificación Enerxética del Ministeriu d’Industria, y la verdá ye que dixo dalguna cosa interesante.

A la entruga de si tien sentíu concentrar producción eléctrica n’Asturies, que yá tien escedentes, envede facelo en zones deficitaries, diz que nun se va pronunciar, más que nada porque ye’l promotor el que toma les decisiones, y el so departamentu namás mira que cumplan les condiciones. Y diz una verdá de Perogrullo: les centrales hai que poneles onde faen falta, y lo deseable ye que seya lo más averao posible al puntu de consumu, p’aforrar n’infraestructures y en perda d’enerxía nel transporte. Y pon como exemplu Murcia, onde tres promotores van facer en Cartaxena ciclos combinaos con una capacidá de 3.200 megavatios, habiendo una capacidá de transporte de 2.400 Mw que namás pue aumentase hasta 2.800.

Francisco Macía Tomás amosó ser educáu, al plantear n’Asturies los problemes que tienen en Murcia. Maxinamos que cuando vaya ellí va contar los problemes qu’hai n’Asturies, anque nun nos vamos enterar.

Asturies produz anguaño’l doble de la enerxía que gasta, y ensin embargu tan falando de duplicar la capacidá eléctrica con seis centrales de gas (2 en Soto de Ribera, 2 en Nubleu, 1 en La Perea y 1 nel Musel) que tengan la mesma capacidá que tienen anguaño (2.600 Mw) les centrales de carbón. A eso hai qu’amesta-y la nueva central de carbón d’Aboño, con una capacidá de 800 Mw más.

Van mantenese tovía unos años les centrales de carbón, ensin gastar un duru nelles, anque teníen que tar cerraes cuantayá.

Esti aumentu na capacidá va trayer de la mano un espoxigue de molinos eólicos, porque tien qu’haber un porcentax d’enerxía llimpio. Anguaño hai instalaos 7, y hai proyectos pa mangar otros 30 nel occidente astur (qué más da que seya reserva de la biosfera). Y por supuestu, esto lleva tamién a facer nueves llinies d’alta tensión, qu’agora sólo puen sacar 1.200 Mw, contra la oposición de toles zones per onde van pasar.

La realidá ye qu’Asturies ye, agora mesmo, la rexón española que más CO2 emitimos por habitante, triplicando la media europea, y como cada vez llueve menos y se llimpia peor la mierda, va aumentar muncho la mortalidá por razones ambientales, onde ya somos primeros de tol país según l'INE. Tamién lo somos nel númberu d'alerxes, y tamién tamos nos primeros puestos n’enfermos respiratorios, cardiovasculares y tumorales.

Cuando tol plan que tien montáu esti gobiernín salga alantre, vamos salinos per primer vez nuna estadística, direutos al llibru Guinnes nuna montonera estayes.

Ye dalgo más vieyo que la tos eso de poner al llobu a curiar les oveyes: el mayor furtivu del pueblu ye’l meyor guarda, porque sabe onde poner les trampes... Si quies que naide te critique una televisión plano y qu'aporta mui poco, nun tienes namás que meter a trabayar a los que te puedan criticar.

Si, toi falando de la TPA (Too Por Areces), esi inventu pa marafundiar perres a la mayor gloria del réxime.

Contrata xente foriato, que se vea que tienes vocación d’universalidá, y subcontrata, que dalgo queda. Da-y la xestión de programes a La Nueva Engaña, a la Vocina de Asturias, al Bebercio, qu’asina nun van gorgutar porque tienen la boca enllena. Mete a tolos partíos políticos nel conseyu, onde podemos aparcar hasta quince magüetos, pa que se puedan quitar de delantre a dalgún ex-alcalde resentíu ensin nada que facer, y tira p’alantre que llibres.

Y enseña una Asturies de postal, falsia la realidá, machaca la llingua, aborrega a la xente.

Pa que dempués venga un Ambás, cenciellu y ensin dase importancia, metiéndose nes cases de la xente de pueblu y te lo reviente too.

Mañana torna “Camín de Cantares”. Hai que velo pa descubrir esa Asturies que dalgún tolaina diz que nunca nun vió.

Dalgún, a lo meyor, yá recibió un corréu pela rede onde-y ufierte un trabayu mui bien pagáu por facer un trabayu fácil y cómodu dende casa, si tienes internet y una cuenta bancaria.

Ye perfácil. Namás tienes que contestar y comprometete a trespasar les perres que metan na to cuenta pa otres que te manden, polo xeneral nel estranxeru. A cambiu, pues quedate col 10 % de tolo que mandes: si te meten 3.000, mandes 2.700 euros.

Esto ye dalgo real, nun creáis que me lo toi inventando.

El problema ye qu'eses perres  son dineru negro, y al saltar d’una cuenta a otra lo que se ta faciendo ye blanquialo. La cuenta que lo recibe ciárrenla, y les perres ya son llegales.

Que sepáis que siempre queda rastru de les cuentes usaes, y que’l blanqueu de capitales ye un delitu.

Traemos equí la segunda parte del artículu de Gregorio Morán que publicamos l’otru sábadu. Esta vez titúlase “Los comederos de la intelixencia”, y anque rebaxa’l tonu, sigue contando verdaes como puños y poniéndonos un espeyu delantre que nos amuesa que’l rei ta esnudu, cola mesma naturalidá que tienen los neños en cualquier parte del mundu.

http://www.lacoctelera.com/reggio/post/2007/09/22/los-comederos-la-inteligencia-gregorio-moran-la

Qué pena qu’estes coses se tengan que contar a mil kilómetros d’equí.

El sábadu que vien, otru. Y el títulu promete: ¿Y a mí quién me paga 'les pites'?

La estadística ye una ciencia esacta pero, na so aplicación, resulta ser la más inesacta.

A base d’escolinos obligaos (como actividaes del colexu) puen engordase guapamente les cifres de visitantes de cualquier muséu.

O faciendo conciertos y espiches los visitantes d’un xardín botánicu.

O poniendo a Fernando Alonso nun cinexín nun Palaciu de Congresos.

Ayeri cuenten qu’había más de 250.00 persones pa ver a un rapaz meter ruíu y quemar ruedes con dellos coches nel centru Uviéu. O seya: la cuarta parte de tola xente d’Asturies, o tola ciudá d’Uviéu y una cuenca.

Y nós que lo creemos.

Según el cantar, con lletra de León Delestal, la mina de La Camocha dicíen que diba baxo’l mar. Nunca foi asina, y seique’l mitu surdiere porque dalguna galería tenía más distancia (pero non na mesma dirección) que la qu’había ente la mina y el mar. N’Asturies hubo una mina que sí se metía baxo’l mar, que foi la d’Arnao, de la que yá falamos otra vegada, y que precisamente dexó d’esplotase cuando s’inundó.

Enantes de nada vamos repasar un poco d’historia. Los tres hermanos (Víctor, Secundino y Constantino) de la familia Fernández-Felgueroso González, propietarios de la sociedá Felgueroso Hermanos solicitaron nel añu 1900 poder esplotar el carbón qu’hubiere na zona ente les parroquies de Güerces y Vega. El primer sondéu ficiéronlu n’agostu del añu siguiente, atopando carbón de bona calidá. Tres dellos intentos (ún dellos dio orixe al popular mecheru de Caldones, del que vamos falar otru día) que se van sucediendo nos años, ensin acabar d’atopar sitiu y perres, en xunu del añu 1930 entamen colo que diba ser el Pozu Nuevu númberu 1, y como al llau había un prau con una vaca mocha, d’ehí cuenten que salió’l nome de Camocha. Nel añu 1932 abrieron lo que diba ser el Pozu Nuevu númberu 2 a 115 metros del otru. Los entamos fueron duros (tuvieron paraos por nun tener perres más d’un añu) hasta que nel añu 1935 atoparon la veta de carbón principal y pudieron vender el primer cargamentu de carbón (a la Panadería Zarracina).

Según la prensa de la época, la xente de Xixón, que siempre foi mui dao a les chances, dicía que nun yera carbón del pozu, que lo traxeren de fuera.

Cuando la guerra civil pararon l’actividá, que retomaron nel añu 40, yá baxo les condiciones de la dictadura, pa la que’l carbón yera un asuntu estratéxicu, poro los mineros taben militarizaos y nun podíen camudar de trabayu porque diba por ellos la guardia civil.

Nel añu 1945 la sociedá Felgueroso Hermanos vendió la empresa al gallegu Bancu Pastor, pasando tres años dempués a ser propiedá de la Sociedá Minero Siderúrxica de Ponferrada (MSP) hasta l’añu 1993, nel que la compró la familia lleonesa García Brugos.

La sociedá volvió a facese famosa nel añu 2001, cuando se demostró qu’había camiones que subíen cargaos de carbón foriato pa pesalo na mina y camuflalo como de producción propio, pa subir los cupos de les ayudes europees , única razón pola que’l pozu siguía abiertu, porque anque tien munchu carbón, les capes son males y sal mui caro sacalo.

El viaxe d’aquellos camiones fizo realidá les pallabres de los más escépticos, pel añu 35, cuando negaben el primer camión cargáu de carbón: esti carbón nun ye d’equí, de xuro que ye comprao. La empresa siempre alegó qu’esi carbón yera pa les cocines (sic), pero nun devolvió nengún céntimu de los más de 90 millones d’euros recibíos, alegando que les ayudes nun teníen nada que ver cola producción.

Los últimos años, col ex-conceyeru d’industria socialista Carlos Zapico (Petromocho ¿alcordáisvos?) d’apoderáu, la mina convertióse nun abellugu de sindicalistes y compañeros de partíu, que tan en nómina atechaos nes oficines a la espera del cantáu pasu a la pública Hunosa.

Ayeri entamaben los ocho mineros del comité d’empresa un encierru nuna galería de la mina, sofitaos por una güelga de los 160 mineros del pozu, pa reclamar los salarios que nun son a cobrar a la empresa. Y la empresa déxalos facer, hasta-yos va poner les coses fáciles, sabiendo que pue ser la meyor manera de cobrar les sovenciones conxelaes.

Ye una táctica más vieyo que la tos, y que tamién ta usando anguaño l’empresariu Vitorino Alonso: facer que los mineros se muevan, pa que-yos paguen a ellos.

Déxovos equí un enllaz guapu de verdá:

http://www.elmundo.es/nuevaeconomia/2002/114/1013420663.html