Escucando estrelles

Lo de la llinia d’alta tensión ente Lada y Velilla ye una barbaridá, mírese como se mire.

Ye una llinia que nun fai falta salvo pa los intereses de delles empreses privaes, les mesmes que quieren cuadruplicar la enerxía que se produz n’Asturies por mediu de centrales térmiques y de ciclu combináu, pasando’l protocolu de Kioto pel forru los pantalones (les que tan, que ya sobren por vieyes, nun van zarrar tovía). Amás quieren facela a la brava, ensin facer un estudiu d’impactu ambienta seriu, nin respetar nenguna llei urbanística de los conceyos nin de distancies mínimes de llugares habitaos. Y pa encima’l proyectu va estrozar una zona preciosa, de gran valir ecolóxicu: el patrimoniu natural del ríu Negru. En concreto quieren que pase a menos d’un kilómetru de La Carisa (estrozando la posibilidá de da-y usu futuru), machacando diez cantaderos de gallu montés, y a una viesca de trescientos texos ente los Canales de la Boya y el monte Rasón, una de les mayores viesques de texos de tol cordal cantábricu.

Nel periódicu La Nueva Engaña d’ayeri, venía una entrevista mui graciosa a esi supuestu ecoloxista y auténticu mercenariu al serviciu del que más pague que ye Roberto Hartasánchez. Nél defende la regasificadora, les centrales de ciclu combináu y les llinies d’alta tensión porque diz que van ayudar a acabar cola minería de carbón (sic), ensin contar que n’Asturies tamos quemando, en centrales obsoletes que teníen que tar trancaes cuantayá, namás que’l 25 % de carbón propio. Si Asturies tien un desarrollu económicu fuerte pue ser xenerosa y permitise’l luxu de nun esplotar los sos recursos naturales, diz el figura, y pa eso val mas sacrificar dafechu ún d’ellos, total tenemos otros.

http://www.lne.es/secciones/noticia.jsp?pRef=1762_42_557892__Asturias-linea-LadaVelilla-golpe-muerte-mineria-carbon-apoyo

El señor Roberto Hartasánchez, presidente de FAPAS, ye ún de los munchos submarinos que suelen sofitar al poder cuando hai perres de por mediu. Si hai subvención a la mierda la naturaleza, que primero tamos nós, paez ser el so llema. Asina que nun ye nada raro ver la so firma en proyectos que diben dar repelús a un ecoloxista con dalgún escrúpulu. Nun ta de más alcordanos que la mesma Red Eléctrica a la que sofita agora los compró fai años, al encargar al Fapas qu’evaluaren l’impactu de retirada d’unes torres n’otru entornu de gran valir ecolóxicu como ye Redes. Dempués de garrar una fardelada perres, dixeron que yera meyor dexales onde taben, porque asina podíen posase los páxaros nelles (sic) y les abeyes facer caxellos.

Asina nos va. 

Definitivamente, la política n’Asturies nun ye nunca normal.

Esti añu, enantes d’agostu, lo único que ficieron foi colocar en nómina a los compañeros de partíu y familiares, pa dempués dir de vacaciones. Entamaron a trabayar, si pue dicise asina, esti mes.

Areces va tener que gobernar en minoría na cámara, porque munches veces van face-y la pinza los otros dos partíos hasta face-y la vida imposible. Por eso, cuasi que la única manera que tien de poder gobernar de manera tranquilo ye firmar ceo un pactu de concertación social con patronal y sindicatos, lo mesmo que fizo nos otros mandatos. Esti pactu (que nun se firma en nenguna otra rexón en tol estáu) nun va ser sólo llaboral, porque siempre garra estayes polítiques y sociales, marcando les llinies maestres que van dirixir el mandatu, y sirviendo de pantalla pa les estratexes d’oposición que-y faga la Xunta.

Yá hai rulando per ehí un documentu (82 páxines dicen) coles propuestes que va facer el gobiernín. Yá lu criticó la FADE diciendo que nun tien enfoque empresarial nengún y que tien una “escesiva carga social”, según ellos (cómo non) hai que da-yos mas perres a les empreses pa que medren y puedan competir. Pela so parte, los sindicatos esixen un capítulu específicu sobre cohesión social, y que s'incorpore tamién educación y sanidá.

Pa contentar a les empreses, yá anunciaron que se van escaecer de facer aquel gran mega-proyectu estrella pa facer viviendes en Llanera (agora que saben que nun se diben vender): aquellos dos grandes bulevares con tres grandes megaurbanizaciones (30.000 habitantes previstos), anunciáu como si fuere la caraba (anque se-yos ocurriera d’un día pa otru) enantes de les elecciones. Agora van convertilo en suelu industrial p'ampliar los polígonos.

Ye un pulsu, pero al final van arreglase como siempre: dando mas perres a unos y a otros y sacando una semeya toos felices dándose la mano.

Al rodiu de lo que contaba, hai que lleer esto qu'escribe un periodista y escritor asturianu (fíu d’una sobrina de Cuchichi) como la copa d’un pinu: Gregorio Morán, columnista de luxu nel periódicu catalán La Vanguardia.

L'enllaz ye ésti:

http://www.lacoctelera.com/reggio/post/2007/09/15/asturias-gozosa-decadencia-i-gregorio-moran-la

Vamos tener qu’esperar una selmana pa lleer la segunda parte.

Que pena que pa lleer verdaes como estes, anque tea equivocáu en dalguna cosa, haya que dir llonxe.

A nós, lo de que la barbaridá que ficieron en Truyés namás lo denunciaren los cuatro chiflaos del asturianismu, ensin que naide-yos ficiera casu, danos muncho que pensar.

¿Quién s’opón nesti llau del cordal a la llinia d’alta tensión ente Lada y Velilla? Cuatro gatos, porque equí’l gobiernín tien a toos bien cebaos a la mandrecha y a la manzorga.

Pela otra parte, dende fuera, paecen un poco más organizaos, y son quien a amestar al so movimientu a xente como Antonio Gamoneda, Julio Llamazares, Ángeles caso, Juan José Badiola o al pá de Zapatero.

Dalgunos intelectuales, ellí, tan por defender lo d’ellos, anque eso signifique enfrentase al poder vixente.

¿Diben facer, equí, lo mesmo los intelectuales d’esti llau del cordal?

¿Tenemos intelectuales d’esti llau del cordal?

Hai munchos caminos al otru llau, pero toos entamen per ésti.

La prensa d’esti país ta enlleno de resabios y restos del tardofranquismu. Xente que cuando podía aportar dalgo nun los dexaron y agora puen asomase a una columna d’opinión pa llanzar sermones, non por méritos propios sinón porque los qu’ocupaben enantes eses tribunes yá palmaron va tiempu.

Tienen toos la vocación de cures y de dar sermones nel sangre, y anque nun-yos dieren la oportunidá, diben siguir protestando contra’l mundu que nun los entiende dende la sección “cartes y escritos de los llectores”.

Artículos como’l de güei del tardofacha d’Esteban Greciet nel periódicu “La Nueva Engaña” (estes coses siempre salen nel mesmu sitiu ¿nun vos fixáis?) nun faen namás qu’amosanos que, si’l tema de la llingua ofiende a personaxes asina, vamos pel camín correctu.

http://www.lne.es/secciones/noticia.jsp?pRef=1759_52_556786__Opinion-vueltas-llingua

Lo que procedería nestos casos yera quitar al periódicu la subvención pol usu l’asturianu nes cuatro fueyes que saquen al añu nel suplementu Cultura y La Nueva Quintana. Total…

Gracies al esfuerzu personal de xente anónimo, van saliendo cosines na nuestra llingua que la ponen al altor d’otres más normalizaes.  

La xente del blog Gonzalez  y Gonzalez (tenéis un enllaz a la drecha de la páxina) acaben de presentar un guapu proyectu: un clon de la páxina castellana Menéame, p’apurrir noticies y da-yos votos faciendo que resalten les que más presten a los llectores.

L’enllaz ye ésti:

http://www.ximielgame.net/

Paeznos que pue convertise n’otru puntu d’alcuentru mui prestosu.

Lo que llamen “Escuela de Verano de la UGT” son unes xornaes que suelen caer na segunda selmana de setiembre y que tienen calter itinerante per Asturies. Va ya pa ocho años que se vienen faciendo, cada añu dedicaes a un tema distintu. Esti añu va ser n’Avilés, baxo’l títulu de “Seguridad versus libertad. Amenazas y oportunidades para una nueva ciudadanía”.

Y como les organiza quien les organiza ponen a tol mundu firmes.

Güei, a les cinco de la tarde, van inaugurar les xornaes Vicente Alberto Álvarez Areces (presidente d’Asturies), Cándido Méndez (secretariu xeneral de la UXT), Manuel Menéndez (presidente de CaxAstur), Juan Vazquez (rector de la Universidá), Miguel Ángel Álvarez Areces (presidente de Ticcih España, Comité Internacional pa la salvaguarda del Patrimoniu Industrial), y Justo Rodríguez Braga (secretariu xeneral d’UXT Asturies).

¿A dalguién-y estraña agora que la UXT fuere’l sindicatu que reventó fai tres meses la güelga na enseñanza contra’l desendolcu de la carrera profesional docente, o que reventare la güelga en CaxAstur enantes de les elecciones xenerales?

154. Esi ye’l númberu de denuncies qu’atropó España l’añu pasáu na UE por nun facer casu de la normativa europea. Xunto con Italia somos los que más casos aportamos, y muncho mas llonxe queden el restu países.

Pa qu'una denuncia seya aceptada pola UE tien que referise a un incumplimientu grave del drechu européu por parte d’una alministración del estáu, y nun pue ser anónima nin venir d’un asuntu priváu.

Ehí, ente eses 154 hai delles aportaciones asturianes, rellacionaes toes cola especulación: la regasificadora, el banzáu de Caliao y la Zalia.

Tamos avezaos, por parte de los medios asturianos, a aponderar a mediocridaes bien rellacionaes y a palmotiar a rabiar cuando bien a dalgún de fuera, mientes que los que de verdá valen faen el so trabayu en silenciu.

Por eso vamos dar la norabuena a Sergio Gutierrez Sánchez, un asturianín de Xixón, autor va un tiempu del famosu cortu na nuestra llingua 7337, qu’anguaño ta rodando la so primer película: Las Manos del Pianista, y que va un par d’años colocó un guión pa facer una película a la factoría de Guillermo del Toro. El resultáu foi El Orfanato, dirixía por Juan Antonio Bayona, una película de mieu clásica que tuvo mui bones critiques nel Festival de Cine de de Cannes d’esti añu.

Esta madrugada presentaba la película, xunto col direutor y Belen Rueda, nel festival de cine de Toronto, y la revista Variety, que suel contar les coses cuando tan mui cocinaes, dicía que New Line Cinema ta en tratos pa facer el remake americanu.

Norabuena.

¿Crisis? ¿Qué crisis? Entrugábennos Supertramp nun vinilu vieyu. Colos nuevos tiempos podemos facenos la mesma entruga, pero agora en Cd o Mp3.

Mientres nun paren de caenos enriba datos malos pela estaya económica, entamen los políticos a tirase los trastos ente ellos. Y a prometer coses, que les elecciones tan a la vuelta la esquina.

Entamamos bien llueu, porque tovía nos queden seis meses de promeses. En Rodiezmu prometieron subir les pensiones, tan falando de subir el Salariu Mínimu Interprofesional hasta los 600 euros, mientes que pela parte Andalucía yá prometen viviendes pa toos. Y ya entamen a mover la noticia de la rebaxa fiscal… Y los otros tovía nun tocaron la lluna.

Lo cierto ye col tema de la vivienda naide s’anima a meter mano nos impuestos que graven les viviendes, nin les tases abusives de los notarios. Midíes que sí diben baxar los precios de los pisos. Polo mesmo que nun s’espropien los terrenos a los constructores (tolo más dalguna permuta) sinón al paisanu d’a pie. Y ye que, por muncho que pidan austeridá y contención a los demás nel gastu, nengún políticu s’aplica’l cuentu.

Y que, como acabamos de saber, la economía global va bien, pero la de les families de pena. Catorce años d’espoxigue de la economía española, con un PIB xorreciendo a más del 3 % anual, mientes el sueldu de los trabayadores baxó en términos reales. Según la Encuesta de Costes Llaborales del Institutu Nacional d’Estadística, dende 2003 la paga media mensual d’un trabayador pasó de 1.480 euros a 1.616, pero si descontamos la subida de la inflación (más del 10 %) vemos que perdieron perres. Amás, los trabayadores paguen más impuestos agora que fai un par d’años.

Y eso ensin contar les hipoteques, de les qu’ayer súpose que tan frenando muncho más rápido de lo que diz el gobiernu.

Pero quédennos per delantre seis meses de promeses, y toos van tirar la casa pela ventana.