Escucando estrelles

De xuro que si vos cuento qu’a lo meyor nesti requexu del mundu tamos vivos por culpa d’un marineru rusu vais tomame por cualquier cosa, pero asina son les coses. Ta contao milenta veces en llibros y películes, pero nun ta de más contalo una más.

Nel añu 1962 la Guerra Fría yera lo mas in porque tol mundu falaba d’ello. Los rusos llantaren plataformes de misiles en Cuba apuntando pa los USA, y el presidente Kennedy ordenó’l bloquéu comercial de la isla col portaviones USS Randolph y 11 destructores. Xusto nel momentu que taba de camín a Cuba un convoy de cargueros soviéticos con más misiles, escoltaos por submarinos B-59.

El sábadu 27 d’ochobre de 1962 foi’l día más caliente d’aquella crisis. A un avión espía U-2 derribáronlu sobre territoriu cubanu y a otru atacárenlu sobre Siberia aviones Mig soviéticos. Asina que l’Estáu Mayor de los USA taba baraxando invadir Cuba pa da-yos hasta nel carné d’identidá cuando la flotilla encargada del bloquéu atopóse col convoy de barcos soviéticu. Un destructor americanu dio l’altu a un cargueru escoltáu por un submarín B-59. El submarín llanzó entós un disruptor de sonar que’l capitán del destructor confundió con un torpedu, polo que soltó una montonera cargues de profundidá.

Lo malo ye que los tres submarinos qu’acompañaben al convoy soviéticu teníen torpedos con cabeces nucleares, y p’acabar de xoder la marrana teníen autorización pa usalos ensin necesidá de pidir autorización a Moscú (dalgo abegoso pola tecnoloxía de la época): bastaba namás que los tres principales oficiales del submarín dieren el vistu buenu.

El capitán del submarín atacáu, Valentín Grigorievitch Savitsky, sotricáu d’un llau a otru poles cargues de profundidá, pensando que la guerra yá entamara, convoca a los otros dos oficiales de mas rangu: l’oficial políticu Ivan Semonovitch Maslennikov, y el segundu capitán Vasiliy Alexandrovich Arkhipov. Según se contó depués, el submarín yera un caos: llevaben 17 hores somorguiaos y entamaba a falta-yos l’aire, dalgún marineru yá s'esbaneciera y tolos oficiales pidíen al capitán que soltare los misiles d’una puñetera vez.

Asina que, xuntaos los tres oficiales pa decidir qué facer, el capitán y l’oficial políticu voten por disparar (de xuro que yeren de la cuenca y del Soma: cago mio madre, van enterase esos mierdes de lo que ye un misil nuclear soviéticu) Pero’l nuestru héroe, Vasiliy Arkhipov votó que non y consiguió calmar al capitán, diciendo que yera meyor esperar a ver qué pasaba.

Al poco pararon les cargues de profundidá gracies a que dalguién dende Washington punxere dalgo de cordura, y el submarín pudo salir a la superficie. Y al día siguiente Khurshchev retiraba los misiles de Cuba a cambiu de que los americanos quitaren los que teníen en Turquía.

Y non hubo fueos artificiales nin fin del mundu. Non poles negociaciones de los xefes d’estáu, sinón porque nel submarín había un paisanu con sentíu común que vio lo que tenía que facer nesi momentu críticu.

Vamos ver si na negociación del nuestru Estatutu hai dalgún Arkhipov o van ser toos capitanes ineficaces y comisarios políticos hooligans, como tamos avezaos. 

http://en.wikipedia.org/wiki/Vasiliy_Arkhipov

Parafrasiando al Kurt que xuxuriaba “l’horror, l’horror”, veome agora diciendo “la edá, la edá”.

Si fai venti años me ponen esta versión del Smoke on the Water, tocao con instrumentos musicales y orquestona, echo a correr. Y agora préstame. Tovía nun se si me gusta (si nun fuere poles voces, diba tenelo mas claro), pero préstame.

La edá, la edá.

Esti articulín de LNEngaña de güei, del que dexo l’enllaz, fírmalu Jose Ignacio Gracia Noriega:

http://www.lne.es/secciones/noticia.jsp?pRef=2008040400_42_623612__Asturias-valor-economico-lengua

Hai ehí escondía una frase guapa que resume una de les obsesiones de Jose Ignacio Gracia Noriega:

“Ya no se trata de que la lengua sea la compañera del Imperio, sino que es un factor de la expansión económica. Para entender esto, basta con imaginarnos a un empresario asturiano escribiéndole a un cliente japonés en bable. Naturalmente, no se lo imaginan, porque una cosa es la bolera y otra los negocios”.

Ye una pena que tan altu señor (Jose Ignacio Gracia Noriega) nun vaya a lleer estes llinies, non porque nun sepa navegar pela rede (que tamién), sinón porque tan escrites nuna llingua de bolera. Envede suañar con un Imperiu onde toos-y rindan la debida pleitesía, tien que conformase con escribir (mal) nun castellanu garrulo les sos faltosaes, con una maquina d’escribir más vieya qu’él.

La pena ye que dalgunos dan-y más importancia de la que tien. Nun merecería nin estes llinies si nun fuere porque hai un periódicu que-y da una páxina entera, tolos díes.

Acabáramos.

Tan falando de desaloxar a un pueblu enteru por razones medioambientales. Como cuando Chernóbil.

¿En qué república bananera ta pasando esto?

Pues al llau de casa… Ente’l Gobiernín d’Asturies y l’Ayuntamientu de Carreño tan estudiando la posibilidá de desaloxar a la probe xente que queda na parroquia de Carrió, asitiada nel valle d’Aboñu. Ye una parroquia que foi rural nun fai tanto, anguaño estrozada por una depuradora, una térmica y una cementera qu’enllenaron de parques minerales y de tráficu de camiones la vida de tolos díes.

N’Asturies tamos avezaos a echar a la xente de les cases pa favorecer a los constructores, pero nun se yo si hai munchos casos de desaloxu d’una población entero por favorecer dellos intereses empresariales.

Déxovos equí un guapu vídeu de Pablo Quiroga sobre’l tema:

 Pues na, que tan de vacaciones per África tolos que parieron l'ACEBA (incluyíos sindicalistes), pa desendolcar nueves estratexes.

Diez dies per Angola y Sudáfrica que pagamos tu y yo.

Avilés, la ciudá más guapa de tol principáu, ta mui degradao y lleven quince años (dende l’escaecíu plan Avilés2000) prometiendo-yos una actuación que-y llimpie la cara a la ciudá. Pero son 80.000 persones namás, xente tranquilo, y tan fartucos de ver cómo-yos venden fumu y les perres van p’Auditorios o Campus n’otros sitios.

L’aparatu propagandísticu del poder vendió’l Niemeyer por tierra, mar y aire. ¿Cuántes xuntances, ruedes de prensa, noticies y fartures xeneró dalgo que nun esiste? Paezme que nun hai nengún otru proyectu nel mundu mundial que, siendo aire, seya tan publicitáu.

Esta selmana vendiéronnos (dende Madrid, manda coyones que lo vayan a presentar ellí) la Isla de la Innovación, que ye, de momentu, media docena d'infografíes mui guapes y un par de maquetes de cómo va quedar aquello. Namás. Pero nin una pallabra d’ónde van salir les perres pa financialo. Y si, va ser un pelotazu.

http://actualidad.terra.es/articulo/principado_asturias_madrid_isla_innovacion_2344470.htm

Si vos fixáis, ye lo mesmo que ficieron con la Universidá Llaboral: primero va ser esto, depués esto otro, depués lo de más allá, agora cambio de nome… y cuando lo ponen en marcha quéxense de que la xente nun sabe mui bien qué ye. ¡Si vais camudando vosotros d’idees sobre la marcha!

Primero Muséu de los Premios Principiegos, depués Niemeyer a seques, depués Isla de la Innovación. Tovía nun hai nada, pero ya ta amortizáo abondo.

Tamos dando imaxe de que se faen milenta coses, anque nun se tea faciendo nada.

Visto dende fuera debe prestar: hai que ser mui llistu pa engañar a tanta xente con tan poques coses, o tien qu’haber una masa borreguil mui grande pa que pastores tan cortinos dirixan tola reciella.

Delles organizaciones agraries (COAG, UCA y Asaja) punxéronse güei na Escandalera a repartir lleche gratis (más de dos mil llitros, dicen) pa protestar polos baxos precios colos que tienen que vivir los productores.

Fueron cientos los que ficieron cola pa poder garrar un llitru lleche.

A toos esos nun-yos importaba un res que los ganaderos cobren agora’l llitru lleche que producen al mesmu preciu que fai años. Taben toos ellí porque nun teníen nada meyor que facer que ponese nuna cola pa pillar gratis dalgo que val malpenes un euru.

Dalgún dirá qu’hai munchu ociosu, y otros dirán que munchu esgalazáu a namás un par de xintes de la fame.

 Especial atención al nome de Xixón nesta noticia del periódicu El Mundo:

http://www.elmundo.es/diario/mercados/2350723.html

(PD: como nun dexa abrilo, el testu ta nos comentarios)

La quinceava comunidá española en competitividá (por debaxo solo tan Andalucia y Extremadura), ye tamién una de les que tien la suba del IPC más alta, hasta asitiase nel 4,7 %, según datos oficiales.

Tuvimos años echando a la mocedá pa que ficieren la vida fuera, y agora atopamos una sociedá avieyada, esclerótica y con medrana. Una sociedá asina ye fácil de manexar. Si, pa encima, tienes cebaos a los axentes sociales, sabes que’l clientilismu tamién ye otra ferramienta poderosa pa caltener el poder.

Tan fiándolo too al continuismu de  la obra civil, y cualquiera que sepa dalgo pue contate que la obra civil fáenla máquines, por más qu'haya conductores y señalistes, y cuando les máquines cuelen, y s’acaben los fondos europeos, y tengamos el nuestru paisax y l’ambiente fechu una mierda poles llinies d’alta tensión, les centrales y los eólicos… entós dalgún de los qu’agora palmotia va llorar.

Nun se si vos alcordáis, pero cuando entamó’l gobiernu de ZP, na semeya de los nuevos ministros había, daquella, ocho ministros y ocho ministres. Yera una apuesta clara pola paridá, pero foi dalgo que nun caltuvieron col remocique a metá de la llexislatura: quedaron en nueve paisanos y siete muyeres (y por ciertu, ¿pa cuando una muyer en industria, por exemplu?).

Y ye que si’l gobiernu nun atiende al principiu d’igualar la presencia d’homes y de muyeres no público, mal va esixir que se cumpla lo de que’l númberu de representantes de cada sexu nun seya más del 60 % pa ún d’ellos (según establez la Llei d’Igualdá del 24 de marzu del 2007).

Asina, si echamos una güeyada a dellos organismos públicos, la cosa ye peor. Nel Conseyu Económicu y Social, de los 61 miembros sólo’l 15 % son muyeres. Nel Conseyu d’Estáu, compuestu por 30 espertos nombraos direutamente pol Conseyu de Ministros, namás hai un 7 % de muyeres.

Una güeyada a los órganos directivos de los museos de carácter estatal, o a les reales academies, que son instituciones d'autoridá público, dannos que la presencia de muyeres ye perbaxa. Nos órganos de dirección de los hospitales namás hai un 13 % de muyeres, y nos órganos de dirección de les caxes d’aforros (participaes poles autonomíes) la presencia de muyeres ye inferior al 20 %.

Si son los gobiernos los qu’incumplen la llei d’igualdá, ¿a dalguién-y estraña la escasa presencia de muyeres nos conseyos d’alministración de Duro Felguera, Hidrocantábrico, Gam y demás empreses-estandoriu d’esti requexu’l mundu?