Escucando estrelles

(munchu güeyu, qu'hai spóilers a maza)

Lo que ta pasando estos díes cola polémica d’El Musel ye una ópera bufa, que pue aspirar guapamente al guión a la meyor comedia del mundu mundial.

Vamos intentar facer un mapa.

Un grupu, Los Verdes, que cuando taba xuncíu a IU nel gobiernu, miró pa otru llau col estrozu que se diba facer nel Musel, cola Zalia, la Regasificadora y tolo que vien tres d’ello, tuvo la santa decencia de denunciar el sobrecoste. Como Saul (¿foi él?) cuando cayó del caballu y vió la lluz, asina mesmo, pero ensin epifanía.

Un sobrecoste de más de 250 millones d’euros, ensin que naide diere, a día de güei, una esplicación clara y cenciella, pa qu'hasta los que nun somos políticos podamos entendela. Y depués quieren dir a la UE a pidir financiación pa esos sobrecostes engañando, diciendo que son una segunda fase de la obra. Y too pa llucrase cuatro empreses, garra les perres y corri, enmierdando pa siempre a los que vivimos equí. Oye, mira, pues non.

En nenguna cabeza cabe que se pueda perder tanta pasta, si hasta robaben fierro a camionaos como salió denunciao fai bien poco (y nun se supo namás, por cierto). Estes coses sábense con tiempu abondo, anque depués nos dosifiquen la información al restu los mortales (tan mui estudiaos los tiempos d’apaición en prensa) porque nun tamos preparaos pa saber la verdá.

O yeren unos incompetentes, toos, por nun tener capacidá técnica pa prevelo, o sabíenlo dende l’entamu y miraron pa otru llau. Nun se yo que ye peor.

Pero la culpa siempre ye d’otros: de les oles, de la piedra, de HC, de los contratistes o de los políticos, cuando hai un tíu supuestamente preparáu, que ye direutor del Puertu y ye amás el que ta dirixendo les obres (too queda en casa, bobu)

Y ye too pa poner la puñetera regasificadora. El puertu importa-yos una mierda.

Y entós a qué coyones hai qu’andar cada poco subiendo la lluz (van proponenos otra subiduca pa final d’añu) porque dicen que-yos cuesta perres porque la dan barata, cuando añu tres añu espublicen una suba nos beneficios. Si tan usando pola cara los recursos (montes, ríos, mar, tol tarrén que-yos peta) gratis, vamos anda. Equí recomendamos lleer un clásicu: http://ateyavana.nireblog.com/post/2007/07/26/la-tarifa-electrica :-)

Agora solicitaben namás 135 millones d’euros a Europa, y Europa, esi ente abstractu y omnipotente, díxonos que non. Porque si presupuestes una obra en 580 millones y depués gastes la mitá mas, dalguién tendrá la culpa, como en cualquier otra cosa: el que lo estudió, el que lo sacó asina, el que se presentó con esa ufierta (y se comprometió a facelo) y el que nun controló’l gastu… porque si toos lo sabíen, entós tamos falando d’otra cosa muncho más fea. Y entós lo que fai falta ye lluz y taquígrafos.

Porque por cinco mil euros que dicen que costaba un caxetín de tráficu, mandamos a dos sindicalistes a la cárcel ¿Alcordáisvos?, pero claro foi culpa d’un funcionariu bobu.

Pero pa qué protestáis, cabrones, que les perres nun les ponemos nós, que nos vienen de fuera, d’esi ente abstractu y omnipotente que pare les perres por ciencia infusa.

http://www.lavozdeasturias.es/noticias/noticia.asp?pkid=444710

http://www.elcomerciodigital.com/gijon/20080913/gijon/considera-suicidio-frenar-musel-20080913.html

Tan toos d’alcuerdu… ¿Còmo nun van a tar?

Ta complicao metese en xardines, porque l’Autoridá Portuaria tien una xestión propio, y un conseyu qu’asume les consecuencies de lo que firma ¿non?. Y pa saber quién ta, tornamos a los clásicos: http://ateyavana.nireblog.com/post/2007/11/30/conseyu-dalministracian-de-lautorida-portuaria-de-xixan (ye que toi que lo vierto).

O seya, toos a tirar del tetu. ¿Cómo nun van a tar d’alcuerdu?

Pue haber sanciones europees, y paez que diba ser bono que les hubiera, más que nada pa que nun se nos quede cara de tontos y poder siguir confiando en qu’hai xente serio faciendo política, anque tean lo más cerca en Bruseles.

Pa más información: www.losverdesdeasturias.org.

Lo normal, nun país normal, diba ser criminalizar al infractor y non al que se chiva. Pero esti nun ye un país normal ¿nun t’enterasti tovía?.

Hai quien diz que lo que ficieron Los Verdes foi mover una palanca en Bruseles p’algamar unos puestinos n’Asturies, que tol mundu conoz lo que dixo Arquímedes: daime una palanca y fáigome Alministración.

Si hasta’l mesmu fíu de Chus Pesetes, tercer teniente d’alcalde de Xixón, (tres consultar colos tres asesores, tres, que-y pagamos ente toos) contólo estos díes: él opúsose a la variante 3C cuando yeren oposición, y depués, cuando taben nel gobiernu, aprobáronla, lo que demuestra que taben dende l’entamu col Superpuertu y tal, y tal. Podéis lleelo equí (alvierto que contién material esplícitu):

http://www.lne.es/secciones/noticia.jsp?pRef=2008091500_35_675392__GIJON-pugna-politica-sobre-Musel-genera-duros-ataques-entre-gobierno

Oye, mira tu, xusto cuando tan cortexando la FSA ya IU, a piques d’averase al altar y dicir “si, quiero”, van Los Verdes y ponen pates arriba too cola denuncia.

¿Y esto va tener consecuencies pa lo otro? Home, pues claro, agora ta nidio que va haber pactu, pa poder neutralizar a los que más te tan tocando les narices. Si los d’IU nun son namás qu’una noveluca desfasada de Pirandello, cuatro personaxes en busca d’autor que se vienden por un platu llenteyes, qu'o firmen el papelín o llévalos la corriente.

Y si pa firmalu hai qu’escaecer lo d’El Musel, la Zalia, Caliao, la incineradora, la llingua y nun se cuantes coses más, namás te voi dicir: ónde hai que firmar, coño, que yo tengo familia.

http://www.elcomerciodigital.com/gijon/20080912/politica/astucia-izquierda-unida-20080912.html

Asina que la solución ye nidia. Habemus pactu y facemos lo que nos da la gana. Los del SOE echen la culpa a los d'IU-BA-LV y estos echen la culpa los de verde, y éstos echen la culpa a una escisión, y la escisión echa la culpa al funcionariu bobu que foi a echar l’espediente por trámite alministrativu.

Ente toos la mataron y ella sola morrió.

La única que tuvo bemoles pa denunciar toa esta cuchera dende l’entamu foi Alicia Castro cuando taba en Madrid, y dieron-y hasta nel cielu na boca. Acabó dexando la política y pastoriando los negocios de la familia (a los que tamién dieron cachu, por ciertu).

Triste, mui triste too.

Les coses son mas o menos asina. Ensin Musel nun hai regasificadora, y ensin regasificadora…

O seya, que se va facer de toes toes.

ADDENDA: http://mas.lne.es/foros/index.php?showtopic=13162 (porque nunca ta de más alcordanos de delles coses)

Una buena

(nótese la demonización de lo verde)

http://www.lne.es/secciones/noticia.jsp?pRef=2008091000_35_673783__GIJON-presidente-Musel-admite-riesgo-niegue-fondos

Y una mala

http://www.lne.es/secciones/noticia.jsp?pRef=2008091000_41_673873__Occidente-Asturias-quedara-sanean-advierten-propietarios

El neolliberalismu consiste no siguiente: llibertá de mercáu cuando tengo beneficios, too pa min y l’estáu qu’estorbe lo menos posible, y cuando vienen mal daes, hai que sofitame, pa qué pago impuestos.

Agora paez ser que’l turismu, lo qu’esperaben que fuere la gallina los güevos d’oru pegó un baxón. Y si lo demás diba mal, que’l sector servicios falle (dalgo, por otra parte, esperable por cualquiera menos polos aficionaos que nos gobiernen) déxanos en porrica.

Asina qu’hai que meter perres nel sector, ACEBAlos bien, vamos facer un Cluster, ser pioneros n’España (siempre somos pioneros, nun sé cómo nos arreglamos) na busca d’un turismu de calidá, de rentes altes, xente que pueda viaxar cuando-y da pola gana y que gaste a tutiplén.

Mirái la noticia (la risión ye lo de la Cuenta-Aforro-Turismu, institucionalizar el calcetu)

http://www.elcomerciodigital.com/gijon/20080905/asturias/principado-trata-atajar-crisis-20080905.html

Si’l turismu baxa ye porque la xente viaxa menos, porque nun hai pa too y si pues aforrar con un bocata pa qué vas pagar a preciu d’angula un menú del día malu de los que te tiren en tantos llaos. Y qué pue ofrecer una rexón que vendía un paraísu natural y ta perdiéndolu a marches forzaes, colos iconos de los cartelos esbarrumbándose, y marafundiando tou esi patrimoniu.

Envede respetar la natura que nos queda, sofitar l’arquitectura tradicional que nun vas atopar en nengún otru sitiu, poner en valor xoyes como Obona o los castros, facer valir la gastronomía autóctono, y ofrecer al que vien de visita un productu diferenciáu, que si nun vien equí nun lu va atopar en nengún otru llugar del mundu, vamos marafundiar una montonera perres en nada.

Enterramos dineru nun enxendru como La Laboral, en maquetines del Niemeyer y en chorraes, y asina nun vamos a nenguna parte.

Bienaventuraos seyan tolos Cluster, tolos estudios y xornaes, porque asina los de siempre van siguir comiendo.

¿Y d’ónde van salir agora les perres pal turismu? Pues de la cultura, que la Conseyería ye la mesma y tien el presupuestu zarráu.

Si ye que nun aprienden, anque-yos metas el focicu dientro.

Mientres, ensin que la xente fale d’ello (ye meyor contar quién ye más romanu, si Xixón o Uviéu http://24horas.excite.es/cultura/68888/ASTURIASGijon-El-nuevo-museo-en-Tabacalera-se-retrasa-ante-los-nuevos-hallazgos-arqueologicos-de-origen-romano) nuna  de les rexones onde más se lleva gastao en cursinos, xornaes y estudios de seguridá llaboral del mundu mundial, llevamos yá siete muertos trabayando no que va d’añu.

Pero tranquilos, que toca Rudezmu, y va traenos promeses y titulares a esgaya.

Vamos alcordanos:

http://ateyavana.nireblog.com/post/2007/11/08/sobrel-turismu

Una piecina más d’esti mecanu que nos tan armando en secretu ensin que la xente faiga nada.

Van construyir un gaseoductu ente la regasificadora del Musel y Llanera ensin sacar estudiu d'impactu ambiental, nin coses rares d’eses que nun faen otra cosa que retrasar y encarecer les obres.

Pa los que tengáis un minutín, llee-ylu por favor, que ta too perclaro y la verdá ye que nun tien desperdiciu nengún

http://www.boe.es/boe/dias/2008/08/19/pdfs/A34928-34931.pdf

Total, consultáronlo a la Conseyería de Mediu Ambiente y nin siquiera contestó, pa qué,  y entrugaron tamién a un par d’asociaciones ecoloxistes (nuna rexón onde hai bayura d’elles, pa encargar les coses a una u otra según lo que quieras algamar) tamién ensin respuesta. Asina que pa que van gastar tiempu namás por una franxa de 24 metros d’anchu QUE DIBA ATRAVESAR XUSTO PEL MEDIU’L YACIMIENTU DE VERANES (y la Dirección Xeneral de Patrimoniu Cultural de la Conseyería de Cultura nun s’entera y diz que tiren p’alantre, que llibren) hasta qu’un llistu del Ayuntamientu diose cuenta, tres pasar por milenta manes enantes. Menos mal.

Y con tantes instituciones cebaes, al final van tener que ser los paisanos los que lo defendan.

http://www.elcomerciodigital.com/gijon/20080829/gijon/parroquias-afectadas-gaseoducto-musel-20080829.html

O seya, los paisaninos d’a pie contra toles Alministraciones interesaes.

David contra Goliat, again.

Nueve recomendaciones para celebrar el día del blog. Garro nueve porque asina puedo entemecer dalgunos mui conocíos con otros non tanto, y porque nun sabia cual quitar pa dexalo nos cinco que piden. Vagu y/orixinal que ye ún.

1-      http://www.doilacara.net/ Porque me paez la meyor campaña que se fizo nunca pa sofitar la llingua dende la rede. Y a lo meyor fuera tamién.

2-      http://yetube.nireblog.com Porque presta atopar munchos de los videos que tas buscando nel mesmu sitiu, y porque m’escacharro de risa munches veces.

3-      http://trasgu.nireblog.com/ Porque siempre ye interesante, porque foi de los primeros y nun perdió’l toque.

4-      http://munduxaime.blogspot.com/ Otru clásicu que sigue enforma en forma, he, he.

5-      http://esbilla.net/ porque paezme una idea prestosa qu’hai qu’esparder mas (un minutu de silenciu por Ximiélgame, snif).

6-      http://latabierna.blogspot.com/ porque descubro grupos que nun conocía, y porque amuesa que Xandru Fernández, amás de ser el meyor escritor na nuestra llingua, cranea.

7-      http://elxanulcaborniu.blogspot.com/ porque ye collaciu, y cualquier día voi dir abellugame a la so viesca, que paez ser un sitiu onde les idees guañen bien.

8-      http://fartucones.blogspot.com/ porque un fartón como soi nun podía menos qu’apuntar dellos sitios nuevos y esti tío, nes sos reencarnaciones sucesives, siempre foi de fiar.

9-      http://www.siero.com/pingarates/ porque tien personalidá.

Na Xunta de Lleón acaben de destapar un casu pequeñu de corrupción. Polo menos tres cargos de confianza (cesaos) y seis funcionarios del centenar qu’hai nel Serviciu d’Industria tan siendo investigaos por meter la cuchara nel guisu enerxéticu.

Y ye que tantu políticu con ganes d'enmierdar el paisaxe, en contra de miles de persones, tenía que tener dalgo detrás como esto. Hasta 25.000 alegaciones punxeron los vecinos a les llinies d’evacuación d’alta tensión na montaña llionesa, ensin que valiere pa nada.

http://www.soitu.es/soitu/2008/08/14/info/1218728338_812982.html

¿Y a ésti llau?

Fai falta lluz y taquígrafos, a esti y al otru llau del cordal con esti asuntu del guisu enerxéticu.

Y yá que nos ponemos, hai que facelo con munches otres coses. Vamos facer alcordanza de lo que dicíamos fai más d’un añu:

http://ateyavana.nireblog.com/post/2007/07/29/los-chiringuitos-del-poder

Los políticos, unes vegaes al serviciu del partíu y otres por iniciativa propia, monten munchos negocios. Los menos dañinos son aquellos que s’aproveches de la norma qu’obliga a revisar tanques de gasoil (por exemplu) creando una empresa que lo faga, los que de verdá son dañinos son los que fuercen les coses y faen que’l sitiu onde viven se convierta nuna cuchera.

Y los que sofiten la omertá por interés o cobardía. Hai que dir por informes a Suecia o a onde seya falta, facer  que los Alvaro Cuervo qu’hai pel mundu tengan voz y s’esparda.

Tanta culpa tien el que mata como’l que sostién la pata.

Cada equipu de fútbol tien una espresión qu’usen los aficionaos cuando quieren da-y ánimos. Dalgunes son propies de cada tierra. A lo llargo de munchos años estes espresiones van calando de l’afición al públicu en xeneral y, asina, si digo: hala, aupa, musho, viva, forza, visca… caún de vosotros ta poniendo’l nome d’un equipu per detrás ensin problemes.

La espresión pal Sporting ye “puxa”, como tol mundu sabe. ¿Cuántes veces oyistis “puxa Sporting”.

Comentábame un aficionáu que, na celebración del ascensu, el Presidente Vicente, intentando esquivar la palabra na llingua prohibida, dicía “aupa”. ¿Cuántes veces oyistis “aupa Sporting”?

Esti collaciu dicía que nun podía ser que tuviere tantu odiu a les palabres na nuesa llingua. Que tenía que ser por culpa de la Pita, que fizo que tarreciere por demás tolo que tenga que ver cola llingua.

Les palabres importen.

Llee-ylo, que nun tien desperdiciu.

http://www.lne.es/secciones/noticia.jsp?pRef=2008070600_46_654038__Sociedad-y-Cultura-Facultad-puede-separar-asturiano-politica

Surrealista dafechu

Paecelo, polo menos.

http://www.cotizalia.com/cache/2008/07/04/9_queda_ayuntamiento_oviedo_adjudica_contrato_millones.html