Escucando estrelles

Dientro d’unes xornaes de l’Autoridá Portuaria de Xixón que se tan celebrando esta selmana, vino a dar una charla Francisco Macía Tomás, subdireutor xeneral de Planificación Enerxética del Ministeriu d’Industria, y la verdá ye que dixo dalguna cosa interesante.

A la entruga de si tien sentíu concentrar producción eléctrica n’Asturies, que yá tien escedentes, envede facelo en zones deficitaries, diz que nun se va pronunciar, más que nada porque ye’l promotor el que toma les decisiones, y el so departamentu namás mira que cumplan les condiciones. Y diz una verdá de Perogrullo: les centrales hai que poneles onde faen falta, y lo deseable ye que seya lo más averao posible al puntu de consumu, p’aforrar n’infraestructures y en perda d’enerxía nel transporte. Y pon como exemplu Murcia, onde tres promotores van facer en Cartaxena ciclos combinaos con una capacidá de 3.200 megavatios, habiendo una capacidá de transporte de 2.400 Mw que namás pue aumentase hasta 2.800.

Francisco Macía Tomás amosó ser educáu, al plantear n’Asturies los problemes que tienen en Murcia. Maxinamos que cuando vaya ellí va contar los problemes qu’hai n’Asturies, anque nun nos vamos enterar.

Asturies produz anguaño’l doble de la enerxía que gasta, y ensin embargu tan falando de duplicar la capacidá eléctrica con seis centrales de gas (2 en Soto de Ribera, 2 en Nubleu, 1 en La Perea y 1 nel Musel) que tengan la mesma capacidá que tienen anguaño (2.600 Mw) les centrales de carbón. A eso hai qu’amesta-y la nueva central de carbón d’Aboño, con una capacidá de 800 Mw más.

Van mantenese tovía unos años les centrales de carbón, ensin gastar un duru nelles, anque teníen que tar cerraes cuantayá.

Esti aumentu na capacidá va trayer de la mano un espoxigue de molinos eólicos, porque tien qu’haber un porcentax d’enerxía llimpio. Anguaño hai instalaos 7, y hai proyectos pa mangar otros 30 nel occidente astur (qué más da que seya reserva de la biosfera). Y por supuestu, esto lleva tamién a facer nueves llinies d’alta tensión, qu’agora sólo puen sacar 1.200 Mw, contra la oposición de toles zones per onde van pasar.

La realidá ye qu’Asturies ye, agora mesmo, la rexón española que más CO2 emitimos por habitante, triplicando la media europea, y como cada vez llueve menos y se llimpia peor la mierda, va aumentar muncho la mortalidá por razones ambientales, onde ya somos primeros de tol país según l'INE. Tamién lo somos nel númberu d'alerxes, y tamién tamos nos primeros puestos n’enfermos respiratorios, cardiovasculares y tumorales.

Cuando tol plan que tien montáu esti gobiernín salga alantre, vamos salinos per primer vez nuna estadística, direutos al llibru Guinnes nuna montonera estayes.

Los economistes son xente raro, que vaya eso por delantre, y enxamás se van poner d’alcuerdu ente ellos. Partiendo de datos exactos, caún va facete una predicción distinta dafechu, como si fueren homes del tiempu. Como dixo John Kenneth Galbraith: un economista ye dalguién que nun sabe un res de lo que fala, pero que va facevos  creer que la culpa ye vuestra por nun entendelu. Asina, la economía pue ser dalgo mui complicao o dalgo cenciello, y nun hai dos persones que lo vean de la mesma manera: col mesmu sueldu ún aforra y otru nun llega a la fin del mes, y la economía d’un país nun dexa de ser mui distinta, a una escala muncho mayor, de la d’una casa: entra esti dineru, namás, y si gasto muncho nuna cosa nun me queda abondo pa esta otra.

A la falta de confianza nel tarrén económicu de la xente, el gobiernu contrataca, como nun podía ser menos, con un mensaxe de tranquilidá, diciéndonos que’l Presupuestu Xeneral del Estáu ye, ente otres munches coses, equilibráu.

El qu’un presupuestu seya equilibráu reflexa namás un bon equipu de contables con munchu trabayu previu, y ye dalgo que tendríen que tener tolos gobiernos, seyan del color que seyan. La diferencia ente una opción política y otra vien dada polos ingresos (d’onde saquen les perres) y los gastos (en qué les gasten), quién paga y quién recibe más, porque la distribución del dineru pue facer qu’aumenten o mengüen les posibilidaes de los más necesitaos. Eso son fechos, y tolo demás son opiniones.

Agora bien, un gobiernu siempre tien que mirar polos intereses xenerales, porque ta ehí pa eso, y porque si nun lo fai nun va tar ehí munchu tiempu. Asina qu’hai que mimar al mayor númberu de xente posible si quies siguir cortando’l bacalao.

Sabiendo que la batalla electoral va llibrase en gran midida nel tarrén económicu, llegamos a unos Presupuestos Xenerales del Estáu que quieren aparentar normalidá y sacar beneficios a cortu plazu. Asina mímase a los más mozos (un colectivu mui interesante electoralmente y poco aprovecháu) y espoxiga muncho la inversión n’infraestructures (munches máquines y xente trabayando enantes d’unes elecciones faen a la xente creer que’l país medra y les coses van bien).

La verdá ye que los problemes económicos tan entamando agora, pero llevaos pola inercia, nun los vamos a notar del too hasta l’añu qu’entra, y yá los diremos solucionando sobre la marcha.

Les autonomíes del interior (onde nun hai nacionalismos) quéxense de qu’escapen munches perres pa les autonomíes de la periferia más llonxana. Y los catalanes, como siempre, quexándose de que reciben menos de lo que dan, que nun ye que tean subdesarrollaos, pero ya que según ellos son el motor que tira, necesiten gasolina. Por eso piden que’l porcentax d’inversiones seya en función de l’aportación de cada zona al PIB, como diz el so Estatutu (pa qu’asina los más probes sigan siendo más probes), mientres que rexones como Andalucía piden que’l repartu seya en función de la población, ya que nun pue ser en función de la estensión territorial, colo que más o menos empaten. Cualquiera d’estos dos sistemes diba dexanos a nós en porrica, pero como a la fin el repartu va ser en función del so pesu políticu, vamos a menos.

Enantes d'ayeri presentáronse los Presupuestos Xeneral del Estáu, y tolos medios se dedicaron a echa-y una güeyada según la so tendencia política, y cada rexón, amás, según les sos mires.

Dalgún mediu titulaba, con lletres bien gordes, qu’Asturies vuelve a recibir otra vez la mayor inversión por habitante de tol estáu, dalgo dictao a costafecha dende la delegación del gobiernu.

Lleéndolo asina, la nuestra rexón, que tien un pesu nel PIB del país del 2,2 %, y qu'en términos de población namás somos un 2,4 % del total, recibe un 4,2 % de la inversión de tol estáu. Agora bien, hai munchos proyectos que s’incluyen que tienen un calter plurianual (autovía del Cantábrico, Variante de Payares…) que se van arrastrando dende va munchu, munchu tiempu, y hai capítulos que s’amiesten pa engordar la factura que nin nos van nin nos vienen (como lo que se-yos da a EBHISA, RENFE, FEVE…)

De los 1.018 millones d’euros que nos caen en gracia, destaquen los 806 del Ministeriu de Fomentu (Autovía del Cantábricu, Autovía Uviéu-La Espina, Muselón, Variante de Payares…)

La llectura que yo fago ye que’l día que s’acabe tantu afuracar, achaplar y tirar montes al mar, pondremos un lletreru que diga: trespásase negociu furrulando, por nun poder atendelu.

Dalgún, a lo meyor, yá recibió un corréu pela rede onde-y ufierte un trabayu mui bien pagáu por facer un trabayu fácil y cómodu dende casa, si tienes internet y una cuenta bancaria.

Ye perfácil. Namás tienes que contestar y comprometete a trespasar les perres que metan na to cuenta pa otres que te manden, polo xeneral nel estranxeru. A cambiu, pues quedate col 10 % de tolo que mandes: si te meten 3.000, mandes 2.700 euros.

Esto ye dalgo real, nun creáis que me lo toi inventando.

El problema ye qu'eses perres  son dineru negro, y al saltar d’una cuenta a otra lo que se ta faciendo ye blanquialo. La cuenta que lo recibe ciárrenla, y les perres ya son llegales.

Que sepáis que siempre queda rastru de les cuentes usaes, y que’l blanqueu de capitales ye un delitu.

Según va pasando’l tiempu, más me paez que la política n’Asturies nun dexa de ser una política de pueblu un poco publicitao. Tini Areces nun ye más qu’un alcalde d’aldea promovíu a Alcaldón, y la verdá ye que demuéstralo diariamente, camudando’l formigonar caleyes por construyir autovíes o poniendo puntos de lluz nuevos.

El nivel de vida d’un país depende de munches coses. Munches vegaes namás na confianza de los ciudadaninos en que les coses van bien y puen siguir asina munchu tiempu.

La confianza ye dalgo que tarda munchu tiempu en espoxigar y pocu, mui pocu en perdese.

A cortu plazu, les estadístiques van contanos que la economía española sigue medrando a un ritmu d’ente’l 4 y el 3 %. Pal añu qu’entra los analistes tan baraxando ente un 2,8 % si les coses van bien y un 1 % si van mal. O seya, que vamos a menos.

Pero’l principal problema, amás de la falta de lliquidez (los bancos nun s’empresten perres ente ellos más qu’a cortu plazu, por nun saber quién ta entrampiáu coles hipoteques basura nos USA) ye la falta de confianza que se ta tresmitiendo a la xente, por más que nun paren de dicinos que les coses van bien y que ta too controlao.

La economía española, borracha de créditos a preciu tiráu, metióse nuna espiral de consumismu nos últimos años, tanto la xente d’a pie (esi pisu, esi coche, esa tele de plasma…) como les grandes empreses (esa Opa, esa empresina tan barata en Sudamérica…). El resultáu ye un claru déficit esterior, que ta estimáu nunos 100.000 millones d’euros. O lo que ye lo mesmo: fáltennos eses perres pa mantener el nuestru nivel de vida, debémosles.

Cuando se dio un fostiazu un bancu hipotecariu inglés, como ye’l Northern Rock, los bancos de tola UE que más lo sintieron onde más-yos duel (la bolsa) fueron los bancos españoles ya irlandeses, les dos economíes que más espoxigaron nesti tiempu de vaques gordes.

Por poner exemplos de que se tan viendo les oreyes al llobu, el Bancu Popular aplaza pa más alantre una emisión de cédules por 2.000 millones d’euros pol clima de desconfianza. Ye dalgo que nun pue facer el Bancu Santander, que necesita perres pa pagar el bancu que mercó n’Inglaterra, asina que va pagar un 7,5 % pa los que garren la so deuda subordinada a cinco años, un preciu d’otros tiempos. La falta de lliquidez fai que la CECA, la patronal qu’agrupa a toles caxes d’aforros, anuncie problemes a la hora de conceder créditos pa los próximos meses.

Hai más datos malos. L’espoxigue del emplegu baxó 7 décimes con respeuto al añu pasáu, el consumu de cementu baxó cuasi un 5 %, y la importación de bienes de consumu un 6,7 %.

Con un escenariu asina, l’anunciu (electoralista dafechu) por parte del gobiernu d’ayudes al alquiler nun podía menos que recibir palos. Por nun aumentar la ufierta de pisos que s'ufierten, incentivando  o castigando y dando garantíes a los propietarios, y optar por marafundiar dineru público aumentando los precios. Y sobre too, por vendelo como una manera de que la mocedá se pueda emancipar. Lo único que van llograr, con una tasa de fracasu escolar doblando la de la UE, ye crear una mocedá aborregao con una confianza absoluta en que Papá Estáu va tar ehí pa sacar les castañes del fueu.

Y esa confianza de los más mozos nun va durar siempre, sobre too si vienen mal daes.

De xemes en cuando, la prensa diario trainos noticies como l’editorial de güei de La Nueva Engaña: EL SERIO PROBLEMA DE LA FALTA DE INFORMÁTICOS EN ASTURIAS. Y quédense más anchos que dándo-y vuelta al periódicu.

http://www.lne.es/secciones/noticia.jsp?pRef=1769_52_560241__OPINION-serio-problema-falta-informaticos-Asturias

Dicen que nun alcuentren xente formao pa trabayar como informáticos, y dicen que ye un problema global. Saquen los nomes de Cataluña y a Alemaña, que siempre dan prestixu, y que tamién pasen por problemes paecíos. El casu ye qu’a min nun me preocupen nin ún nin otru, que de xuro van atopar aína lo que necesiten.

El problema ye otru. Equí, los empresarios siempre echen la culpa a la falta de mano d’obra pa sacar dalgún titular, y presenten dalguna iniciativa que siempre acaba no mesmo: dame perres. Y lo triste ye que les perres nunca acaben en manes de los que trabayen. Si dan 20.000 euros a la empresa por puestu de trabayu, y los que trabayen nun ven esa cifra nin de llonxe ¿a quién quieren engañar?. Salen-yos los trabayadores gratis un añu, y tovía quieren más.

Nun hai xente que quiera trabayar na hostelería, na construcción, como conductores de camión (tráenlos d’otros países como Portugal o Rumanía, a los que nun-yos puen aplicar lo del carné por puntos, y amás cobren menos)...

Cuando dicen trabayu “en puestos de calidá y con salarios competitivos en términos de poder adquisitivo” ¿a qué se refieren? ¿Qué ye eso? Un salariu ye buenu o nun lo ye, y n’Asturies, por muncho que digan, los sueldos de los que trabayen (non los de los políticos) son muncho más baxos que n’otros llaos, amás que con una bona facultá d’informática, nun hai puestos bonos pa ellos. Porque puen colar pa cualquier otru sitiu y llevantase’l doble o más de lo que-yos ufierten equí, onde va contratalos una empresa que los subcontrata a otra, chupando la metá de lo que deberíen ganar.  Y si se quieren buscar la vida pela so cuenta van tener más torgues que si vienen de fuera. Ye triste pero ye asina. Si pasa hasta colos funcionarios: p’Asturies vienen los peores médicos de cada fornada o xente que quier tar cerca casa, porque les condiciones que-yos tan ofreciendo, en cuanto a duración del contratu y perres, son les más baxes de tol territoriu español.

Fai unos años la xente estudiaba informática porque yera’l futuru, dicíen. Toos o cuasi tolos que salieron de les primeres fornaes tuvieron que colar fuera porque equí nun-yos daben nada curioso. Ficieron la so vida fuera, mercaron pisu y tuvieron los críos, con milenta ayudes qu’equí nun pues atopar per nengún llau.

Sé un poco de lo que falo, porque’l mio hermanu ye informáticu, ta trabayando en Cataluña, nuna multinacional. Ta fixu nun bon puestu porque los d’equí tienen meyor formación y promocionen al que val. Tuvo un críu a entamos del  añu, y la empresa dio-y 4.000 euros brutos por ello. Coles condiciones de trabayu que tien ellí, tien asumío que’l so críu va ser catalán y falar catalán, y nun piensa volver per equí namás que de visita.

Fai años dicíen que’l modelu diba ser Irlanda. Ónde ta anguaño’l tigre celta y onde ta l’asturcón astur, colos cascos esfechos pol formigón.

Definitivamente, la política n’Asturies nun ye nunca normal.

Esti añu, enantes d’agostu, lo único que ficieron foi colocar en nómina a los compañeros de partíu y familiares, pa dempués dir de vacaciones. Entamaron a trabayar, si pue dicise asina, esti mes.

Areces va tener que gobernar en minoría na cámara, porque munches veces van face-y la pinza los otros dos partíos hasta face-y la vida imposible. Por eso, cuasi que la única manera que tien de poder gobernar de manera tranquilo ye firmar ceo un pactu de concertación social con patronal y sindicatos, lo mesmo que fizo nos otros mandatos. Esti pactu (que nun se firma en nenguna otra rexón en tol estáu) nun va ser sólo llaboral, porque siempre garra estayes polítiques y sociales, marcando les llinies maestres que van dirixir el mandatu, y sirviendo de pantalla pa les estratexes d’oposición que-y faga la Xunta.

Yá hai rulando per ehí un documentu (82 páxines dicen) coles propuestes que va facer el gobiernín. Yá lu criticó la FADE diciendo que nun tien enfoque empresarial nengún y que tien una “escesiva carga social”, según ellos (cómo non) hai que da-yos mas perres a les empreses pa que medren y puedan competir. Pela so parte, los sindicatos esixen un capítulu específicu sobre cohesión social, y que s'incorpore tamién educación y sanidá.

Pa contentar a les empreses, yá anunciaron que se van escaecer de facer aquel gran mega-proyectu estrella pa facer viviendes en Llanera (agora que saben que nun se diben vender): aquellos dos grandes bulevares con tres grandes megaurbanizaciones (30.000 habitantes previstos), anunciáu como si fuere la caraba (anque se-yos ocurriera d’un día pa otru) enantes de les elecciones. Agora van convertilo en suelu industrial p'ampliar los polígonos.

Ye un pulsu, pero al final van arreglase como siempre: dando mas perres a unos y a otros y sacando una semeya toos felices dándose la mano.

Un de los grandes problemes de la sociedá asturiana ye nun tener nunca, a lo llargo de tola so historia, una burguesía fuerte y emprendedora que cumpliere la mesma función que sí cumplió en otres comunidaes más riques. Equí les mayores empreses fueron estatales, y ello traxo munchu clientilismu y dio muncha importancia a dellos axentes sociales (ensin haber naide pa compensar al otru llau de la balanza), polo qu’espoxigó ente nós una mentalidá de la que tovía anguaño tamos presos.

Seique al pensar en grandes empresarios asturianos a toos nos vienen a la cabeza la familia Masaveu, que ya va pola sesta xeneración d’empresarios.

Los Masaveu son intocables porque tienen munchu poder económicu y tovía más pesu políticu, anque siempre se caltengan nun segundu planu. Nun tan ente les mayores fortunes por ranking del país, pero nun son recién llegaos: tienen una trayectoria llarga que los avala y eso fai que nos entierros d'Elías o de Cristina Masaveu, aquello s’enllenare de xente VIP. O lo que ye lo mesmo: tienen pedigree, que ye dalgo que namás tienen los ricos y los animales de bona raza.

D’orixe catalán, l’entamu de la saga hai qu’asitialu en Pedro Masaveu Rovira, qu’emigró a Asturies nos entamos del sieglu XIX dende Castellar del Vallés pa trabayar nuna casa testil d’Uviéu. Industriales del cementu (Tudela Veguín) y banqueros (primero Banca Masaveu, que xorreció al xestionar les perres de los indianos, dempués Bancu Herrero), el so momentu de mayor esplendor llego-yos col franquismu, cuando’l negociu bancariu podía medrar abellugáu nel desarrollismu industrial daquella época.

Fai quince años vendieron la xoya de la corona del so negociu, el Bancu Herrero a La Caixa (que dempués diba vendela al Bancu Sabadell), y dempués la so cartera en Hidrocantábrico, y dende entós pue dicise que dexaron de ser una familia industrial pa convertise en rentistes, que ye dalgo polo que tienen querencia tolos empresarios que salen d’esta parte del mundu (Felgueroso, Herrero, Sela, Figaredo, Cosmen…). Debe ser otru de los rasgos del nuestru carácter.

Siguen siendo mui ricos (mil ochocientos millones d’euros ye lo que-yos calculen), pero yá nun son nin de llonxe’l primer grupu empresarial d’Asturies. Tienen la cementera Tudela Veguín, que ye menos de la metá del so patrimoniu conocíu, tienen participaciones en EDP, nel Bankinter y nel Bancu Santander (estes dos pola buena sintonía colos Botín). Tienen bodegues de vino (Fillaboa, Murua, Aalto…), aparcamientos, inmobiliaries (Propiedades Urbanas), la empresa de transporte Draursa, dalgún hotel y una empresa multimedia como ye Ediciones Nobel. Tamién tienen una galería d’arte, Fruela, en Madrid, y dalguna promoción inmobiliaria. Negocios de pocu pesu pa una familia que foi tan importante nun fai tanto.

El suministru enerxéticu d’un país ye una d’eses coses tan básiques que nun hai llugar pa la improvisación: hai que tenelo previsto too. L’anunciu de que la compañía estatal arxelina Sonatrach daba por frayáu l’acuerdu que regalaba’l control del mayor proyectu enerxéticu del país a Repsol YPF y Gas Natural, garró a munchos col pie cambiáu.

Un datu: anguaño, d’Arxelia vien el 40 % de tol gas que gastamos en España, que ye un país dependiente dafechu de la enerxía que vien del esterior (petroleu y gas).

Lo qu’acaba de perdese ye un contratu q’entamó a formase nel añu 2002, anque nun se formalizó hasta dos años dempués (cuando’l petroleu andaba a 20 dólares/barril, non los 70 d’anguaño). D’entós p’acó hubo dellos retrasos na construcción, según les compañíes españoles porque’l gobiernu arxelinu les fomenta, pero lo que ye verdá ye que, al subir tanto los precios, los países probes yá nun necesiten capital foriatu pa esplotar los sos yacimientos, asina qu’echen a los que se van a aprovechar d’ellos. Llámenlo “nacionalismu económicu”, pero a la fin podemos resumilo asina: los probes (Venezuela, Bolivia, Arxentina) yá nun son tan probes y puen autoxestionase solos. Como dixo’l ministru d’enerxía d’Arxelia: “si tengo les perres, les reserves, el mercáu y la tecnoloxía, ¿qué ye lo que pues dame tu?”.

Lo qu’acaba quedar en nada yera un proyectu ente Repsol YPF, Gas Natural y l’arxelina Sonatrach de 5.182 millones d’euros, el más importante de tolos qu’hai en marcha n’Arxelia, y l’únicu que contaba con mayoría de capital priváu.

El proyectu de Gassi Touil tenía previsto producir 22 millones de metros cúbicos diarios de gas (los campos d’esplotación yeren más de 17.000 kilómetros cuadraos, cuando Asturies tien 10.700). Diba contar con una planta de licuefacción pa convertilo en llíquido pa transportalo en barcu, y un gaseoductu de 600 kilómetros pa mover unos 6.500 millones de metros cúbicos anuales. Dempués diba llevase en barcu pa la península.

La verdá ye que si salía alantre’l proyectu, Sonatrach diba quedar con una participación del 35 % del yacimientu de Gassi Touil y Repsol YPF y Gas Natural diben tener ente los dos un 65 %, y fai bien poco que sacaron una llexislación nueva en Arxelia qu’obliga a que Sonatrach tenga mayoría de polo menos el 51 % de tou proyectu qu’eche a andar en toles fases de la cadena del gas, dende la explotación a la venta final.

Sonatrach ye dueña del 2 % de la portuguesa EDP, dueña d’Hidrocantábrico, y teníen previsto que se metiere nel pastel que tan preparando cola regasificadora del Musel, pa la que cuenten poner la primera piedra nel añu 2008, anque meten priesa per tolos llaos, y pue qu’entamen a mover tierra yá esti mesmu añu.

Arxelia, xunto con Rusia, tien la llave del grifu del gas pa Europa. Nun paecen los dos países mui de fiar. Y mientres, la UE machacando’l carbón y pagando porque nun produzan.

Mira a ver tu si nun vamos tener qu’envainánosla colo del cambiu climáticu y volvemos a dar Foster a la chapa de la cocina de carbón.

Cuando’l gobiernu saca nuna rueda de prensa, a bombu y platillu, lo bien que nos va na economía, nel IPC o nel paru, polo xeneral el ciudadanu d’a pie nun pue sentise reflexáu nesos datos. Nun lo ve cuando va a mercar coses a la tienda, nin cuando cobra, sólo lo ve na tele, como si pasare nuna realidá virtual.

Según el gobiernu, la economía española va de puta madre, xorreciendo a un ritmu del 4 % y ensin parar de crear emplegu. Según los datos del Bancu d’España y d’un estudiu qu’acaba de sacar a la lluz el serviciu d’estudios de Caixa Catalunya sobre l’estáu de les cuentes de les families, nun ye pa tirar cohetes precisamente.

La situación financiera de les families va a peor, y según el Bancu d’España la renta bruto anual nun-yos da pa pagar los gastos de consumu y les cuotes de los préstamos, polo que tienen qu’echar mano de lo qu’aforraron n’otros años o volver a empufase.

Según datos del Bancu d’España, los préstamos de les families son anguaño 806.348 millones d’euros, frente a una renta disponible bruto anual de 633.596 millones (incluye salarios, subvenciones y prestaciones, tres descontar los impuestos). Asina que les families españoles, nel so conxuntu, yá deben más de lo que son capaces de ganar cada añu: si ganen 100 yá deben 115 (proporción que fai siete años yera de 100-70,7). Llegamos a estos númberos tres el boom inmobiliariu, p’asitianos dafechu nun modelu asemeyáu al d'USA o Gran Bretaña, onde lo normal ye deber más de lo que se gana (nel restu la UE nun ye asina). Anguaño les families españoles son más riques porque tienen más patrimoniu (esos pisos a cuarenta años) pero son más probes porque tienen menos aforrao. Y como ye una situación que nunca vivimos hasta agora, ye normal que dalgún seya pesimista a mediu plazu.

Hai que tener en cuenta qu’estos son datos de la media de tol conxuntu del estáu, asina que la realidá ye muncho más duro porque son munches les families saniaes, ensin nengún tipu de deuda (según el Bancu d’España, sólo tienen deudes el 40 % de los españoles mayores de 18 años, nel añu 2000 el porcentaxe yera del 30 %). Asina que tien qu’haber xente que ta pasándolo permal, tirando de familiares o teniendo que volver a empufase p’acabar l’añu.

Llegamos a esto porque nun paren de subir los tipos d’interés, y asina la carga financiera (cuotes  p’amortizar préstamos ya intereses) tamién lo fai. L’euribor púnxose yá al 4,66 %, y en sólo dos años (d’agostu del 2005 a agostu del 2007) una lletra media d’una hipoteca subió 200 euros al mes.