Escucando estrelles

El Plan d’Enerxíes Renovables fixó pal 2010 una potencia fotovoltaico de 400 megavatios (Mw), malpenes el 1 % de tola que se produz nel estáu español. Esi porcentax va algamase l’añu que vien.

Nel añu 2000, en tol territoriu español había 2,85 Mw furrulando, yá yeren 37 Mw cuatro años dempués, y 137 Mw a finales del añu pasáu. Y esto va multiplicase hasta quién sabe ónde. Empreses del sector falen de que son 6.000 Mw los que tan anguaño proyectaos, mientes que la mayor patronal d’enerxíes renovables, APPA, fala de 18.000 Mw.

Esta fiebre pola enerxía solar fotovoltaico nun vien dao porque la xente seya mas respetuosa col mediu ambiente. Ye una cuestión de rentabilidá. El pasáu 26 de mayu, el Ministeriu d’Industria sustituyó la norma que lo regulaba dende l’añu 2004, y agora garanticen que les instalaciones d’ente 0,1 Mw y 10 Mw van recibir unos 41 céntimos por kilovatiu que produzan los venticinco primeros años, dempués el preciu va baxar a 33 céntimos.

Anguaño, producir un kilovatiu cuesta namás que 25 céntimos, asina que pue amortizase la inversión ceo, y sacar una rentabilidá d’ente’l 8 % y el 12 %. Amás d’eso necesítase una menor inversión inicial: unos 500.000 euros por cada 0,1 Mw, frente al 1 Mw que pue dar un aeroxenerador con un costu d’ente un y dos millones.

Asina, nun ye raro que munches empreses constructores  y bancos s’escaezan de lladriyu y apuesten poles enerxíes renovables. L’abanderada nesto ye Acciona, pero hai yá más de 400 empreses funcionando nel sector.

Según datos del Ministeriu d’Industria, el preciu de la metá de los alimentos básicos (31 sobre 58) medró más que la inflación. El preciu de los alimentos non ellaboraos xorreció, namás nun mes, un 5 %. Dalgunos exemplos son el pollu, con un subida del 10 %, el 14 % de los pimientos, el 32 % de les cebolles, o’l 6 % de la lleche. Y la previsión ye que sigan subiendo.

Los motivos son l’aumentu de la demanda de materies primes allimentaries, y el desvíu de maíz y xirasol pa fabricar biocombustibles, qu’encarecen los piensos y la demanda d’otros cereales.

Cola entrada del euru, nel añu 2001, el redondeu de munchos precios al alza foi dalgo xeneralizao, anque n’España los alimentos básicos subieren 1,7 % más que nel restu países europeos.

Ensin embargu, onde más se notó la subida de precios foi na hostelería. Asina, España ye’l país de la zona Euru onde más subieron les tarifes de la hostelería nos últimos años, nada menos qu'un 40 % ente 1998 y 2006, diez puntos más que la media comunitario, y mui perriba del 15 % que subieron n’Alemaña o’l 20 % de Francia, según un informe de la Dirección d’Asuntos Económicos de la Comisión Europea.

Y amenacen con siguir subiendo.

Siempre nos cuenten que los precios tan mas baxos que nel restu de la UE. Lo que nunca nos cuenten ye cómo tan los salarios.

Paez que vamos tener que garrar l’abrigu porque ta refrescando la economía.

Anque los del Gobiernu y los del gobiernín (El Señor del Cementu y los cincuenta y cuatro conseyeros, direutores xenerales y vices, ensin contar consortes) callen como afogaos, hai munches ñubes nel finxu’l cielu.

La construcción ta parando, y nun hai alternatives (equí n’Asturies ye namás la obra público lo que tira del carru, ensin la que nun medraríamos un res, pues díbamos perder xusto esi 3,3 que dicen vamos a espoxigar esti añu)

Fai unos meses salía’l vicepresidente Solbes de bomberu pa contanos que yera bueno que les families tuvieren empufaes porque taben invirtiendo en coses sólides como yera la vivienda. ¿Alcordáisvos? Y agora sal a contanos con cara póker que ye bono que les viviendes baxen de preciu, por aquello del axuste y tal y tal.

Dicen los que dicen que saben d’esto que los tipos d’interés van siguir subiendo y que si la gasofa se pon en plan Picu Urriellu y l’euru nun baxa (ye malo que tea alto, bobu, porque esportamos menos) dalgunos vamos pasales putes, pero putes de verdá.

Sobre too porque, nesti tiempu, la presión fiscal subió pa les rentes medies-baxes (y baxó pa les medies-altes, mira tu’l progresismu) y los salarios fai cuantayá que nun suben.

Y yá tan falando de subes d’un 20 % en productos básicos como la lleche, el pan, la carne o los güevos.

Asina que ya sabéis, a mercar un abrigu baratu.

Tola vida pagando una hipoteca al bancu pa poder tener un pisu y dempués que lu tienes vendes-ylu al bancu porque cola pensión nun te llega pa vivir.

Fagan pisos, señores, que la banca gana siempre.

La hipoteca inversa surde porque los xubilaos españoles tienen pensiones baxes y porque’l 85 % d’ellos tienen una vivienda en propiedá. Entós un llistu con máster dixo que’l paisanín y/o paisanina tamién podíen volver a hipotecar el pisu que tanto-yos costó pagar, pasando la propiedá al bancu o non, y recibir tolos meses una renta mientres siguen viviendo nél. Y si los herederos quieren dempués recuperalo, que paguen.

Esta ye una modalidá d’hipoteca que fai que los mayores de 65 años y persones dependientes puedan complementar con una renta la pensión que tienen a cambiu de ceder la so casa como garantía. Calcúlase que nestos dos años firmáronse unes 10.000 d’estes hipoteques, al pesar de que nun ta bien regulao y los ciudadanos siempres salen perdiendo porque los que lo soliciten suelen tar necesitaos, y los bancos abusen. Son productos caros, con unes comisiones mui altes.

Anguaño’l Parlamentu t’acabando de tramitar la Llei Hipotecaria y, en cuantes entame a furrular, ésto que vos acabo de contar va facese muncho mas normal. Tanto que va ser un mercáu petecible pa bancos y empreses de seguros, que ya tan afilando estratexes.

Asina hai qu’entender que’l PP y CIU pidan promover esti tipu d’hipoteques con toa clas de meyores fiscales: IRPF, Patrimoniu, y Socesiones y Donaciones.