Escucando estrelles

La orografía siempre xugó a la contra na nuestra tierra, lo que fizo que tovía anguaño pervivan restos de lo que foi la vivienda n’otra dómina (payoza, casa mariñana…), races autóctones (xalda, asturcón, casines, vaques roxes…), la escanda, vezos, vistíos, ferramientes, dances, canciones, lliteratura oral…

Esa circunstancia dábase ya enantes, lo que fizo qu’en munchos castros apaezan restos tardorromanos qu’averen la so ocupación hasta’l sieglu V, y hasta reocupaciones serondiegues. Un exemplu claru ye’l castru de Mohías, que se supón habitáu hasta’l sieglu IX.

Na Crónica Idacina, cuando fala de la ocupación de la península por vándalos, suevos y alanos nel añu 411 diz: Hispani per ciuitates et castella residui a plagis barbarorum per prouincias dominantium se subiciunt servituti.  Y cuando fala de les campañes de Hermerico del añu 430 diz: Sueui, sub Hermerico rege, medias partes Gallaeciae depraedantes, per plebem, quae castella tutiora retinebat, acta suorum partim partím caede, partim captiuitate, pacem quam ruperant familarum quae tenebantur redhibitione restaurant.

Na campaña de Teodorico II nel añu 457, el castru Coviacense (Valencia de Don Xuan, Lleón) taba habitáu, y presentó tanta resistencia que mereció una mención: Unum Couiacense castrum tricesimo de Asturica miliario a Gothis diutino certamine fatigatum auxilio de¡ hostibus et obsistit et preualet. quam plurimis ex eorum manu interfectis, reliqui reuertuntur ad Gallias.La Crónica Rotense d’Alfonso III , a la hora de  falar de les campañes d’Alfonso I diz: Qui (Adefonsus) cum fratre Foilane sepius exercitu mobens multas ciuitates bellando cepit, id est, Lucum, Tudem ( .. ) Cinasaria et Alesanzo seu castris cum uillis et uiculis suis omnes quoque Arabes interficiens X~pianos autem secum ad patriam ducens.

Mientres que la Crónica Ovetense diznos que:  (Adefonsus) simul cum fratre suo Froilane multa ad aduersus Sarracenos presa gessit atque plurimas cíuitates ab eis olim oppressas cepit, id est, Lucum, Tudem ( .. ) Septempublica et cunctis castris cum uillis et uiculis suis; omnes quoque Arabes occupatores supradictarum ciuitatum interficiens X~pianos secum ad patriam duxit.

Y munchos de los diplomes astures de los sieglos VIII y IX citen villes y castros, siendo dalgún de nueva construcción y dalgún d’orixe prerromanu.

Ayeri la Fundación Latores XXI entregó al direutor xeneral de Patrimoniu Cultural del Principáu, Jose Adolfo Rodriguez Asensio, el so premiu “Castru d’oru” pola defensa del desapaecíu Castru de Cellagú. Tres la entrega d’esti premiu seique hai dos coses. Por un llau la mala conciencia, porque nun escaezamos qu’esa ye una organización empresarial, y que munchos de los sos miembros nun puen sacar pechu na tema de la defensa del patrimoniu precisamente. Y por otru l’interés propiu: como nun podía ser menos nesti país, la petición d’un aula pa la Fundación nel enésimu centru d’interpretación que van llevantar, nesti casu dedicáu a la cultura castreña.

Hai topónimos que van quedar pa siempre na memoria con un significáu especial. Nomar al Castru de Cellagú ye lo mesmo qu’alcordanos d’una de les mayores vergoñes que pasaron nos últimos tiempos nesti país bananeru.

El castru de Cellagú yera ún de los castros prerromanos más importantes qu’había n’Asturies, exemplu únicu na zona d’Uviéu y con delles particularidaes propies. Sábese que tuvo habitáu más de 700 años, hasta’l sieglu II d.C. Escavóse parcialmente, sacando bayura de restos importantes: sobre too munchos bronces, restos  en güesu y cerámiques.

Tuvo la mala suerte de qu’al llau había una cantera xestionada pola empresa Readymix Asland, y como nun acababen de da-yos la llicencia pa trabayar na zona del castru, una nueche fai cuasi diez años apaeció estrozáu, dalgo perfácil porque nun tenía vixilancia. Nin siquiera con eses lu nomaron Bien d’Interés Cultural, quedó ermu. Nun s’atopó a nengún de los responsables del atropellu. Equí paz y dempués gloria.

A la fin, salváronse delles coses que taben guardaes y pudo rescatase dalgo más: hasta  1278 sillares siguen nun almacén (ente ellos la puerta monumental del castru, el torrexón, el cuerpu de guardia, una cabaña y un cachu de la muralla) y 8.000 pieces de cerámica y metal. Ta previsto que, colos restos, se llevante una pequeña réplica, col so centru d’interpretación, pal añu qu’entra.

Dalgún día, dientro munchos años, va estudiase la esquizofrénica xestión de los bienes culturales ya históricos nesti requexu del mundu, con especial procuru nos inútiles centros d’interpretación a los que tantu enfotu tienen los nuestros gobernantes.

Siempre se dixo qu'ástures vien del ríu Ástura, pero Mariano Tobes Arrabal sacó a la lluz fai poco una cita d’Alberto Magno que-y sirve de palanca pa intentar atopar un significáu distintu.

Nun escritu del sieglu XIII d’Alberto Magno (De animalibus) atopó esto: “narraverum autem nobis fideles aucupes in superiori parte Germaniae quae Suevia superior nuncupatur, quod cum longe ingrederetur in profundum silvae ad capiendas accípitres, qui astures vocantur”, o seya, que nuna rexón de Germania, na parte superior de Suevia, unos cazadores d’aves rapaces descubrieron no más fondero de la viesca unos páxaros conocíos como astures.

L’autor apuesta pola triada astur-ustur-astor, qu’andando’l tiempu diba dar el castellán azor (ferre).

Queda dicho, por si acasu.

El mundu de la numismática ye una parte del procesu históricu que los historiadores suelen dexar de llau, más que nada pola imposibilidá d’atropar munches vegaes les pieces dignes d’estudiu, que suelen tar en manes de coleicionistes privaos que nun les suelten fácil.

Na dómina medieval, había delles ciudaes que podíen acuñar moneda (Lleón, Burgos, A Coruña, Zamora, Toledo, Cuenca, Murcia, Sevilla, Avila, Santiago…) lo que vien a sofitar la importancia histórica que tuvieron, al ser un privilexu que namás podía dar el rei. Tener un taller monetariu na ciudá significa un poder políticu fuerte, una economía importante que xustificare’l so funcionamientu pol efectu multiplicador nel entornu.

Según defenden dalgunos numismáticos, la ciudá d’Uviéu tenía en tiempos de doña Urraca una ceca propia p’acuñar monedes. Hai monedes daquella época que tienen una O, y siempre s’atribuyeron a una ceca d’Ourense, pero estudios nuevos dicen que pue ser Uviéu.

Pol tiempu nel que salieron, yera cuando la monarquía lleonesa necesitaba lliquidez pola xuntanza con Castiella. Y la hipótesis cola que se trabaya anguaño ye que naquella dómina les acuñaciones del noroeste peninsular facíense en Llugo, Santiago y Uviéu, hasta qu’a la fin de la edá media se centralicen na ciudá d’A Coruña.

La Fundación León tien catalogaos dellos exemplares cola ceca O de la reina Urraca, fía d’Alfonso VI, del so fíu Alfonso VII “Raimundez”, de Fernando II l'hispánicu, d'Alfonso IX, hasta acabar con acuñaciones de Fernando III el Santu, anque hai dalgún que diz que se recuperaron les acuñaciones en tiempos d'Enrique II, ensin confirmar.

Los periódicos trayíen güei la noticia de qu'un paisanu alcontró nuna finca d’Oles un  par d’esteles funeraries de fai 7.000 años.

http://www.lne.es/secciones/noticia.jsp?pRef=1777_30_562656__ComarcaSidra-vecino-Oles-encuentra-finca-estela-funeraria-hace-70000

N’Asturies había bayura d’elles, pero munches usáronse pa facer muries o de cimientos en edificios nobles, asina que son mui poques les que llegaron hasta nós, y cuasi nenguna nel so sitiu orixinal.

Na vecina Cantabria hai munches más, tantes qu’una d’elles, la de Barros, ye’l símbolu non oficial de la comunidá.

Tienen qu’apaecer munches más, y tovía nos falta un estudiu seriu y rigurosu sobre’l tema.

La cueva de Sopeña, nel conceyu d’Onís, nun para de sacar restos interesantes: hasta 300 nun solu día de trabayu.  Nun toos tienen munchu valir, pero hasta agora atopáronse dellos tipos de ferramientes, fleches,  y munchos güesos usaos como adornu de les pieles y tres llápices d’ocre, dos coloraos y ún mariellu (usábense pa pintar el cuerpu). Amás de güesos de rinocerontes, ciervos, caballos, robecos, corzos, lleones, panteres o llobos (cuando la fame apretaba…). Sorpriende que nun s’alcontrare nengún restu humanu.

La cueva de Sopeña yá se conocía por unos grabaos de la Edá de Fierro qu’había na parte esterior de la cueva, hasta qu’un sondéu del añu 2001 demostró la bayura qu’escondía dientro. Calcúlase que pue haber unes 40.000 pieces y unos 16 niveles arqueolóxicos rexistraos hasta agora. Hai trabayu pa munchos años, si siguen escavando una capa de dos centímetros per temporada.

Calculen que la cueva tuvo ocupada a lo llargo de 80.000 años, hasta fai 20.000, lo que significaría que vivieron nella neardentales (desapaecieron fai 42.000 años) y dempués cromañones. Hai mui poques cueves nel mundu con una ocupación tan llarga.

La escavación (hispano-finlandesa-norteamericana) ta al cargu d’Ana Pinto Llona, asturiana de Proaza ya investigadora del Conseyu Superior d’Investigaciones Científiques (CSIC), del que foi científica distinguía l’añu pasáu, y profesora adxunta del Institutu d’Oríxenes Humanos de la Universidá Estatal d’Arizona. Formó parte del equipu d’Atapuerca al que-y dieron el Premiu Príncipe, y tamién tien el Premiu d’humanidaes “Eva Haller” de la Wings World Quest del añu 2005.

Fai vente años qu’entamaron les escavaciones nes cueves de Canes, Tíu Llines y Arangas, nel conceyu Cabrales. Hasta agora dieren como resultaos tres enterramientos y un fornu de fundición de cobre atopáu nel añu 1998. Dempués d’aquello, lo de siempre nesti país pequeñu, abandonóse.

Nueve años dempués, ente’l día 6 y el 18 d’esti mes, tornaron a facer sondeos, atopando una bayura restos, lo más d’ellos güesos de ciervu, xabaril, corzu, cabra y vaca. Destaca un asta de ciervu recortada, un raspaor de radiolita y los restos d’un silu d’ablanes.

La cueva d’Aranga tuvo ocupada na menos que 16.000 años siguíos, polo que pue dar tovía munchos datos del Neolíticu, el Caolíticu, el Mesolíticu y los entamos de la Edá de Bronce.

Les escavaciones taben coordinaes por Pablo Arias Cabal, catedráticu y direutor del Institutu Internacional d’Investigaciones Prehistóriques de Cantabria, que yá ficiera les de fai diez años.

La que dicen foi la mayor ciudá de los ástures, Lancia, ta asitiada nel conceyu lleonés de Villasabadiego, ente los ríos Esla (l’antiguu Ástura) y Porma, ente los kilómetros 311 y 312 de la N-601.

Añu tres añu, dende fai doce, pel branu, dos docenes de voluntarios y estudiantes escaven una pequeña parte de la ciudá. Esti añu van ser doscientos metros cuadraos namás.

L’añu pasáu nun se fizo, pero na escavación de fai dos años sacáronse a la lluz los edificios d’una calle, ente otros, atopóse un edificiu grandón con mármol y moldures decoraes que pue ser d’usu notable, restos de les termes y d’un taller metalúrxicu, seique una ferrería, con restos del fornu y ferramientes.

Lo de mas valir de tol yacimientu sigue siendo, hasta agora, el mercáu (macellum) porticáu.

Dase la paradoxa que parte de la ciudá ta baxo finques privaes que tovía nun s’espropiaron, por exemplu’l Foro, que se sabe ónde ta dende fai años, pero nun se toca al ser propiedá d’una persona particular.

Según nos cuenta l’historiador Floro: “Los ástures, per esti tiempu, baxaron con un exércitu grande de los montes nevaos. Y nun yera a ciegues  qu’aquellos bárbaros atacaben sinón que, poniendo’l so campamentu xunto al ríu Ástura, dividiendo l’exércitu en tres columnes, preparábense p’atacar al mesmu tiempu los tres campamentos romanos. Y fuera una llucha cruenta y dudosa (…) de nun ser pola traición de los brigecinos, qu’avisaron a Carisio y esti actuó col so exércitu (…)La poderosa ciudá de Lancia abellugó los restos del exércitu derrotáu y lluchóse nella tan duro que, cuando tomaron la ciudá, los soldaos reclamaben que se-y pegare fueu, y malamente pudo llograr el xeneral que se la perdonare pa que, quedando en pie, fuere meyor monumentu pa la victoria romana que quemada”.

Fai media docena d’años, alcontráronse los primeros restos del asentamientu astur: construcciones de madera y cubierta vexetal que namás dexaron la güella de los postes que lo sosteníen, fornos pa cocer, una cai empedrada y dalguna pieza d’axuar domésticu. Los espertos calculen que n’época prerromana tendría unos 1.500 habitantes.

Dempués de les guerres cántabro-ástures, l’enclave espoxigó y ye posible que se convertiera en municipium en época flavia, na parte escavada vese que tuvo actividá polo menos hasta’l sieglu IV d.C.

Les escavaciones entamaron el dos de xunetu y tan yá a piques d’acabar per esti añu.

Mientres en Lleón escaven y ponen en valor lo que tienen, n’Asturies destruyen la Sienda del Arcedianu, obra d’inxeniería romano-medieval, porque dalgún inxenieru dio de pasu facer una canalización pel mediu la Sienda.

Al rodiu del Puertu Leitariegos acaben d’atopar los restos d’un supuestu campamentu militar d’época romana o d’época medieval.

Ta asitiáu nuna colina, a unos 1500 metros d’altitú, al llau de la vía natural que va de Leitariegos al valle del Narcea, tien forma rectangular y una estensión d’ente 120 y 70 metros. Vese que tien un foxu doble qu’arrodia tol perímetru y nun s’aprecien restos de construcciones, lo que paez dar a entender que pueda tratase d’un campamentu militar romanu.

Nun sitiu normal, l’apaición de dalgo asina diba ser motivu d’estudiu con medios abondos.

Equí, lo único digno d’estudiu ye’l desinterés de toos.