Escucando estrelles

El drechu de Poznera ye ún de los que ta reconocíu ente les figures xurídiques tradicionales asturianes, y consiste en que los vecinos podíen plantar y aprovechar árboles nes tierres comunales, siendo la propiedá del tarrén del pueblu, pero l’árbol y tolo que produxere yera del que lu plantaba. A estos árboles llamábenlos entepolaos, y munches vegaes poníase-yos una marca pa identificalos. Quedaben reconocíos ante notariu al tresmitilos a los fíos (hai bayura d’exemplos).

Esta costume tien los sos raigaños na edá de bronce (nun vamos a dicir que vien de los celtes porque dalgún purista igual nos pega, pero podíemos dicilo guapamente): el que plantaba un árbol yera’l dueñu y lligaba de dalguna manera’l so destín al árbol. Amás d’aprovechase d’él tenía que mantenelu pa que nun molestare, y pasalu a los fíos cuando él morriere, ensin poder cortalu.

Esti drechu usóse sobre too coles castañales, un árbol que dio de comer a munches xeneraciones d’asturianos.

La pallabra poznera nun apaez nel sacrosantu diccionariu de l’Academia. Que yo sepa tien tres significaos: amás de ser el drechu que vos acabo contar, pue ser tamién el furacu que se fai nel suelu y nel que s’echa cuchu pa plantar un árbol, Arias, nel diccionariu de LNE, recueye que pue ser tamién la caña que s’espeta nel suelu y xorrez ensin raíz.

A finales del sieglu XIX y entamos del XX, la Feria de los Santos de Gera, conceyu de Tinéu, yera una de les más importantes de tol norte d’España. Duraba dellos díes y movía milenta cabeces de ganáu. Tamién la conocíen como “feria de los maestros”, porque yera cuando munchos pueblos de Tinéu y Cangas aprovechaben pa contratar a los maestros de temporada.

Daquella, munchos pueblos taben aislaos tol iviernu y naide podía mandar a los fíos a estudiar a les escueles nacionales, poro víense obligaos a contratar maestros que subieren a los pueblos. A estos maestros llamábenlos maestros babianos, porque los más d’ellos veníen de La Babia, o n’otres zones maestros lazariegos. Yera xente que trabayaba nel campu y qu’amás d’eso sabíen lleer y escribir, aritmética, xeografía ya historia, ensin que tuvieren nengún títulu.

Pa que los escoyeren, poníense nun corru nun estremu de la Feria , según dicen vistiendo una especie de gorru cónicu rematáu con un pompón colgando. Llevaben con ellos unos pocos llibros d’escuela y dalgún cuadernu con problemes.

Cada pueblu mandaba una comisión de tres o cuatro vecinos qu’entrevistaben a los aspirantes pa ver qué sabíen. Si pa encima sabíen tocar l’acordión, por exemplu, cobraben más, porque tamién podíen allegrar les llargues nueches d’iviernu. El contratu diba dende’l mes de payares a mayu, ya incluyía allugamientu y cebera repartida ente les cases del pueblu.

Como comíen de toles cases, tamién los conocíen como catapotes. Les clases diben dales baxo los horrios, nos pórticos de les ilesies o na casa de dalgún vecín si había sitiu. Asina s’educaron xeneraciones y xeneraciones de paisanos.

Nel llibru Bellezas de Asturias, del añu 1928, Aurelio del Llano diznos lo siguiente:Una de las cosas que más me llaman la atención en esta feria es «la contrata de maestros».A fines de octubre los vecinos de los pueblos de las montañas que tienen lejos la escuela nacional, se reúnen en conceyu y nombran una comisión para que baje a la feria a contratar un maestro que ponga escuela a sus hijos.

Estos llamados maestros, cuya instrucción es la que recibieron en la escuela de su pueblo, son jóvenes de veintitrés a treinta años; vienen en grupos de Laciana y otros lugares de las Babias, con una especie de zurrón a la espalda, y muchos de ellos traen un acordeón.Sobre el puente de Jera veo unos cuarenta «en contrata», con las comisiones. Ganan de ciento cincuenta a doscientas pesetas y mantenidos por poner escuela de noviembre a abril, ambos inclusive. Cada padre les da de comer y cama tantos días como hijos manda a la escuela, y así andan turnando de casa en casa. El que trae acordeón lo toca los domingos para que bailen las mozas.

Estos vecinos que viven en las brañas lejanas, desde tiempo inmemorial vienen empleando este sistema de enseñanza, y gracias a él, sus hijos saben leer y escribir. No hay que pensar en que los niños pueden ir a las escuelas nacionales, dada la gran distancia a que se encuentran, con caminos cubiertos de nieve y frecuentados por los lobos en el invierno y caldeados por el sol en el verano.