Escucando estrelles

Ye perfácil: movemos les cabines de peaxe a Lleón, y yá ta.

Pa que depués digan que nun cumplimos.

En fin...

La prensa del réxime nesti requexu del mundu nun nos da noticies como esta:

http://www.elperiodicodearagon.com/noticias/noticia.asp?pkid=409588

O seya, una familia que quisieron engaramitar no más alto, al nun tar avezada a llevar tacones, tien dalgún tropiezu.

Y como son de los qu’ocupen sitiu nos periódicos, disfrázase de venta.

Pa más datos:

http://www.burbuja.info/inmobiliaria/showthread.php?p=829304

http://www.skyscrapercity.com/showthread.php?p=20155038

O seya, si yes ricu y tienes problemes, siempre habrá una CajAstur o una CAI p’ayudate. Si yes probe xódete.

Mall, mui Mall.

Va ser verdá aquello que dicía ún de que, trenta años depués, la cara que te mira dende l’espeyu ye la de to pa, o seya, too aquello contra lo que te engarrabes cuando yeres mozu.

Diba amárgame poniendo dalgo sobre CLAS, pero como ye viernes vamos dir de cerveces. Voi colgavos dellos vídeos sobre una marca de cerveza uruguaya. La cerveza llámase Patricia, y nun sé que tal ta, pero los videos son una gozada (n’América llatina tan faciendo la meyor publicidá del mundu, quiciabes)

El primeru ye xenial, ya intenta esplicar l’amistá masculina.

Esti amuesa lo simples que somos los tíos:

Nesti cuenten la convivencia dende’l puntu de vista d’un home.

Y pa nun ser monotemáticu, ún d’otra marca, sobre cómo abrir una cerveza:

Salú.

Probinos, hai que subir un 11,3 % lo que paga la lluz al usuariu d’a pie porque producir electricidá nun ye rentable:

http://www.expansion.com/edicion/exp/empresas/es/desarrollo/1114476.html

Eso si, que’l paisanín nun pida subir el sueldu, que nun ta la cosa pa bromes.

Fai un mes, LNE descolgábase con un estudiu (que tenía una antigüedá de cuasi un añu) pa privatizar, envolver en papel de colorinos y poder regalar una de les poques empreses de verdá que queden n’Asturies. Tamos falando de la Central Lechera Asturiana, y del plan fechu a midía por dos “independientes” como son Álvaro Cuervo y Pedro de Silva.

Los anicios de la empresa, allá pel añu 1967, fueron la organización d’unos cuatro mil ganaderos en réxime de cooperativa, pa nun tar presos de les grandes compañíes, que podíen marcar el preciu que-yos daba la gana y arruinar a los pequeños productores. La Central Lechera, que llegó a tener más de 12.000 socios, nun tien anguaño namás que 7.470 socios, de los que namás 1.280 siguen produciendo, tres la brutal reconversión del campu asturianu (zarraron más de ventemil ganaderíes) pola entrada na UE (un alcuerdu perbeneficiosu pa los productores de lleche franceses, por exemplu).

Agora que vien la lliberalización de les cuotes llecheres, tan preparando’l camín pa enfrentase a la más que previsible importación masiva d’escedentes llecheros d’otros países, pero la manera escoyida ye l’espoliu de los socios minoritarios, creando una sociedá onde yá nun van pintar nada (un par d’ampliaciones de capital y tan fuera).

http://www.elpais.com/articulo/empresas/Vaqueros/grena/elpepueconeg/20080413elpnegemp_6/Tes?print=1

Asina, contao nun periódicu de tirada nacional, entiéndese muncho meyor. Ye’l mayor grupu industria llecheru español en recoyida de lleche, anque nun lo seya nin en facturación nin en beneficios.

Güei, escondía nun periódicu d’información económico, apaecía la siguiente noticia:

http://www.eleconomista.es/en-el-diario/noticias/518766/05/08/El-petroleo-sobrepasa-los-120-dolares-Solbes-se-enfrenta-a-Montilla-y-Camps-y-Asturiana-se-acerca-a-Pascual-para-crear-un-gigante-lacteo-.html

O seya, Pedro Astals, actual conseyeru delegáu de Central Lechera Asturiana, quier crear el mega-super-gran grupu llecheru d’esti país. Voi contavos el plan (o la fueya de ruta, pa ser modernos):

1-      L'espoliu (tresformación de la cooperativa nuna S.A)

2-      Xuntanza de la S.A. colos otros dos grandes grupos llecheros: Leche Pascual y Puleva (con Leche Pascual yá lo intentaron fai años)

¿Depués que diba quedar? ¿Alcordáisvos de lo que pasó fai ocho añinos con Asturiana de Zinc? Pues lo mesmo.

PD: el domingu salió un anunciu na páxina 55 de LNE, na parte d’abaxo, bien pequeñu. Dicía asina: Sat. Ganadera San Antón de Peralta (Navarra) compra para sus socios productores de leche títulos a socios durmientes de CENTRAL LECHERA ASTURIANA.

La paralización de la llinia Soto-Penagos por nun tener estudiu d’impactu ambiental ye una bona noticia, un garrar aire onde nun lu había… Tiempu llegará pa que cocinen a tou meter un estudiu d’impactu ambiental fechu a midía, pero mientres tanto demuéstrase que quixeron facelo a la trágala según la llei del embudu.

Anque REE y tol Plan del Gas Arecista acabe ganando, pasándose les lleis pol arcu de trunfu, nun ta de más allegranos pol respiru. Dende equí doi les gracies a tolos que llucharon porque la cordura asomare la tiesta.

Y pa celebralo déxovos una guapa viñeta d’un tal Cedeño, qu’ilustra dos maneres de suicidase. Xenial.

Echa a los que tan preparaos, al futuru (el cuarenta por cientu de tola mocedá en cinco años, ehí ye nada), a los descontentos que puen votar en contra del to chiringu (y que tan obligaos a empadronase n'otros sitios pa facer la vida).

Quédate colos tuyos, colos prexubilaos, colos xubilaos, colos sindicalistes que nun dexen el puestu nunca, colos empresarios que enxamás seríen nada ensin les perres que-yos disti, con tola prensa vendía por trenta monedes de plata y un contratu publicidá.

Gobierna, niega tolos datos de la realidá testerona que te quier poner nel to sitiu. Miente, engaña, manipula. Dinos otra vez que somos la comunidá meyor preparada contra la crisis. Que'l futuru ye estrozar tolo nuestro y poner equí les empreses que naide quier. Vuelve a contanos qu'hai que reformar la Sanidá porque nun hai cotizantes. Que vamos invertir en I+D+I.

Cuentanos otra vez lo de les lleendes urbanes, anda.

http://www.lne.es/secciones/noticia.jsp?pRef=2008042700_42_630928__ASTURIAS-Casi-19000-jovenes-abandonaron-Asturias-2007-para-trabajar-otras-comunidades

Hai coses que, cuando ún s’entera, dan ganes de glayalo bien alto.

Resulta que CajAstur, la entidá financiera que dicen que ye de tolos asturianos, tien un conseyu d’Alministración onde hai 30 persones: 8 d’Ayuntamientos (alcaldes), 7 d’entidaes fundadores (más políticos), 12 de los impositores (sindicaleros y families de políticos) y 3 empleaos (más sindicaleros). Estes persones tienen que xuntase cada ciertu tiempu pa rise de les comisiones que van cobrar a los clientes y coses asina. Por cada xuntanza cobren unes perres que salen de los aforros de tolos pininos que guardamos les perres ellí (hai dalgún que lleva con esti choyu venti años).

Pues resulta qu’esti vienres la xuntanza van facela en BARCELONA, esos trenta mas la Comisión de Control, porque como cuerre Fernando Alonso en Montmeló y tienen un contratu de patrociniu (como tien poco…), hai que paga-yos a tolos miembros del Conseyu d’Alministración (y pareya) un fin de selmana too pago (¿será por perres, ho?) con hotel de luxu, entraes a los entrenamientos y a la carrera. Guapamente más de cien persones. Nun se cuánto pue costar, nin nos vamos enterar pola prensa, pero pue salir por un güevu.

¿D’onde salen eses perres? De los prubinos d’a pie que tenemos los aforros ellí. Echando cuentes a min, por tener dos tarxetes y una cuenta con cuatro perres y dellos recibos, llantáronme l’añu pasáu cuasi setenta euros sumando toles comisiones.

Asina que, en cuantes tenga un día llibre, voi cancela-yoslo too pa dir a otru bancu. De xuru que los otros van facer lo mesmo, pero a lo meyor nun m’entero.