Escucando estrelles

Esta selmana tráxonos la confirmación, via carbonu 14, de que'lcastru de Cuaña yá yera un llugar civilizáu nel sieglu IV Enantes de Cristu, muncho enantes de que vinieren los romanos, porque son d’esa época los conxuntos termales y les muralles (con un 95% de probabilidá ente’l 740 y el 380 E.C.).

Nun fai munchos años, dalgún de los historiadores de la mui noble y benemérita ciudá negaba perriba de toles coses que los ástures pudieren tener un ciertu grau de civilización: molaba más dicir que yeren unos brutos a los que los romanos civilizaron a base de cohortes. Asina sofitaben les tesis españolistes de Claudio Sanchez Albornoz. Nun vaya ser.

Asina que dalgo tan básico como ye’l carbonu 14 pon les coses nel so sitiu, nesi castru y nos de tola cuenca del Navia, anque dalgún de los lluminaries d’entós siga ocupando sitiu na so cátedra ensin problemes.

Son munches les posibilidaes enterraes nel Parque Históricu del Navia (ensin dir mas llonxe, non muncha xente sabe qu’al otru llau del ríu hai otru pobláu ximielgu ensin escavar). El casu ye que, si hasta agora naide quixo datar con una prueba tan básica como ye la del carbonu 14 les termes (conocíes yá dende’l sieglu XVIII) ye porque non interesaba.

Cuaña tien toles posibilidaes pa ser un focu turísticu de primer orde, namás que reconstruyendo una parte y escavar la otra, como se ta faciendo per toa Europa. Pero eso tampoco interesa.

Como diz el cantar, un pueblu ensin alcordanza nun tien futuru a la llarga.

Ye de chiste: la conseyería de Riopedre y los 69 asesores diznos que sobren maestros.

http://www.lavozdeasturias.es/noticias/noticia.asp?pkid=391648

A la hora recortar, siempre per baxo.

Cuando yo yera un rapaz, na España de 1931, vivía en Aranjuez un Maestru Nacional llamáu D. Justo G. Escudero Lezamit. A puntu de xubilase, diba a la escuela hasta los sábados pela mañana anque nun tenía clases porque ellí, nun despachín que-y cedieren, atendía la so biblioteca circulante. Yera de so porque creárala él solu, con llibros daos por collacios, instituciones y pás d’alumnos. Los sos clientes yéramos mozos y adultos, homes y muyeres a los que namás cobraba cincuenta céntimos al mes por prestar a caún un llibru a la selmana. Ellí descubría Dickens y a Baroja, lleí a Salgari y a Karl May.

Munchos años depués fici una visita a una bibliotequina d’un pueblu madrilanu. Nun paecía mui frecuentada, pero ficiérase cargu diba poco una moza titulada qu’inventara crear un esquinu esclusivu pa los críos con un cachu de moqueta pa sentalos. Al entamu les más acoyeron la idea con simpatía porque sirvía-yos de guardería. Tres recoyer a los sos fíos del colexu dexábenlos ellí un cachín mientres terminaben de facer les compres, pero cuando tornaben a por ellos, nun yera raro que los críos, intrigaos pol final, pidieren quedase un ratín más hasta finar el cuentu que taben lleendo. Na espera, les madres fisgaben, garraben dalgún llibru, mirábenlu y delles veces tamién elles quedaben enganchaes. Tiempu depués entéreme que la esperiencia diera los sos frutos: dalgunes llectores yeren muyeres que nunca lleeren un llibru enantes de qu’una simple moqueta en manes d’una bibliotecaria moza-yos descubriera otros mundos.

Y tovía más años depués descubrí otru prodixu nun gran hospital de Valencia. La biblioteca d’atención al paciente, cola qu’allivien les llargues esperes y angusties tanto de familiares como de los propios enfermos, creóse por iniciativa y voluntarismu d’una empleada. Con un carrín del supermercáu cargáu de llibros donaos, pasiándose peles distintes plates, con llargues pelegrinaciones y lluches cola alministración intentando convencer a burócrates y médicos non siempre abiertos a otres consideraciones, de que’l conocimientu y el placer que da la llectura pue ayudar a la curación, al cabu de los años llogró dotar al hospital y a los sos usuarios d’una biblioteca con un serviciu de préstamos y unes actividaes que-y valieren, además del prestixu y l’almiración de cuantos pasamos per ellí, un premiu del gremiu de llibreros en reconocimientu al so llabor en favor del llibru.

Evoco agora estos tres d’ente los munchos exemplos de tesón bibliotecariu, al entérame de que torna l’amenaza del préstamu de pagu. Preténdese obligar a les biblioteques a pagar 20 céntimos por cada llibru prestáu en conceptu de canon pa resarcir (eso dicen) a los autores del desgaste del préstamu. Quédome ablayáu y nun entiendo nada. Na vida corriente, el que paga una suma ye porque:

a)      Saca dalgo a cambiu.

b)      Ye oxetu d’una sanción.

Y yo entrúgome: ¿qué saca una biblioteca pública, una vez pagada l’adquisición del llibru pa prestalu? ¿O ye que debe ser multada por cumplir cola so misión, que ye xustamente ésa, la de prestar llibros y fomentar la llectura?

Por otru llau, ¿qué se-yos desgasta a los autores na operación? ¿Acasu dexaron de cobrar pol llibru? ¿Se-yos va lleer menos por ser llectures prestaes? ¿Van vender menos o va sirvi-yos de publicidá’l préstamu como cuando una fábrica regala los sos productos? Pero, sobre too: ¿Se quier fomentar la llectura?, ¿Europa prefier autores más ricos pero menos lleíos?

Nun entiendo a esta Europa mercantil. Personalmente prefiero que me llean y soi yo quien se siente deudor col llabor bibliotecariu na difusión de la mio obra.

Sepánlo los que, ensin preguntame, pretenden defender los mios intereses d’autor cargándose a les biblioteques. Firmé en contra d’esa midía en delles ocasiones y xúntome nuevamente a la campaña.

¡NON AL PRÉSTAMU DE PAGU NES BIBLIOTEQUES!

Estes pallabres qu’acabáis de lleer nuna mala torna, son de Jose Luis Sampedro, escritor, filósofu y bona xente.

Al escritor Terry Pratchett diagnosticaron-y l’añu pasáu que tien alzeimer, asina que prestaríame entamar esti añu con un pequeñu homenaxe al segundu autor más vendíu n’Inglaterra (tres la Rowling) en forma de cites:

Nun importa lo rápido que viaxe la lluz; siempre s’alcuentra con que la oscuridá llegó enantes y ta esperándola.

Del llibru El Segador.

Rincewind podía pidir piedá a gritos en diecinueve llingües, y simplemente gritar n’otros cuarenta y cuatro.

Del llibru Tiempos Interesantes.

A grandes rasgos, la única habilidá que los alquimistes d’Ankh-Morpork descubrieren hasta’l momentu yera la capacidá de convertir oro en menos oro.

Del llibru Imágenes en Acción.

Pero si vos prestaben los sos llibros, o queréis entamar con ellos, nun dexéis d’entrar na páxina de LA CONCHA DE LA GRAN A’TUIN: http://dreamers.com/mundodisco/

Son munches les maneres que pues escoyer pa contar una cosa o pa sacar a la lluz un datu. Si hai una subida del euribor, nesti requexu del mundu los periodistes van ponenos nel periódicu: los asturianos van pagar más poles hipoteques, con lletres gordones, seique porque nos va la marcha y nos presta sufrir (a lo meyor por eso votamos como lo facemos) o seique porque nos tomen por subnormales (que tamién).

Asina que puedo poner dalgo asemeyao a esto:  Asturies roza la converxencia económica, que ye un titular amable colos que nos gobiernen, y que cuando dalguién mira’l periódicu por altu da-y la sensación de les coses se tan faciendo bien.

http://www.lne.es/secciones/noticia.jsp?pRef=1864_45_591767__Economia-Asturias-roza-convergencia-economica-gracias-empuje-industria

O pues contar que tamos por debaxo de la media, malapenes perriba de Melilla. O contar que, de toles comunidaes de la cornisa cantábrica, somos los peores con muncho (Cantabria, Galicia y el País Vascu son la segunda, la tercera y la cuarta comunidá con más puxu, Asturies ye la númberu trece).

Nun ta de mas alcordanos que dende l’añu 1955, que foi’l puntu más altu, les tases de PIB por habitante nun dexaron de baxar hasta asitiase, nel añu 2000, nes cotes más baxes: un raquíticu 84 por cientu. Si agora tenemos una cota del 90 quier dicir que medramos seis puntos  en seis añinos.

Diz la estadística que los asturianinos teníamos una renta per cápita de 19.820 euros nel 2006 (la media nacional ta en 22.260 euros), o seya que tamos sestos pela cola (equí gánennos hasta Ceuta y Melilla). Pero lo peor ye que, pese al grandonismu xixonés de dalgún dirixente, ye que l’espoxigue en Renta per cápita (el segundu mayor del país) ye debíu al estancamientu de la población (hala, ya tamos otra vez coles lleendes urbanes).

Anque equí los llumbreres que manden digan qu’esa crisis que nun nomen va durar hasta la primavera del añu que vien, munchos de los espertos dicen que pue duranos guapamente hasta’l 2009. Hasta’l Bancu Central Européu dixo que va acabar subiendo los tipos pa frenar la inflación. Y como los españolinos nun aforramos nada, les perres coles que nos empufábamos pa les hipoteques yeren euros foriatos: americanos, franceses y alemanes sobre too… y esos agora nun vienen, asina que toles entidaes tan intentando garrar perres a los sos clientes por si nos próximos meses namás tienen lo de casa (esa ye la esplicación de tolos cartelos que cuelguen nos escaparates) y vendiendo les sos participaciones industriales. Anque, la verdá, nun tienen porqué danos pena: mientres que’l P.I.B. español quedó nun 3,8 %, los beneficios de los bancos esti añu espoxigaron un 20 % hasta setiembre.

Y ante’l bastiazu que s’acolumbra, España ye’l país de tola eurozona (xunto con Irlanda) que más competitividá esterior perdió dende 1999, namás y na menos que 15 puntos enteros. ¿El motivu? L’aumentu de los nuestros precios (por dexar munches propines, seique) y la cotización del euru. España tien, agora mesmo, el segundu mayor déficit esterior de tol mundu (tres los USA), según datos del Bancu d’España hasta setiembre, el déficit anda rozando los 75.500 millones, o seya 9,8 % del valor del nuestru P.I.B., colo que vamos andar raspiando los 100.000 euros a final d’añu (esti datu vamos poder confirmalu nun par de meses).

La Comisión Nacional de la Enerxía diz que les tarifes eléctriques tienen que subir polo menos el 4,1 pa igualar l’IPC . Tamién nos contaron los del Gobiernu que diba ser malo que subieren los salarios l’IPC, porque de xuru que va baxar depués. Dicho un par de díes depués de saber que, d’un añu pa otru los directivos de les empreses del IBEX tuvieron una suba nel sueldu del 33 %) y que, según un estudiu de BBVA fechu públicu esta selmana, la construcción va echar a la cai pal añu que vien a 90.000 persones y a otres 160.000 pal 2009… meyor despedilos que subi-yos el sueldu.

Según un estudiu de Caja España, Asturies va acabar l’añu con ún de los espoxigues más baxos de toles rexones españoles, namás un 3,2 % (sólo ganamos a Baleares). Y ya ye la rexón española que más mocedá pierde, polo que la población nun para d'avieyar… Por ciertu ¿cómo se pue llamar a una lleenda urbana que demuestra ser verdá?

Per nun vos preocupéis, que los nuestros estrategues empresariales (esos que lleven coles uñes clavaes na poltrona venti años) quieren abrir mercaos en Sudáfrica y Angola: siempre habrá otru más probe pa poder aprovechase d’elli.

Felices fiestes.

Les nueves tarifes del canon (esi impuestu revolucionariu pa compensar a los autores pola copia privada) que se van aprobar faen que pasen per caxa los móviles, MP3 y MP4, y que baxe la tasa de CD y DVD.

Ye un impuestu inxustu que fai pasar per caxa a xustos y a pecadores.

Asina que, cola hipocresía per delantre, por si acasu nos da por facer una cosa illegal (copiar una canción, por exemplu), van cobranos. Debe ser l’únicu casu nel que se pague por si acasu vas facer dalgo malo… ¿y nun me da eso pie a facelo como dalgo polo que ya pagué? ¿nun fai eso que los DVDs con sistema anticopia seyan illegales si yo quiero sacar otra copia pa min?

Enantes, nos tiempos de les cintes de casette, tol mundu facía copies y naide s’escandalizaba, asina que ya vamos poniéndonos al nivel de los usamericanos. Agora si merques un reproductor de CDs, pagues canon, y si merques un discu CD, pagues canon, y si tienes un negociu y prendes esi aparatu que mercasti y pones el discu na tienda, pagues canon (y anque pongas la tele, que ya paga canon, tu la prendas, vas volver a pagar canon).

¿Y a quien lo pagues? A una sociedá privada con ánimu de lucru como ye la SGAE, que ye la encargada de cobrar y xestionar esi canon, cobrando lo de los sos afiliaos, lo de los non afiliaos, lo de los foriatos y lo de la caxa los muertos… pa que dalguién, que tuvo un éxitu fai venti años y nun volvió calcala en tola so puta vida, pueda vivir de rentes, mientes que los que faen música/cine/lliteratura y se lo tan currando anguaño nun son quien a sacar la cabeza porque a los que manexen el cotarru nun-yos interesa.

http://blogs.publico.es/dominiopublico/184/el-canon-la-nueva-marbella-de-la-propiedad-intelectual/

Según Arthur Schopenhauer, hai tres clases d’autores:

1)      Los qu’escriben ensin pensar, escribiendo de memoria o direutamente a partir de llibros ayenos; son los más numberosos.

2)      Aquellos que piensen mientres escriben y piensen pa escribir; hai abondos.

3)      Los que pensaron enantes de ponese a escribir, y sólo escriben porque lo pensaron enantes; nun hai munchos asina.

La cita ye de los Manuscritos Berlineses, una guapa colección d’aforismos.

Como nel guapu y famosu cuentu de Nathaniel Hawthorne, la prensa anda contándonos estos díes la vida de John Darwin (hasta tien el nome guapu), un piragüista británicu al que dieren por muertu n’alta mar allá pol añu 2.002 y que se presentó de sutrucu nuna comisaría fai una selmana diciendo que nun s’alcordaba de nada (como aquel mozu del piano, ¿alcordáisvos?).

Pues resulta qu’agora acaben de descubrir que l’enigma namás yera un casu d’estafa. El tal John Darwin taba enllenu de deudes, asina que nun se-y ocurrió otra cosa que finxir que desapaeciera n’alta mar, ensin contar nada a la muyer, que s’enteró como una selmana depués de que taba vivu y decidió nun dicilo “por amor” y poles perres d’un seguru de vida que cobró.

El casu ye que depués de facese’l muertu, el paisanu viviera tol tiempu na casa d’al llau, como Wakefield, pero sabiéndolo la muyer. Les dos cases taben comunicaes por una buraca, que tapaben con un armariu pa que nun se notare cuando dalguién los visitaba.

Pero John Darwin nun taba namás trancáu en casa (lleendo, viendo la tele y faciendo bricolaxe), sinón que salía dalgunes veces a dar una vuelta (disfrazáu y faciéndose’l coxu). Y hasta mantuvo dalgún romance nel estranxeru. Dalgo que la muyer nun-y perdonó, y como tenía toles perres a nome d’ella, coló a vivir a Panamá, asina que’l probe John Darwin nun tuvo más remediu que resucitar porque nun tenía un chapu.

Los dos fíos de la pareya, que nun vivíen cola ma, nin siquiera lo sabíen, pero agora que se descubrió tol enguedeyu, acaben de sacar una nota diciendo que los pás que-yos tocaron son fatos dafechu y que nun quieren saber ná d’ellos.

A ver cuanto tarden en contanos la película.