Apúrrovos un testu guapu de Miguel Ángel Llana
VOTAR O NUN VOTAR NES ELECCIONES DEL 9 DE MARZU ¿PA QUÉ?
Dientro d’un mes va tener una papeleta na mano, pero como usté nun ye de fiar nin siquiera usté mesmu va poder metela na urna. Asina entama y termina la so actividá y participación democrática hasta dientro de cuatro años.
Si usté ye militante del PSOE, PP, IU o de dalgún otru partíu d’ámbitu nacional o autonómicu (na mayoría de los casos) nin siquiera va poder participar na elección de los candidatos que presenta’l so partíu, de mou que por esta razón (y otres munches) cuando la democracia nin siquiera furrula dientro de los partíos qué puen esperar el restu de los ciudadanos. Les llistes son zarraes, ensin resquiebres, pa que too quede atao y bien atao.
Una vez elixíos, el presidente del gobiernu o cualquiera de los presidentes autonómicos, diputaos o senadores, conseyeros autonómicos, alcaldes y conceyales enxamás van consultar a los sos militantes sobre les decisiones que van tomar y muncho menos a los ciudadanos que los votaron. Solo una pequeña élite va decidir a espaldes de los ciudadanos ya mesmamente de los sos militantes, por nun falar de la llei D’Hont, de les circunscripciones electorales y d’otres munches disposiciones que tuercen y tracamundien los intereses de los ciudadanos.
Col so votu, por exemplu, España entró y mantiénse na OTAN, intervién activamente ya hasta militarmente, en munchos países violando la so soberanía, mantién rellaciones cordiales y sofita a rexímenes criminales y dictatoriales d’una llarga serie de países, too ello, tanto con gobiernos del PSOE como del PP.
En cuanto a la política interior, el gobiernu central y los autonómicos y los sos partíos actuen contra y enfrente de los ciudadanos con una praxis política que criminaliza a los movimientos llaborales y ciudadanos. No económico, espoxiguen les desigualdaes sociales y la precariedá llaboral. Nun cuerre meyor suerte la política relativa a la educación, sanidá, privatizaciones, el mediuambiente y en definitiva tolo rellacionao con una planificación social sostenible a mediu y llargu plazu. Les rellaciones cola cúpula más conservadora y golpista de la ilesia afítense cada vez más, el PP sofítales y el PSOE finánciales.
El so votu ye importante, dicen, pa que cola so complicidá llegalicen los atropellos de la política internacional y l’espoxigue de la brecha social y la perda de los drechos y llibertaes de los ciudadanos. Por esta razón y por otres munches, vote, vote y llegalice la situación.
La llei de financiación de los partíos sirve pa que sólo los que puedan financialos tengan el partíu que los represente, pero sólo a los sos intereses. D’esti mou sálvase y caltiénse la unidá: el poder económicu, la financiación y los resultaos van de la mano garantizando que siempre queden bien representaos nel partíu que financien. Pa eso paguen.
Si usté tien agora menos de 48 años nun tenía drechu a votar, yera menor d’edá, cuando se restauró la monarquía pero, nun importa, ye monárquicu por definición y si tien más de 48 lo mesmo. Consideren qu’usté nun ta capacitáu pa tener opinión sobre estos temes, nin tampoco pa entender les lleis de la xenética y menos les de la predestinación, que son les que ponen o non reis y reinos. Y, sobre too, cuando la monarquía y el monarca ye impuestu por un dictador y aplaudíu pola oligarquía que sofitó a ambos.
Pero, si esto ye un Estáu de Drechu, cierto, sólo que pa unos yelo más que pa otros y pa otros munchos nada. Les sos lleis ampárennos a toos, pero como les lleis tan feches a midía, sólo a la midía de dalgunos, a unos protéxenlos del too y a otros encarcélenlos por nada. Hasta unos tienen inmunidá que ye lo mesmo que dicir que son impunes. Pero falando de lleis, d'inmunes e impunes, nun más difícil tovía, el rei ta perriba de cualquier llei ensin importar los que faga o pueda facer. El rei ta al marxe de la llei, lliteralmente ta fuera de la llei: ye'l rei.
El círculu de tol entramáu zárrase col control de lo que vienen llamando los tres poderes: executivu (gobiernu), lexislativu (parlamentu) y el xudicial (tribunales) como si hubiere dalguna independencia cuando los tres poderes furrulen como nun sistema de vasos comunicantes y cuando, amás, los tres poderes tan en manes del partíu de turnu que gobierna y esti del que lu financia. Dalgunos llamen a esti modelu de democracia partitocracia, como si los partíos pintaren dalgo y nun fueren namás instrumentos del poder económicu que ye’l que de verdá gobierna. Pero que’l xuegu de los partíos nun pase de ser una ficción nun quita pa que los sos dirixentes y munchos de los sos militantes se fagan d’oru y acaben metíos nel poder económicu como se ta viendo tolos díes.
Pero tovía fai falta más. El círculu séllase cola llibertá d’espresión. Si usté tien unos cuantos millones d’euros, usté va tener llibertá d’espresión, pero, entós nun pa dicir lo que quiera (qué valta-y fai con tantes perres) sinón pa dicir lo que-y convenga o lo que convenga a los sos intereses, que vien a ser lo mesmo. Si non tien esos millones tamién va poder, rara vez, de vez en cuando, dicir dalgo pero poco y curtió y, munchu güeyu, ensin pasase. Asina salvase la pluralidá informativa pa que naide pueda dicir que nun hai llibertá d’espresión.
En resume: vote y vote a cualquiera, qué mas da, vote hasta en blancu, pero vote. Lo que cuenta ye la participación y la suma de complicidaes, collabore entós, cuantos más cómplices meyor, too va ser más democrático y la conciencia de los políticos (si ye que la tienen) va quedar a salvu col so votu.
Esbilla
del.icio.us
Nací col don de la risa y cola intuición de que’l mundu taba llocu.
Y esi foi tol mio patrimoniu.