Escucando estrelles

En tiempos escuros, siempre ye muncho mas prestoso lleer a los clásicos.
Gracies a Tucídides, na so Hestoria de la Guerra del Peloponesu, tenemos testimoniu d’una manera de ver el mundu al traviés de los güeyos del mundu antiguu.
Na Oración fúnebre, un discursu escritu por Pericles en honor de los cayíos na Guerra del Peloponesu, que gracies a Tucídides lléganos, en munches de les sos partes, frescu y vivu como nengún discursu políticu d’anguaño: si nes nuestres rellaciones privaes evitamos molestanos, na vida pública, un mieu respetuosu ye la causa principal de que nun cometamos faltes, porque obedecemos a los que se suceden nel gobiernu y nes lleis, y sobre too a les que tan feches p’ayudar a los que sufren inxusticies y a les que, ensin tar escrites, faen que quien les fraye cargue con una vergoña reconocida dafechu.
Eso valía pa enantes, agora paez que nun ye asina.
Tornamos al llibru de Tucídides: Sabémoslo tan bien como vosotros, nel cálculu humanu, la cuestión de la xusticia plantease sólo ente fuerces iguales, si non, el fuerte impón la so decisión y el débil cede.
Tantu tiempu y qué poco cambiamos.
Salieron de la cárcel, onde nunca tuvieron qu’entrar, los sindicalistes Cándido y Morala. A la fin, tarde, ye verdá que dalgunes vegaes hai xusticia.