Escucando estrelles

Tenemos estos díes n’Avilés una guapa esposición d’óleos na Sala Cultural Caxastur (c/ Alfonso VII númberu 2), hasta’l próximu tres d’agostu.
Nos cuadros, de trazu gordu, alcontramos una interpretación mui personal de la naturaleza, buscando conxugar color y armonía, como si’l paisax nun fuere namás qu’una escusa pa mostranos tol so mundu interior. Dalgo que paecen afitar los títulos de los cuadros: “anochecer en el bosque”, “paisaje”, “paisaje con árboles”…
Un conxuntu interesante, que paez pillar a l’autora nun momentu creativu a metá camín ente l’abstracción y la figuración, ensin saber tovía si tirar per un llau o per otru. Dellos apuntes nos cuadros faen aldovinar una futura esposición sobre temes marinos, paeznos.

Dende’l nuestru puntu de vista, y dao la mocedá de l’autora (tien namás 27 años), apuntamos el d'Elisa Bermejo, de la que nun sabíemos nada hasta ayeri, como nome a siguir.