Escucando estrelles

N’Asturies fai munchu tiempu que nun tenemos periódicos de verdá.

Tenemos dos y mediu, que viven del duernu de les subvenciones-anuncios de los ayuntamientos, el Principáu, Caxastur y les empreses constructores, ensin preocupase d’informar o de contrastar la información que-yos dan fecha. Y como cada vez vienden menos, cada vez dependen más d’ello, nuna espiral que paez llevanos a toos a nenguna parte.

Los fines de selmana ye tovía peor: nun son namás que sofitos pa promociones inútiles y publicidá. Y los domingos namás una escusa pa espetanos publirreportaxes enforma.

Asina qu’esti fin de selmana vemos dellos artículos que nos falen de les bondaes del Plan de la Vega, de la mudanza de Naval Xixón y de lo bono que va ser repetir otros cuatro años asignatura con Areces, por nun facer bien los deberes.

Pa muestra, un exemplu, güei nel diariu El Comercio (títulu significativu onde los haya) tenemos un publirreportaxe de dos fueyes con Pedro Sanjurjo, segundu teniente d’alcalde y conceyal d’urbanismu en Xixón, que se repite tamién en dos fueyes en La Nueva Engaña edición xixoniega, onde amás dediquen otres dos fueyes de publirreportaxe a Javier Fernández pa xustificar otra vegada la francedura del pactu (vese que nun tien la conciencia tranquila) y otres dos a Quico Buendía, p’avisanos de lo que nos espera.