Escucando estrelles

El Ministeriu d’Educación acaba d’actualizar los datos sobre fracasu escolar en España. A la vista de los resultaos, podemos dicir que’l fracasu escolar va bien. Pasó de tar estancáu dende fai tres años (28,9 % en 2002, 28,7 % en 2003 y 28,5 % en 2004), pero espoxigó 1,1 puntos nel últimu añu, p’asitiase nel 29,60 %, máximu históricu.

Esti ye un índiz que se calcula sacando la tasa bruto de graduaos en cuartu de la ESO y restándolo a 100. El númberu diznos el porcentaxe de población que dexa los estudios ensin el títulu de Graduáu n’ Educación Secundaria Obligatoria.

O lo que ye lo mesmo: 130.000 alumnos dexaron la ESO ensin nengún títulu l’añu pasáu.

Amás, compartimos puestu con Portugal, Islandia ya Italia, como países nos que más d’un cuartu de mozos ente 20 y 24 años abandonen los estudios.

Dientro d’esa escala, los asturianos somos de los que tienen ún de los meyores índices: un 10,60 % d’abandonu. Anque los resultaos tean maquillaos abondo, nun dexa de ser significativo qu'un sistema educativu que pierde maestros porque pasen pa la política (Areces, Valledor, Torre, Buendía, Trevín, Velino Martínez, Cuervo’l de Cangas…) furrule ensin ellos.

¿O va ser por eso?