Escucando estrelles

Según The Wall Street Journal, los ganaderos norteamericanos tan dando a gochos y vaques coses tan chocantes como regaliz, galletes, chocolate, corteya de quesu, patates frites, pulpa de llimón, mantega de cacagüeses y frutos secos. ¿El motivu? Aprovechar los escedentes de la industria alimentaria sal-yos anguaño muncho más barato que mercar maíz, que duplicó’l preciu nun añu.

¿Y porqué subió tanto’l maíz? Pues porque los que manden nos EEUU, pa combatir l’alza nos precios de la gasolina (rozando ya’l máximu históricu), tan subvencionando a maza’l desarrollu del etanol de maíz.

Estes subvenciones tan disparando los costes de la cría del ganao, y el que lo ta pagando ye’l consumidor final. La inflación na primera metá d’esti añu ye del 6,1, casi que triplicando la del añu pasáu, lo que fai que la Reserva Federal nun pueda tocar los tipos d’interés, estancaos nel 5,25 % a pesar de la frenada económica y el pinchazu de la burbuxa inmobiliaria.

La solución más fácil diba ser abrir el mercáu a les importaciones d’etanol fecho con caña d’azucre brasileño, que ye muncho más barato que l’etanol de maíz. Pero’l lobby de la caña d’azucre d’EEUU nun quier , y amás el gobernante qu’apruebe esa midida va poner d’uñes a estaos como Iowa, Dakota del Sur, Kansas y Ohio, que tan volcaos na producción de maíz pa cobrar los subsidios. Y nun se pue escaecer que l’ añu que vien hai elecciones.

Asina que, sabiendo too esto, la inflación nos EEUU va dir pa llargo.

Lo peor nun ye pa ellos. EEUU producía’l 40 % del maíz mundial, anque ta aumentando esi porcentaxe a marches forzaes (n’abril, nel estáu d’Iowa fumigáronse con avionetes campos enteros plantaos de trigu pa poder volver a semalos de maíz). Esto fai que’l maíz ya nun vaya pa l'alimentación y que s’abandonen otros cultivos pa semalo de lo qu’agora resulta mas rentable. N’Italia, la baxada na producción de trigu yá aumentó un 20 % el preciu de la pasta esti añu.