Escucando estrelles

Ta de moda la falta de lluces, asina que vamos a contar qué pagamos anque tengamos la lluz apagada.

El preciu de la lluz ye ún de los componentes más importantes nel IPC, polo que tolos gobiernos que nel mundu fueron quieren tenelu siempre controláu. La llexislación obliga al gobiernu a revisar la tarifa de la lluz cada tres meses.

Al intentar conxelar el preciu, les empreses recurren porque l’alza nel preciu del crudu fai-yos tener una perda supuesta. La Comisión Nacional de la Enerxía (CNE) reconoz-yoslo siempre y aplicalo nel capítulu d’otros gastos. Asina que los españolinos d’a pie pagamos lo que quieren les empreses, pero con intereses.

L’añu pasáu, el déficit foi de 2.300 millones d’euros, que tovía tan pendientes de confirmar pola CNE. Esti déficit, al dicir de munchos, ta maquilláu.

El recibu de la lluz ye bimestral, y nél págase un coste fixu que depende de la potencia contratao, l’alquiler del equipu de midida y la enerxía que se consume. La suma de too va grabada con un impuestu especial qu’aplica cada compañía eléctrica y con l’IVA.

A la hora de fixar el preciu del kilowatiu hora tan aplicándonos lo que cuesta xenerar la enerxía, tolos gastos de mantenimientu de la planta, los combustibles, distribución y conceptos que dependen de decisiones polítiques como la Moratoria Nuclear, el Plan de la Minería del Carbón (subvencionar la mineria n’España) y el Plan de Residuos Radiactivos de les centrales nucleares.

La Moratoria Nuclear ye una deuda qu’asumió l’Estáu cuando decidió parar la construcción de centrales nucleares que ya taben entamaes. L’Estáu determinó por llei (añu 1984) incluyila nel recibu de la lluz per un periodu de 25 años (acábase nel 2015).

O seya, traducío en perres, de los 22.702 millones de euros que van recaudar les compañíes eléctriques pol recibu de la lluz esti añu, unos 974 millones (5,16 millones de la Moratoria Nuclear, 51,6 pol Plan de Residuos Radioactivos, 832,3 millones por déficit d’ingresos y 80 millones pol Plan de la Minería del Carbón) son partíes ayenes dafechu a la producción eléctrica. A la fin, cada casa paga una media de 42 euros al añu por razones non económiques.

A pesar de toles perdes supuestes que-yos provoca la estabilidá nos precios de la lluz, toles empreses eléctriques del país tienen macrobeneficios añu tres añu y nun paren de facer operaciones especulatives pa entrar nel accionariáu d’empreses d’otros sectores o d’otros países, desatendiendo les redes de distribución y el mantenimientu.

Pero si-yos dan perres ensin esixi-yos nada, seríen tontes si lo gastaren. Tira que llibres, paecen pensar, nun hai país como ésti.

Y ye por eso que les empreses de fuera danse d’hosties por garrar cachu nesti país pequeñu.