Escucando estrelles

Como dicía un vecín del pueblu de mio pá: mira si ye mala la política, qu’a la suegra, los finos, llámenla madre política.

Estos díes los periódicos nun paren de sacar noticies sobre cuanta xente s’atecha dempués de ganar unes elecciones. Noticies sobre lo muncho que cobren alcaldes y lliberaos, los cargos de confianza que tien caún… A min llámame muncho l’atención la bayura d’Institutos y Consorcios que tenemos dende va años pa reactivar la economía, caún col so direutor y subdireutor y tola cla, pero ensin que veamos nengún avance mas allá de dalgún viaxe al estranxeru nel periódicu o dalguna estadística chorra. Pero por caún que sal na prensa hai munchos otros que nun salen: los que namás pañen un puestu de secretaria/u, chófer o currito a seques.

Hai muncha xente nos partíos, y non toos valen nin tienen estómagu pa tar nes altures.

Pero lo mas gordo ye lo que nun sal nunca. Lo que nun va salir porque’l que se mueva ya nun va salir na semeya enxamás. Les empreses de los/as compañeros sentimentales, de los interpuestos o de tolos averaos al poder que sirven como muérganu de financiación de los partíos o pa poder pagase’l chaletín na costa meyor conservada del mundu mundial. Les empreses constructores sobre too, pero tamién los xeriátricos en manes de maríos, les imprentes que tan “Construyendo Asturies”, les empreses d’obra civil, les radios, los hoteles o les ganaderíes de sobrinos…

Y si siguimos baxando va siendo peor, porque los grandes contratos quédense nes altures y según va baxando la xente dase puñalaes por pillar cachu nun contratín d’un caleya, nun cursillu de formación, nun viaxe de promoción industrial o turístico, etc.

Naguamos porque nun futuru non mui llonxanu, dalguién independiente pueda estudiar daveres tola rede de clientilismu qu’hai nesti país pequeñu, y entrar a fondu con toles consecuencies.

Anque si nunca se fizo coles grandes fortunes que dalgunos pillaron col franquismu, vemos complicao que se faga dalguna vegada colos que tan mandando agora mesmo. A la fin, son los mesmos o los fíos d’aquellos espabilaos.