Escucando estrelles

Tola vida pagando una hipoteca al bancu pa poder tener un pisu y dempués que lu tienes vendes-ylu al bancu porque cola pensión nun te llega pa vivir.

Fagan pisos, señores, que la banca gana siempre.

La hipoteca inversa surde porque los xubilaos españoles tienen pensiones baxes y porque’l 85 % d’ellos tienen una vivienda en propiedá. Entós un llistu con máster dixo que’l paisanín y/o paisanina tamién podíen volver a hipotecar el pisu que tanto-yos costó pagar, pasando la propiedá al bancu o non, y recibir tolos meses una renta mientres siguen viviendo nél. Y si los herederos quieren dempués recuperalo, que paguen.

Esta ye una modalidá d’hipoteca que fai que los mayores de 65 años y persones dependientes puedan complementar con una renta la pensión que tienen a cambiu de ceder la so casa como garantía. Calcúlase que nestos dos años firmáronse unes 10.000 d’estes hipoteques, al pesar de que nun ta bien regulao y los ciudadanos siempres salen perdiendo porque los que lo soliciten suelen tar necesitaos, y los bancos abusen. Son productos caros, con unes comisiones mui altes.

Anguaño’l Parlamentu t’acabando de tramitar la Llei Hipotecaria y, en cuantes entame a furrular, ésto que vos acabo de contar va facese muncho mas normal. Tanto que va ser un mercáu petecible pa bancos y empreses de seguros, que ya tan afilando estratexes.

Asina hai qu’entender que’l PP y CIU pidan promover esti tipu d’hipoteques con toa clas de meyores fiscales: IRPF, Patrimoniu, y Socesiones y Donaciones.