Escucando estrelles

Entama la temporada de toros en Xixón, y yá tenemos a lo mas rancio y casposo de la ciudá faciendo’l paseíllu a “los artistes”.

Muncha xente, al mirar pa una cosa, namás ve lo que-y interesa: l’espectáculu, l’oru, la música y l’arte, y nun ve’l sufrimientu d’un animal, toles mentires y falsedaes coles que nos lo vienden. Nun lo ven porque nun quieren velo, non porque nun lo tengan delantre los güeyos.

Ye una fiesta, pue ser, pero una fiesta cruel y desfasada, que yá nun tien nenguna razón de ser, y menos nestes tierres onde nunca tuvimos muncha tradición, anque agora nos lo quieran meter pelos güeyos.
Ye tamién, pa munchos, dalgo ética y moralmente refugable, porque ye un supuestu arte que namás se basa na tortura d’un animal que nun tien defensa nenguna porque ta vendíu namás que lu carguen nel camión con un sacu de sable enriba’l llombu pa que nun salga a la plaza mui revolvín. Porque van marealu d’un llau pa otru. Porque va salir a la carrera d’un sitiu escuru a la lluz del sol, quedando cegáu y namás va sentir un barullu al rodiu’l cosu. Van rabialu col capote, van clavá-y hasta l’alma un puyazu con diez centímetros d’aceru pa que sangre y vaya pingando-y tola fuerza. El caballu onde monta’l picaor va ser vieyu, colos güeyos tapaos y les cuerdes vocales cortaes pa que nun rinche. Y al toru van clava-y la puya delles veces. Y entós van clava-y cuatro arpones d’ocho centímetros d’aceru, que van quedar clavaos, moviéndose y esgarrándo-y los músculos, asina que dempués nun va poder llevantar bien la cabeza. Y ehí ye onde l’artista va sacar lo meyor de sigo mesmu, los olés, los pases que-y van valir esa oreya que lu fai subir nel escafón y cobrar más pal otru añu.

Cada añu mátense d’esta manera trenta mil toros nesti país llamáu España.

Cada añu faen en Xixón la fiesta Begoña y traen toreros pa danos espectáculu. Organizáse cuando mas foriatos hai na ciudá, porque anque cuatro paletos digan lo contrario, nestes tierres nun hai tradición nenguna y a mui pocos-yos interesa. Y ye deficitario porque la plaza nun s’enllena y entós hai que subvenciónalo.

Inxenuidá tengo la xusta. Dalgunos nacionalistes españoles defenden lo que llamen la fiesta nacional porque ellos mesmos son lo mas rancio y venlo como dalgo sagrao, que nun se pue retrucar. Otros, nacionalistes d’otru pelaxe, venlo como una inxerencia estranxero. Asina que podéis pensar que tengo muncha inxenuidá si vos digo que’l motivu pol que más me prestaría que desapaecieren del mapa les corrides de toros ye’l sufrimientu del toru. Pero ye asina. Y pola mesma, prestaríame que desapaecieren tamién esi prender fueu a los cuernos tan graciosu, esi tirar animales de campanarios tan tradicional, esi arrancar cuellos a los pitos tan prestosu, etc…

Enllace: http://www.faada.org/antitoros.php