Escucando estrelles

N’Asturies somos los primeros de tol conxuntu d’España en númberu de xubilaos, con un fermosu 29 %. Si a ellos sumamos los funcionarios, dannos que tenemos 360.223 persones dependientes de Papá Estáu, o seya que cobren de l’Alministración.

Son 6.823 persones más que’l númberu total de trabayadores por cuenta ayena, según datos del Institutu Nacional d’Estadística.

O pasao a númberos más entendibles: de cada 100 persones que viven nesti requexu del mundu: sólo 32 trabayen fuera de casa pa ganase les fabes. Y colo que ganen tan financiando a 29 xubilaos o dependientes, a otros 4 funcionarios (alministración, seguridá, salú y educación) y a la mayor parte de los 33 que queden (neños, paraos ensin cobertura, ames de casa…)

Poro, somos una zona “pasiva”, que depende de los recursos públicos, y que cuenta con un nivel de paru superior al del conxuntu del país. Esto vien dao, ente otres coses, por tener la tasa de natalidá mas baxo d’España (7,2 nacíos por cada 1.000 habitantes, frente a los 10,92 de media nacional), anque pa compensar tamién nos muerren mas vieyos (11,6 por 1.000, frente a los 8,4 del conxuntu nacional).

Nesto tien muncho que ver tamién l’éxodu de les lleendes urbanes, eses que dalgunos tan emperraos en dicinos que nun esisten.

Lo meyor de la nuestra mocedá emigra na busca d’un trabayu dignu y fai la vida fuera, colo que van tener los sos fíos llonxe d’esti cementeriu de sindicalistes reconvertíos en políticos de caleya que dalgunos tan faciendo d’esta tierra.