Escucando estrelles

Dalgún día alcordarémonos d’esti discu con rabia, al pensar lo que tuvimos delantre ensin da-y mayor importancia.

Mus son/yeren un grupu d’atmósferes, a mediu camín de la tradición y d’un minimalismu de vanguardia. Un grupu que fai alcordase de Mazzy Star (sobre too), Mojave 3 o Cocorosie, pero pal que nun alcontramos nengún referente per estes tierres. Un pop elegante, señardosu y suañador, o seique folk, nun sé mui bien cómo definilos.

Usando siempre la llingua asturiana pa espresase (porque quieren: el discu nun tien subvención) consiguieron llegar ensin facer munchu ruíu a mercaos internacionales, ensin escaecer la conciencia social nes lletres.

Cada discu de Mus ye una reacción al discu anterior, asina que tres espublizar fai cuatro años Divina Lluz, la so obra mas cerrada y pesimista, tornen mas senciellos que nunca. Al paecer tuvo muncho que ver con ello la muerte del pá de Fran Gayo, alma mater del grupu. La vida ye un discu muncho mas cercanu, mas lluminosu, anque siga teniendo fondigonaes y señardá.

Nesti discu, lo primero que sorpriende ye la portada. Per primer vez, tenemos lluz y sensación de movimientu, con una semeya de la vocalista baillando esmelenada, dalgo que nun se vía nos discos anteriores.

Fran Gayo ye un poderosu xenerador d’imáxenes. Fai propiu’l mundu onde vive (un barriu obreru de Xixón) y devuélvenoslu masticáu, fechu versos enllenos de señaldá. Ye mas poeta que munchos otros que tienen llibros publicaos. Ensin embargu, nesti discu, les lletres son mas curties y ye la instrumentación la que garra mas pesu, con instrumentos y arreglos nuevos que faen algamar un volume distintu a les canciones.

Mónica Vacas, la vocalista, xuxuria les lletres con fraxilidá y vergoña, de manera hipnóptica cuasi, como si aventare les pallabres al aire, y arropa bien los testos, non tan escuros como nos discos anteriores. Porque quitando dellos matices, ufiértennos lo mesmo: lletres tradicionales y propies que s’entemecen pa facer un universu propiu ya indivisible que nos fala d’esperes y sentimientos nenyuri.

Por desgracia, paez ser qu’ésti va ser el so discu caberu.