Escucando estrelles

Caltuvimos un espaciu natural privilexáu munchos años. Asturies yera un paraísu natural (espero que nun me demanden por apropiame del eslogan murcianu) nel que la ganadería y l’agricultura, los cazadores y los madereros, calteníen la sostenibilidá.

Ensin embargu, nestos tiempos de nuevu ricu, tamos tirando a la basoria tolo que nos dexaron los paisanos d’enantes, pa usar  un modelu que namás sigue furrulando en dalgún país tercermundista. Ye la cultura del tira que llibres, qu’a min quédenme namás cuatro años de phaeton y detrás va venir otru.

Tantu campu golf (¿diecisiete?) y urbanizaciones como tan previstes na costa, les llinies d’alta tensión, los parques eólicos, la incineradora de Serín, les centrales de ciclu combinao, l’ampliación del Musel que se ta cargando los montes que caltienen playes, el banzáu de Caliao…

¿Estudios d’impactu ambiental? Apunta que te dicto, y como pongas una coma de más nun cobres.

Son les maneres del nuevu ricu, del prexubiláu que quier ampliar la casa (el negociu), tener un cochón más grande (un phaeton, por exemplu,) y una tele mayor (modelu TPA).

Son tantos los frentes abiertos que ye imposible enfrentase a toos. Dalgunos conviértense entós en bandera, en piedra angular, como Caliao. Sólo asina s’esplica’l bombardeu mediáticu que tenemos qu’aguantar.

Nuna rexón onde’l  47 % del agua potable de la zona central úsase pa usos metalúrxico-enerxético-industriales (el 89 % del conteníu de los embalses ye pa producir enerxía eléctrica) nun necesita un banzáu en Caliao, un sitiu que ye reserva natural. Necesita una política más racional, o políticos nuevos.