Escucando estrelles

La inmortalidá lliteraria ye dalgo que namás va dar el tiempu, ensin embargu anguaño tamos criando toa una xeneración de plumilles y estudiosos (nun vamos dicir intelectuales, que da noxu) que vive de la subvención, del afalagu al poder vixente, del agrupamientu n’Asociaciones pa facer fuerza, de les feries...

Ye mui ilustrativo que, cuando l’etnólogu Aznar yera presidente, dieren el Cervantes a Jimenez Lozano, y al llegar Zapatero al poder dase’l premiu a Gamoneda. Anque los dos lo merecíen, y muncho, vemos dalgo normal que los premiaren asina y non al revés, porque damos por supuestu que caún va premiar a los de la so cuerda.

Dexamos el méritu, el valir lliterariu de caún, pa prau.

Los escritores d’Areces nun son los subvencionaos del asturiano, por más que munchos lo quieran ver asina. Los escritores d’Areces son los escritores de Selmana Negra y de Salón del Iberoamericanu-llistu, los de l’Asociación d’Escritores de xira per toa España pagándolo nós, toos esos escritores que vinieron, vieron y nun ganaron namás qu’un puestu na organización d’una feria hipersubvencionada o d’una columna nun periódicu onde poner bien al poder. Namás que palmeros, escritores que nun s’enfrenten al status quo. A la mano que-yos da de comer.

Sólo asina s’entiende que la lliteratura en castellán, onde anguaño tenemos autores de munchu valir a nivel nacional como Ricardo Menéndez Salmón o Ignacio del Valle, amás d’una honrosa segunda fila (Fulgencio Argüelles, Susana Pérez Alonso, Eugenia Rico, Jesus del Campo, Nacho Guirado, Rodolfo Martínez, Pepe Monteserín…) seya tan plano, una lliteratura moxigato a la hora de reflexar l’ambiente de l’Asturies d’anguaño.

Los únicos intentos (bien timiducos, eso si) de describir una Asturies averada a lo real vamos atopalos escritos nuna llingua que malapenes llee naide.

Ye otru de los motivos pa nun facela espoxigar, paeznos.