Escucando estrelles

La Universidá Llaboral ye una especie de Frankestein arquitectónicu llevantáu a mayor gloria del Réxime, copiando ya interstualizando estilos de tol mundu.

Fízose dando la espalda a la ciudá de Xixón, porque ella mesma tenía vocación de ser una ciudá pequeña pa los fíos de los obreros. Y la ciudá respondió-y dando-y munchos años la espalda. 

Usábase como institutu, y pa dar dalgún conciertu pel branu, namás.

A finales del sieglu XX pensaron metela nel Campus de Xixón, del que de xuru sedría anguaño l’iconu, pero equí siempre prefieren facer edificios nuevos, que dexen mas perres, anque nun tengan carisma y tean esperdigaos de cualquier manera en metá de nenguna parte.

A principios d’esti sieglu coincidieron dellos factores que ficieron que tol mundu mirare pa ella.

• Transferencia de les competencies educatives a la comunidá autónoma, pasando l'edificiu a ser de titularidá rexonal. ¿Qué facer con un edificiu xigante (ocupa 45 hectárees, con 120.000 metros cuadraos construyíos) cuando cada vez hai menos alumnos? Nun escaezamos que’l mantenimientu anual costaba 6 millones d’euros.
• La ciudá de Xixón agotaba l’espoxigue pel este (taba acutao pa una ronda y un puertu) y entamó a xirar hacia l’oeste: desendolcu urbanísticu de Viesques, campus universitariu, parque tecnolóxicu, xardín botánicu… lo que traxo la continuación del proyectu de Metrotrén por parte del Ministeriu de Fomentu.
• Yera la época de los fondos mineros y aprovechando que’l ríu La Mierda pasaba por La Camocha, Xixón púnxose a la cola de los conceyos mineros con un proyectu de muséu baxo’l brazu, sacando un reintegru de 8.000 millones de les pesetes vieyes.

Asina que, a tou meter, les mentes pensantes (¿?) idearon un Centru d'Arte Actual y Creación Audiovisual, y p’arropalu xuntáron-y un conxuntu d’equipamientos hetereoxéneos. Yá que teníen el traxe fechu y pagáu, había qu’engordar el cuerpu hasta enllenalu.

Asina nació La Llaboral, una ciudá de la cultura.  A la fin, namás qu’un castiellu onde enrocase frente a Calatravas y Niemeyers, buenos somos cuando nos ponemos.