Escucando estrelles

Nos años ochenta del sieglu pasáu, Xixón, fartuca de ser una escura ciudá obrera, dio un xiru radical a la so política urbanístico. Entamó una serie de grandes actuaciones (El Llano, Fomento, Cimavilla, Montevil, Viesques…) que diben cambia-y el focicu a la ciudá.

Anque nun seya cierto dafechu, el pistoletazu de salida pa too aquello podemos asitialu, simbólicamente, na instalación del “Elogio del Horizonte”, la escultura de Chillida que, a pesar de les critiques de los entamos, diba pasar col tiempu a convertise nel auténticu iconu y logotipu de la ciudá, desterrando pa siempre la imaxe de la silueta calteniendo una cruz.

Dalgo tan cenciello como poner una estatua diba trayer dos coses. Semar d’estatues abstractes (¿pa diferenciáse del figurismu d’Uviéu?) la ciudá, seique p’aplacar a los agraviaos artistes asturianos. Y tamién diba trayer la conversión, nel momentu xustu, nuna ciudá de servicios cuando too indicaba que’l futuru nun yera negru-carbón, sinón multicolor de bikini, mesa y chiruca.

Y asina, la ciudá foi convertiéndose nuna especie de monstruu de Frankenstein, un conxuntu hetereoxéneu, mientres que’l restu la ciudá intentaba ponese al altor.

Asina llegamos a tener un ciudá cosmopolita, que ye un términu qu’agora presta muncho dicir: nueves playes, otra fachada marítima, una parva de pubs, equipamientos deportivos, sidreríes de diseñu, centru de talasoterapia, unos cuantos museos de mediu pelo, acuarios, titulaciones universitaries, casinu, víes verdes, xardín botánicu…

Xixón tenía ganes de fiesta, pero vocación de cultura. Había que facer frente al modelu de cultura de clase alta que defendía Uviéu, simbolizao sobre too na Ópera y nos premios Príncipe.

Una suma de sensibilidaes, a les que nun foi ayena la Selmana Negra, esi inventu de tres amigos pa vender noveles que ta asitiáu yá nel sentir xixonés (anque nengún lu quiera al pie de casa) col so amiestu de fiesta y cultura, pasando a convertise nun festival Multicultural y Multicolor, y dexando de pasu unos cuantos artistes subvencionaos tol añu.

Aína, el Teatru Xovellanos quedóse pequeñu pa tantu espectáculu, y echábase en falta un gran muséu, dalgo qu’atropare la ufierta cultural y sirviere de referencia, de focu. Yá teníemos un festival de cine y la Selmana Negra, pero facía falta dalgo más que’l “Salón del Llistu Sudamericanu”. Puestos a ser cultos había que selo más que naide.

Si cada conceyu asturianu tenía un muséu (el del tacu madreña, el del cascu del asturcón, el del corchu sidra…), nós ya teníamos media docena, anque nun los visitare naide. Y como en Xixón siempre fuimos grandones (alcordavos: la escalerona, la iglesiona, el Molinón… nada que ver col complexu los vecinos: Campillín, Vallobín, Pumarín…) tomamos como referencia’l Guggenheim como polu d’atracción turístico, dalgo capaz de facer una catarsis colectiva, un revulsivu sicolóxicu como lo foi nel so momentu’l Water de King Kong.

¿Facemos un edificiu nuevu o un apañu con dalgo yá fecho? Puñetazu na mesa, cagonmiomantu, eso nin s’entruga, tenemos equí un edificiu d’aventar el mexu. ¿Que ta nes afueres? Nun importa, asina los turistes van ver la ciudá pa visitalo, y si fai falta ponémos-yos un tren, anque seya baxo tierra. ¿Qué ye un símbolu franquista? Meyor, asina podemos remocicalu como queramos. ¿Que l’arquitectura ta mas vista que’l tebeo? Pues entós vamos ser mas modernos que naide, y a potenciar el conteníu. ¿Y cómo enllenamos esi edificiu? Pues vamos partilu en cachinos, faciendo actuaciones distintes, cruciamos los deos pa qu’a la fin la cosa nos salga armonizao y tiramos p’alantre.

Demandábase un centru qu’atropare la cultura, que la proyectase al esterior. Pero equí siempre tuvimos un conceptu de cultura adelantao al nuestru tiempu. Cultura entendío como nos entamos del sieglu XXI, más averao al espectáculu qu’al recoyimientu, primando’l diseñu sobre’l conteníu. Equí aprovechamos pa invocar l’ideariu de la Selmana negra y too eso.