Escucando estrelles

Tres años contándonos que les vaques asturianes producíen un escesu de cuota, multando a les que teníen más caldar de la cuenta, pagando al ganaderu pa que dexare de producir, alcontrámonos agora con que va facer falta producir más, si nun queremos tener problemes.

Y ye que’l preciu de la lleche nun para de subir.

Los motivos pa esti alza son más d’un. Per un llau la suba nel preciu del cereal por destinar parte de la producción pa facer biocarburantes (nos USA destinen yá’l 30 %) fai que tamién aumente’l costu de los piensos. La UE tien como oxetivu que nel añu 2010, el 10 % del consumu enerxéticu de los países venga d’enerxía más llimpio, lo que supón destinar na menos que’l 17,5 % de la superficie total de cultivu de toa Europa pa facer biocombustible. Nun país como Francia, por exemplu, esti añu subieron el preciu n’orixe del trigu un 66 %, el del maíz un 32 % y el de la cebada un 44 %.

Son yá tres años siguíos cola demanda de cereales muncho más alto que la ufierta, pol despertar de China sobre too (nun ye sólo pa consumu humanu, nesi país aumentó’l consumu de carne un 40 % en sólo tres años) yá India, xuncío a una seca grave en países mui productores como son Australia, Nueva Zelanda y Arxentina (principales productores mundiales de la lleche en polvu).

La industria sube los precios al consumidor nel intre, hasta agora namás qu’un 5 %, anque yá avisen que la mayor subida va venir en cuantes pase’l branu, y dempués vese obligao a subilo a los ganaderos, tres cinco años manteniendo los precios, que tan cobrando por llitru unos 35 céntimos, un 15 % más que fai tres meses.

Nel últimu informe trimestral del Bancu d’España, yá alvertíen d’una aceleración de los precios de los alimentos non ellaboraos que, no va que d’añu, son la parte más inflacionista del IPC: tienen una tasa d’espoxigue mediu del 5,8 % nel segundu trimestre, frente al 4,1 % del trimestre anterior.

Calculái que’l brik de lleche, qu’anguaño tien un preciu mediu de 75 céntimos según l'Institutu Nacional d’Estadística, pue tar valiendo guapamente un euru a finales d’añu. La Unión de Consumidores d’España yá avisa que la suba nos precios de los productos básicos pue encarecer en 1.200 euros al añu la cesta de la compra.

Toa esta situación pilla a toos col pie cambiáu. Cenciellamente: naide lo tenía previsto.

Años machacando al ganaderu pa que nun produza, promoviendo l’abandonu d’esplotaciones, fai qu’agora mesmo la edá media de los productores tea rondando los 56 años. Anguaño la UE namás permite a España producir seis millones de tonelaes de lleche, cuando tenemos un consumu de nueve millones, foi ún de los peaxes a pagar pa poder entrar. Nel añu 1993 España tenía 141.700 esplotaciones ganaderes, l’añu pasáu quedaben namás 28.100 (n’Asturies foi a les braves, perdimos en venti años más de 20.000 esplotaciones de lleche) que producen un 80 % más qu’enantes.

Hai profesionalidá nes esplotaciones, pero paez que nun l'hai nos despachos oficiales. Dalguién tenía que tener esto previsto, porque pa eso cobren. Ye más grave cuando nos periódicos nun paramos de ver cada poco publirreportaxes con escursiones empresariales y polítiques al xigante asiáticu p’abrir mercaos, dicen.

Nesti país, nel pequeñu y nel grande, siguimos naguando por una reconversión de la clase político. Hubola a tolos niveles, pero tovía nun la tuvimos nos dirixentes.