La Tonada y Anabel Santiago
La Tonada viviera tiempos meyores. Alcordábase muncho d’un mozu, el Piano, que tuvo cuantayá y col que tuvo muncho pelos teatros. Avieyó y yá nun quería salir de casa. Namás salía a dar una vueltina al rodiu casa con una amiga de los vieyos tiempos, Gaita, pa dir a dalgún concursu o romería.
Pero la Gaita apuntóse a viaxes del Inserso, conoció mundu y entamó a viaxar sola. Conoció otros instrumentos, xuntóse a grupos folk, a grupos de pop, de rock, de ska y delles variaciones más. Entamó a salir con mozos y remocicó ella mesma.
Agora, cuando caminen xuntes, la tonada mira a la gaita con envidia, paez-y que remocicó muncho, y que cuando tal al llau d’ella paez muncho mas vieya, que tien menos futuru.
Discos como’l nuevu d’Anabel Santiago, Desnuda, faen que’l futuru de la tonada s’españe en caminos nuevos, mesmamente tantos como yá descubrió El Presi va pa cincuenta años, nin mas nin menos.
La verdá ye que, tonada tonada atopamos poca, pero la manera de cantalo ye mui asturiana, y con eso yá nos conformamos. Ye un discu comercial, pensáu y repensáu, seique pa llanzala al circuitu de les voces étniques femenines.
El tiempu va dicinos si esi yera’l camín, de momentu escuchámosla, y callamos.
Esbilla
del.icio.us
Nací col don de la risa y cola intuición de que’l mundu taba llocu.
Y esi foi tol mio patrimoniu.
Tovía nun lu garre pero tengo ganes d´atopalu yá nes tiendes. A min esta moza prestame a esgaya, más el primer discu que´l segundu. Nun pueo dicir si ye tonada o non porque nun lu escuche y tampoco ye qu´entienda muncho del tema, pero ensin dulda esta moza ta abriendo´l camín pa que´l nuesu cantar siga vivo xeneración tres xeneración. Ye una gran voz y el futuru de la tonada.
trasgu | 26-08-2007 - 21:05:40 GMT 1 #
Mui bones, Trasgu, encantáu d’alcontrate per equí.
El discu ta perbién, paezme que te va prestar pola vida, pero caún ye caún (y k2…).
Yo encamiéntolu a toos, anque munchos babayos de xuro van da-y una montonera palos por nun ser “purista”.
Un saludu.
Ateyavana | 27-08-2007 - 15:23:22 GMT 1 #
Ye qu´a min lo que fai esta muyer préstame muncho, pero la tonada de tola vida ye que nun soi a tar más d´un minutu escuchándola. Yá´l so segundu discu dedicáu a Diamantina namás qu´hai dos cantares que me presten de verdá, pero´l primeru gústanme toes de la ún a la doce. Los concuros de tonada tienen que renovase d´una vegada, namás qu´hai vieyos nes siyes y eso pón en peligru la tresmisión xeneracional.
Salú.
trasgu | 27-08-2007 - 20:22:16 GMT 1 #
Doi dafechu d’alcuerdu contigo.
Yo, la tonada de tola vida, puedo soportalo un gotu más que tu… minutu y mediu tolo más.
Paezme que, reconociendo tol valir que tien, la tonada tien qu’españar, abrise a formes nueves de cantar, xuntase con instrumentos nuevos y renovase nes lletres (yá fiede tantu falar de llindar vaques nel monte).
Esta moza ta intentándolo, y van criticala a maza, pero l’intentu ye necesariu de toes toes. Si trunfa, van sali-y imitadores a rebufu y van da-y aire a la tonada, sinón namás va quedar pa los concursos, enlleno vieyos nes siyes y con cuatro ñetos llevaos a la fuerza.
Haxa salú.
Ateyavana | 27-08-2007 - 20:48:26 GMT 1 #