Escucando estrelles

Acaben de tirar de la manta los del otru partíu, enfurruscaos porque nun-yos dexen moyar el so cachu de pan na salsa económico del poder, y asina la mayor parte de los xixoneses enteráronse de dalgunos de los nomes de les families que los gobiernen.

¿A dalguién a esti altor de la película-y sorpriende que los nuestros políticos namás piensen de cuatro en cuatro años? ¿Y que namás miren polo d’ellos? Nengún de los que tenemos aspira a más nada qu’a pillar un puestín y perres fáciles pal bolsu, que nun hai que da-y cuentes a naide.  

Amás d’eso quieren muncho a la familia.

Pedro Sanjurjo, conceyal d’urbanismu, ye l'home de Maria José Ramos, conseyera de Presidencia, Xusticia ya Igualdá, con hermanos bien asitiaos en dellos Conseyos d’Alministración (d’esos que te dan pasta por dir un día y nun facer nada) y un cuñáu, Santiago Martínez Argüelles, vicerrector de la Universidá y conceyal de Facienda.

Jesús Morales , que dexó de ser conceyal d’Urbanismu tres tar acomodáu venticinco años (por culpa d’aquelles marches verdes qu’agora aplaude l’alcaldesa cuando ta fuera), ta colocáu anguaño como asesor de la UXT (amás de siguir nel conseyu de CajAstur, Xixón al Norte y Cegisa), y punxo a la muyer, Clara Costales, como diputada.

A Iván “Movistar” Álvarez Raja, aquel mocín, un poco torpe él, que nos traxo a Paul McCarthy, invitáronlu a dexar el puestu porque taba estresáu, anque caltuvo’l puestu na Caxa y agora mangáronlu como xerente del Centru de Transportes. Amás d’eso punxeron-y a la muyer nel conseyu d’Escueles Taller. Probes, tan empezando la vida, hai qu’echa-yos un gabitu.

Agora, que’l meyor de toos ye Jesús Montes Estrada, Churruca, prexubiláu del mui noble oficiu de sindicalista, con un garapiellu curiosu de propiedaes inmobiliaries a nome de delles sociedaes, y que, dende’l puestu que-y da IU, quier meter la cuchara en toles salses inmobiliaries. A esti paisanu, coherente, plural y progresista onde los haya, nun-y daba col sueldu como teniente d’alcalde pa llegar a fin de mes, asina que colocó a la muyer, Asunción Gómez Alonso, como conseyera pagada del conseyu d’Alministración na Empresa Municipal   d’Agües.

Y asina hasta diez families, y eso qu'a dalgunos yá-yos paecía feo lo d’Areces moviendo a la muyer d’un puestín pa otru.

De lo del Principáu pa qué vamos falar. N’Uviéu Gabino armó la de coyer al zarrar el grifu de les perres a los de la oposición, y hubo que colocalos a tou meter en dalgún sitiu.

Nesti país namás trabayen de verdá los mui, mui tontos.