Escucando estrelles

La comarca de Cocagne ye como un triangulu ente Toulouse, Albi y Carcassonne, nos Midi-Pyrenées. Ellí, a lo llargo de sieglos, concentróse’l cultivu del glasto, una planta conocida como Isatis Tinctoria, que s’usaba pa sacar un guapu color azul y que quier munchu sol.

La producción d’esi colorante fizo rica a tola rexón (en Francia la espresión un pays de Cocagne ye como dicir en castellán un país de Jauja).

Un refrán mui vieyu dicía: “au Pays de Cocagne, plus on dort plus on gagne”, que traducío ye: “na comarca de Cocagne, cuanto más se duerme, mas se gana”. Antanu, les fueyes del glasto secábense y moldiábense en forma de boles a les que llamaben cocagnes pa poder manexales bien. Dicíase que cuantu más tiempu se dexaren reposar (ente otros compuestos, usábase orina humana, rica n’amoniacu), más vivu yera’l tinte y más caru se podía vender. D’ehí salió la idea de que, esperando, ún podía llegar a facese ricu.

La fiebre azul entamó nel sieglu XIII, cuando la realeza abandona’l colorao y opta pol color azul, asociáu a la pureza de la Virxen María. La mayor parte de la producción taba en manes de ricos y poderosos comerciantes qu’edificaron palacios luxosos fechos con ladriyos de color rosa. La bayura d’ellos fai que, tovía angüañu, a Toulousse se la conoza como la Ciudá Rosa.

La mayor prosperidá foi ente’l sieglu XV y el XVI, cuando los sacos de pigmentu (l’oro azul de les cróniques) mandábense a toa Europa. Dempués alcontróse con un competidor inesperáu: l’índigu que traxeron los españoles de les colonies americanes. L’azul d’esta otra planta yera dalgo violáceu, pero yera muncho más rápidu y fácil de sacar que’l glasto, y muncho mas baratu. Poro, el so cultivu foi amenorgando. L’últimu intentu pa facelu espoxigar foi con Napoleón que, col bloquéu continental, nun tenía índigu y vistió a los sos soldaos con azul de glasto.