Escucando estrelles

Cuasi toles ciudaes tienen un escritor que les inmortaliza, que-yos da alientu y les fai pasar a les páxines de la lliteratura d’una manera digna. Si naide tien calidá lliterario pa ello, pue fabricase atopando un cronista de periódicu cualquiera, pero da munchu mas prestixu un novelista.

Nel sieglu XX foi mui distinto, porque yá cambiara’l conceptu de ciudá y tamién el papel del escritor, pero los mayores  escritores del sieglu XIX odiaben les ciudaes onde nacieron, y nes páxines qu’escribieron atopamos exemplos enforma.  Stendhal con Grenoble, Flaubert con Rouen… l’exemplu más claru seique seya Heine, qu'espotricó tanto contra Düsseldorf que tovía anguaño nun-y quieren poner una estatua. Ye’l mesmu casu que clarín, que caricaturizó tan bien l’alta sociedá burguesa d’Uviéu, que tovía güei da-yos repilu tener un detalle cola so memoria.

Pola contra, Xixón nunca foi una ciudá lliterario como Uviéu, una ciudá con un cronista d’altu nivel. Xixón siempre despreció a tolos lliteratos que tuvo, quitando a Xovellanos que ye’l pá de la patria (y como tal ye patrimoniu de toa Asturies, como Alfonso Camín). Xixón siempre despreció al Gerardo Diego o al Piñer de turnu, y prefirió sacase fotos col foriatu mediocre qu’atrayía la Selmana Negra o’l Salón Iberoamericanu, encantaos de pasar unos díes de vacaciones y ensin ser quien a creyelo del too, como un Kucharski cualquiera.

El Xixón lliterariu siempre quedó a desamano, yera un café de la capital, seique por eso la novela de Xixón dicen los llistos que ye Helena o el mar del verano, de Julián Ayesta. Una noveluca de prosa ñoño que reflexa bien l’ambiente de la época en Somió, escaeciendo que Xixón ye una ciudá proletario dende siempre y que Somió namás son cuatro cases del estrarradiu.

Por eso, porque nun hai nenguna novela asitiada pa cubrir esi güecu, agora l’Ayuntamientu saca un llibru con autores que falaron y falen de Xixón. Danos pena dicir que, a la vista de lo qu’atopamos nél, la novela de Xixón tovía ta por escribir.