Escucando estrelles

Nun fai tanto, el preciu de venta al públicu d’un llibru calculábase multiplicando por cuatro’l costu de la so producción industrial (esto baxaba si tenía dalgún tipu d’ayudes). Anguaño munches editoriales multiplíquenlo por 8 o por 10.

Asina que merco llibros de segunda mano, ediciones de bolsu o merco novedaes en Amazón per Internet, onde los mesmos llibros llevaos al estranxeru sálenme pola metá de lo que me cuesten equí (mercando unos cuantos salen bien de preciu, al repartir los costos). Por poner un exemplu, un discu o un llibru qu’en España val 18 euros mércase en Canadá (con un nivel de vida más altu que’l nuestru) polo que son al cambiu unos 10 euros. A lo meyor ye por eso qu’ellí nun hai top-manta.

Too esto ye un problema que xenera’l preciu fixu de los llibros, dalgo que defendíen llibreros y editores pa defendese de les rebaxes de les grandes superficies. Ensin embargu, los descuentos mantiénense pal llibru escolar (equí mandaben les grandes superficies, y la editorial Santillana), qu’amás vese ayudáu poles ayudes escolares de les distintes alministraciones publiques. Amás, les editoriales van vese beneficiaes tamién pol canon nel préstamu de los llibros nes biblioteques (una imposición europea), gastu qu’asume l’Alministración, asina que vamos pagalo ente toos.

España ye la cuarta potencia editora de tol mundu. Equí, como n’otros llaos, los grandes grupos editoriales enmazcaren como actos culturales llanzamientos comerciales yá imponen les sos preferencies de manera tala que la diversidá creativo desapaez. El preciu fixu nos llibros intenta caltener esa diversidá creativo, faciendo que puedan aguantar llibreros y editores pequeños ya independientes.

En Francia lleven venticinco años col preciu únicu. Como se pue reducir nun 5 % el preciu que marca la editorial gracies a tarxetes de fidelidá, los llibros más caros viéndense sobre too nes grandes superficies. Además, agora los editores agoten les esistencies nos almacenes pa poder cambiar el preciu del llibru tres un plazu determináu, lo que trai la desapaición de munchos títulos del mercáu. Pero’l preciu únicu nun fizo que dexaren de desapaecer llibreríes pequeñes. Pa lo que si valió foi pa caltener la diversidá editorial, al facer que pudieren salir alantre autores que nun vendíen muncho.

El que los llibros tean subiendo de preciu tien munchu peligru, porque los llibros son dalgo de lo que se pue prescindir, asina que si suben muncho nun se van vender, porque puen prestase o sacase d’una biblioteca, o fotocopiase, o escanealu y colgalu na rede. Entós va pasar lo mesmo que colos CDs, que crearon un monstruu, inflando los precios y faciendo que milenta fartones vivan del trabayu ayenu, asina qu’en cuantes entama a fastidiáse-yos el choyu hai qu’echa-yos un gabitu porque ye una industria mui poderoso y faen palanca.

Porque’l de los drechos d’autor ye un mercáu domináu por entidaes de xestión (SGAE, CEDRO…) que se queden tamién colo de los que nun son afiliaos, nun claru exemplu d’apropiación indebida frente al que la llei nun fai nada.

Anguaño’l mundu ye un gran mercáu, onde se protexe los intereses de los más poderosos. Pero nun hai qu’escaecer que los grandes llogros culturales de los dos últimos sieglos siempre s’algamaron a la contra de lo que dictaba’l mercáu, sofitando la independencia creativo perriba de too.

A ver cuanto tardamos en cayer na cuenta.