Escucando estrelles

Según el cantar, con lletra de León Delestal, la mina de La Camocha dicíen que diba baxo’l mar. Nunca foi asina, y seique’l mitu surdiere porque dalguna galería tenía más distancia (pero non na mesma dirección) que la qu’había ente la mina y el mar. N’Asturies hubo una mina que sí se metía baxo’l mar, que foi la d’Arnao, de la que yá falamos otra vegada, y que precisamente dexó d’esplotase cuando s’inundó.

Enantes de nada vamos repasar un poco d’historia. Los tres hermanos (Víctor, Secundino y Constantino) de la familia Fernández-Felgueroso González, propietarios de la sociedá Felgueroso Hermanos solicitaron nel añu 1900 poder esplotar el carbón qu’hubiere na zona ente les parroquies de Güerces y Vega. El primer sondéu ficiéronlu n’agostu del añu siguiente, atopando carbón de bona calidá. Tres dellos intentos (ún dellos dio orixe al popular mecheru de Caldones, del que vamos falar otru día) que se van sucediendo nos años, ensin acabar d’atopar sitiu y perres, en xunu del añu 1930 entamen colo que diba ser el Pozu Nuevu númberu 1, y como al llau había un prau con una vaca mocha, d’ehí cuenten que salió’l nome de Camocha. Nel añu 1932 abrieron lo que diba ser el Pozu Nuevu númberu 2 a 115 metros del otru. Los entamos fueron duros (tuvieron paraos por nun tener perres más d’un añu) hasta que nel añu 1935 atoparon la veta de carbón principal y pudieron vender el primer cargamentu de carbón (a la Panadería Zarracina).

Según la prensa de la época, la xente de Xixón, que siempre foi mui dao a les chances, dicía que nun yera carbón del pozu, que lo traxeren de fuera.

Cuando la guerra civil pararon l’actividá, que retomaron nel añu 40, yá baxo les condiciones de la dictadura, pa la que’l carbón yera un asuntu estratéxicu, poro los mineros taben militarizaos y nun podíen camudar de trabayu porque diba por ellos la guardia civil.

Nel añu 1945 la sociedá Felgueroso Hermanos vendió la empresa al gallegu Bancu Pastor, pasando tres años dempués a ser propiedá de la Sociedá Minero Siderúrxica de Ponferrada (MSP) hasta l’añu 1993, nel que la compró la familia lleonesa García Brugos.

La sociedá volvió a facese famosa nel añu 2001, cuando se demostró qu’había camiones que subíen cargaos de carbón foriato pa pesalo na mina y camuflalo como de producción propio, pa subir los cupos de les ayudes europees , única razón pola que’l pozu siguía abiertu, porque anque tien munchu carbón, les capes son males y sal mui caro sacalo.

El viaxe d’aquellos camiones fizo realidá les pallabres de los más escépticos, pel añu 35, cuando negaben el primer camión cargáu de carbón: esti carbón nun ye d’equí, de xuro que ye comprao. La empresa siempre alegó qu’esi carbón yera pa les cocines (sic), pero nun devolvió nengún céntimu de los más de 90 millones d’euros recibíos, alegando que les ayudes nun teníen nada que ver cola producción.

Los últimos años, col ex-conceyeru d’industria socialista Carlos Zapico (Petromocho ¿alcordáisvos?) d’apoderáu, la mina convertióse nun abellugu de sindicalistes y compañeros de partíu, que tan en nómina atechaos nes oficines a la espera del cantáu pasu a la pública Hunosa.

Ayeri entamaben los ocho mineros del comité d’empresa un encierru nuna galería de la mina, sofitaos por una güelga de los 160 mineros del pozu, pa reclamar los salarios que nun son a cobrar a la empresa. Y la empresa déxalos facer, hasta-yos va poner les coses fáciles, sabiendo que pue ser la meyor manera de cobrar les sovenciones conxelaes.

Ye una táctica más vieyo que la tos, y que tamién ta usando anguaño l’empresariu Vitorino Alonso: facer que los mineros se muevan, pa que-yos paguen a ellos.

Déxovos equí un enllaz guapu de verdá:

http://www.elmundo.es/nuevaeconomia/2002/114/1013420663.html