Escucando estrelles

Ye un modelu que pue aplicase a munches otres estayes.

Nos pueblos, a la hora de pasar la gorra pa facer les fiestes y romeríes del pueblu, les comisiones de festexos suelen dir a picar a los que tienen negocios y a los que más aparenten, por eso de nun ser menos que los demás. Y si se porten bien y suelten perres abondes, sáquenlos nos cartelos o dan-yos una mención como paisanu del añu, fabón d’oru, o dalgo asemeyao. Ye un modelu que sabe usar perbién la Fundación Príncipe d’Asturies: yá que te dimos un premiu, fai dalgo por nós (regalanos un muséu, abre una sede, fai una peli equí…), o dámoste un premiu si nos saques en dalgún llau.

Nel patronatu de lo que pomposamente llamen Laboral Centro d’Arte y Creación Industrial, Ciudá de la Cultura, y nun se cuantes coses más, atopamos nomes interesantes.

El presidente ye un home de Sedes, la constructora del Principáu. El vicepresidente ye Jorgito Fernández León, la mandrecha de Tini pa controlar l’aparatu represivu-propagandísticu, y como vicepresidente segundu ta FCC Construcción. Dempués tenemos una retafila de vocales patronos, ente los que destaquen l’Ayuntamientu de Xixón, l’Autoridá Portuaria (¿?), CaxAstur, Constructora San José, Acciona, Dragados, HC Enerxía, Fundación Telefónica y dalgún nome pa dar prestixu como ye un Xuan Cueto Alas mui veníu a menos.

Llama l’atención ¿nun vos paez? Toles empreses que metieron la cuchara nes obres faraóniques de Tini I l’Alcaldón ponen el güevu pa sacar alantre esi monstru de Frankestein. Nun vos escaezáis que, de los más de 80 millones d’euros que manexa de presupuestu, el Principáu namás pon la metá.

Y si devuelven tantes perres, ye porque lo del Metrotrén, lo del Muselón, lo de… da pa muncho.