La falta de racionalidá na nuestra política enerxético
Dientro d’unes xornaes de l’Autoridá Portuaria de Xixón que se tan celebrando esta selmana, vino a dar una charla Francisco Macía Tomás, subdireutor xeneral de Planificación Enerxética del Ministeriu d’Industria, y la verdá ye que dixo dalguna cosa interesante.
A la entruga de si tien sentíu concentrar producción eléctrica n’Asturies, que yá tien escedentes, envede facelo en zones deficitaries, diz que nun se va pronunciar, más que nada porque ye’l promotor el que toma les decisiones, y el so departamentu namás mira que cumplan les condiciones. Y diz una verdá de Perogrullo: les centrales hai que poneles onde faen falta, y lo deseable ye que seya lo más averao posible al puntu de consumu, p’aforrar n’infraestructures y en perda d’enerxía nel transporte. Y pon como exemplu Murcia, onde tres promotores van facer en Cartaxena ciclos combinaos con una capacidá de 3.200 megavatios, habiendo una capacidá de transporte de 2.400 Mw que namás pue aumentase hasta 2.800.
Francisco Macía Tomás amosó ser educáu, al plantear n’Asturies los problemes que tienen en Murcia. Maxinamos que cuando vaya ellí va contar los problemes qu’hai n’Asturies, anque nun nos vamos enterar.
Asturies produz anguaño’l doble de la enerxía que gasta, y ensin embargu tan falando de duplicar la capacidá eléctrica con seis centrales de gas (2 en Soto de Ribera, 2 en Nubleu, 1 en La Perea y 1 nel Musel) que tengan la mesma capacidá que tienen anguaño (2.600 Mw) les centrales de carbón. A eso hai qu’amesta-y la nueva central de carbón d’Aboño, con una capacidá de 800 Mw más.
Van mantenese tovía unos años les centrales de carbón, ensin gastar un duru nelles, anque teníen que tar cerraes cuantayá.
Esti aumentu na capacidá va trayer de la mano un espoxigue de molinos eólicos, porque tien qu’haber un porcentax d’enerxía llimpio. Anguaño hai instalaos 7, y hai proyectos pa mangar otros 30 nel occidente astur (qué más da que seya reserva de la biosfera). Y por supuestu, esto lleva tamién a facer nueves llinies d’alta tensión, qu’agora sólo puen sacar 1.200 Mw, contra la oposición de toles zones per onde van pasar.
La realidá ye qu’Asturies ye, agora mesmo, la rexón española que más CO2 emitimos por habitante, triplicando la media europea, y como cada vez llueve menos y se llimpia peor la mierda, va aumentar muncho la mortalidá por razones ambientales, onde ya somos primeros de tol país según l'INE. Tamién lo somos nel númberu d'alerxes, y tamién tamos nos primeros puestos n’enfermos respiratorios, cardiovasculares y tumorales.
Cuando tol plan que tien montáu esti gobiernín salga alantre, vamos salinos per primer vez nuna estadística, direutos al llibru Guinnes nuna montonera estayes.
Esbilla
del.icio.us
Nací col don de la risa y cola intuición de que’l mundu taba llocu.
Y esi foi tol mio patrimoniu.
Dende la mi profunda ignorancia en esti tema ( bueno, algo sé, formáronme en tecnoloxía, y una vez hasta fui a una conferencia del entonces Director General de Asuntos Energéticos del Ministerio de Industria y Energía, o algo así, era, el paisanu), permitirasme que te haga una pregunta.... No ye con trucu, de verdá, ye que no lo sé y tendría que enterame por alguien que supiera más que yo del tema (cosa que pienso hacer con algún compañeru sociata especialista en el tema tan pronto como pueda, curiosity killed the cat):
¿ Por qué crees tú que los inversores gasten perres en construir centrales de producción eléctrica en zonas donde hay excedentes de potencia a pesar de que eso les supone durante su uso pérdidas de energía en el transporte ?
Haxa salú
Sergio | 30-09-2007 - 10:58:47 GMT 1 #
Anque nun soi nengún espertu, voi date la mio opinión.
Nesti casu ye política, namás, y una visión a mui cortu plazu de la economía: sólo la construcción yá ye rentable en términos económicos y llaborales, lo que pase dempués que lo arreglen otros.
Pa rebañar los últimos años d’ayudes europees inventaron un proyectu grandón: l’ampliación a lo bestia del Musel, una obra innecesaria de toes toes a la vista del volume que mueve anguaño polo mal xestionáu que ta (mira por cierto quien ta nel conseyu) y que pue traer munches consecuencies a nivel medioambiental que diremos viendo col tiempu.
Ye una obra que va dar trabayu a muncha xente, unos diez años o asina, anque van estiralo tolo que puedan, porque los retrasos y males planificaciones a la fin son mas obra y más perres pal bolsu de les empreses que lo faen.
Como la obra nun se xustifica ensin tráficu, y aprovechando que diben poner delles centrales de ciclos combinaos, deciden poner una regasificadora. Nun primer momentu dicen-yos en Madrid que si tan chumaos, que cola de Ferrol y Bilbao hai regasificadores abondes, que nun hai xustificación nenguna pa facer otra, etc… (pues consultar les hemeroteques) A la fin, acaben dándola de pasu, un poco a la trágala, porque si nun s’aprobaba entós, yá nun se diba facer.
Regalase la concesión a Enagás, ensin concursu nin nada. Y agora hai que facer llinies d’alta tensión, estrozando pa siempre’l paisaxe per onde pasen.
Mira la rellación d’empreses que tan xintando d’esa tarta. Compárala coles que salen nel famosu llibru “Construyendo Asturias” y coles del patronatu de La Llaboral Ciudá de la Cultura. Mira la evolución de les acciones de Duro Felguera, mira quien ta nel conseyu. Fai un diagrama, si eso t'ayuda.
El Musel tamién trai de la mano la famosa Zalia (Zona d’Actividaes Loxístiques ya Industriales d’Asturies), una barbaridá ermo pa la que diben espropiar una montonera tarrén. Los vecinos, como equí nun-yos facíen nin puñeteru casu, fueron a Bruseles y dieron-yos la razón de que les coses nun se puen facer asina, ensin facer estudiu d’impactu ambiental y ensin cumplir los plazos nin tola normativa. Como pasaba d’un númberu de metros yera dalgo obligatorio, y entós la UE dixo que si siguíen alantre con ello diben conxelar toles ayudes económiques (adiós entós a la obra del Musel, ente otres coses). Pa que nun-yos quitaren les perres, ficieron un proyectu más pequeñu, colo que nun tienen problema de momentu. Pa más alantre, en cuantes s’acaben les ayudes van facelo como-yos pete, porque entós la UE nun va poder quita-yos nada. Equí fago de pitonisu, andando’l tiempu vas velo.
Una vez falemos de too esto con un altu cargu d’un Ministeriu en Madrid y, reconociéndonos que too yera una barbaridá, vino a dicinos qu’un perru enxamás come a otru perru.
Cuando entrugues, mira bien a quien lo faes. Cola respuesta que te de vas saber si te pues fiar o non pal futuru. :-)
Salú.
Ateyavana | 30-09-2007 - 13:03:36 GMT 1 #
A ver, Sergio, ayeri escaecióseme contate qu’equí damos toles facilidaes pa poner actividaes molestes y contaminantes que n’otres rexones tan prohibíes porque nun les quieren de nenguna manera. El principiu que siguen equí ye que cualquier cosa que pongan va contaminar menos que lo qu’había enantes, lo que-yos da bula pa que fagan cuasi cualquier cosa, piensen.
Asina llegamos tamién a la superincineradora de Serín.
Seique por eso, equí ta derogáu'l Reglamentu d’Actividaes Molestes, Insalubres, Nocives y Peligroses (RAMINP), mientres que n’otros llaos non mui llonxanos sigue vixente.
Salú.
Ateyavana | 01-10-2007 - 16:23:16 GMT 1 #
Yo voy a decir una burrada, medio para provocar a ver si animamos este blog, que está muy guapu, medio de verdad.
En una región, como Asturias, que perdió miles de empleos en la minería, miles de empleos en la siderurgia, y que durante muchos años ha tenido dificultades bastante grandes para crear empleo para sus gentes, yo digo que acepto cualquier cosa que me ofrezcan que genere medio puesto de trabajo. Cualquiera. Nociva, peligrosa, insalubre, molesta, incómoda, de les que no le "molan" a nadie....
¿ Qué te parece como posición ?
Haxa salú
Sergio | 02-10-2007 - 14:50:50 GMT 1 #
Mui bones, Sergio. Voi entamar con otra burrada: nun entiendo cómo nun medres más. Das el perfil perfeutu d’home de partíu, nótase que tienes metíu dientro’l programa. ;-)
Nuna rexón como ésta, que perdió tantísimos miles d’emplegos por milenta llaos (tu fales de minería y siderurxa, pero yo tamién te saco’l sector naval, l'agrario-ganaderu, el pesqueru y tolos demás que quieras) a cambiu de NADA, del pan pa güei y fame pa mañana, y cuatro carreterones, NUN PODEMOS HIPOTECAR EL NUESTRU FUTURU porque nos dean cuatro puestinos de trabayu. Si ye asina, prefiero morrer de fame, que si les coses van mal polo menos voi poder tener una güerta, comer curioso y respirar puro.
Anque la regasificadora pueda crear a mui curtiu plazu quinientos o mil puestos de trabayu, cuando entame a furrular, van ser menos de cincuenta. ¿Sabes tu cuantes empreses asturianes, que nun echen mierda nin molesten a naide puen dar un saltu de calidá cola cuarta parte de toles perres que van marafundiar nesos planes faraónicos de los que namás se beneficien empreses foriates? ¿Cuántos puestos de trabayu crea una llinia d’alta tensión que vas tener fadiándote’l paisax tola vida? ¿Cuántos puestos de trabayu hai nun parque eólicu cola metá de los molinos ensin furrular? ¿Qué pesa más na to balanza, que na mía ta nidio?
Alcuérdome cuando xente del to partíu pensó que con Javier Fernández les coses diben a ser distintes. Conozo dalguna xente nel PPSOE y daquella falaben d’un cambiu, d’una apuesta poles nueves tecnoloxíes ¿alcuérdeste?... A lo meyor daquella tovía tábemos a tiempu y podíamos apostar de verdá por convertinos nuna Irlanda d’andar per casa. Pero siguimos igual, o seique peor porque queda menos tiempu, y regalamos un local a Informática El Corte Inglés, sólo por dicir que tan equí, lo mesmo que lu vamos a regalar a National Geographic, y menos mal que Bill Gatos nun se dexó, que si non…
Delles vegaes cuido que tenemos lo que nos merecemos: por burros, por dexaos y por tener xustamente la clas político que nos merecemos.
Haxa salú, ya que nun hai otra cosa.
PD: Siéntolo. Güei pillástime un día malu, tres pasar tol día currando. Recomiéndote, pa que nun te quede mal tastu de boca, que mires la sección de Les Mios Semeyes… si nun te convencen,anque una imaxe val mal que milenta pallabres, polo menos vas allegrar el güeyu con dalguna. ;-)
Ateyavana | 02-10-2007 - 19:57:46 GMT 1 #
Hoy voy mirar les tus semeyes en vez de respondete porque se me ocurren delles coses que dicite, pero prefiero que sea otru compañeru o compañera del partido más preparaos en estos temas el que te conteste, y voy masacrar a nuestros expertos en las materias que abordamos (empleo, reindustrialización, industria, nuevas tecnologías) hasta que te respondan o hasta que tengan que apagar el móvil pa no aguantame. Pero eso mañana, que hoy ye un pocu tarde y dellos tienen guajes pequeños :-)
P.S.: Mi partido se llama Partido Socialista Obrero Español, y sus siglas son PSOE, con una sola P.
Sergio | 02-10-2007 - 20:28:12 GMT 1 #