Escucando estrelles

Según un informe del Deutsche Bank tituláu España 2020, con un espoxigue económicu sosteníu de namás el 2 % podemos superar a Italia o Alemaña dientro de 15 años. Anguaño, la renta per cápita n’España ye de 27.000 euros, por 31.000 d’Alemaña. Nesa estadística tan los ingresos de les caxeres de supermercaos y los de Paco’l Poceru o los del presidente d’Endesa, qu’esti añu va meter nel bolsu, ente sueldu, primes y plusvalíes, unos 13 milloninos d’euros.

Según esti estudiu, la fortaleza qu’algamó la economía española dende qu’entrare na UE nel añu 1986 débese a les ayudes recibíes, al boom inmobiliariu, al fuerte déficit esterior por un consumu ansiosu y una producción propio modesto, y al superávit fiscal, con unes cuentes saniaes.

Pero tamién diz que l’espíritu innovaor y emprendeor de los españoles ye demasiao floxu pa mantener la bonanza económico. 

L’Índiz d’Innovación 2006 que tamién acaba de facer públicu la UE, pon a España detrás d’Italia y Chequia, como los países con menos sentíu emprendeor y menos vocación de preparase y dir aprendiendo a lo llargo de la vida. Mirando’l númberu de patentes, por caúna española hai diez franceses, que ta asitiaos na media de la UE. Los italianos patenten 5 veces más idees que los españolinos, y los que se salen son los finlandeses, que patenten 100 veces más coses.

España ta, amás, na cola en estudios según l’informe PISA pa los países desarrollaos, sólo siguía por Portugal ya Italia, mui por detrás de munchos países del este.

Asina qu’un de los principales problemes de la economía que vien ta nel probe nivel d’enseñanza y preparación que tenemos.

Hai tres coses básiques nuna sociedá: la xusticia, la sanidá y la educación. Como son coses incómodes la primera, anque cada vez ande más de la mano del poder, y les otres dos necesiten grandes inversiones ensin sacar un beneficiu al momentu, anguaño tan un poco escaecíes, porque mola más gastalo en carreteres y puertos, que puen enseñase nuna semeya y sacase dempués nel “Construyendo Asturias”. Seique por eso de que pa dalgunos ye marafundiar perres, son dos vieyes reivindicaciones de la izquierda, cuando tovía l’había.

Nestos tiempos importen más otres coses, asina que, envede mimar la educación vamos dexar que los rapazos pasen cursu con cuatro suspensos, porque importa más la publicidá nes cifres educatives que la educación de verdá.