Sobre Escrito Na Ceniza, de Xose Nel Riesgo
Xose Nel Riesgo ye autor de tres noveles. Cola primera, El cai nunca duerme (1989), regalónos una novela negra mui sólida con dalgún fallu de primerizu. Cola segunda, Parque temáticu (2005), una parodia de los alcaldes de pueblu qu’entama mui bien pero va perdiendo puxu. La tercera ye ésta, Escrito na ceniza, y ye d’esti mesmu añu.
Entama asina:
Por fin quedara solu. Pela primer vez dende qu’ingresara nel hospital recordaba, internándose nos desiertos enllabanaos de la memoria del camín andáu, qu’agora se dibuxaba nes blanques parees del cuartu.
Una puñalada insensible caltrió-y el recuerdu, revelándo-y que fuera un home valiente hasta nes coses y los detalles a los que, nel momentu mesmu de vivilos, nun-yos diera la menor importancia. Los árboles esmochaos del iviernu perenne de la vieyera trazaben una llende, desconocida, nel paisaxe de l’alcordanza. Una frontera que nun podía arrodiar nin tampoco nun tenía vuelta p’atrás. Una llinia zarrada de cañes que, por embargu, tenía una cande tresparencia, el misteriu d’un encantu, dexando aldovinar un espaciu más p’alló de los cantiles de la memoria.
L’entamu clasicu yá nos da’l tonu del llibru: un home nun hospital colos sos recuerdos.
Sigue, por exemplu, asina:
Al volver pa casa Nela foi tocando les piedres ensin saber que, en faciéndolo, taba sanando tristures de los tiempos devolviendo-yos l’alendar a les sobrepuertes d’aquelles queríes cases, que volvíen mugar rises de folixa con ecos de fragües de fierros trabayaos a güelpes d’Hestoria, suañada otra vuelta dende’l mangu mesmu de la Memoria de los pueblos.
Aquella nueche Nela supo d’au venía.
De la pelleya de los regodones del ríu. De les raíces de la escanda y de les fabes. De les flores de les castañales. Del tastu del pan. Del arrecendor de les mazanes coyíes de la mano. Del mofu de los teyaos. De los tueros de los carvayos. Del Beleñu y del Arfueyu. Del Mexacán y del Lloréu. Del Persil de les Bruxes y de la Xaranzana. De la cazumbre del Texu.
Adela’l Ferreru tien trenta años. Venti de vida y diez de tortura, los diez que lleva casada con Rufu la Venta, el mayor borrachu del mundu conocíu. Nun pasó un día dende que salieron per primer y última vegada xuntos de la ilesia que nun llegara aquel home a casa col celebru esllavazáu y con ganes de calca-y enantes de tirase nel catre.
Y va acabar, tres enseñanos delles estampes esllavazaes de la vida d’un pueblu que puen facer de metáfora de la historia d’Asturies, asina:
Tuvimos de palique, dándola ensin güesu, como a elli-y prestaba dicir, tola nueche. Cuando me despidí d’elli pela mañana del otru día, los sos güeyos azules como’l cielu yá nun teníen la fuercia d’enantes. Paecíen les augües aparaes d’un embalse apináu hasta los bordes. Díxome un “hasta otru momentu” alzando una mano engurriada polos sos setenta y cinco años de vida.
Yo barrunté que la so voz sonaba a un hasta siempres.
Foi la última vez que lu vi colos güeyos abiertos.
Al otru día marchó d’esti mundu, cargáu de memoria, cola sabencia esperta de cientos y cientos de miles de kilómetros de rectu camín, que nunca nun torció. Sélo bien, porque asina me lo enseñó.
Llámome Xuan Pravia, y soi’l fíu de Dolfo.
Y acabamos de zarrar un círculu.
Esbilla
del.icio.us
Nací col don de la risa y cola intuición de que’l mundu taba llocu.
Y esi foi tol mio patrimoniu.
Ye un llibru bien prestosu.
Pa mi, muncho meyor que El cai nunca duerme (nun me presta nada como describe'l mundu de les drogues, pero esto ye bien personal) y Parque temáticu. Atopéi dalgún fallu (ye q lleilu pa clase y cuando quiero vuélvome mui crítica con too). Nun dexa de ser la hestoria reciente d'Asturies. Una hestoria de vides, de sentimientos, d'anéudotes,...
Y tou un homenaxe al pá.
¿Nun ye preciosa la hestoria de los gaiteros durante la guerra? Tan dándome ganes de facer una entrada con ella...
Laura | 05-10-2007 - 15:39:09 GMT 1 #
A min tamién me paez un llibru meyor que El Cai Nunca Duerme, más que nada porque pasó’l tiempu y agora Xose Nel escribe muncho meyor. Daquella yera un rapazu de venticinco años, que tuvo la valentía d’escribir una novela sobre lo que taba viendo pasar delantre la ventana, tolos díes, y cayeron-y milenta palos por ello.
Y si, yo tamién creo que tien fallos, pa min el peor ye que ta un poco eslabazada, dalgunes escenes déxente colgáu, cuidando cómo podríen siguir, pero ye porque son bones y quies que sigan… si fueren males nun m’alcordaría d’elles.
Y si, la historia de los gaiteros ye mui guapa... tómolo como promesa, asina qu'a ver cuando te pones a ello...
Ateyavana | 07-10-2007 - 21:30:49 GMT 1 #
Pues llevo un pa de díes relleendola, pero si cito tolo que me presta... creo que me denuncien por plaxiu.
Pero pondreme a ello, prometío queda.
Laura | 07-10-2007 - 22:10:30 GMT 1 #
El cai nunca duerme foi´l primer llibru que lleí na mio vida n´asturianu, amás desendolcase n´Avilés, que ye la mio ciudá, y foi perprestosu metete nuna hestoria que pasaba nes cais poles que medrasti.
Hai daqué sentimental que fai qu´esi llibru te nun sitiu especial na mio biblioteca.
trasgu | 10-10-2007 - 15:07:31 GMT 1 #
Mui bones, Trasgu. Pa min tamién ye un especial por ser de los primeros que lleí y faceme ver que se podíen escribir otres coses n'asturiano.
Salú.
Ateyavana | 11-10-2007 - 07:35:21 GMT 1 #
Saludos. Un bon amigu coméntame que faláis equí de "Escritu na ceniza" y, de pasu, de "El cai nunca duerme", y diome por venir facevos una visitina pa, a lo primero, davos les gracies pol vuesu interés y los vuesos comentarios, y de segundes, decivos que taré encantáu d'esclariavos toles duldes o custiones que vos pete plantegame. Con tola sinceridá, y calteniendo'l vuesu anonimatu, que respeto no que puea valir.
Nesta primer entrada namás que me prestaría comentavos que cadún de los mios llibros nun tien (cásique) nada que ver colos demás; respuenden a momentos bien estremaos de la mio vida y estaos d'ánimu a los que namás que xune un ciertu posu de tristura. Eso sí, lo que naide nun podrá negame ye que, hasta la fecha, ensayé "palos" bien diferentes a la hora de contar histories. Porque, ensin falsa modestia, de lo primero que soi cosciente ye del fechu de qu'entá queda muncho que deprender, y que la freba narradora cébase con llectura y práutica d'escribir.
"El cai..." ye tamién pa min, trasgu, un llibru especial: lo único que quixe al escribilu foi facer un llibrín pa lleer nel autobús, na playa, en tren... ello ye, pa pasar un ratadín ensin más aquello. Y la verdá ye que foi xulgáu, sentenciáu y colgáu embaxo d'acusaciones tan graves como "prostituir la llingua asturiana", o "importar escenarios inesistentes n'Asturies" (falando de la novela negra yanqui). Y ya véis lo que llovió de magar entós: esi escenariu "imposible" garró una actualidá espantible cola escabechina del 11-M,per aciu de la dinamita de los dos hampones de poca monta avilesinos. Enfin, que vivir pa ver.
En cuantes a "Escrito na ceniza", agradézote, Laura, el comentariu que faes al respeutive del homenaxe a mio padre, porque yera eso, precisamente lo que pretendía. Como curiosidá direvos que tanto esta novela como "parque Temáticu" son dos reaiciones a una traxedia familiar cola muerte -que nun esperaba- de mio pa y un albuertu...tou ello EL MESMU DÍA. "Parque Temáticu" escribilo como terapia d'humor pa la mio compañera del alma. "Escritu" foi un axuste de cuentes col dolor.
Agora toi notros proyeutos nos que trabayo col únicu envís de pasalo bien y rescatar delles histories de la nuesa Historia coleutiva. Pero d'estes quiero mas nun cuntar nada hasta que nun vean la imprenta.
Insisto en que toi abiertu a tolo que me queráis entrugar.
Cola mio reconocencia pa col vuesu compromisu cola llingua y la cultura asturianes, mándovos el saludu más candial.
Xosé Nel Riesgo | 17-10-2007 - 13:22:24 GMT 1 #
Hostia, ye un honor, de verdá, atopate per equí. Y aprovechando la mano que tiendes, voi garrátela.
Yo, que soi un poco más vieyu que los otros dos, alcuérdome de cuando salió El Cai nunca duerme, y tamién m’alcuerdo de dalguna de les hosties lliteraries que te dieron naquella polémica, absurda por demás… A min, el posu que me queda como llector ye que la novela salió seique nun momentu non mui afayadizu. ¿Nun te paez que la to propuesta (y la de dalgún otru) adelantóse un poco al so tiempu? Porque si saliere agora nun diba pasar nada, paezme. ¿Cortóte too aquello a la hora d’escribir nesti tiempu?
Quedo ablucáu colo que cuentes de les dos traxedies nel mesmu día. De xuro qu’eso da-y otru sentíu a les dos obres. ¿Escribístiles a la vez?
Y nada, yo toi con munches ganes de lleer “Cazadores de Ciudá”. ;-)
Salú.
Ateyavana | 17-10-2007 - 16:21:07 GMT 1 #
Gracies polo del honor. Per partes:
Nun me paez que s'adelantara la propuesta de la novela negra que fixéramos entós dellos amigos, porque la polémica, daveres, anició nun aquello de guerra total estantina ente dos mundos separtaos per un fondu bocarachón. Cortar, lo que se diz cortar, nun me tarazó nada, si acasu valiome pa ver les coses (toes, públiques y privaes) con un mayor...allonxamientu, diría yo.
En cuantes a la pregunta que tien que ver con aquella traxedia (de la que tamién deprendí muncho, sobre tou pa medime la capacidá de tener por ello), direte que sí: entameles al tiempu, masque llevome mas xera "Escritu" y acabela muncho dempués (namás que-y metía mano cuando, lliteralmente, podía pa con ello).
Y pa finar, de momentu, claro, ¿d'aonde saques eso de los "cazadores de ciudá"?. Menos mal que nun va ser títulu de la novela, porque sinón tendría de falar cola axencia Pinkerton.... Namás que por tranquilizame, ¿sentístelo en públicu de la mio boca, o díxetelo-dixérontelo en priváu?. Ye qu'alcuérdome que falara dalgo d'ello n'Arribada, na mesa reonda sobre la novela histórica.
Salú, gamberru/a.
Xosé Nel Riesgo | 18-10-2007 - 13:43:04 GMT 1 #
Munches gracies poles respuestes.
Lo del títulu saquélo de la mesa de la novela histórica, n’Arribada, nun te preocupes.
Salú.
Ateyavana | 18-10-2007 - 16:44:20 GMT 1 #
Gracies, pero lo único que me preocupa ye la mio indiscreción pa conmigo mesmu. Anque, pensándolo bien, alcuérdome que lo que conté foi pa responder a un fulanu que nos punxo "ente la espalda y la paré" (que diría Sindo Caleyes) con aquella pregunta a la mesa nel sentíu de qué tábemos escribiendo anguaño... Bien, espero nun defraudate, masque va tardar porque lleva muncho vagar na documentación (el rigor ye obligáu con personaxes históricos) y, d'otra banda, porque nun tengo'l tiempu que quixera pa meteme pa con ello.
Un placer, Ateyavana. Si dalún día m'atopes perende y te peta, falamos personalmente. Si quies seguir nel anonimatu, por min ta bien igual. Ya te dixe que lo respeto.
Respetu, precisamente, ye ún de los elementos que carecemos nel asturianismu, por disgracia, ¿nun te paez?.
Bon día, y bon llabor.
Xosé Nel Riesgo | 19-10-2007 - 09:21:32 GMT 1 #
Gracies, pero lo único que me preocupa ye la mio indiscreción pa conmigo mesmu. Anque, pensándolo bien, alcuérdome que lo que conté foi pa responder a un fulanu que nos punxo "ente la espalda y la paré" (que diría Sindo Caleyes) con aquella pregunta a la mesa nel sentíu de qué tábemos escribiendo anguaño... Bien, espero nun defraudate, masque va tardar porque lleva muncho vagar na documentación (el rigor ye obligáu con personaxes históricos) y, d'otra banda, porque nun tengo'l tiempu que quixera pa meteme pa con ello.
Un placer, Ateyavana. Si dalgún día m'atopes perende y te peta, falamos personalmente. Si quies seguir nel anonimatu, por min ta bien igual. Ya te dixe que lo respeto.
Respetu, precisamente, ye ún de los elementos que carecemos nel asturianismu, por disgracia, ¿nun te paez?.
Bon día, y bon llabor.
Xosé Nel Riesgo | 19-10-2007 - 09:22:16 GMT 1 #
Tamién presta la espera, si la llectura dempués ye bona. ;-)
Nun te preocupes, que si dalgún día coincidimos voi presentame.
Y si, toi contigo en que’l respetu ye una de les coses que más adolez l’asturianismu en toles sos estayes, pero ye dalgo que tien qu’entamar por ún mesmu.
Gracies a ti.
Salú.
Ateyavana | 19-10-2007 - 16:59:45 GMT 1 #