El quesu de Gamonéu va tener denominación d'orixe
Dientro de seis meses, en cuantes pase’l periodu d’información pública, el quesu gamonéu va pasar direutamente al rexistru de marques con Denominación d’Orixe Protexía de la UE.
La UE reconoz dos variantes: la del puertu y la del valle, y obliga a que se siga ellaborando na zona xeográfica que reconoz la denominación, Onís y Cangas. La variedá del valle faise tol añu, mientres que la variedá del puertu sólo se fai nes cabañes de los puertos ente xunu y setiembre. A partir del añu qu’entra van tar etiquetaos.
Esti branu tuvi falando con dalgún pastor de Cuadonga y quexábense de que se viende poco, anguaño ta a 33 euros el kilu, y tan falando de ponelo a 40 pal añu que vien (anque, como dicía ún: si nun hai pa 33 nun va haber pa 40). Tamién nos contó que namás quedaben cuatro vieyos que lo facíen y que, por muncho que falaben de da-yos ayudes, siguíen pagando 1000 euros poles cabañes y diez quesos (ónde acabarán esos quesos, entrúgome yo) al ayuntamientu.
Tamién contaben que cuasi cada añu subía’l Presidente Vicente y dellos conseyeros a velos y sacase la foto. Y que lo que notaben ye que, les soluciones diben allargándose nel tiempu, pero que cada añu había más xente nel séquitu.
Y qu’a toos-yos gustaba muncho, pero que cuasi nengún compraba.
Esbilla
del.icio.us
Nací col don de la risa y cola intuición de que’l mundu taba llocu.
Y esi foi tol mio patrimoniu.
Nun pueu date una visión amplia de lo que foi l´Arribada, avereime namás un día ya quedei un pouco, nun sei cumo dicilo...Falaron de Mitoloxía, cumo tema contemporaniu na nuesa lliteratura(you nun entendí mui bien esti planteamientu, nun me parez un tema que seya contemporaniu) ya nada, la xenti nun s´estendeu na mesa ya los que tabamos elli tampouco. Esi dia foi un pouco ensin más. De todas formas la pouca acoyida vien dada pola pouca publicidá que-y dieron (como siempres) Nun sei, a mi parezme una cousa importantísima pa la nuesa llingua, toos (o casi toos) los autores falando ente outras cousas del estau de la lliteratura n´asturianu. Esto pasa n´outru llau ya sedría un fecho relevante (imaxina tolos autores catalanes reuníos nunas xornadas, nun tien puntu comparativu, pero bono) equi pasou ya la inmensa mayoría nun supu que fora eso de L´Arribada. A min parezme abondo triste. Pero que-y vamos faer...asina tamos nesti llugar nuesu.
(perdona polas faltas, sou relativamente nueva nesto)
leticia | 11-10-2007 - 11:26:58 GMT 1 #
(si dalguién quier siguir el filu d’esta charra, va tener que dir a:
http://lamiradamoyada.nireblog.com/post/2007/10/07/et-in-arcadia-ego
que ye un blog bien prestosu, y amás ye onde entamó esto.
(de nada)
Ateyavana | 11-10-2007 - 12:28:28 GMT 1 #
Ía bien duru pensar que nun se toman en seriu eventos desti calibre. Ía bien "triste" que la gran mayoría de xenti desti paraisu natural nueso, pasa de la llingua (o vénla cumo cousa folclórica)( nun ía desconocíu esti datu). Pero puestos a falar, tamién toi mui a la contra de la doble moralidá que hai nestos temas. Munchu falé d´esto colos collacios ya enfándase, pero...parezme que muncha xenti, que tá cola oficialidá del asturianu, llueu a la hora la verdá,cuando tienin que demostralo, nun lu faen ya falan castellán na so vida diaria. Entos esti ía ún gran problema en xeneral pa una llingua. Nun te parez?
leticia | 11-10-2007 - 13:53:18 GMT 1 #
Toi contigo, dafechu, acabes de nomar al que seique esi seya’l gran mal del asturianismu. Si tolos qu’escriben n’asturiano, canten n’asturiano o van a les manifestaciones pol asturiano, lo usaren na so vida diario (nel curro, al facer la compra, al charrar…), otru gallu diba cantanos… Polo menos diba sentise dalguna vegada nes cais de les ciudaes, onde munches vegaes nun se ve, y diba convertise en dalgo visible.
A min dame noxu que seya dalgo tapecío, pero intento frayar esa muria falándolo tolo que puedo y colgando cosuques nesti blog.
Les grandes caminates entamaron siempre dando un pasu, dixo dalguién.
Ateyavana | 11-10-2007 - 14:06:55 GMT 1 #