Soncai System
Hai dalgo nesti discu que fai que nun m’acabe de sonar bien del too, anque seique seya que según voi cumpliendo años l’oyíu musical va aformigándoseme.
De mano, el guapu nome del nuevu proyectu musical de Xune y les palabres coles que nos lu vendieron, fízome tener esperances y que naguare por mercalu. Y la verdá ye que, anque’l resultáu ye guapu y dignu enforma, ún esperaba dalgo más novedoso y seique seya eso lo que me fai quedame con un tastu amargosu tres escuchalu toos estos díes.
Nel camín vamos atopar lletres con mensaxe mui trabayaes y munchu pesu de soníos xamaicanos (ska, dub o reggae) y tempos medios, qu’intenten enmazcarase d’innovadores con unes pingarates de jazz, electrónica y hip-hop. A la fin, dannos un batulax con Manu Chao, The Clash, Dixebra y Fermín Muruguza al fondu. Si pa encima la voz de Xune, amortizada abondo en Dixebra, nun garra nengún matiz nuevu (sacantes Tienes un fusil, que furrula perbién) y les demás voces que lu arropen canten igual que nos sos grupos, tenemos la sensación de ser más de lo mesmo.
Un productu mui dignu y prestosu, ya digo, anque yo esperare otra cosa. ¿Qué vos paeció a vosotros?
Esbilla
del.icio.us
Nací col don de la risa y cola intuición de que’l mundu taba llocu.
Y esi foi tol mio patrimoniu.
A mi préstame muncho, anque seya más de lo mesmo (nesti casu más y meyor). Lo que más, The Real Xixón Sound, cola voz raggamuffin que realmente si ye novedosa na música asturiana, Clashturies y la que tu menciones de Tienes un fusil. Ye lo que tu dices, un productu mui dignu y presentable (si dalgún de fuera entrugase "¿qué pueo escuchar n'asturianu?" grabaría-y esti discu), pero échase de menos una migaya d'optimismu. Lleven tantos años afalándome a la rebelión que echo en falta un poco más de "Cuando n'avientu risca'l iviernu sidre del duernu quiero sorber...". ¡Asturies ye más qu'esta decadencia! Aprovecho pa dicite tamién que me pasa lo mesmo col to blog, yá sé que nesti país hai munches coses poles que llorar y escolforase, pero fíu, yá van munches siguíes ¿nun te paez?. Por favor que nun te paeza mal porque va per delantre que'l to blog paezme tamién de primera.
Besinos
Laura | 28-10-2007 - 23:07:53 GMT 1 #
Tamién ye’l discu que regalo/voi regalar a collacios de fuera, eso nun quita pa que yo esperare otra cosa.
Asturies ye más qu’esta decadencia, pero hai que lluchar pa llevantala. ¿Nun te paez?
Lo del blog ye como lo de la mio tiesta: paezme que nun tien igua. Al intentar actualizalu tolos díes que pueda dirá siendo más allegre cuando tea menos agobiáu, espero, anque reconozo que nun soi l’allegría de la güerta precisamente y que lo que veo al mio llau tampoco ayuda.
Salú.
Ateyavana | 29-10-2007 - 16:48:22 GMT 1 #
Les lletres de lo meyor y más trabayáu que vi na música asturiana, el soníu inmeyorable y variáu caleyando per dellos estilos, presta esi batulax de músiques. Yo nun pueo dexar d´escuchar “The real Xixón sound”, prestosísima lletra, y “Clashasturies”, hip-hop n´asturianu con un ritmu que te fai mover los pies. A min prestóme pola vida.
Lo de "llorar" pa min que vien dau pol fechu de ser asturianista, yo tengo una collacia que me diz que siempre-y tengo que buscar a les coses el so llau negativu, será que dempués de tantos años yá venimos de vuelta...
Salú
trasgu | 29-10-2007 - 17:24:26 GMT 1 #
Trasgu, toi contigo en que les lletres son de lo meyor, pero van pel mesmu camín de les de Dixebra ¿nun te paez? Nun veo cambiu. Yá digo que ye una impresión mía.
D’alcuerdu dafechu col segundu enunciáu. Ye dalgo que traemos de serie.
Salú.
Ateyavana | 30-10-2007 - 17:34:32 GMT 1 #