Escucando estrelles

La psicoloxía ye una ciencia que tien un futuru insospecháu, al nun conocer naide les sos llendes. Na so escalada hai un puntu d’inflexión importante: cuando les teoríes de Lleonor d’Aquitania, long-seller nel tiempu, se ficieron l’harakiri pa dexar sitiu a les aventures incestuoses de les endomorfines. D’entós p’acá los psicólogos anden crecíos. Acabáronse les charres de chigre onde s’algamaba un conocimientu universal ente culín y culín, agora mola más facer un estudiu y xustificalo de manera empírico.

Tres gastar miles de millones n’estudios en delles universidaes, llegaron a la conclusión de que los homes y les muyeres son distintos, cosa que sabe cualquier fíu de vecín. Agora la psicoloxía anda diciendo que’l “homo políticum” tien un desarrollu distintu del cerebru, y que los d’izquierdes tienen el mapa cerebral distintu que’l de los de dereches, qu’ehí si fai falta un bon GPS.

Yo a los políticos siempre-yos vi asemeyaos a los abogaos: ¿faelos asina l’estudiu de la carrera y el desendolcu posterior de la mesma o yá vienen predefiníos de serie y por eso escueyen la profesión?

Lo peor ye qu’enantes la política nun envelenaba’l sistema d’enriba abaxo como fai anguaño. Agora los xueces, la policía, los científicos o los periodistes son d’un llau o del otru, tienen el mapa cerebral d’una manera o d’otra, y hai qu’amosalo de dalguna manera. Asina que pue armase la de coyer por un quítame p’allá esa opinión, con cámares de TV en direutu, bobaes pa dar carnada periodístico toa una selmana, hasta que dalguién arme la siguiente.

Hai demasiada tensión. Y eso que tovía tan los llaboratorios de cada bandu cocinando les estratexes, los futuros escándalos de corrupción que van sacar a la lluz (hai una regla non escrita que diz que siempre salen enantes de les elecciones y depués tápase lo más posible, nun vaya a ser que dalgo chisque) y la manera de machacar la llibertá d’espresión de la otra parte.

Ai, mamina, la que nos espera d’equí a marzu.

Nós intentaremos nun caer nel xuegu namás que cuando nos preste, y vamos falar d’árboles, de lliteratura, de música y de delles coses inútiles más que nos ocupen sitiu na tiesta.

Ye una promesa.